Read Aghem Matìo 16 Bible Online

Matìo 16 - Aghem bible

Matìo 16

¹ Ghî a Falàsîi à li gho ghèe ghê Sadùwsîi tə̀ n nduw bùghò alebùghò baʼn kwu Yɛso, ghe m bvʉ â wə̄n enyəa, “Děe wò ghaʼ â tsə̌a enyəa à fùghù Kəzə̀ ghû â daʼa ko aleghəəŋ ghəa ghəla ghù ghəəŋ fɛ.”

²Yɛso n so bɛlɛ̀ ghee, dzɛ̀ â ghee enyəa, “Abugho tsuʼ u zɔlɔ an nə̀gha è guŋsò zò, ghɛ̀ mo enyəa, ‘Tsʉ̂ u lo zee nù tsʉtsʉ.’

³À m bùghò à lǒ â gbə̀làgbə̀là tò, ghɛ̀ mo enyəa, ‘Fɛ̀ɛn kə eghuuw kə sô tsùghuu nù nɛ, aŋghəa wala kə sô baŋa ləŋo ndûw nû.’ Ghɛ̀ kwo nû aletɔɔŋ kelê fəgha kəla tsə̌a tə kəwala tə deē, kuuwn yò aleteso dzɛ̂ ghəa ghəla a səa an tì kən.

⁴ Bòobò tə ghì tə nɛ tən tò ghɛ, ghe tsəŋō yo Zə̀ kò; mmɛ̀ mbɔŋɔ bvʉa wò mùghò â tsə̌a. Ghɛ̀ lo tsoo kòʼò yò tsə̌a è lì, tsə̀ghàasə̌a ko yo tsə̌a è ghùwshʉ̀ghà Dzonàh zən.” Aŋghəa ù kə̀a tsughu êzə̀, ù n zə̀ghàa tàʼà tsughu ghee fughu, nùghù e wən zo.

⁵Ghəa tsə̀təndə̄ghā tə̀ dâŋ sə nduw aŋ ŋgùŋ zə ènyʉ̀ è li ezə̂, à n lo mò ghe mâa nì zə̀ alenì kə̀bɛ.

⁶ Yɛso n dzɛ̀ â ghee enyəa, “Ni nlò ghôom zò am mbvùŋ è ghì Falàsîi ghèe ghê ghî Sadùwsîi ghò.”

⁷Ghe ŋ kaʼ tsughu alekə̀a aŋ ghùe e ghee enyəa, “Ù ghəa ghən fɛ kə̀a nu ù a kâ bùghò â bɛ ko.”

⁸Yɛso ŋ kele tsughu fəgha kəla ghe mô kəā, ù m bvʉ â ghee enyəa, “À lò kə kwò ghɛ̀ pfʉa dzughu gho aŋ ghùe zɛʼɛ enyəa ghɛ̀ ki yo bɛ ko a? Ghɛ̀ kâ tɔ̀ʼ bǒo fughu â mùghò a!

⁹ Ghɛ̀ kaām zuwkɛlɛ to ghəa gho a? Ghɛ̀ ghaam nìzə̀ dzə̀ nù aŋghəa mùgho mò nî kɔʼ sə a ugbɛ gho a tɛ̀ a, mùghò m boʼn dzùghùu fughu tsughu â kam tə aghì tò tə tɛ̀ a? Ghɛ̀ mò kuum lueso kɔʼ ushwàʼnlo u shò ghe mo zə naŋā sə tsughu a?

¹⁰ Ŋkāa ghɛ̀ nîzə̀ sùghò nù ghoo tə gbɛ tən sə̀ghàmbəgha mùghò mò fughu â kam tə aghì tən tə chìakò, àsùghò ndə̀m è u shwàʼnlo u kəbɛ wəla u mò səā tsughuu a?

¹¹À sə̀ lǒ kwò ghɛ̀ maʼà tâʼkè zuwkɛ̀lɛ̄ enyəa M̀ mô fɛ kə̂a yò ghəa e kəbɛ zo a ghɛ̀ a? Nǐ nlò ghôom zò am mbvùŋ è ghì a Falàsîi, àsùghò è ghì a Sadùwsîi.”

¹²Ghe fi daŋso zuwkɛlɛ nù enyəa ù mò fɛ kə̂a yò enyəa ghe nîi kɔʼ eghômlò am mbvùŋ è kə̀bɛ, enyəa à mò kǔuwn lò enyəa ghe ghomlò an tsʉ̀ e ghì a Falàsîi ghèe ghê ghì a Sadùwsîi ghò.

¹³A m bùghò Yɛso bùghò am mbùʼ à Sìsalìa Felèpîi, ù m bvʉ â tsə̀təndə̄ghā tə wə̄n to enyəa, “Ghî à dzɛ̂ enyəa Wɛ̀ ù Ghùw lò ndugho a?”

¹⁴ Ghe mo enyəa, “Ghî à li a dzɛ̂ enyəa à lǒ Dzɔn Fùghùu mùghù ŋ Kə̀zə̀, à li yia so enyəa à lǒ Elaedzà, à li yia a dzɛ̂ enyəa à lǒ Dzɛ̀lɛ̀mîa ŋkāa ghùwshʉ̀ghà ù lì.”

¹⁵Ù m bvʉ â ghee enyəa, “Ghɛ̀ yia sô kuuwn dzɛ̀ enyəa Ǹ lo ndughoo a?”

¹⁶ Sǎemòn, tɔɔŋ Pità m bɛ̀lɛ̀ tsùghù enyəa, “Ghù lǒ Kə̀lestò, wɛ ù Zə̀ kəla kə mughù tən.”

¹⁷Yɛso n daŋso bɛ̀lɛ̀ tsùghu wə̄n enyəa, “Dzɔ̀ lǒ â ghù a Sǎemòn wɛ ù Dzɔ̌n, nu à kà sə̀ŋò zən dê dzə̂ ghùw ù lì â ghù, à sə̀ŋò e te e dê Tsele waŋā wəla ù lò alo kəwālā.

¹⁸Ǹ so Ǹ dzâa wô â ghù enyəa ghù lò Pità, mo e moʼnlò enyəa, à lò kənɛ, kəla Ǹ lo bəghaa tiso kɔʼɔ dzeŋe kə ghì a Kəzə̀ kaŋa ko a te, mo vʉ e kê bùʼ tsò yò aletughu tsəghà dzeŋe kə te ko.

¹⁹ Ǹ lo fughuu ghù â tsʉ kə̀ fɔ̀e u kəwālā ko. Ghəa zəla ghù tsughu boo tsughu fɛ am mbī, ghe lo bɔɔm boom sùghò èzə̀ alo kəwālā, zəla ghù tue maʼà tsughu fɛ am mbī, ghe lo tuu màʼn sùghò êzə̀ alo kəwālā.”

²⁰Ù n daŋso tɔ̀ʼ kuɛ̀ɛn tsùghu Tsə̀təndə̄ghā tə wə̄n enyəa e kwo ko ghe lô dzâa â ghùw enyəa e lo Kə̀lestò.

²¹Alezìi tsughu an nəgha e te zo, Yɛso ŋ kaʼ tsughu aledè â tsə̀təndə̄ghā tə wə̄n to enyəa, “Ŋ̀ ki alendùw an Yɛ̀lusalɛ̀m, Ǹ ndùw ŋgeē fala aŋ ghùu tsoʼ tə enaʼ to, fɔ̀e tə̀ tughu to, àsùghò ghê dèekə̀làŋ, ghe lo wiī sughò mùghò, Zə̀ kə̀ lo zôo nughù kɔʼ mugho abugho tsuʼ ŋ kpe tsughu n təgha.”

²²Pità n nyɛʼɛ nùghù bə̀ŋso tee tsughu ghèe wə̄n, kàʼ ndùw wə̄n alezùghù enyəa, “Zə̀ kə̀ yo aleboo a Mughùbè! Ghəa zən yo aletsoō sə a zəŋò ghù.”

²³Ù ŋ kuuwn fə̀n tsughu ughue, dzɛ̀ â Pità enyəa, “Nùghu a bàâ mùghò a Satàn! Ghu tə̀ghàsò mùghò; nu zə yo dzə̂ moʼnlò e Kəzə̀ ghù ki, zə lo moʼnlò aghì.”

²⁴ Yɛso n daŋso dzɛ̀ â Tsə̀təndə̄ghā tə wə̄n to enyəa, “Abugho ghùw so e bwîi â bàâ mùghò, ù n ni tsùghù enyəa e yo dzə̂ fəgha kə̀ li ko, ù m boo tsughu evʉ, ù n nùghù wô a bàâ mùghò.

²⁵Nu ghùw wəla ù ləghaa alebəgha sə ghue u wə̄n, ù lo guŋù tuw kə wə̄n, wəla ù lo alegùŋù tuw kə wən ko aŋghəa zaŋā, ù lo zəa nù tuw ko.

²⁶Nu ghùw lo alezəā kɔʼ kə kwò abugho ù kele mɛʼɛ̀ fʉgha wo u dzə̀m am mbī a, ù ŋ kuuwn gùŋù tuw kə wə̄n à? Ŋkāa ghùw lò alekuūwn fughu tsəghà ndûw kə̀ kwò alezuū sə tuw kə wə̄n a te à?

²⁷ Wɛ ù Ghùw ki alebùghò ghèe ghê tsə̀təndə̄ghā tə Kəzə̀ tò təla tə lô tə wə̄n to an səghanyəgha n Tsele, ù è ke tsəa ko ghùw am fəgha kəla kə kpe am fwàʼ kə wə̄n.

²⁸Kùmkùm, M̀ fɛ dzàa wò nù â ghɛ̀, ghî à lo nû fɛ mo vʉ e lô ghee â mbàŋ sɔ̂ŋ fùghù yo mo ghe kâ Wɛ ù Ghùw kôʼ ù bùghòo fɛ am mbī tò Kədə̀ŋ.”