Read Aghem Matìo 12 Bible Online

Matìo 12 - Aghem bible

Matìo 12

¹ A m bùghò ko an Tsuʼntsə̄ u Tə̀dzûu ù li wo, Yɛso n tsəghàa dzì am bəghaa zə asò è li zo ghèe ghê tsə̀təndə̄ghā tə wə̄n to, à n lo mò dzə̀ŋ zaa tsə̀təndə̄ghā tə wə̄n; ghe ŋ kàʼ ndùw saŋ à kəāan pfʉ̄a gho, dzəŋ tə màʼa fə̀ zaā ghee.

²A m bùghò ghî a Falàsîi à li a sô kôʼ ghəa yi gho, ghe mo â Yɛso enyəa, “Kòʼo ko ghəa ghəla tsə̀təndə̄ghā təghà tə̀ ghəŋlo nɛ Tsuʼntsə̄, Mo lâŋ kə̀ dêe yò êzə̀ à.”

³ Yɛso n dzɛ̀ â ghee enyəa, “À fɛ lo tò ghɛ kafə tɔɔŋ kòʼ ghəa ghəla Dɛvìd fə̀ ghəŋlo, aŋghəa dzə̀ŋ fə̀ za tsughu wə̄n ghèe ghê ghì a wə̄n gho a?

⁴Ù fə̀ nyə nduw an ndughu è Kə̀zə̀ e ne ghèe ghê ghì a wə̄n gho a dzə̀m, ghe n nì zə kɔʼ bɛ kə̀ baa kəla à ki ko fɔ̀e tò alezə.

⁵ Ŋkāa ghɛ̀ kaām tɔɔ̄ŋ kòʼ an làŋ kə Musî aŋghəa fɔ̀e tə̀ zaʼā lâŋ kə Tsuʼntsə̄ ko a te, ghe n naam lǒ enyəa ghe kâ làŋ kə̀ bvʉa à?

⁶Ǹ dzâa wô â ghɛ̀ enyəa fəgha kə̀ li kə lo fɛ kə tsəghàtaʼà sə Ndùghù è Kə̀zə̀ e ne.

⁷ Abugho ghɛ̀ mô lo alezuūwkɛlɛ̂ mòʼn zən enyəa, ‘Ǹ tsâʼ se è kwuso zo, Ŋ̀ kâ tsaʼ nyôm təla ghe bughò sâa fughu wo â mùghò.’ Abugho ghɛ̀ mô kûm kwo fəgha kəla ghəa zən moʼn ghè zo, ghɛ̀ mô yò alesāʼ ghùw wəla ù dòʼŋkè bonlo èghəa.

⁸Nu Wɛ ù Ghùw lò Mughu ù Tsuʼntsə̄.”

⁹Yɛso n zə̀ghà tsughu luʼū chi, nùghù nyə̀ ndùw an Ndùghène è Tə̀dzûu è ghee a fughu.

¹⁰Ghùw ù lì n lo a fughu mo kwe kə wə̄n kə m kpùw dòʼò. Ghî a Falàsîi à li ghə m bvʉ̄ â Yɛso a fughu an ndughu enyəa, “À lò kəlâŋ à alebaaŋ ghùw an Tsuʼntsə̄ a?” Ghe sô kəŋo dzì alebàʼn kwu wə̄n.

¹¹ Ù n dzɛ̀ â ghee enyəa, “Ghùw kpɛ̀ʼɛ lò nû am bvʉa zɛʼɛ̄, ù ki ko ndzì fò fə mɔ̀, fia fə ndùw bvʉ̂ nyə tsughu nduw alo kəbùʼ an Tsuʼntsə̄ a, vʉ̀a ù dòʼŋkè ndûw sêe səā kɔʼɔ̄ wo â?

¹²Ndzì kà tsò kɔʼ ŋgàla ghùw! À fi lo enyəa lâŋ kə̀ boo nù enyəa a e ghəəŋ dzɔ̂ zò an Tsuʼntsə̄.”

¹³Yɛso n daŋso dzɛ̀ â tûw vʉ enyəa, “Nə̀ghaan sə ndùw kwe kə̀a kò.” Tûwbʉ̀ghà vʉ̀ n nə̀ghàan sə è nduw, kwe kə wə̄n kə m bɔɔm kòom tùghù dòʼò wò tǒ kə̀ li kən.

¹⁴14 Ghî a Falàsîi à li ghə ŋ kuuwn sə kòom kàʼ ndùw alesaān ghəa ghəla ghe so e wi wə̄n a te.

¹⁵A m bùghò Yɛso kele tsughu enyəa ghe kwâa wə̄n, ù n zə̀ghàa tsughu bəla e te zo, saʼ kə aghì kə̀ n tə̀ŋò nùghù ndùw a bâa wə̄n, ù m baaŋ kɔʼ ghî à dzaŋa gho a te a dzə̀m.

¹⁶Ù ŋ kwɛ̀ɛn tsùghu ghee enyəa kwo ghe lô ghəŋlo enyəa ghùw kele ghee.

¹⁷Yɛso fə̀ ghəa ghən fɛ ghəəŋ tsughu enyəa, e lueso tsughu lâŋ kəla Ghùshʉ̀ghà Èzayà fə̀ dzɛ̂ naŋā enyəa,

¹⁸ “Kòʼô nlò, kɔ̂ɔ faŋa fəlà Ǹ tsɔʼ kɔʼ, kɔ̀ɔ faŋa fəla Ŋ̀ gaʼ fə̀ŋ a zəŋò ghè fò, Ŋ̀ ŋgee tsoʼn nù, bòʼ wə̄n. Ǹ lo dzə̀là tsùghû shʉ̀ghà waŋa a zəŋò wə̄n, ù ke e naʼn nduw ghəa zəla e lô tsəghatsəgha â tùu tò fɛ am mbī.

¹⁹Ù lo ndòʼò pfʉ̀a zee yo dzughu zo ghèe ghê ghì ghò, ù lo buʼn yo bɔ̀ŋ mò, ghùw lo bùʼù zǔuw kòʼò sùghò yǒ dzə̀ è wə̄n an dziī.

²⁰Ù lo tughu yo â dzə̀ an tuw u bvùʼù mə̀ àghì. Ù lo ghəəŋ sùghò yò ghə̀a è li zo e lo alenomso ghee. Ù lo ghəəŋ ko enyə, ghî à lo bughò telè zuūw kɛlɛ̄ tsughu enyəa ghe e ki alemùghù mùghù e tsəghatsəgha zo.

²¹Ghî ghə̀n à dzə̀m am mbī kê naŋa wô ko kə̀ tuw a zəŋò wə̄n, enyəa ghe lo alezə kətuw am bàm e wə̄n.”

²²Ghî à li ghə n daŋso ndùw bùghò â kùʼ kə̀foō kə̀ li ko a vʉ̀a Yɛso, Yɛso m baaŋ kɔʼ wə̄n, tûw vʉ ŋ kàʼ wò ghəa à kə̀a gho, kàʼ ndùw sùghò luʼū tə̀ koʼō to.

²³Dzughu zə zūm aghî à dzə̀m, ghe m bvʉ enyəa, “Wən tə̀m lò to wɛ̀ ù Dɛvìd wə̄n a?”

²⁴ A m bùghò ghî a Falàsîi à zuw tsughu ghəa yi gho, ghe n dzɛ̀ enyəa, “Tûwbʉ̀ghà wən zʉ̀ ù tsoo shùaan sə̌a sùghò an daʼa kə Bɛzɛbùl, də̀ŋ kə zʉ̀ ù biigh wo.”

²⁵Ghəa Yɛso daŋso kele kɔʼ moʼnlò e ghee zo, ù n dzɛ̀ â ghee enyəa, “Naʼ zəla e təmā tsàm aŋ ghùe e ghee, zə n tsùghù è bvʉ. Naʼ è li e yo ŋkāa ndùghù è lì ghe ndzughùun lo an aŋ ghùe e ghee, ghe lo tsughu bvʉ̂a yo.

²⁶Abugho Satàn dzùu səā satàn, ghe fi dzughùu dòʼò nù aŋ ghùe e ghee, fɔ̂e u ghee u lo ênzə̂n to wə e ti lo a?

²⁷Abugho Ǹ shʉ̂aan səā zʉ̀ wò an daʼa kə Bɛzɛbùl, ghî ghɛʼɛ̄ a kuuwn shùaan sə̌a an daʼa kə ndugho ko a? E fi lo enyəa, à kè lò ghî ghɛʼɛ ghe lo saʼā tuw wɛʼɛ wo.

²⁸Abugho e kuūwn lô enyəa, Ň zʉ̀ ù fɛ shùaan sə̌a an Zuʼ tə Kəzə̀, à fi lo enyəa fɔ̂e u Kəzə̀ wə̀ ŋ ghɛ̀ bùghò kwùnlo.

²⁹Ŋkāa ghùw lò ênzə̂n alenyəa ndûw an ndùghù alô ghùw ù kə̀daʼa a, ù bòʼn səa kɔʼ fʉgha u wə̄n mò ù kà wə̄n bûʼ kɔ̀n nàŋa tsughu dzə a, sěe ù sò lô alefuūw sə fʉgha u ghûw vʉ̀ à?

³⁰ Ghùw wəla ù ti yo ghàʼ à wə̄n, à lǒ ghùwkə̀tuw[6] waŋā, ghùw wəla ù yòsò yô mugho alezùuŋ naŋā wô, ù fi kuuwn sàŋà màʼn nu.

³¹M̀ fɛ dzàa wò nù â ghɛ̀ ezə̀ŋ enyəa, Zə̀ kə̀ lo ghuuw maʼa nù bôo tə ghì ghəla ghe ghəə̄ŋ bo zo â ghì ghò, kə buʼù zə̂a sughò ghəla ghe boōn zən e wə̄n zo; Kə yo alekuūwn zə̂a kôʼ ghì ghəla ghe sûuwn Zuʼ tə Kəzə̀ tò.

³²Ghùw wəla ù boōn zən e Wɛ ù Ghùw zò, to Zə̀ kə̀ ghuuw maʼà ghea a te gho; wəla ù kuūwn sûuwn zən e Zuʼ tə̀ Zɔlɔ to, Zə̀ kə̀ lo zə̀a yǒ bôo tə ghùw ù te to, to mbī kê bughò mîaa.”

³³ “Abugho kâʼ fə̀ noōm dzɔɔ̄, fə m mʉ̂a tam kə̀ dzûŋ kò; mo fə noom dzɔ̀ɔ yo, fə m mʉ̂a tam kə̀ biigh ko; nu a kâʼ fə̀ telè kèle ko am tam kə wə̄n.

³⁴Wɛ a ufwī tò ghɛ! Ghɛ̀ lo ênzə̂n alekele dzə̀ è dzùŋ mò ghɛ̀ lo ghî à biigh gho a? Tɔŋlo enyəa à bɔɔm səa wò kô fəgha kəla kə lue doʼō ghùw an unʉ̀ghà.

³⁵Ghùw ù dzùŋ bɔ̌ɔm ghəəŋ wò kô ghəa à dzûŋ ghò an ndə̀m è èdzɔ̀ zəla ù ki am fə̂ŋ è wə̄n. Ghùw ù biigh bɔɔm ghəəŋ wò ko è bo an ndə̀m zə̀ ebo zəla ù ki am fə̂ŋ è wə̄n.

³⁶Ǹ so Ǹ dzâa wô â ghɛ̀ enyəa, abugho tsuʼ u te u kê kpe tsughu enyəa Zə̀ kə̀ fɛ saʼa àghì, chìa è ke taŋso ko shwaʼ u wə̄n ù dala wəla ù kə̌a ghè wò;

³⁷tɔŋlo enyəa ghù kè saʼ saʼa zəa ko an shwaʼ wʉ̂a, tò ghù lo saʼā bvʉ̂a sugho a te.”

³⁸ A m bùghò tsuʼ ù li wo, ghê dèekə̀làŋ àsùghò ghì a Falàsîi à li ghə n dzɛ̀ â Yɛso enyəa, “Wàdè, ghàʼ ləghaa enyəa ghù de tsughu ghaʼ â tsə̌a.”

³⁹ Ù ŋ kuūwn bɛ̀lɛ̀ tsughu ghee enyəa, “Bòobò tə aghì tə nɛ tən, ghe kâ bùʼ biso naŋa fə̂ŋ tə ghee to a zəŋò Zə̀ kò, ghe nda bvʉ̀ wò tsə̌a; e sô fɛ lo ko enyəa tsə̌a è lì kôom yò â ghee mò à gɔ̀ʼɔ̀ ko yo è ghùwshʉ̀ghà Dzonàh zən.

⁴⁰ Tɔŋlo enyəa aŋghəa Dzonàh fə̀ doʼò tsughu tsuʼ n zə̀ŋè mò n təgha an nʉ̀ghà u faŋkwu kə etsə̄ghāa, Wɛ ù Ghùw lo bɔɔm dòʼn sùghò tsuʼ n zə̀ŋè mò n təgha êzə̀ alo eshìaa.

⁴¹ Ghî ghə enaʼ a Ninēvɛ̀ a kê nùghùun wò an tuw kə ghì a nɛ ghən, ghe e komso ghee; mbuu ghe mafə̄ ti kuuwn nùghù wò fə̂ŋ tə ghee to am bòo tə ghee aŋghəa Dzonàh fə̀ ndûw naʼà ndùw tum â ghee. Kòʼô, ghùw wəla u tsə̀ghàtàʼà Dzonàh, ù lò fɛ, ghɛ yia taʼkè tiī kuwnlo.

⁴²A kê bughò an tsuʼ u sāʼ, nàʼtùm ù tsə kə emàm lo nughù kɔʼ an tuw kə ghì a nɛ ghən abugho ghe kê saʼā ghee, ù kè komso ghee; nu ù fə̀ nughu wo to an lɔʼkədzam enyəa e bughò zə̂ən tɔ e Solomòn. Kòʼô, ghùw wəla ù tsə̀ghàsə Solomòn, ù lò fɛ, ghɛ̀ yia taʼkè zuw â wə̄n.”

⁴³“Abugho zə̀a fə̀ biigh fə sə nughù tsughu a zəŋò ghùw, fə ŋ ŋgəa kaaŋ ndùw an lùʼu tə̀ zum to, fə kəŋo ndûw luʼū kə̀ mughūuŋ ko, fə ŋ kə̀n kè e tsughu.”

⁴⁴Zə̀a fə̀ biigh fə te fə n daŋso nùghù dzɛ̀ tsùghù enyəa, “Ŋ̀ kôom ndùuw ko nù ebàm an ndughu zaŋā e zəā mùgho mò nughù sə wo a te. À m bùghò fə bùghò kôʼ wo mo è lǒ è ghā, mo ghe n zè nàŋa, bian naŋa è tsughu.

⁴⁵Fə n daŋso nùghù è tsughu, ndùw nì wò zə̀a biigh n li mo sə̀ghàmbəgha mo m bûʼ bò tsə̀ghàtàʼàsə ghuūghùe u ghè fò, mə̀ n nyə̀ mùghùu ndùw a fughu; ghûw vʉ m bò tsə̀ghà tsùghù aŋghəa ù mò bûʼ lo a te sûesʉ. E kê bɔ̌ɔm lò sugho êzə̀ â ghî a nɛ ghən, ghe sô lô ghî à biigh gho.”

⁴⁶Aŋghəa Yɛso naām kə̂a ghəa gho â ghì a yi gho, zə̂ m bùghò těe wò a beē ghèe ghê waazə̂ ghò, ghe ŋ kəŋo dzì alekə̀a aghəa ghèe ghee.

⁴⁷Ghùw ù lì n ndzɛ̀ ndùw â wə̄n enyəa, “Zughù tì a beē ghèe ghê waazughù ghò, ghe lə̀ghāa alekə̀a tsughu aghəa ghɛ̀ à ghee.”

⁴⁸Yɛso m fwə̀n dzɛ̀ ndùw â ghùw vʉ enyəa, “À lò ndugho nughò lo a, à lò ghê ndùghò waanughò ghò a?”

⁴⁹Ù n daŋso sɔ̀ʼ dè ndùw tsə̀təndə̄ghā tə wə̄n, dzɛ̀ tsùghù enyəa, “Nughò wəla ghèe ghê waanughò ghò!

⁵⁰Tɔŋlo enyəa, ghùw wəlà ù tsoō bwîi dzə an dzə̂ è Bə̀ghà alo kəwālā, ù lǒ wàanùghò ù nùu, àsùghò ù zən, vʉ̀a ù lò sughò nughò.”