Read Aghem Matìo 20 Bible Online

Matìo 20 - Aghem bible

Matìo 20

¹“Fɔ̂e u kəwālā u lo tǒ ghùw ù lì ù fə̀ gbən sə tsughu alendùw kəŋ ghî à kəfwàʼ enyəa ghe soʼō fwâʼ an sum u wə̄n.

²Ghəa ghe boō naŋā tsughu fəgha kəla ù ki aletsə̄ ghee a te alo fətsūʼ, ù n tùm sòʼ ndùw ghee an sum u wə̄n.

³An tàm tə ezuuw tɛ̀ndzughu a gbə̀làgbə̀là to, ù ŋ kòom sə̀ è ndùw, ndùw kòʼ tsùghù aghî ghe laŋà lô kaŋlō am fwàan wə enaʼ

⁴ù n dzɛ̀ â ghee enyəa, Soʼ fwàʼa sùghò nlò an sum waŋā, Ǹ sô tsə̌a nù ghɛ â fəgha kəla kə kwuū ghəa zo. Ghe n sòʼ ndùw è sugho.

⁵An zùuw è kɔʼɔ teme zo, ù n sə kpeʼe è nduw, kòom bùghò sə kpeʼe ndùw an tàm tə ezūuw tə təgha an zùuw è bəŋo zo, səa ghəəŋ kô ghəa è mɔʼɔ̄ zo.

⁶An tàm tə ezūuw tə tɛ̀ an nə̀ghà è guŋsò zò, ù n sə kpeʼe è ndùw, ndùw kòʼ kpèʼe ndùw àghì ghe ti kaŋlō; ù m bvʉ tsughu â ghee enyəa, ‘À lǒ kwò ghɛ̀ bughò laŋà teēn zeē ndûw fɛ kənughùnùghù a?’

⁷Ghe n dzɛ̀ â wə̄n enyəa, ‘À lǒ bòʼ ghùw kà ghàʼ alo kəfwàʼ nî.’ Ù n dzɛ̀ â ghee enyəa, ‘Soʼ fwàʼa sùghò nlò an sum waŋā.’

⁸ A m bùghò nəgha è kwəla e kpe tsughu, mughu ù ùsum n dzɛ̄ â ghùw wəla ù lɛɛ̄n ghî a kəfwàʼ ghò enyəa, ‘Tɔŋɔ tsughu ghî a kəfwàʼ ghò ghù tsə ghee. Zǐi tsughu a zəŋò ghì ghəla ghe mô soʼ nyə gûŋsò wo, ghù è kɔʼɔ nduw.’

⁹Ghî ghəla ghe mô ni ghee alo kəfwàʼ an tàm tə ezūuw tə tɛ̀ an nə̀gha è guŋsò zò, chìa n nîi ndùw ko kua u fətsuʼ.

¹⁰A m bùghò ghî ghəla ghe mô soʼ nyə esə̄ ndûw bugho, ghe n chîi ko tùʼ enyəa ghe sô nìi ndə̀mà tə ukʉ̄a, ghe n nì ndùw sùghò kua u fətsuʼ, kua u fətsuʼ.

¹¹Ghəa ghe nî kɔʼ kua u ghee wo, ghe ŋ kàʼ ndùw alesaʼ mughu ù usum ù te,

¹²dzàa tsùghùu enyəa, ‘Ghî ghə ebàm ghən fwâʼ ko an tàm zə̀ èzuuw e mɔ̀ʼ, ghǎʼ yia tsughu zeē fɛ̀ alo kəfwàʼ am bòobò kə tsə̂ kən, ghù vʉ̀a ghù bùghò tsə dzəə̄ŋ wo ghàʼ à ghee eghəla.’

¹³Mughu ù sum vʉ kuuwn bɛ̀lɛ̀ tsùghu ko ghùw ù ghee u mɔ̀ʼ enyəa, ‘Kòʼo ghùw waŋa, Ŋ̀ kâ ghɛ̀ tsê dzə̀, yìa n so a mô bǒo naŋa fəgha kəla Ŋ̀ ki aletsə̄ ghɛ a te alo fətsūʼ a?

¹⁴Nǐ nlò kua wɛʼɛ wo ghɛ̀ nughu e zɛʼɛ zo, à tsə̀m tsùghù mugho enyəa Ŋ̀ ki aletsə ghɛ̀ à ghê ghì ghə ebàm ghən eghəla.

¹⁵À lò enyəa Ŋ̀ yo aleghə̂əŋ ghəa zəla Ǹ tsəm tsughu aŋ kua waŋa a? Ŋkāa ghɛ̀ mʉʉn nù enyəa M̀ mwaʼà nù à?’ ”

¹⁶Yɛso n tsughu tsən tsughu enyəa, “Ghî ghəla ghe lô bam ko lo bùghòo dòʼn kə̀sə, ghəla ghe lô se ko kê bughò doʼò kə̀bam.”

¹⁷A m bùghò Yɛso nùghù tsughu enyea e kɔʼɔ ndùw an Yɛ̀lusalɛ̀m, ù n ghəəŋ tsughu enyəa tsə̀təndə̄ghā tə wə̄n tən èghəm à ghè tò tə bə̀ghà kuʼsō doʼò wô ghèe ghee, ù n nyɛʼɛ dzɛ̀ â ghee enyəa,

¹⁸“Kòʼô nlò, sɛ̀ fɛ kɔʼɔ ndùw an Yɛ̀lusalɛ̀m: a fughu, ghe lo nìi fùghuu ndùw Wɛ̀ ù Ghùw â tuw u təfɔ̀e wò ghèe ghê dèekə̀làŋ, ghe lo fughuu tsughu kədaʼa enyəa ghe wiī maʼà wə̄n.

¹⁹Ghe lo daŋso fughuu tsəghà ndûw wə̄n â Tòʼò zò ghe lo sûuwn wə̄n, ghe bu wən alo təkwùu, ghe daŋso nîi təghàa kɔʼ wə̄n, Zə̀ kə̀ lo zôo nughù kɔʼ wə̄n alo evʉ̄ bugho tsuʼu m kê kpe tsughu n təgha.”

²⁰Wi ù Zɛ̀bɛ̀dêe n sə̀ kɔʼ wò a vʉ̀a Yɛso ghèe ghê wɛ a wə̄n à nûu ghə̀n à bə̀ghà tɔɔŋ Dzɛ̂ms ghèe Dzɔ̌n, sə kɔʼ nyaʼa ndùw a tsəlà wə̄n, nɔ̀e ndùw wə̄n â yòsò zò.

²¹Yɛso m bvʉ â wə̄n enyəa, “Ghù lə̀ghaa kə̀ kwò à?” Ù dzɛ̀ â wən enyəa, “Dzǎa naŋa tsughu enyəa abugho ghù kè lo də̀ŋ kò, wɛ ghaŋā à nûu ghə̀n à bə̀ghà ke dōʼ ghɛ̀ à ghee, u mɔ̀ʼ aŋ kwe wʉ̂a ù təma wo, u mɔ̀ʼ alô ù kwû wò.”

²²Yɛso m fwə̀n bɛ̀lɛ̀ tsùghu ghee enyəa, “Ghɛ̀ kwò yo fəgha kə̀là ghɛ̀ bvʉā ghè kò. Ghɛ̀ lò nû alezūw ŋgoʼ zəla Ŋ̀ ki alezuw a?” Ghe mo â wə̄n enyəa, “Òo, ghàʼ lo nû.”

²³Ù n dzɛ̀ â ghee enyəa, “To ghɛ̀ zuw ŋgoʼ zaŋā, alekuūwn doʼò aŋ kwe waŋa u təma wo ŋkāa ù kwû wò, à yò mugho aledzɛ̀. Luʼū tən kuuwn lɛ̂ɛn ghì ghəla Bəghà fəghaan naŋā â ghee.”

²⁴A m bùghò tsə̀təndə̄ghā tə wə̄n tə̀ li tə̀n èghəm zuw tsughu ghəa yi gho, ghe m pfʉso n nə̀ghà a zəŋò waazə̂ à li yi a bə̀ghà.

²⁵Yɛso fi tɔŋɔ tsughu nu tsə̀təndə̄ghā tə wə̄n to tə dzə̀m dzɛ̀ â ghee enyəa, “Ghɛ̀ kwo enyəa dwə̀ŋ u mbī u kɔʼ nyaʼa an tuw u ghì a ghee, ghî a ghee à ne yia dêe dwaʼa wo a zəŋò ghee.

²⁶E lo yò dzə̂ êzə̀ am bvʉa zɛʼɛ̄, ghùw wəla ù so e doʼò ghùw ù nè am bvʉa zɛʼɛ̄ ki aledòʼò tsughu ghùw ù kə̀ fwàʼ â ghì à li ghən a dzə̀m.

²⁷Ghùw wəla ù so e doʼò sughò kə̀sə am bvʉa zɛʼɛ̄ ki aledòʼò tsughu kɔ̂ɔ fɛʼɛ.

²⁸E fɛ lò sugho tò aŋghəa Wɛ̀ ù ghùw fə̀ bughò enyəa ù e fwə̂ən fwaʼā â ghì ghò, à yò dzə̂ enyəa ghî ghə̀ è fwaʼa â wə̄n, àsùghò enyəa ù fughuu ndûw tuw kə wə̄n alezuū sə tuw u ndə̀m è àghì.”

²⁹A m bùghò Yɛso zə̀ghàa tsughu Yɛ̀lekò, saʼ kə aghì kə̀ n tə̀ŋɔ̀ nùghù ndùw a bǎà wə̄n.

³⁰A mo e kôʼ ghì à foō à li gho a bə̀ghà ghe mò doʼ fughu aŋ kwàn u dziī ŋ kaʼ tsughu bɔ̀ŋ m bùʼn mò aŋghəa ghe zuw tsughu enyəa Yɛso tsə̀ghàa nù; ghe n dzâa tsùghùu enyəa, “Kwuso se zo a zəŋò ghàʼ a, wɛ̀ ù Dɛvìd!”

³¹Ghî ghə̀ ŋ kee ndùw ghee enyəa ghe zuūw doʼò mɔŋ; ghe ŋ kôom fə̀ghaan ŋgee buʼn səa kɔʼɔ mbɔ̀ŋ enyəa, “Wɛ̀ ù Dɛvìd, Mughùbè, kwuso se zo a zɔŋò ghàʼ!”

³²A m bùghò Yɛso zuw tsughu, ù n têe è tsughu, tɔŋɔ tsughu ghee, bvʉ â ghee enyəa, “Ghɛ̀ ləghaa enyəa Ŋ̀ ghəŋlo ênzə̂n â ghɛ̀ a?”

³³Ghe n dzɛ̀ enyəa, “Mughùbè, ghàʼ ləghaa enyəa ghù ghəəŋ tsughu ghàʼ è koʼō luʼu to.”

³⁴Yɛso ŋ kwuso tsughu ese, mɔ̀m tsùghù sə a ghee, ghe n daŋso kàʼ ndùw luʼū tə̀ koʼō to, ghe n nùghùu ndùw a bàâ wə̄n.