Read Aghem Matìo 17 Bible Online

Matìo 17 - Aghem bible

Matìo 17

¹Ghəa tsuʼ n tsəghà tsughu tǔu, Yɛso n nì kɔ̀ʼ ndùw Pità ghèe ghê Dzɛ̂ms ghèe wàazə̀ Dzɔ̌n, ghe n nùghù kɔ̀ʼ ndùw an ndɔ̀ŋɔ̀ ndɔ̀ŋɔ̀ fə ukwàʼ a fughu ghee à nəŋ ko.

²Ù n nùghù kǔuwn kɔʼ fughu an sə kə ghee, sʉ u wə̄n wə n nyəghanlo tò ezuuw, ndzʉ tə wə̄n tə m fəmà nyə̀ghaan ndùw tǒ tsə̀.

³Ghe n tɛ̀ fìi kɔʼ Musî ghèe Elaedzà mo ghe yia kə̂a ghəa gho ghèe ghê Yɛso.

⁴Pita n dzɛ̀ â Yɛso enyəa, “Mughùbè, e nyɔʼɔ̀ dzɔ̂ɔ nù ghàʼ lô fɛ; abugho ghù ləgha, M̀ bəghaa kɔʼ ntughuu fɛ n təgha, fə mɔ̀ʼ â ghù, fə mɔ̀ʼ â Muwsî àsùghò fə mɔ̀ʼ â Èlaedzà.”

⁵ Ghəa ù naām kə̂a ghəa gho, ghe mo ekôʼ fə̀màfə̀m kə nyəghaan kə mbàʼ kə̀ li kə m bvʉ̀ tsə̀n tsughu ghee, dzə̀ è lì n dzɛ̀ sə wòʼ fughu am mbàʼ enyəa, “Wən lǒ wɛ waŋa Ŋ̀ gaʼ fə̀ŋ a zəŋò wən Ŋ̀ ŋgee duʼn nù ghàʼ à wə̄n; e zuuw nduw nlò â wə̄n.”

⁶Ghəa tsə̀təndə̄ghā tə zuw tsughu, fə̂ŋ tə̀ m bàa ghee, ghe n tì bvʉ̀ pfʉ̌a naŋa ndùw èsʉ a ghueetsə̄.

⁷Yɛso ŋ kuuwn bùghò mɔ̀m tsùgho ghee, dzɛ̀ â ghee enyəa, “Nùghu kɔʼ nlò, kǎ nlò tsəŋ.”

⁸Ghe mo e baŋà lɛ̌ɛn kɔʼɔ nù, ghe ŋ kòʼ kɔʼ Yɛso, kè kôom kôʼ ghì à li yì.

⁹A m bùghò ghe tsughuu wô ebàm aŋ ukwàʼ, Yɛso ŋ kùɛɛn tsughu ghee enyəa, “E kwo ghɛ̀ lô dzâa fəgha kəla ghɛ̀ kôʼ fɛ â ghùw, à gɔ̀ʼɔ̀ ko mò Wɛ ù Ghùw n lo kɔʼsə alo evʉ̄.”

¹⁰ Tsə̀təndə̄ghā tə n daŋso bvʉ â wə̄n enyəa, “À kǔuwn lǒ kwò ghê dèekə̀làŋ kuuwn dzɛ̂ enyəa, Elaedzà lo tèlè kì dzə alebùghò a?”

¹¹Ù m bɛ̀lɛ̀ tsughu enyəa, “Elaedzà kùum bùghòo nù, ù bùghò biān naŋā aghəa a dzə̀m;

¹² M̀ fɛ so Ŋ̀ kuūwn dzâa wô â ghɛ̀ enyəa ù maā bughò, ghî ghə ŋ kè koʼòkɛlɛ wə̄n, ghe n tsôo ghə̌əŋ ndùw kô ghəa ghəla ghe ləghaa â wə̄n. Wɛ ù Ghùw lo bɔɔm faan sùghò èzə̀ aŋ ghùu ghee.”

¹³Tsə̀təndə̄ghā tə fi daŋso zuwkɛlɛ nù enyəa, ù fɛ kə̂a ghəa Dzɔ̌n Fùghùu mùghù ŋ Kə̀zə̀ â ghee.

¹⁴A m bùghò ghe bughò kôʼ wô saʼ kə aghì kò, tûwbʉ̀ghà ù lòʼ n sə kɔʼ nyaʼa wò a vʉ̀a Yɛso, dzɛ̀ enyəa,

¹⁵“Mughùbè, kwuso se zo a zəŋò wɛ̀ waŋā, nu ù bvʉ̀a kə̀bvʉ̀, vʉ̀a ù ŋgeē fanlo. Ù bùghòo an nə̀gha è li zo, ù m bvʉ̀ nyə ndùw aŋ uwə̀n, nəgha è li zo ù bvʉ̀ nyə tsughu alo mmùghu.

¹⁶M̀ mô fɛ nî wò wə̄n â tsə̀təndə̄ghā təghà tò, ghe yia yô alebaaŋ wə̄n.”

¹⁷Yɛso n daŋso bɛ̀lɛ̀ tsùghù enyəa, “Ghɛ̀ ghî a tì kə nɛ kən, ghɛ̀ kâ dɔ̀ɔm bǒo fughu â Zə̀ kò, ghɛ̀ kwo yo ghəa è dzuŋ zò ŋkāa è biigh zo, Ǹ lo bòʼò dòʼn tsùŋlò ênzə̂n sɛ̀ a? Nǐi wǒ wə̄n.”

¹⁸Yɛso n daŋso tsə̀ghàsò tsughu kəlâŋ, bvʉ̀ kə n sə̀ nùghù tsughu a zəŋò wɛ vʉ̀, ù n daŋso tùghù e kɔʼ.

¹⁹Tsə̀təndə̄ghā tə Yɛso tə̀ m bùghò tsɔŋ bvʉ â Yɛso enyəa, “À kǔuwn lǒ kwò ghàʼ maʼà yô aleshùaa sə zʉ̀ u te wo a?”

²⁰ Ù n dzɛ̀ â ghee enyəa, “À lǒ bòʼ ghɛ̀ kâ tɔ̀ʼ bǒo fughu â Zə̀ kò. Nu M̀ fɛ kùu dzàa wò nù â ghɛ̀, abugho ghɛ̀ mô bûʼ ki ko nyàaŋ fə eboo fo tò sam fə mustàd, ghɛ̀ mô lò nû aledzàa tsughu â kwàʼ wən wo enyəa, ‘Səəŋ dòʼò kəŋo ndùw fi ezə̂.’ To u mô səə̄ŋ doʼò kəŋo ndûw. To êzə̀, ghəa è li e mô yò aletsə̀ghàasə ghɛ.”

²¹[À bɔ̌ɔm mìaa kô ègɔ̀ŋlò àsùghò dzughu è baa zo e lô aleghəŋlo ghùw shùa sə ŋgòʼ è dzàŋ zən.][9]

²²A fə̀ bugho tsə̀təndə̄ghā tə̀ bugho dzeŋe doʼò tsughu aŋ Galèlîi, Yɛso n dzɛ̀ â ghee enyəa, “Ghe lo kùʼù nìi fùghuu tsə̀ghàa ndùw nǔ Wɛ̀ ù Ghùw aŋ ghùu ghì ghò,

²³ghe nîi wiī tsughu wə̄n, ghe lo zôo nughù kɔʼ wə̄n alo abugho tsuʼu n lo tsəghà tsughu n təgha.” Ghəa e te zə m fəmso tsughu tsə̀təndə̄ghā tə wə̄n enyə.

²⁴ A m bùghò Yɛso bùgho aŋ Kàpɛnùm ghèe ghê tsə̀təndə̄ghā tə wə̄n to, ghî ghəla ghe bvʉa chuw to an Ndughu è Kə̀zə̀ è ne m bùgho bvʉ̀ â Pità enyəa, “Mughùbè wɛʼɛ fughu ko nǔ chuw tə wə̄n an ndughu è Kəzə̀ è ne a?”

²⁵Pità m bɛ̀lɛ̀ ndùw wə̄n enyəa, “Ù tsǔuw nù.” A m bùghò ù daŋso kwən nyə wo, Yɛso ŋ kə̀a ndùw dzə̀ àghəa â wə̄n enyəa, “Ghù mòʼò èndugho Sǎemòn? Dwə̀ŋ wə enaʼ u ki alebvʉ̄ kəŋgùu ŋkāa mwàʼsò kə̀ chuuw ko â ghê ndùghò a? Ghe ki alebvʉ â wɛ a kətsə̄ a te gho ŋkāa ghe ki alebvʉ â tùu tò a?”

²⁶A m bugho ù bɛ̀lɛ̀ tsughu enyəa, “Ghe ki alebvʉ â tùu tò.” Yɛso n dzɛ̀ â wə̄n enyəa, “À fi lo enyəa wɛ a kətsə̄ a ki yo alechūw.

²⁷To a mô zəghà ko nù, a ka boon fə̂ŋ tə ghee to. Ndùw nlò alo enyʉ̀ ghɛ̀ maʼa nduw saʼ fo, ghɛ̀ ni kɔʼ tsəgha e sʉesʉ zəla ghɛ̀ kwuu sə kɔʼ, ghɛ̀ zom tsughu dzughu e wə̄n zo, ghɛ̀ koʼ tsughu kua u fəŋgɔ̀ʼ wò a te, ghɛ̀ nduw fughu nduw â ghee enyəa à lǒ chuw è sɛ̀ a dzə̀m ghən.”