Read Aghem Matìo 19 Bible Online

Matìo 19 - Aghem bible

Matìo 19

¹A m bùghò Yɛso kə̀a mɛʼɛ̀ tsughu shwaʼ wən wo, ù n zə̀ghàa tsùghù Galèlîi dàŋsə kɔʼ dzùghù è Dzodàn, dàŋ ndùw am mbùʼ è Dzùdîa a ŋgùŋ è lì ezə̂.

²Ndə̀mà tə aghì tə̀ n tə̂əŋ bwìi ndùw a bàâ wə̄n, ù m baaŋ kɔʼ à dzaŋā gho a fughu.

³Ghî a Falàsîi à li ghə n ndùw bùghò alebùghò baʼn kwu wə̄n, ghe m bvʉ̄ â wə̄n enyəa, “Lâŋ kə̀ boo nù enyəa ghùw lò nû alesɛ̀ɛ ghèe wì ù wə̄n abugho ghəa è li e sə kɔʼ ā, ŋkāa abugho ù tsə̀m tsughu aleghəŋlo êzə̀ à?”

⁴Ù m bɛ̀lɛ̀ tsùghù enyəa, “Ghɛ̀ kaām tɔɔŋ kòʼ am Mwàʼsò kə Kəzə̀ enyəa aletsoō kaʼa nughù wô, Zə̀ kə fə̀ bɔm tsughu aghî, wìnûu àsùghò wìzən?

⁵ Zə̀ kə̀ n dzɛ̀ tsùghù enyəa, ‘Zən lò e ghee wìnû kè zəghàan taʼn tsughuu zə̂ ghèe tsele ù ndùw təmadzəə̄ŋ kɔʼ ghèe wī, ghee a te gho a bə̀ghà kè doʼò tsughu kə fəgha kə mɔ̀ʼ.’

⁶À fi lo enyəa ghe kôom yò dzə̂ ghî ghò a bə̀ghà, ghe lo kəfəgha kə mɔ̀ʼ. E lo enyəa fəgha kə̀là Zə̀ kə̀ təmdzəə̄ŋ kɔʼ e kwo ko ghùw lo so e gbôo sɛ̂ɛ nù.”

⁷ Ghe m bvʉ â wə̄n enyəa, “À kǔuwn lǒ kwò Musî màʼa fə̀ fughu lâŋ kò enyəa mò ghùw so e sɛ̂ɛ ghèe wì ù wən a, ù m fùghù tsə̀ghà ndùw mwàʼsò kə ghùe è dzughū ko, daŋso sɛ̀ɛ tsùghu ghèe wə̀n à?”

⁸Yɛso n dzɛ̀ â ghee enyəa, “Musî fə̀ zəghāa tsughu enyəa ghɛ̀ è gboō sɛɛ̄ ghɛ̀ à ghê yi ghɛʼɛ̄ gho mbuu fə̂ŋ tɛʼɛ tə ŋgee tughuu nù, alekaʼā nughù wô, à mò yo dzə êzə̀.

⁹ Ǹ so Ǹ dzâa wô sughò â ghɛ̀ enyəa; abugho ghùw tue maʼa wi, mò à yò dzə̂ enyəa wi ù wə̄n sə nùuŋ nù, ghùw u te m fi sə nùŋlò.”

¹⁰Tsə̀təndə̄ghā tə n dzɛ̀ â wə̄n enyəa, “Abugho e lo êzə̀ â ghùw ghèe wì ù wə̄n, dzɔ̀ fi lo enyəa ghùw ka bìso nǐ wī.”

¹¹Ù ŋ kuuwn dzɛ̀ â ghee enyəa, “À yò dzə aghî a dzə̀m ghe lô alezuūwkɛlɛ̂ fəgha kəla Ŋ̀ kə̂a tsughu, à lo ko ghî ghəla Zə̀ kə̀ lo mo kə̂ ŋ ghee â tɔ u te u fughu.

¹²Nu ghî à lo nû mo ghe yo alenì àyi, mo ghe mò dzə tən wo ghee êzə̀, à li yia lo mò à ghə̌əŋ tsughu aghî enyəa ghe ka yi a nî, à li yia lo nîi yô yi gho bòʼ ghəa e fɔ̀e è kəwālā. Ghùw wəla ù lò alebôo ghəa zən, ù boo.”

¹³13 A m bùghò kô tsuʼ ù li wo, ghe n nì wò wɛghêtùghù a vʉ̀a Yɛso enyəa to ù mò gaʼā tsughu aghu an tuw u ghee, ù gɔ̀ɔŋ tsughu â ghee. Tsə̀təndə̄ghā tə ŋ kee ndùw ghì a te gho;

¹⁴Yɛso ŋ kuuwn dzɛ̀ â ghee enyəa, “Zə̀ghàa nlò wɛghêtùghu yi gho ghe bughò kôʼ mùghò, kǎ nlǒ ghee təghàsò sùghò; tɔŋlo enyəa fɔ̂e kəwālā u lɛɛn ŋgwàʼ zən.”

¹⁵Ù n daŋso gaʼ tsughu aghu an tuw u ghee, fughu tsughu ghee â bughuun zo. Ghəa ù mìasò tsughu, ù mo è nughu.

¹⁶Zə m bùghò sə kɔʼ enyəa ghùw ù lì bùghò kòʼ wò Yɛso, bvʉ â wə̄n enyəa, “Wàdè, Ǹ lo aleghəə̄ŋ tsughu ghəa è dzûŋ è ghɛ zo tò Ŋ̀ kê kele mùghùu zəla e doʼò tən à?”

¹⁷Yɛso n daŋso bvʉ â wə̄n enyəa, “À lǒ kwò ghù sò kì alebvʉā wô mugho â fəgha kəla kə dzɔɔ a? À lò ko sə e kətūw e ghûw ù mɔ̀ʼ, ù lǒ ghùw ù dzùŋ! Abugho ghù ləghaa alekelê mùghù è doʼn təla zo, e naaŋ lwâŋ u wə̄n wo.”

¹⁸ Ghùw ù te m bvʉ â Yɛso enyəa, “À lò lwâŋ ù ghɛ wo?” Yɛso n daŋso dzɛ̀ â wə̄n enyəa lwâŋ wəla u dzɛ̂ enyəa, “Kǎ ghùw wi, kǎ wi ù ghùw nyəŋè, kà tsɔŋ, kà doʼò bvʉ̂nɔ̀ʼ wə̀ agha.

¹⁹ E fughuu kɔʼso mò â zùghù ghèe tsùghò, ghù è ləghaa nduw sugho wàazùghù tò aŋghəa ghù ləghaa ghue wʉ̀a wò a te.”

²⁰Ghùw vʉ n dzɛ̀ â wə̄n enyəa, “Ǹ naaŋ nù lwâŋ wə̀n wo ù dzə̀m; à è zəŋ buw mugho â kwò kò à?”

²¹Yɛso n dzɛ̀ â wən enyəa, “Abugho ghù ləghaa aledòʼò ghùw ù tsəghatsəgha, ndǔw nǐi fěe tsughu fʉgha wəla ghù ki u dzə̀m, ghù dzughu kua u te wo â ghì à laa gho, tò ghù e ke kuuwn lo ghùw ù kǔu alo kəwālā; ghù daŋso nughu wo a bǎa mùghò tǒ tsə̀ndə̄ghā zaŋā.”

²²Ghəa ghùw vʉ zuw tsughu ghəa yi gho, ù n nùghù fùghù mo ù muŋe nù; tɔŋlo enyəa ù fə̀ ŋge ki ufʉgha.

²³Yɛso fi daŋso nùghù dzɛ̀ nû â tsə̀təndə̄ghā tə wə̄n to enyəa, “Kùmkùm, aŋghəa Ǹ dzâa wô fɛ â ghɛ̀, e lo tughuu tsə̀ghà nù â ghùwkǔu alenyə am fɔ̀e u kəwālā.

²⁴Ǹ so Ǹ dzâa kpeʼē wô â ghɛ̀ enyəa to kə̀anyòm kə̀ mbaā tsəghà nyə an sə e fəsāʼ tsə̀ghàtàʼà sə aŋghəa ghùwkǔu lo aletsə̀ghà nyə a te am fɔ̀e u Kəzə̀.”

²⁵Aŋghəa tsə̀təndə̄ghā tə zuw tsughu ghəa zən, tuw kə m kpuw ghee, ghe m bvʉ tsughu enyəa, “À kǔuwn lò ndugho alezə̄ kə̄tūw à?”

²⁶Yɛso ŋ kòom sɔʼ lɛɛn ko ghee enyə, dzɛ̀ tsùghù enyəa, “Â ghì ghò, e yo alesə̄. Â Zə̀ kò, aghəa a dzə̀m bùghuun nù alesə̄.”

²⁷Pità mo e bɛlɛ̀ nù, dzɛ̀ tsùghù enyəa, “Kòʼô, ghàʼ m fʉgha waʼa wo u dzə̀m zəghàa tàʼà ndùw, nùghù wò a bàâ ghù. Ghàʼ lô fi kuuwn kele kə̀ kwò?”

²⁸ Yɛso n dzɛ̀ â ghee enyəa, “Kùmkùm, ghəa Ǹ dzâa wô fɛ â ghɛ̀, am mbī è fughu è te, abugho Wɛ ù Ghùw kè doʼ an ndàŋ è kə̀də̀ŋ è wə̄n, ghɛ̀ e ke doʼ sugho alo təndàŋ eghəm à ghè tò tə bə̀ghà, saʼâ nàʼà mə Ezə̀lɛ̂ mən èghəm à ghè mò m bə̀ghà.

²⁹Ghùw wəla ù mò tso zəghàa maʼà wô dzə̂ waazə̂ ghò, zə̀ghàa wò tsele àsùghò zə̀, ŋkāa wɛ a wə̄n, sum e wə̄n, ŋkāa ndughu tə wə̄n, enyəa ù bughòo a bàâ mùghò, ù lo kelê fʉgha u te wo təbɔm, ù kele sughò mùghùu zəla e doʼò tən.

³⁰ Ndə̀m zəla è kuūwn lô sə ko êzə̄ŋ, ghe kê lò tsəgha kəbam, ghəla ghe lô bam ko êzəŋ, ghe kê kǔuwn lò kəsə.”