Read Aghem Matìo 2 Bible Online

Matìo 2 - Aghem bible

Matìo 2

¹Ghe fə̀ Yɛso dzə tsughu an naʼ e Bɛtə̀lɛ̀hɛ̂m am mbùʼ è Dzùdîa, an tì kəla Hɛlɔ̀d fə̀ lo də̀ŋ kǒ a te a fughu am mbùʼ e te. Ghî à tɔɔ à li ghə n zə̀ghàa tsùghù naʼ e ghee am bà kəla zuuw e səā wo a te, nyə̀ wò an Yɛ̀lusalɛ̀m, bvʉʉn wò enyəa,

²“Ghe də̀ŋ kə Tə̀dzûu kən fɛ dzə ghɛ? Ghàʼ kôʼ sə̀ghàbəlà fə wə̄n fə səgha sə kɔʼ wo an tsə kə̀ səa ko, ghàʼ yia daŋso sə kə̂m wô ko enyəa a bughò fughu wə̄n â kɔʼso wə̄n.”

³A m bùghò Hɛlɔ̀d zuw tsughu ghəa ghən gho ghèe ghê ghì a Yɛ̀lusalɛ̀m gho a dzə̀m, ghəa a te ghə m fəmso mìasò ndùw ghee enyə.

⁴Hɛlɔ̀d n daŋso tɔŋɔ naŋa tsughu tuw u təfɔ̀e u dzə̀m àsùghò ghê dèekə̀làŋ a dzə̀m fughu alo enaʼ, tɔ̀ʼ tɔ̀ʼn sə kɔʼ luʼu wəla ghe mò ki aledzə̄ Bəghambī wən a te aŋ ghùu ghee.

⁵Ghe n dzɛ̀ â wə̄n enyəa, “À lò an naʼ e Bɛtə̀lɛ̀hɛ̂m, am mbùʼ è Dzùdîa, tɔŋlo enyəa ghùwshʉ̀ghà fə̀ tɔm tsughu enyəa,

⁶ ‘Yia a bughò ghû a Bɛtə̀lɛ̀hɛ̂m, aŋ ghueekətsə̄ kə Dzudà, ghù dɔ̀m yò dzə kə̀nughùnùghù an tuw wə enaʼ fɛ am mbùʼ è Dzudà. Tɔŋlo enyəa à kè lò fɛ, də̀ŋ kəla kə kê lɛnlō â ghì ghaŋa gho a dzə̀m kè səā kɔʼɔ̄, tɔ̂ɔŋ ghì ghə Ezə̀lɛ̂.’ ”

⁷Hɛlɔ̀d n daŋso nyɛʼɛ tɔŋɔ tsughu ghî a tɔɔ yì, bvʉ tɔ̀ʼn kɔʼ nəgha zəla ghe mò tso zeʼē kôʼ kɔʼ sə̀ghàbəlà fə̀n a te, aŋ ghùu ghee.

⁸Ghəa ù tɔʼn sə kɔʼ dzə êzə̀, ù n zə̀ghàa ndùw ghee enyəa ghe ndûw fughu am Bɛtə̀lɛ̀hɛ̂m, dzɛ̀ â ghee enyəa, “Ndùw nlò, ghɛ̀ tɔʼ kəŋ sə kɔʼ luʼū kəla wɛ ù te lo a te. Abugho ghɛ̀ kôʼ tsughu, ghɛ̀ ghəəŋ tsughu enyəa Ŋ̀ kele, tò M̀ bɔŋɔ̄ ndûw kɔʼso sughô wə̄n.”

⁹Ghəa ghe mîasò tsughu ghèe ghê də̀ŋ kə te ko, ghe n zə̀ghàa tsùghù alesəā nùghù daŋso. Ghe mo e daŋso səa wò fughu, ghe ŋ kòom kòʼ kpèʼe kɔʼ sə̀ghàbəlà fia ghe mô bûʼ kôʼ dzə.Sə̀ghàbəlà fə te fə n ndûuw ko â sə ko, ndùw těe dòʼò kɔ̀ʼ an də̀ŋò kəla wɛ vʉ lo a te.

¹⁰Ghəa ghe tso kôʼ kɔʼ sə̀ghàbəlà fi êzə̀, ghe n duʼn mìasò ndùw ènyə.

¹¹Ghe mo e ndûw nyə̌a tsughuu a fughu an ndughu, ghe n nyə̀ kòʼ ndùw zə̂awɛ̀ vʉ̀, tɔɔŋ Mèle, ghèe wɛ ù te. Ghe n təm ndùw tə̀ŋguʼ a vʉ̀a wə̄n, fughu ŋ ŋkɔʼso â wə̄n. Ghe n daŋso sɛ̀ɛ sə kɔʼ fʉgha wəla ghe mô boʼò kele, səso namso tsughu wɛ vʉ alo etsɛ̀, àsùghò nyeē zo, àsùghò an ŋgòʼ è vʉ n lə̀mlo n lǐ mò, ghe tɔŋlo enyəa à lò Mayà.

¹²Ghe mo e nughùnlò èbàm, ghe n sə wā tsughu dzì è nùghù, Zə̀ kə màʼa fə̀ kʉ̂ɛɛn tsughu ghee an dzǒo enyəa, e kwo ghe lô dɔ̂m luʼū alekòom ndûw èbàm alô Hɛlɔ̀d.

¹³A m bùghò ghî à tɔɔ yi zəghàa tsughu, tsə̀ndə̄ghā è Kə̀zə̀ n ndùw bùghò a vʉ̀a Dzùghùsî an dzǒo, dzɛ̀ â wən enyəa, “Nùghu kɔʼɔ̀, ghù ni kɔʼ wɛ̄ wə̄n ghèe zə̀, ghɛ̀ ti tsughu an Edzìpt, ghɛ̀ doʼo ko a fughu, Ŋ̀ kê telè dzâa wô â ghɛ̀ enyəa ghɛ̀ kwən nyə; tɔŋlo enyəa Hɛlɔ̀d kə̀ŋo kaaŋ wɛ wən alewiī maʼà.”

¹⁴Ù fi nughù kɔ̀ʼ sùghò nù, nì kɔ̀ʼ zə̂awɛ̀, ghèe wɛ̀ ù te, nùghù tsùghù ndùw an Edzìpt â tsuʼ wo.

¹⁵ Ù n dòʼò ko a fughu êzə̀, Hɛlɔ̀d m bùghò kpùw è tsughu. Zən fə̀ lo aleluesō tsughu lâŋ kə ushwaʼ wəla Mughù ù te fə̀ kə̂a wo â ghǐishʉ̀ghà ghò enyəa, “Ŋ̌ wɛ waŋā tɔŋɔ sə̀ wò an naʼ zə Edzìpt.”

¹⁶A m bùghò Hɛlɔ̀d bùghò kele kɔʼ enyəa ghî à tɔɔ yi ghə ŋ wə̄n lôʼsò, ù m pfʉso mìasò ndùw ùnʉ̀ghà ènyə, daŋso tsə̀ghàsò tsùghù kəlâŋ enyəa ghe wîin wɛ à nûu ghəla ghe lô mo ghe kaām kɔʼ tsə̀ghà nûu tò tə bə̀ghà an nāʼ e Bɛtə̀lɛ̀hɛ̂m àsùghò am mbùʼ è te, aŋghəa ù fə̀ tɔʼn kele kɔʼ aŋ ghùu ghì à tɔɔ yì.

¹⁷Ghəa ghən fə̀ fɛ sə kɔʼ alelueso tsughu lâŋ kə fəgha kəla ghùwshʉ̀ghà Dzɛ̀lɛ̀mîa fə̀ dzɛ̂ naŋa enyəa,

¹⁸ “Ghe zuw bɔŋ kə edì kə kûm zɛʼɛ̄ wo an Lamàʼ, Lashìɛl, ù dìi wɛ a wə̄n gho; vʉ̀ ù tue enyəa ghe ka wən gɔ̂ŋlò, bòʼ wɛ a wə̄n ghə m kpuwnlō.”

¹⁹Hɛlɔ̀d n daŋso bùghò kpùw è tsughu, tsə̀ndə̄ghā è Mughu ù te n ndùw bùghò an dzǒo, dzɛ̀ â Dzùghùsî enyəa,

²⁰“Nùghu kɔʼɔ̀, nǐi kɔʼ wɛ wə̄n ghèe zə̀, ghɛ̀ à ghee nduw ebàm an naʼ zə Ezə̀lɛ̂; tɔŋlo enyəa ghî ghəla ghe mò kəŋo dzì alewiī maʼà wɛ ù te, ghe m kpuwnlo.”

²¹Dzùghùsî n nùghù kɔʼ è sugho, nì kɔʼ sùghò wɛ vʉ̀ ghèe zə̀, ghe n nùghù ndùw èbàm an naʼ zə Ezə̀lɛ̂.

²²Ghəa Dzùghùsî zuw tsughu enyəa à ndàŋ è Hɛlɔ̀d kɔ̀ʼ kɔʼ Akīlòs, wɛ̀ ù Hɛlɔ̀d ùnu, ù n tsəŋ ghaʼ tsughu aledòʼò a fughu, ù n ndùw tsə̀ghà kɔʼ daŋso ndùw am mbùʼ è Galèlîi, bòʼ tsə̀ndə̄ghā e Kə̀zə̀ fə̀ bughò tsʉ tsughu wə̄n an udzǒo.

²³ Ù n ndùw mùghù ndùw fughu an naʼ è li zo ghe fə̀ tɔŋlo enyəa à lò Nazalɛ̀t, enyəa e bɔɔ̄m səā kpeē ndûw an shwaʼ wəla ghiīshʉ̀ghà a fə̀ dzɛ̂ naŋā kùu ndùw Yɛso enyəa, “Ghe lô wə̄n tɔŋlo enyəa à lo ghùw ù Nazalɛ̀t.”