Read Aghem Matìo 15 Bible Online

Matìo 15 - Aghem bible

Matìo 15

¹Ghî a Falàsî a li ghə n nùghù wò an Yɛ̀lusalɛ̀m ghèe ghê dèekə̀làŋ à li gho, ghe m bùghò bvʉ̀ â Yɛso enyəa,

²“À lò kwò tsə̀təndə̄ghā tə̀ghà tə̀ zaʼa kaāŋ lwâŋ wəla ghê bə̀ghàbə̀ghà fə̀ naŋa lo a? Nu, abugho ghe so e zə, ghe ŋ kè suw aghu aŋghəa bughōo kə enaʼ kə deē.”

³Yɛso m bɛ̀lɛ̀ tsughu ghee enyəa, “Ghɛ̀ laʼa kuūwn bvuʼu kaāŋ kwò lwâŋ ù Kəzə̀ wò a, enyəa so à lò ghəa ghə enaʼ ghɛʼɛ̄ lo a?

⁴ Nu Zə̀ kə̀ dzɛ̂ an làŋ kə wə̄n enyəa, ‘E zuuw nduw â zùghù, zuuw sùghò à tsùghò.’ Àsùghò enyəa, ‘Ghùw wəla ù ki dzə̀ è bǐigh a zəŋò tsele ŋkāa a zəŋò zə̂, ù ki alekpuw.’

⁵Ghɛ̀ yia kuūwn zoʼn ghî ghò enyəa, ghùw lò nû aledzɛ̀ â zə̀ ŋkāa tsele enyəa, e kôom yò aleyòsò wə̄n, tɔŋlo enyəa fəgha kəla e mô ki aleyòsò wə̄n a te, e m fughu â Zə̀ kò. Ù yo alekòom fughu tsele ŋkāa zə̂ â kɔʼso mò aleyòsò ghùw ù ghee.

⁶E fi lo enyəa, bughōo kə enaʼ kɛʼɛ̄ kə̂ ŋ ghɛ̀ ghəŋlo ghɛ̀ yia tâʼkè naŋa kə̀tuŋlō an shwaʼ u Kəzə̀.

⁷Ghî a kə̀bàŋàdzə̀m to ghɛ! Shwaʼ u Kəzə̀ wəla ghùwshʉ̀ghà Èzayà fə̀ tɔm naŋā kùu ndùw ghɛ̀, ù ka fə nɔʼ dzə̀, aŋghəa Zə̀ kə fə̀ dzɛ̂ an shwaʼ u te wo enyəa;

⁸ ‘Ghî ghən a mugho kɔʼso ko alo edzughu, mo fə̂ŋ tə ghee tə lɔʼso lò an lùʼu kə̀ nughù kò.

⁹Ghe loʼsò ghue e ghee enyəa ghe kɔʼso mùghò, nu ghî à bughòo tsughu ghəa a ghee ghe yia zoʼn kaāŋ ghî gho a te tò a e soō à lò lâŋ kaŋa.’ ”

¹⁰Yɛso n daŋso tɔŋɔ naŋa tsughu aghî, dzɛ̀ â ghee enyəa, “Zuwkɛlɛ tsughu nlò enyəa;

¹¹à yò dzə̂ fəgha kəla kə nyəā nduw an dzughu e ghûw kə boōn ghùw, à lò fəgha kəla kə səā wo an dzughu e ghûw kə boōn wə̄n.”

¹²Tsə̀təndə̄ghā tə ŋ kuʼso kəŋo ndùw a vʉ̀a wə̄n, bvʉ â wə̄n enyəa, “Ghù kwò ko nû enyəa nə̀ghà m bôo ghì a Falàsîi ghən an shwaʼ wən a?”

¹³Ù m bɛ̀lɛ̀ tsughu ghee enyəa, “Fəgha kəla kə lo mò à kà Tsele waŋā alo kəwala tam naŋa, ghe lo sughuu màʼn nù.

¹⁴ Zə̀gha nlò ghee, ghe lo ghî à foō gho, ghe tɛ̂ɛ bwìi ghì à foō gho. Abugho ghùw ù fǒo tɛ̂ɛ bwiī ghuw ù fǒo, ghe a te gho a bə̀ghà n ndùw bvʉ̀ nyə tsughu alo kəbùʼ.”

¹⁵Pità ŋ kuuwn dzɛ̀ â wə̄n enyəa, “Teso dzâa wǒ kwə̀ən kə ushwāʼ kən ko â ghàʼ.”

¹⁶Ù n daŋso nì tsughu enyəa, “Ghɛ̀ naam lò ko mò ghɛ̀ zuuwkɛlɛ yo ghəa ghən gho a?

¹⁷Ghɛ̀ kwo yo enyəa abugho à nyə ndûw ko kwò kò alo edzughu, kə n nyə tsughu ndùw an nʉ̀ghà, kə n tsə̀ghà sə daŋsò tsùghù è nduw a?

¹⁸Kəlā kə səā wo alo edzughu, à lò fəgha kəla kə sə kɔʼ wo am fə̂ŋ è ghùw, à lò kə ghee kə boōn ghùw.

¹⁹Nu à am fə̂ŋ è ghùw bɔɔm səa kɔʼɔ wò ko mòʼnlò e biigh zo, àsùghò ghəa à biigh à li gho tǒ alewinlo àghì, alesəa nuŋlo, aleghəəŋ kaaŋ dzə̀adzə̀ tə aghəa tə̀ li to, aletsɔŋɔ, alemaʼn kaaŋ nùʼ tò àsùghò fom to.

²⁰Ghən lò ghəa ghəla a dzəso ghùw. Alekuūwn zə mò ghùw kà ghu a sûw, aŋghəa bughōo kə enaʼ kə deē, e te e boōn yo ghùw.”

²¹Yɛso n daŋso zə̀ghàa è tsughu, nùghùu nyə ndùw a naʼ e Tae àsùghò e Sidɔ̀n zò.

²²A mo e kôʼ wìzən ù Kanàan ù lì a fughu alo enaʼ n ndùw bùgho a vʉ̀a Yɛso mò ù dìi wò nù, bùgho dzɛ̀ â wə̄n enyəa, “Wɛ ù Dɛvìd ù nùu, kwuso se zo a zəŋò mùghò a Mughùbè! Zʉ̀ ù biigh u lo a zəŋò wɛ waŋa ù zən, vʉa u ŋgeē waʼsò fəmso wə̄n.”

²³Yɛso ŋ kè kuūwn bɛlɛ̀ wə̄n. Tsə̀təndə̄ghā tə wə̄n tə n daŋso bùghò bǔʼ wò wə̄n â ghu ko enyəa, “Dzǔu nùghu wə̄n, nu ù bùʼn wò mbɔ̀ŋ a bàâ sɛ̀.”

²⁴Yɛso ŋ kuuwn dzɛ̀ â wìzən vʉ enyəa, “Ghe mò mugho tum wo â ghi ghə Ezə̀lɛ̂ ghəla ghe lo tò ndzì təla tə lâʼ miāa.”

²⁵Wìzən ù te ŋ kuūwn sə̀ bugho nyàʼa tsughu ko a sə̀a Yɛso, dzàa tsughuu ko enyəa, “Mughu ù te, yòsò mugho.”

²⁶Yɛso m bɛ̀lɛ̀ tsùghù enyəa, “E dzɔ̂ɔ yò alenìi kɔʼ fʉghàzə u wɛghêtùghu, a maʼà ndûw â bvʉ to.”

²⁷Nughò vʉ mo è boo, dzɛ̀ enyəa, “À lò esəŋò a Mughùbè, bvʉ tə ŋgəəŋ kuum zəa sùghò nù sugho tə fʉ̀ghàzəa təla tə tsɔʼn tsughu a ghueetsə̄ abugho Mùghubè ù ghee zəā.”

²⁸Yɛso n daŋso bɛ̀lɛ̀ tsùghù nʉghà vʉ enyəa, “Wo wìzən, ghù m bɛso boo fughu â mùghò. E bɔɔ̄m doʼò ko aŋghəa ghù ləghaa.” Wɛ ù nùghò vʉ n daŋso tughu kɔʼ an nə̀gha e te zo.

²⁹Yɛso n daŋso nùghù è tsughu, tsə̀ghà tsùghù ndùw dzì a ŋgùŋ è ènyʉ̀ e Galèlîi. Ù n daŋso nùghù kɔ̀ʼ ndùw aŋ ukwàʼ, kɔ̀ʼ gàʼ dòʼò tsùghu a fughu.

³⁰Ndə̀mà tə aghì tə̀ n tsôo lǔu wò ko a vʉ̀a wə̄n ghèe ghê ghì ghəla ghe lô bâ kə̀ mɔ̀ʼ, ghəla ghe lo kə̀əŋ wò, ghî à foō gho, ùmùʼ, à ndə̀ma tə ghì à dzaŋa gho, ghe m bughò nǎaŋ wò a vʉ̀a wə̄n, ù m baaŋ kɔʼ ghee.

³¹Ghəa saʼ kə aghì chi kə koʼ aŋghəa mùʼ ù kə̂a wô ghəa gho, ghî a bà kə̀ mɔ̀ʼ bwìi wô tsəghatsəgha a te, ghəla ghe mò lo kə̀əŋ wò ghe n tughuu doʼn wo, ghî à foō a koʼò wô luʼū to; dzughu ghə zūm ghee, ghe ŋ kàʼ ndùw alefughu ŋkɔʼso â Zə̀ kə Ezə̀lɛ̂ kò.

³²Yɛso n daŋso tɔŋɔ zùuŋ wò tsə̀təndə̄ghā tə wə̄n dzɛ̀ â ghee enyəa, “Se e kwuu mùghò a zəŋò ghì ghən gho, nu ghe n dòʼo ghàʼ à ghee alo ntsuʼ n təgha, ki yo fəgha kə̀ zəa ko; M̀ fɛ tsoo ləghaa sùghò alezə̀ghàa ndûw ghee an dzəŋ, e kwo ko ghe lô vuŋlo an dziī.”

³³Tsə̀təndə̄ghā tə̀ n daŋso bvʉ â wə̄n enyəa, “A êzəŋ nîi wô ghɛ̀ fʉghàzəa wo fɛ alo ebə̄ghā lo a, u lô alekpenlo â ghì ghə̀n à dzə̀m a?”

³⁴Yɛso n daŋso bvʉ â ghee enyəa “Ghoo tə ugbɛ tə lo tə shò?” Ghe n dzɛ̀ â wə̄n enyəa, “Tə lo sə̀ghàmbəgha, à sə a tətsəgha gho ko enyə a sòʼ.”

³⁵Ù fi fughu tsughu lâŋ kò enyəa ghî à tsughuu doʼò tsughu a ghueetsə̄.

³⁶Ù n ni kɔ̀ʼ ghoo tə ugbɛ ti to sə̀ghàmbəgha àsùghò tsəghaa te to, fùghù ndùw kə̀zɔ̀ŋlò â Zə̀ kò, boʼn fughu tsughu â tsə̀təndə̄ghā tò, tsə̀təndə̄ghā tə̀ n dzùghù fùghù ndùw â ghì ghò.

³⁷Ghee a dzəm mo è zə, zə̀ è kuw; ghe ŋ kuum lueso kɔʼ sugho təla tə səā tsughu alo ukwaʼ sə̀ghàmbəgha.

³⁸Ghî ghəla ghe mò zə fʉghàzəa u te wo, à mò lo kam tə aghì tə chìakò, mo a kâ yìzən a te a taŋ ghèe ghê wɛghêtùghù gho.

³⁹A m bùghò ù zə̀ghàa ndùw ghî ghò enyəa ghe nughùu, ù nyə kɔʼ alo kəkwə̀n nùghù ndùw am mbùʼ è Magadàn.