Read Aghem Matìo 22 Bible Online

Matìo 22 - Aghem bible

Matìo 22

¹Yɛso ŋ kòom kwə̀ən kə̀a kpèʼe ndùw àghəa â ghì yi gho enyəa,

²“A lo alenìi bâan ndûw fɔ̀e ù kəwālā ghèe də̀ŋ kə̀ li ko kə fə̀ so e zɔ̂ʼ àghì enyəa wɛ̀ ù wə̄n nî tsùghu wī.

³Ù n tum tsughu kɔ̀ɔ u wə̄n enyəa ghe ndûw tɔɔ̄ŋ kaāŋ wô ghì ghə̀là ù mò naʼā enyəa ghe bughò a fughu. Ghî a te ghə n ləghaa yo alebùghò a fughu.

⁴Ù n tum sə kpeʼe tsughu kɔ̀ɔ n li mò, dzɛ̀ â ghee enyəa, ‘Nduw dzǎa ndùw nlò â ghì ghəla mugho mò naʼà enyəa: nəgha e kəzə zə m kpe, mùghò n tsɔ̀m u təmbɔ̀ŋ waŋa u wi, yìa Ŋ̀ wi tə̀ kaā to. Mùghò ŋ ghəa gho a dzə̀m biaan naŋa mɛ̀ʼɛ̀, enyəa ghe bughò an zə kə nì zə eghùe kə wɛ waŋa wən!’

⁵Ghe ŋ kè buʼù nî ghəa a te gho tò eghəa, ghe n nùghù ghe â luʼū to, chìa n nùghù sòʼ ndùw an sum u wə̄n, ù lòʼ wən n sòʼ sə̀ ndùw wən â bekewə̄n ko.

⁶Ghî à li ghən ŋ kuūwn kwu tsughu kɔ̀ɔ ŋ wə̄n mì, tsʉ̀ ghee, wiin màʼà tsughu ghee.

⁷Də̀ŋ chi kə ŋ ŋge pfʉso ùnʉ̀ghà aŋ ghəa a te gho, tsə̀ghàsò tsùghù kəlâŋ â sùghugòʼ tə wə̄n to, tə n ndùw tə̌əm wī tsughu ghî ghəla ghe mò wi kɔ̀ɔ ŋ wə̄n mì, kpàa màʼà kɔʼ naʼ e ghee.

⁸Ù fi dzɛ̂ tsùghù nû â kɔ̀ɔ ŋ wən mò enyəa, ‘Nəgha e zə kə nì zə eghùe kə m kpe, ghî ghə̀là mùghò mò naʼā, ghe ka mo kpe to a e naʼà ghee.

⁹Sə ndùw nlò êzəŋ am fwànlò e tədzǐi, ghɛ̀ waʼn naʼa nduw ghî ghən a dzə̀m ghɛ̀ koʼ, enyəa ghe bughò an zə kə nì zə eghùe.’

¹⁰Kɔ̀ɔ mi mə̀ n sə ndùw sùghò am fwànlo e tədzǐi, kuum kaāŋ wò ghì ghəla ghe fə kôʼ tsughu a dzə̀m, à biigh gho àsùghò à dzûŋ ghò; sàŋkpàa chia ghe fə̀ ghəə̄ŋ ghəa a nì zə eghùe gho a te n lue tsughu enyə aŋ ghùu ghì ghò.

¹¹A m bùghò, də̀ŋ kə te kə sô sə wo alebùghò kôʼ ghì yìa ù mò naʼā, ù m bùghò sə̀ kòʼ wò ghùw ù lì a fughu u mɔ̀ʼ mò ù kà ndzʉ tə zə kə nì zə eghùe tə̀ dzəlà.

¹²Ù m bvʉ̄ â ghùw ù te enyəa, ‘Ŋ ghûw fə̀n, ghù mò nyə̀ ênzə̂n fɛ à mò ghù kà dzə̀la ndzʉ tə nì zə eghù tò a?’ Tûwbʉ̀ghà vʉ ŋ kè kə̂a èghəa.

¹³Də̀ŋ chi kə n daŋso fughu tsughu kəlâŋ â kɔ̀ɔ ŋ wən mò, dzɛ̀ â ghee enyəa, ‘Kwu kɔ̀lɔ tsughu nlò kwe e ghùw vʉ zo, àsùghò fwee e wə̄n zo, ghɛ̀ shʉaa maʼa sə nduw wə̄n a beē, a fî alo kələ̄m, a fia ghî à sô diī, ghee e pfʉa sɔŋ gho.’ ”

¹⁴Yɛso n tsughu tsən tsughu enyəa, “Ghe naʼà wò də̀m è àghì, ghe yia kuūwn shîaa sə wô ko sə fə aghì ghe tɔ̂ʼ gaʼ fə̀ŋ e ghee aŋ ghəa a te.”

¹⁵Ghî a Falàsîi à li ghə n ndùw dòʼò ge naŋa tsughu aŋghəa ghe lo alebèe kwu Yɛso a te aŋ shwaʼ u wə̄n.

¹⁶Ghe n tùm ndùw tsə̀təndə̄ghā tə ghee ghèe ghê ghì a Hɛlɔ̀d à li gho a vʉ̀a Yɛso; ghî a tum yi ghə n ndùw dzɛ̀ â wə̄n enyəa, “Wàdè, ghàʼ kûm kwò nû enyəa, ghù lǒ ghùw wə̀ èsəŋò, ghù vʉ̀a ghù kùu zoʼn sugho ghî ghò â səŋò zò aŋ ghəa a Kəzə̀. Ghù bùʼù nǎaŋ yo tuūŋ ko aŋ ghəa ghəla ghî à moʼò an tsʉ̀ zəla ghùw fughuu â ghì ghò, ghù vʉ̀a ghù naāŋ sughò yô sə zo am fəgha kəla ghùw lǒ ghè kò.

¹⁷Ghù mòʼò èndugho aŋ ghəa ghən à, dzâa wò â ghàʼ. E dzɔ̂ɔ nù alechūuw mwàʼsò kò â Də̀ŋ kə Lumà ko ŋkāa e dzɔ̂ɔ yǒ a?”

¹⁸Yɛso ŋ kuuwn lò mò ù mâa kèle zìi moʼnlò e ghee è biigh zəa ghe mô ki ghè zò, ù n dzɛ̀ â ghee enyəa, “Ghɛ̀ mugho chwəlà kòʼò aŋ kwǒ, ghɛ̀ ghî a kə̀bàŋàdzə̀m ghən?

¹⁹Děe wò nlò mugho â kua wəla ghɛ̀ nîi chuūw mwàʼsò kò a te tò Ŋ̀ kôʼ.” Ghe n nì wò sùghò kua u fəŋgɔ̀ʼ vʉ̀.

²⁰Yɛso m bvʉ̄ â ghee enyəa, “Kən lò zəŋsō kə ndugho ko àsùghò zən e ndugho zo ghe tɔm naŋa a te à?”

²¹Ghe n dzɛ̀ â wən enyəa, “À lò sʉ u Kaesà.” Ù n daŋso dzɛ̀ â ghee enyəa, “Fəgha kəla kə lô kə Kaesà kò, ghɛ̀ è fughuu nduw Kaesà, də̀ŋ kə Lumà, mò alò fəgha kəla kə lô kə Kəzə̀ kò, ghɛ̀ è fughuu nduw sugho â Zə̀ kò.”

²²A m bùghò ghe zuw tsughu ghəa ghən, ghe n zə̀ghàa tsughu luʼū kə te ko, nùghù s fùghù mo ghue zə ŋ ghee kpuw lɔŋe.

²³An tsuʼ fə̀ mɔʼɔ̄ fə̀ te fo, ghî a Sadùwsîi à li gho, tɔ̂ɔŋ ghì ghəla ghe moʼò enyəa ghùw yò kpuūw kɔʼɔ̄ sə alo evʉ̄, ghe m bùghò kòʼ wò Yɛso,

²⁴bvʉ â wə̄n enyəa, “Wàdè, Muwsî fə̀ dzɛ enyəa, abugho ghùw kpuw naŋa taʼà tsughu wi ù wə̄n mò ghe ka mo kaam dzə dzə̂ wɛ a te, wàazə̀ ghùw ù kpǔuw n nyə̀ŋsò ndùw wìkpuw ù tè, dzə fughu tsughu awɛ a te â wàazə̀.

²⁵Êzə̄ŋ, ghî à li a fə̀ lo fɛ̄ sə̀ghàmbəgha mo ghe lo waazə̂; ù sʉèsʉ n nì tsùghu wī, kpuw naŋatàʼà tsùghù â wàazə̀ mò ù kà wɛ̀ a te dzə̄.

²⁶À m bɔɔm sə sùghò ghəa è mɔʼɔ̄ zo a zəŋò wàazə̀ vʉ̀a ù nyə̀ŋsò tsughu wìkpuw vʉ̀. Ù lì wən ŋ kòmlò è nyəŋso è zum zo; à m bɔɔm lò ko ghəa è mɔʼɔ̄ zo alekɔʼɔ̄ kûu ndûw aŋ waazə̂ a te gho a dzə̀m sə̀ghàmbəgha.

²⁷Ghəa ghe bughò kpuūw mɛʼɛ̀ tsughu, wìzən vʉ m bùghò kpùw tsùghù è sugho.

²⁸Êzə̄ŋ, abugho ghî à kê zôom wô alo evʉ̄, wìzən ù te kê lǒ wì ù ndùghò aŋ ghì ghən sə̀ghàmbəgha à, ghee a dzə̀m màʼa fə̀ nî kaāŋ wo wə̀n à?”

²⁹Yɛso m fwə̀n dzɛ̀ ndùw â ghee enyəa, “Ghɛ̀ n nyə̀ŋ làʼ, tɔŋlo enyəa ghɛ̀ kwo yo shwaʼ u Kə̀zə̀ wò, ghɛ̀ kwo sugho yo daʼa kə wə̄n ko.

³⁰Nu tsuʼ fə kɔʼɔsəa fo alo evʉ̄, ghùw nìi yǒ wī, ghùw nìi fùghuu sùghò yǒ wìzən â ghùw; ghî ghə̀n à dzə̀m lò ko tǒ tətūm alo kəwālā.

³¹Aŋ ghəa à zoōm wo gho alo evʉ, ghɛ̀ kaām tɔɔŋ kòʼ fəgha kela Zə̀ kə fə̀ dzɛ̂ â ghɛ̀ à? Kə fə̀ dzɛ enyəa,

³²‘Ǹ lo Zə̀ kə Abə̀làhâm, Zə̀ kə Aezìk, lò sugho Zə̀ kə Yàkɔ̂b.’ Ù yò dzə Zə̀ kə ghì a kpuuwn gho, Ù lǒ Zə̀ kə ghì a sə̀ à tughu gho.”

³³Aŋghəa saʼ kə aghì chi kə zuw tsughu ghəa ghən gho, dzughu zə n zum ghee aŋ ŋgòʼ è dzì zəla ù zoʼn ghî ghò a te.

³⁴Aŋghəa ghî a Falàsîi à zuw tsughu enyəa Yɛso n dzughu a ghì Sadùwsîi à nyəm naŋa, ghe n nyə̀ŋ zùŋlò è wo.

³⁵Dèekə̀làŋ ù lì u mɔ̀ʼ ŋ kəŋo alebàʼn kwu Yɛso, ù m bvʉ â wə̄n enyəa,

³⁶“Wàdè, à bìso lo dəŋò kə̀ ghɛ ko alo kəlàŋ a, kə tughu tsəghà lwâŋ wən wo ù dzə̀m a?”

³⁷Yɛso m bɛ̀lɛ̀ ndùw enyəa, “Ghù ki aleləgha Mughu ù te, Zə̀ kə̀a â fə̂ŋ zə̀ghà e dzə̀m, àsùghò ghùe wʉ̀a wò u dzə̀m, àsùghò am mòʼn zə̀ghà e dzə̀m.

³⁸Kən lò lâŋ kə sûesʉ kəla kə tughu tsəghà lâŋ wò u dzə̀m.

³⁹Kə̀ li chia kə məghà nduw mo kə tughuu sùghò tò kə sûesʉ kən. Kə te kə dzɛ̂ enyəa, ‘E ləgha Wàazùghù tò aŋghəa ghù ləghàa ghue wùa wò a te.’

⁴⁰Wən lo lwâŋ wə̀n ù bʉ̀ghà u kwu kɔlɔ̄ kɔʼ lwâŋ u Musî wò dzə̀m, à tsʉ̀ e ghǐishʉ̀ghà a Kəzə̀ zò.”

⁴¹A m bùghò ghî a Falàsîi à li zûuŋ doʼò tsughu, Yɛso m bvʉ̀ ndùw ghee â ghəa zo

⁴²enyəa, “Ghɛ̀ moʼò èndùghò kùu ndùw Bəghambī lo a? Ù sə̀ an tiigh kə ndugho ko a?” Ghe m bɛ̀lɛ̀ ndùw wə̄n enyəa, “Ù sə̀ an tiigh kə Dɛvìd.”

⁴³Yɛso m bvʉ â ghee enyəa, “À sò lǒ kwò Zuʼ tə Kəzə̀ tə fə̀ ghəə̄ŋ tsughu enyəa Dɛvìd è tɔɔŋ wə̄n enyəa ù lò Mughu ù te a?

⁴⁴ Dɛvìd fə̀ dzɛ enyəa, ‘Mughu ù te fə̀ dzɛ â Mughùbè waŋā enyəa: Dòʼo tsughu fɛ aŋ kwe waŋa ù təma wo tò Ŋ̀ kê telè naŋā wô dzə̂ ghì a kətūw ghə̂a a tsəla efwee zəghà.’

⁴⁵Abugho Dɛvìd fə̀ tɔɔŋ wə̄n enyəa à lò Mughu ù te, ù lò ênzə̂n alelo wɛ̀ ù Dɛvìd a?”

⁴⁶Ghùw mɔʼɔ̄ n yo alebɛ̀lɛ̀ wə̄n. Nì nùghù tsùghù an tsuʼ fə te fo, ghùw ŋ kè kôom foʼò kôʼ alebvʉ̄ wə̄n â ghəa zo.