Read Aghem Matìo 18 Bible Online

Matìo 18 - Aghem bible

Matìo 18

¹ An nə̀gha e te zo, tsə̀təndə̄ghā tə̀ m bùghò bvʉ̀ â Yɛso enyəa, “A ghàʼ tsəgha ndugho alo kəwālā à?”

²Ù n daŋso tɔŋɔ tsughu wɛfêtùghu fə̀ li fo, naŋa nyə tsughu am bvʉa e ghee,

³ dzɛ̀ tsughu enyəa, “Kùmkùm, ghəa Ǹ dzâa wô fɛ â ghɛ̀, à buw mò ghɛ̀ kuuwn kɔʼ nû, ghɛ̀ doʼo tsughu tò wɛghêtùghu ghən, ghɛ̀ kê nyə yo am fɔ̀e u kəwālā.

⁴Ghùw wəla ù ghaʼ tsəgha waazə̂ ghò am fɔ̀e u kəwālā lo ghùw wəla ù zuumsō tsughu ghue u wə̄n wo tò wɛfêtùghu fən.

⁵Ghùw wəla ù nì naŋā sugho ŋgòʼò wɛfêtùghu fə te fo, ù fi nî nàŋa mùghò.”

⁶Yɛso n dzɛ̀ tsùghù sùghò enyəa, “Abugho ghùw ghəə̄ŋ tsughu wɛ̂ɛtùghu u mɔ̀ʼ aŋ wɛghêtùghu ghəla ghe boō fughu â mùghò enyəa ù ghəŋlo èbo, ghùw ù te fi kpe to a nî kɔʼ ŋgɔ̀ʼɔ̀ kə etia kə̀ gwuūŋ ko, a kɔlɔ̀ tsughu am mwè u wə̄n, a ndûw maʼà nyəa tsughu wə̄n alo kətsə̀m.

⁷Ŋgoʼ fɛ am mbī bòʼ ghəa ghəla a ghəŋlo enyəa ghî ghə̀ è ghəəŋ bo zo! Nu ghəa a te a ki nû alesəa, zəa e kuūwn lô enyəa ŋgoʼ â ghùw wəla ù ghəŋlo enyəa ghùw ghəŋlo èbo!

⁸ Abugho ghu kə̀a ŋkāa kəghuw kə̀a kə̀ tsoōm ghû enyəa ghù è ghəəŋ ghəa à biigh gho, ghù ŋ kə̀a è maʼa. Nu â ghù aleki ghu ko ŋkāa kəghuw ghù kuuwn nduw pfʉa aŋ wə̀n ù doʼn təla wo, dzɔ̀ lò enyəa ghù kele mughù è doʼn təla u zò mò ghù lǒ kə̀màkə̀kwe ŋkāa kə̀màkə̀fwee.

⁹Abugho sə zə̀ghà è ghəə̄ŋ sughò enyəa ghù è ghəəŋ ghəa à biigh gho, ghù m bɛso bɛ̀ʼɛ̀ màʼà sə wò sə e te zo; nu â ghù aleki sə gho a dzə̀m ghù kuuwn nduw pfʉ aŋ wə̀n wəla u doʼò tən, dzɔ̀ lò enyəa ghù kele mughù zəla e doʼò tən à sə zo e mɔ̀ʼ.”

¹⁰ “Ghəəŋ tsughu enyəa ghɛ̀ ka e koʼō keē nyàaŋ mə̄n; nu ghəa Ǹ dzâa wô fɛ â ghɛ̀, tsə̀təndə̄ghā tə Kəzə̀ tə ghee tə lo tsəgha ko ghèe ghê Bə̀ghà alo kəwālā.

¹¹[Tɔŋlo enyəa Wɛ̀ ù Ghùw mò fɛ bùghò alebəghaasə ghî ghəla ghe lâʼ lo.][10]

¹²Ghɛ̀ moʼò èndùghò à? Abugho ghùw ki bɔm fə təndzì fò, e mɔ̀ʼ zə̀ è làʼ mîaa tsughu a te, ù ŋ kè naŋā taʼà tsughu ghə̀m n tə̀ndzì mən tɛ̀ndzūghū à ghè tǒ tɛ̀ndzūghū aŋ ŋgaŋlò e ukwàʼ à enyəa e ndûw kəŋo wô dzə̂ zəla è làʼ miaa a?

¹³Mò ù kəŋ kòʼ tsùghù nû, ù n lɔʼso duʼn mìasò ndùw enyə a te tsə̀ghàtàʼàsè aŋghəa ù duʼnlo aŋ ghə̀m mə̀n tɛ̀ndzūghū à ghè tò tɛ̀ndzughu tə dòʼŋkè mîaa.

¹⁴À lò sugho eghəla, Bəghà alo kəwālā kâ lə̀ghà dzə̀ enyəa wɛ u mɔ̀ʼ mìaa səa wô aŋ wɛmètùghu mən.”

¹⁵ “Abugho wàazùghù ghəə̄ŋ tughu ghû â bo zo, dòʼò tsughu ghɛ̀ à wə̄n a bə̀ghà, ghù dzɛ̀ nduw â wə̄n. Mò ù ŋ ghù zuw, ghù fi kôom kèle kɔʼ nu wàazə̀.

¹⁶Abugho ù dòʼŋkè kuūwn zuw ghû, ghù n ndùw kə̀ŋ wo ghùw u mɔ̀ʼ ŋkāa a bə̀ghà enyəa mò à lò eghəa, ghî ghə̀ n ti a te a bə̀ghà ŋkāa a təgha.

¹⁷Mò ù tùe sùghò nù enyəa e zuuw yo ghee, ndǔw dzǎa ndùw an dzeŋe kə ghì a Kəzə̀; mò ù tue daŋso sùghò enyəa e zuuw yo â dzeŋe kə ghì a Kəzə̀ ghò, nǐi ndǔw wə̄n tǒ ghùw wəla ù kwo yo Zə̀ kò, ŋkāa tǒ dzə̀akə̀mwàʼsò.

¹⁸ Kùmkùm, aŋghəa Ǹ dzâa wô fɛ â ghɛ̀, ghəa zəla ghɛ̀ tsughu boō tsughu enyəa e lo êzə̀ a fɛ am mbī, ghe lo boom sùghò ezə̀ alo kəwala, mò à lò zəla ghɛ̀ kuūwn tue maʼà tsughu fɛ am mbī, ghe lo tuu màʼn sùghò êzə̀ alo kəwālā.

¹⁹Ǹ so Ŋ̀ kôom dzâa kpeʼe wô â ghɛ̀ enyəa abugho ghɛ̀ a bə̀ghà tsughu boō tsughu alo eghəa, ghɛ̀ gɔŋlò enyəa to ghəa e mô sə êzə̀, Bəghà alo kəwālā lo fwàʼà fùghuu nù ghəa e te zo â ghɛ̀.

²⁰Nu bugho aghî a bə̀ghà ŋkāa a təgha zûuŋ doʼò tsughu bòʼ mùghò, mùghò n lo a fughu ghàʼ à ghee.”

²¹ Pità n daŋso sə kɔ̀ʼ è wo dzɛ̀ â Yɛso enyəa, “Mughùbè, Ǹ lo alenìizə̂ bòo tə waanùghò alekɔʼɔ̄ sə tənəghā tə sòʼ abugho ù tsòo ghəə̄ŋ kwêen ko mugho â bo zo a? Ǹ lo nû alenìi zə̂ bo e wə̄n kɔʼɔ səa ndùw tə̀nəghā sə̀ghàmbəgha a?”

²²Yɛso n dzɛ̀ â wə̄n enyəa, “Ǹ dzâa wò dzə̀ yò enyəa à lò tənəghā sə̀ghàmbəgha. À lǒ ghə̀əm n tə̀nə̀gha sə̀ghàmbəgha alo tənə̀gha sə̀ghàmbəgha.

²³Fɔ̂e u kəwālā u lo tò kədə̀ŋ kə fə̀ ləghaa alebianlo ghèe kɔ̀ɔ ŋ wə̄n mò.

²⁴Ù n naam kaʼ tsughu ko ebianlo, ghe n daŋso bùghò â ghùw mò ù ki wə̄n â ndàŋ kò an ndə̀mà tə ukʉ̄a.

²⁵A m bùghò kɔ̂ɔ fi fə sô ki yô fəgha ko aletsəā tsəghàa ndûuw ndàŋ chìa ù mò ki â ghùw vʉ̀, də̀ŋ chi kə n tsə̀ghàsò tsùghù kəlâŋ enyəa ghe nîi fêe sə wə̄n tò kəkɔ̂, ghe fêe daŋso â wi ù wə̄n àsùghò wɛ a wə̄n gho àsùghò fʉgha u wə̄n wo u dzə̀m, ghe tsə kua u te wo.

²⁶Kɔ̂ɔ fi fə n nyaʼa ndùw a tsəlà wə̄n, buʼ kəghu â wə̄n enyəa, ‘Mughùbè, fughu tsughu mugho â nyàaŋ fə enə̀gha fo, Ǹ lo tsəa nù kua wʉ̀a wò u dzə̀m.’

²⁷Də̀ŋ chi kə ŋ kwuso tsughu ese a zəŋò wə̄n, nìzə̀ ndùw ndàŋ kə te ko, zə̀ghàa màʼà ndùw wə̄n.

²⁸Kɔ̂ɔ fə̀ mɔʼɔ̄ fi n nùghù è tsughu enyəa fə fɛ nùghùnlò ebàm alô wə̄n, fə kpeen ndùw ghèe ghùw fən ù wə̄n mò à lò sugho fəkɔ̂ɔ. Tûw vʉ n lo mò ù ki wə̄n â ndàŋ kò a tə̀tɔlɔ tə sòʼ enyə ko; ù ŋ kwu kam kɔʼ wə̄n am mwè, dzɛ̀ â wə̄n enyəa, ‘Tsə tsə̀gha wò ndàŋ kə̀a kò.’

²⁹Ghùw fə̀n ù wə̄n vʉ n nyə̀ŋè ndùw a ghueetsə̄, buʼ kə ghu â wə̄n enyəa, ‘Fughu tsughu mugho â nyàaŋ fə kə ghāa fo, Ǹ lo tsəa nù ghû.’

³⁰Ù mo e tue, nì dzə̀n ndùw ghùw fən ù wə̄n vʉ an ndùghùtsāʼ enyəa ù kè tèlè tsə̌a ndàŋ chì.

³¹A m bùghò kɔ̀ɔ n lǐ mìa ghèe ghee dzeŋe fwaʼā a dzə̀m kôʼ ghəa yì gho, ghue zə ŋ ŋge kpuw ghee, ghe n lɛ̂ɛn ghəa a te gho a dzə̀m, ndùw dzɛ̀ fughu tsughu â mughùbè ù ghee.

³²Mughùbè ù wə̄n fi tɔŋɔ tsughu nu wə̄n, dzɛ̀ â wə̄n enyəa, ‘Ghù tɔ̀ʼ lǒ ghùw ù kəfwàʼ ù bǐigh enyə! Yìa Ǹ so ghù mò mgbaŋ buʼ kəghu fɛ̄ â mùghò enyəa Ǹ nîizə̂a ndûw ndàŋ kə̀là ghù mò ki â mùghò a,

³³ghù mò bɔŋ yo sughò alekwuso ese a zəŋò ghùw wəla ghɛ̀ à wə̄n fwaʼà dzəŋlō a dzə̀m, tò aŋghəa M̀ mô kwusō sugho se zo a zəŋò ghù a?’

³⁴Mughùbè ù wə̄n vʉ m pfʉso kɔʼ unʉghà, nì tùm ndùw wə̄n an ndùghùtsāʼ enyəa ghe e buu wə̄n a fughu tò ù kè telè tsə ndàŋ kə wə̄n.”

³⁵Yɛso n daŋso dzɛ̀ tsùghù enyəa, “Bə̀ghà alo kəwālā kê bɔ̌ɔm ghəəŋ sùghò èzə̀, â ghùw wəla ù dòʼŋkè nîizə̂ bo e wàazə̀ am fə̂ŋ è wə̄n.”