Read Aghem Matìo 21 Bible Online

Matìo 21 - Aghem bible

Matìo 21

¹A m bùghò Yɛso kuʼso nduw an Yɛ̀lusalɛ̀m ghèe ghê tsə̀təndə̄ghā tə wə̄n to, ghe m bùghò an naʼà fə Bɛtfàch aŋ kwàʼ u tə̀ Olèf[11], ù n daŋso tum tsughu tsə̀təndə̄ghā tə bə̀ghà,

²dzɛ̀ â ghee enyəa, “Nyə ndǔw nlò an nāʼ zə̀ â sə ko, ghɛ̀ nduw koʼ tsughu zə̂ ù fə̀ ndzàkâs ghe təŋò naŋā, àsùghò tsʉa fə̀ndzàkâs ù nûu wò am bùghu e wə̄n, ghɛ̀ ze tsughu ghɛ̀ bugho â ghə̀ wò.

³Abugho ghùw bvʉ ghɛ â ghəa zo, ghɛ̀ dzɛ â wə̄n enyəa, ‘Mughu ù te ki kə fwàʼ a te.’ Ù sò daŋso zəghàa wô.”

⁴Ghəa ghən fə̀ bəla kə ni kɔʼ alelueso tsughu lâŋ kəla ghùwshʉ̀ghà fə̀ dzɛ̂ naŋā enyəa,

⁵ “Dzǎa ndùw â wɛ a Zayòn ghò enyəa, Kòʼo nlò, Də̀ŋ kɛʼɛ chia kə bughōo a vʉ̀a ghɛ̀! Ù lò an zʉ̀ kə ughùe mò ù nyàʼ alo fəndzàkâs, an tsʉa u fəndzàkâs.”

⁶Tsə̀təndə̄ghā tə te tə m bɔ̄ɔm ndùw ghə̌əŋ ndùw sùghò fəgha kəla Yɛso mò teso â ghee;

⁷nì wò ndzàkâs fə te fo, à tsʉ ù nûu vʉ̀, tsɔʼ zəghaan kɔʼ dàlà tə ghee a te, Yɛso ŋ kɔ̀ʼ dòʼò kɔʼ a te.

⁸Ndə̀mà tə aghì tə̀ an saʼ kə aghì chi n zîi ndùw ndzʉ tə ghee an dziī, à li ghə n chwɛɛn wò ùchʉghā, zìi wò an dziī.

⁹ Nɔ̂e kə aghì kəla kə mò ndûuw esə, à kəla kə mò bughōo ebàm, ŋ kāʼ tsughu alefughu mbaŋa â wə̄n enyəa, “Hòsanà, hòsanà, â wɛ ù Dɛvìd luu! Bughunlo e lo â ghùw â ghûw wəla ù bùghò an zən e Mughu ù te! Hòsanà alo kəwālā luu!”

¹⁰Ghəa ù nyə ndûw an Yɛ̀lusalɛ̀m, naʼ zə n tee kɔʼ alo efwēe, ghî ghə m bvʉ enyəa, “Wən lò ndugho a?”

¹¹Ghî à mo enyəa, “Wən lǒ ghùwshʉ̀ghà Yɛso, ù sə wo an Nazalɛ̀t, am mbùʼ è Galèlîi.”

¹²Ghəa Yɛso nyə nduw an Yɛ̀lusalɛ̀m, ù n ndùw nyə̀ ndùw am be kə ndùghù è Kə̀zə̀ e ne, bù dzùm sə aghî ghe mò fêen fʉgha wo a fughu, àsùghò ghəla ghe mò zuenlō. Ù n təm pfʉʉn kaaŋ tsə̀ghà gbàʼ u ghì ghəla ghe mò fêen səa kə̀a mò â ghì ghò, təghaa màʼà sùghò ndàŋ tə ghì ghəla ghe mò feēn mbuŋū to.

¹³ Ù n dzɛ̀ â ghee enyəa, “Ghe tɔm naŋa am mwàʼsò kə Kəzə̀ enyəa Zə̀ kə̀ dzɛ̂ enyəa, ‘Ghe lô Ndughu zaŋā è ne kwo enyəa à lò ndùghù ègɔ̀ŋlo.’ Ghɛ̀ yia kuūwn nî naŋā tsughu enyəa, à lò seen kə ghì à tsɔŋɔ gho.”

¹⁴Ghî à foō ghə m bùghò kòʼ wò Yɛso a fughu am Ndùghù è Kə̀zə̀ e ne, àsùghò ghì à ŋgɔɔn bwiī gho, ù m baaŋ kɔʼ ghee.

¹⁵A m bùghò tuw u təfɔ̀e ù kôʼ ghəa yi gho ghèe ghê dèekə̀làŋ, fɛ̀ɛn tə aghəa tìa ù mò ghəŋlo, àsùghò aŋghəa wɛghêtùgho a mò fəghaan buʼn sugho bɔ̀ŋ mò a fughu an Nùghù è Kə̀zə̀ e ne enyəa, “Hòsanà, wo wɛ̀ ù Dɛvìd luu.” Nə̀ghà mə̀ n tɔ̀ ndùw ghee enyə.

¹⁶ Ghe fi daŋso bvʉ̀ ndùw nù â Yɛso enyəa, “Ghù zǔuw ko nù fəgha kəla wɛ a yi dzɛ̌ a?” Yɛso n dzɛ̀ â ghee enyəa, “Ǹ zuuw nù, ghɛ̀ kaām kuūwn tɔɔŋ kòʼ shwaʼ u Kəzə̀ wən wo a? Wəla u dzɛ̂ enyəa, ‘Ghù zòʼn tsughu wɛghêtùghu àsùghò ghəla ghe naām nyɔŋɔ̄ ghe zo, enyəa ghe e fughuu kɔʼso mò â ghù.’ ”

¹⁷A m bùghò Yɛso zə̀ghàa tsughu ghî yi gho, ù n sə̀ nùghù ndùw fughu alo enaʼ, ndùw bwǐi ndùw am Bɛtānì.

¹⁸A m bùghò Yɛso gbəla kwəla nyəā wo a fughu alo enaʼ ebàm, à n lo mò dzə̀ŋ zǎa wə̄n.

¹⁹Ù ŋ kòʼ ndùw kâʼ fə fîʼ fə̀ li fo aŋ kwàn u dziī, ù n ndùw fughu a tsəla fəkàʼ, kòʼ tsughu ko tə̀fòo, kè tsuʼ kətam alo esə. Ù n daŋso dzɛ̀ â kàʼ fi te fo enyəa, “To ghù kà mò kòom tsò mʉ̀ kòʼ tsə̀ghà tam ko!” Kâʼ fə te fə ŋ gwə̀n tən tsughu ko an nə̀gha e te zo.

²⁰A m bùghò Tsə̀təndə̄ghā tə kôʼ ghəa zə̀, dzughu zə n zum ghee, ghe m bvʉ enyəa, “Kâʼ fən enyə vùuŋ nùghù gwə̀n tsùghu kwò enyə à?”

²¹ Yɛso n dzɛ̀ â ghee enyəa, “Ǹ so Ŋ̀ kûu dzâa wô â ghɛ̀, abugho ghɛ̀ lò mò ghù ŋ kùm bǒo fughu, kòom sə̀əm yò, ghɛ̀ sò lɛ̌ɛn ghəəŋ ko yo ghəa ghəla Ŋ̀ ghəə̄ŋ tsughu fɛ â kâʼ fən fo. Abugho ghɛ̀ bùʼ dzɛ̂ tsughu ko enyəa, to kwâʼ wən mô nughù kɔʼ fɛ u məla nyəā tsughu alo enyʉ̀, e sô bɔɔm dòʼn sùghò èzə̀.

²²Abugho ghɛ̀ bvʉ tsughu ko ghəa è ghɛ zo, mò ghɛ̀ gɔ̂ɔŋ tsughu nù, ghɛ̀ mò è kele, abugho ghɛ̀ boō fughu tən tsughu â Zə̀ kò.”

²³A m bùghò Yɛso ndùw nyə kpeʼe nduw an Ndughu è Kə̀zə̀ e ne, fɔ̀e tə̀ tughu to ghèe ghê tsoʼ tə enaʼ to m bùghò kòʼ wò wə̄n mo vʉ̀a ù zoʼn ghî ghò, ghe m bvʉ â wən enyəa, “Ghù ghəa ghən ghəŋlo an daʼa kə ndugho ko a? À ghù â daʼa kə te kə fughu ndughoo a?”

²⁴Yɛso m bɛ̀lɛ̀ ndùw ghee enyəa, “M̀ bvʉa wò sùghò nù ghɛ â ghəa zo, abugho ghɛ̀ sô bɛlɛ̀ wô mugho, Ǹ sô daŋso dzâa wô ghɛ̀ â luʼū kəla daʼa kaŋa kə nughù wo a te â mùghò aleghəəŋ ghəa ghən gho.”

²⁵Ù n daŋso bvʉ̀ ndùw â ghee enyəa, “À mò daʼa ko â Dzɔ̌n wəla ù fughuu ghî ghò â mùghù ŋ Kə̀zə̀ mò fughu ndugho a, alekəma ghî ghò a? À mò lo Kəzə̀ ŋkāa ghùw a?” Ghe ŋ kàʼ ndùw fom tə̀ baaŋ to alo eghùe enyəa, “A lo aledzàa ndûw èndughō? Abugho a bɛlɛ̀ ndûw enyəa, ‘À mò lo Kəzə̀.’ Ù sò dzɛ̂ enyəa, ‘À sò lǒ kwò ghɛ̀ màʼa fə̀ taʼkè boō fughuu ndûw â wə̀n à?’

²⁶A yo sugho aledzɛ̀ enyəa, ‘À mò fughu ghùw nsɔ̌ɔŋnchùw.’ Sɛ̀ sô tsəŋo ghaʼā ghî ghò; nu ghe maā boo fughu enyəa Dzɔ̌n mò kum lo ghùwshʉ̀ghà.”

²⁷Ghe fi nughù bɛ̀lɛ̀ ndùw nù Yɛso enyəa, “Ghàʼ kwo dzə yo.” Ù n daŋso dzɛ̀ ndùw ghee enyəa, “À fi lo enyəa Ǹ dzâa sùghò yò ghùw wəla u fughu mugho â daʼa ko aleghəəŋ ghəa ghən gho a te.”

²⁸Yɛso ŋ kòom dzɛ̀ kpèʼe ndùw â ghee enyəa, “Ghɛ̀ moʼò èndugho an shwaʼ wən à? Tûwbʉ̀ghà ù lì fə̀ ki wɛ a wə̄n à nûu ghò a bə̀ghà, ù n ndùw alo ù sûesʉ, dzɛ̀ â wə̄n enyəa, ‘Ŋ wɛ̄, ghù nɛ e soʼō fwaʼà zee an usum mā.’

²⁹Ù mo â tsele enyəa, ‘Ǹ soʼo dzə̀ yò.’ Ù ŋ kòom nùghù kǔuwn kɔʼ fə̀ŋ è wən ebàm, nùghù sòʼ è nduw.

³⁰Ghùw vʉ n ndùw alô ù lī wən, bɔɔm dzɛ̀ sùghò ghəa è mɔʼɔ zo. Ù te m boo è kɔʼ, dzɛ̀ enyəa, ‘Ǹ soʼo nù.’ Ù ŋ kè kuūwn kôom soʼ.”

³¹Yɛso m bvʉ tsughu â ghee enyəa, “À mò lo wɛ ù ghɛ̌ wò aŋ ghee a bə̀ghà a, ù mò fwaʼ fəgha kəla tsele mò ləghaa ghè kò a?” Ghe m bɛ̀lɛ̀ tsùghù enyəa, “Ù sûesʉ wə̄n.” Yɛso n dzɛ̀ â ghee enyəa, “Kùmkùm, aŋghəa Ǹ dzâa wô fɛ â ghɛ̀, ghê dzə̀akə̀mwàʼsò lo kɔʼɔ tàʼŋ ghɛ̀ alo kəwālā ghèe ghê kpàlà[12] wò.

³² Dzɔ̌n mò bugho a vʉ̀a ghɛ̀, alebùghò dêe wô ghɛ̀ â dzì zəla è lò tsəghatsəgha, ghɛ̀ ŋ kè boō fughu â wə̄n. Ghê dzə̀akə̀mwàʼsò m fwə̀n bǒo fùghù ndùw â wə̄n ghèe ghêe kpàlà wò. Ghɛ̀ m bùʼ kòʼ kô ghəa yì èzə̀, kè buʼù dzɛ̂ enyəa ghɛ̀ ti kuwnlo, ghɛ̀ boo fughu nduw â wə̄n.”

³³ Yɛso n dzɛ̀ â ghee enyəa, “Zəən tsughu nlò kwə̀ən kə ushwāʼ kə̀ li kən. Mughùbè ù lì fə tam tsughu kàʼ n utwām an sum u wə̄n, bɛ̀nlò è kɔʼ. Ù n tsəm naŋa tsughu etsugho, zəla ghe tsaʼā lʉ̀ mò a te, ti kɔʼ laŋ kə̀ chiīn ko, nì tsòʼò fùghù sə̀ ndùw â ghì à li gho, ù n sə̀ bwìnlò è nduw.

³⁴A m bùghò twam u te u bughò baāŋ tsughu, ù n tum tsughu kɔ̀ɔ ŋ wə̄ enyəa ghe ndûw nîi wô tuʼ e wə̄n aŋ ghùu ghì a te gho.

³⁵Ghî ghəla ghe fə̀ nîi sum vʉ wo ŋ kwu tsughu kɔ̀ɔ ŋ wən mì, zàʼ fə li fo alo ŋkwə̀n, wi màʼà fə̀ li fo, təəm fə̀ li fo alo atīa.

³⁶Ù ŋ kòom tum kpeʼe tsughu ŋkɔ̂ɔ mò mə̀ n tsə̀ghàsə̀ məla ù mò bûʼ tum; ghe m bɔɔm ghəəŋ tsùghù sùghò ghəa è mɔʼɔ̄ zo a zəŋò ghee.

³⁷Ù n dzɛ̀ tsùghù am fə̂ŋ è wən enyəa, ‘Ghe sô nə̌əŋ zūuw nù â wɛ̀ waŋā.’ Ù n tùm gùŋsò tsùghu wɛ̀ ù wən ù nùu.

³⁸A m bùghò ghî ghəla ghe fə̀ nî sum vʉ wo fəghaan tso kôʼ tsughu wɛ vʉ̀, ghe n saan tsughu aŋ ghùe e ghee enyəa, ‘Wən nyɔ̀ʼ lǒ zə̀abè ù wə̄n, bùghò nlò to a wi wə̄n, a nîi kelê fʉgha u wə̄n.’

³⁹Ghe ŋ kwu tsughu wə̄n, sè nùghù sə̀ ndùw wən an usum, ndùw wi è nduw.

⁴⁰Abugho mughu ù ùsum wən ndùw bugho êzə̄ŋ, to ù dzə̀ ênzə̂n â ghì à tsoʼō niī a usum yì à?”

⁴¹Ghî a Falàsîi yì, ghèe ghê dèekə̀làŋ m bɛ̀lɛ̀ ndùw Yɛso enyəa, “Ù wîi nǔ bòobò tə aghì tə te to aŋ ŋgòʼ è dzì è bǐigh è lòʼ ènyə, ù fəŋsō nîi tsoʼò fughuu səā ndûw sum u te wo â ghì ghəla ghe lô alebɔŋɔ fughuu sugho tuʼ e wə̄n zo abugho nəgha e te e kpe tsughu.”

⁴² Yɛso n dzɛ̀ â ghee enyəa, “Ghɛ̀ kaām tɔɔŋ kòʼ ghəa ghəla ghe tɔm naŋa am Mwàʼsò kə Kəzə̀ enyəa: ‘Tia è mɔʼɔ̄ zəla ghê bɔ̀ɔtə̀ndughu mò bâʼ naŋa sə kɔʼ ŋ kòom bùghò dòʼò nùm ù etìa e buw e ndughu; À fə̀ ghəa ghən ghəəŋ Mughu ù te, yia a fɛ̂ɛn koʼo an sə a sɛ̀.’

⁴³Zən lò e ghee Ǹ so Ǹ dzâa wô â ghɛ̀ enyəa, ghe lo nìi nùghùun kɔ̀ʼɔ̂ fɔ̀e u Kəzə̀ aŋ ghùu ghɛ̀, ghe nîi fughuu ndûw â ghî ghəla ghe lo aleghəŋlo ghəa è dzûŋ e səā wô a te.”

⁴⁴[Ghùw wəla ù bvʉ̀ an tia zən, ù n sàan tsùghù alo nsàa, abugho tia e te e kuūwn tsughu bvʉ̂ tsughu a zəŋò ghùw, zə n ndzàʼsò màʼà tsùghu wə̄n.]

⁴⁵Ghəa tuw u təfɔ̀e ù zuw tsughu kwə̀ən kə ushwāʼ kə wə̄n kən ghèe ghê ghì a Falàsîi ghò, ghe n nì ndùw enyəa ù mò fi kə̂a a ghee.

⁴⁶A m bùghò ghe kəŋo dzì alekwū wə̄n, ghe m bùghò tsə̀ŋ kòom tsùghù aghî, ghî a màʼa fə̀ ki wə̄n a fughu alo enaʼ tǒ ghùwshʉ̀ghà.