Read Aghem Matìo 23 Bible Online

Matìo 23 - Aghem bible

Matìo 23

¹Yɛso daŋso dzɛ̀ ndùw â saʼ kə aghì chì ko ghèe ghê tsə̀təndə̄ghā tə wə̄n to enyəa,

²“Ghê Dèekə̀làŋ ghèe ghê ghì a Falàsîi à lo ghî ghəla ghe ki daʼa ko aleteso dzâa lâŋ kə Musî kò.

³E fi lo enyəa ghɛ̀ ki alezuuw nduw â ghee, fwàʼà ndùw fəgha kəla ghe dzâa wo, kà sô nlò sə a ghee a kuuwn kòʼnì; tɔŋlo enyəa ghe bwîi yò an dzə̂ è ghee.

⁴Ghe fughuu àghì â mbùŋ kəla kə də̂n tsəgha ghee, mo ghuūghùe e ghee e bûʼ yò alebòʼò zuw ghùw â mbùŋ kə te ko.

⁵ Ghe ghəa a ghee a ghəŋlo ghe sô dəmà ko enyəa to ghî à mô kòʼò wò ghee; Ghe ŋ kuuwn ghəəŋ tsughu tɛtâa m fìlaʼtɛlìs[13] ŋ ghee enyəa mə̀ e ŋgɔʼɔ̄ duūw. Kòʼo to də̀ghàa tə ushwāŋ to ghe ki an dàlà tə ghee à.

⁶Ghe ləghaa kô bəla tə̀ ne to an zə kə lo a te. Ghe yia kəŋo ko ndàŋ tə e zən to an Ndughutə̀ne tə Tə̀dzûu tò.

⁷Ghe tɔʼɔ̀ lə̀ghaa ko enyəa ghî ghə̀ è ŋgɔɔm wo ghee an dziī abugho ghe tsəghaa, àsùghò enyəa ghe e ŋgɔɔ wo ghee enyəa à lò ghê wàdè.

⁸Ghe ki yo alekuūwn tɔŋɔ ghùw wɛʼɛ enyəa à lǒ wàdè, tɔŋlo enyəa ghɛ̀ ki ko wàdè u mɔ̀ʼ, ghɛ̀ a dzə̀m yia kuūwn lô waazə̂ ghò.

⁹Ghɛ̀ ki sugho yo aletɔŋɔ ghùw fɛ am mbī enyəa à lǒ tsele wɛʼɛ, tɔŋlo enyəa ghɛ Tsele ki ko u mɔ̀ʼ; wəla ù lò alo kəwālā.

¹⁰E kwo ko ghɛ̀ lô bomlo enyəa ghe e tɔɔŋ ghɛ enyəa à lò ghê mughùbè, nu ghɛ̀ mughùbè ki ko u mɔ̀ʼ, tɔɔŋ Bəghambī.

¹¹ Ghùw wəla ù tsə̀ghàsə ghɛ a dzə̀m am bvʉa zɛʼɛ ki alelō kɔ̂ɔ fò â ghɛ̀;

¹² ghùw wəla ù kɔʼso ghue u wə̄n wo, ghe lo tsughu màʼn wə̄, ghùw wəla ù kuūwn maʼà tsughu ghue wo, ghe lo kɔʼso kɔʼ wə̄n.”

¹³“Ghɛ̀ ghê Dèekə̀làŋ ghɛ̀ à ghê ghî a Falàsîi ghò, ghɛ̀ lo an tsù ù ne wo; ghî a kə̀bàŋàdzə̀m tò ghɛ! nu ghɛ̀ fê nàŋa tsughu dzì enyəa ghî à ka alo kəwālā tsəghà nyə̀, ghuūghùe zɛʼɛ̄ zəa e buʼù nyəā ndûw sughò yo a fughu, ghɛ̀ yia ləghaa sughò yo aledèe tsughu dzì â ghì ghəla ghe dəmà aletsə̀ghàa nyə enyəa ghe nyəā ndûw.

¹⁴[Ghɛ̀ ghê Dèekə̀làŋ, ghɛ̀ à ghê ghî a Falàsîi ghò, ghɛ̀ lo an tsù ù ne wo; ghî a kə̀bàŋàdzə̀m tò ghɛ! nu ghɛ̀ tsêe yiikpūw, ghɛ̀ yia nɔɔ̄m zəa fʉgha u ghee wo, kuuwn fəŋo wò sə a aghì an də̀ghàdə̀ghà tə egɔ̀ŋlò. Ŋgoʼ zɛʼɛ̄ lo tsə̀ghàasə̌a è ghì à li ghən bòʼ ghəa ghən.]

¹⁵Ghɛ̀ ghê Dèekə̀làŋ, ghɛ̀ à ghê ghî a Falàsîi ghò, ghɛ̀ lo an tsù ù ne wo; ghî a kə̀bàŋàdzə̀m tò ghɛ! Nu ghɛ̀ daŋà tsùghuu tə̀dzùghù, ghɛ̀ m bwìi tsughu təbəghaa alendùw kuūwn kɔʼɔ̄ ko ghùw u mɔ̀ʼ. Ghùw ù te mo e kuuwn kɔʼɔ nù, ghɛ̀ ŋ kòom ghə̌əŋ tsughu wə̄n ù m fən tsùghù fəgha kə lo ndûw pfʉa wə̀n u tsə̀ fə̀ baŋā fo tsə̀ghàtàʼà sə ghɛ̀ alo tənə̀gha tə bə̀ghà.

¹⁶Ghɛ̀ ghî à foō ghəla ghɛ̀ tɛ̂ɛ bwîi ghî ghò, ghɛ̀ lo an tsù ù ne wo! Nu ghɛ̀ dzɛ̂ enyəa abugho ghùw kɛ̀ tsughu ndùghù è Kə̀zə̀ e ne, ù kɛ̀ màʼà kə̀nughùnùghù, mò ù kɛ̀ tsughu am fʉgha wəla u lo an ndùghù è Kə̀zə̀ e ne ghe ghəŋlo alo etsɛ̄, ù lô fî ghəəŋ nù ghəa ghəla ù mò kɛ̂ tsughu a te.

¹⁷Ndzə̀ŋ tə efùw tə̀ foō to tò ghɛ; à tsə̀ghà etsɛ ŋkāa ndùghù è Kəzə̀ e ne zəla è ghəŋlo tsɛ e te zəa e lo è baa zo a?

¹⁸Ghɛ̀ yia dzâa sugho enyəa, ‘Abugho ghùw kɛ̀ tsughu kəŋ zo, ù kɛ̀ màʼà kə̀nughùnùghù, mò ù kǔuwn kɛ̀ tsughu am fəgha kəla ghe sɛ̂ naŋā alo ekə̀ŋ, ù lô fî ghəəŋ nù ghəa zəla ù mò kɛ̂ tsughu a te.’

¹⁹Ghɛ̀ ghî à foō ghən! À tsə̀ghàtàʼà sə̀ kə kwò, fəgha kəla ghe sɛ̂ naŋā alo ekə̀ŋ ŋkāa kəŋ zəla e ghəŋlo enyəa fəgha kə te kə doʼò tsughu kə̀ baa ko a?

²⁰E fi lo enyəa, ghùw wəla ù kɛ̀ tsughu kəŋ zo, ù fi kɛ̂ èkəŋ àsùghò fʉgha wən ù dzə̀m u lô a te.

²¹Ghùw wəla ù kɛ̀ tsughu sugho ndùghù è Kəzə̀ e ne, ù fi kɛ̂ tsùghu ndùghù è Kə̀zə̀ e ne àsùghò Zə̀ kəla kə mughu a fughu.

²²Ghùw wəla ù kɛ̀ sughò wala ko, ù fi kɛ̂ ndàŋ è Kə̀zə̀ àsùghò wə̄n wəla Ù dǒʼ an ndàŋ è te.

²³ Ghɛ̀ a ghê Dèekə̀làŋ, ghɛ̀ à ghê ghì a Falàsîi ghò, ghɛ̀ lo an tsù ù ne wo, ghî a kə̀bàŋàdzə̀m tò ghɛ! Nu ghɛ̀ lo enyə ghɛ̀ kpuwso chuuw ko nǔ ndzùghò fɛʼɛ fo am fʉgha wəla ghɛ̀ kele kɔʼɔ̄ am fə̀ghàan n lə̌əm məla ghe tɔŋlo enyəa à lò mînt, dîi àsùghò kumɛ̀n, kuuwn tùe kɔ̀ʼ ghəa à səŋò ghò alo kəlàŋ, tǒ aleghəəŋ ghəa gho tsəghatsəgha, alekele tsughu se è kwuso zo, gàʼ tsùghù sùghò fə̀ŋ a zəŋò Zə̀ kò; ghən lò ghəa ghəla ghɛ̀ mô ki aleghəŋlo mò ghɛ̀ zəŋso naaŋ yo è li zo a te e mɔ̀ʼ.

²⁴Ghɛ̀ lo ghî à foō ghəla ghe tɛ̂ɛ bwîi ghî ghò! Ghɛ̀ ziīn màʼn sə̌a wò èdzə̀adzə̀a am fʉgha wɛʼɛ ù mʉa wo, ghɛ̀ ŋ kuuwn nì mìi ndùw kə̀kə̀anyòm!

²⁵Ghɛ̀ ghê Dèekə̀làŋ ghɛ̀ à ghê ghì a Falàsîi ghò, ghɛ̀ lo an tsù ù ne wo, ghî a kə̀bàŋàdzə̀m tò ghɛ! Nu ghɛ̀ lo enyə ghɛ̀ sûuw zɔ̀nso tsughuu kô beē kə təwùa àsùghò beē kə ukwāŋ, mo nlʉ̂ àsùghò fʉ̀ghazəa wəla ghɛ̀ dzəla tsughuu a te, ghɛ̀ ŋgaām nî wò am mbāaŋ tə aghəa, ghɛ̀ sô səā â sə gho.

²⁶Ghɛ̀ ghî a Falàsîi à foō ghən! bùʼu kòʼo tsughu dzə̀ enyəa lʉ̀ mì aŋ wùa è te àsùghò fʉ̀ghàzəa vʉ̀ aŋ kaŋ kə te ko bùghò an dziī è zɔ̀lɔ, to beē kə təwùa kə̀ è zɔlɔ sugho, àsùghò beē kə ukwāŋ ko.

²⁷ Ghɛ̀ a ghê Dèekə̀làŋ, ghɛ̀ à ghê ghì a Falàsîi ghò, ghɛ̀ lo an tsù ù ne wo, ghî a kə̀bàŋàdzə̀m tò ghɛ! Ghɛ̀ nyəghaan dzɔ̀ɔ ko fɛ a beē tò shîa təla ghe tsoʼsō tsughu an tsə̀n è fə̀ma, mò à lo ghoo u aghì à kpuuwn wo a tèetè, à dzə̀adzə̀ tə aghəa tən tə̀ dzə̀m.

²⁸À bɔ̌ɔm lò sugho êzə̀ ghɛ̀ fweēn ghî à dzûŋ ghò alo esʉ̄, mò ghɛ̀ lo ghî a kə̀bàŋàdzə̀m, ki sugho ebo am fə̀n tɛʼɛ.”

²⁹“Ghɛ ghê Dèekə̀làŋ, ghɛ̀ à ghê ghì a Falàsîi ghò, ghɛ̀ lo an tsù ù ne wo, ghî a kə̀bàŋàdzə̀m tò ghɛ! Nu ghɛ̀ bɔɔ kɔʼɔ̂ shìaa tə ghǐishʉ̀ghà, laa kɔʼɔ sùghò tə ghì à li ghəla ghe fə̀ mughù tsəghà mughùu è zɔlɔ zo,

³⁰ghɛ̀ mo enyəa, abugho ghɛ̀ fə̀ lo an tì kə ghê tsele a ghê tsele ghɛʼɛ, to ghɛ̀ ka fə dzə̂n dzə̀ ghu kɛʼɛ ko aŋ ghəa ghəla ghe fə̀ ghəŋlo àsùghò aŋghəa ghe fə̀ wiīn ghiīshʉ̀ghà a Kəzə̀ ghò.

³¹À fi lo enyəa ghɛ̀ ŋ kùm m boo enyəa ghɛ̀ lo waawɛ a ghì ghəla ghe fə̀ wiīn ghiīshʉ̀ghà a Kəzə̀ ghò.

³²Ndǔuw ko nlò â sə ko, ghɛ̀ miaso kɔʼ fwàʼ kəla ghê tsùghò fə̀ kaʼ naŋā tsughu.

³³ Təzughu tò ghɛ, ghɛ̀ à ghê wɛ ghɛʼɛ̄ gho a te, ghɛ̀ laʼà lǒ ênzə̂n aletiī sə enyəa Zə̀ kə̀ ka lò ghɛ̀ tum an wə̀n ù tsə̀ fə̀ baŋā fo a?

³⁴Ǹ so Ǹ dzàa wô â ghɛ̀ enyəa yìa Ǹ tuū wô ghɛ â ghǐishʉ̀ghà ghò, ghê wàndɔŋ, à ghê Dèekə̀làŋ; ghɛ̀ è ke təghaan winlo à li gho, tsɔʼɔ à li gho alo təkwùu an Ndughutə̀ne tə Tə̀dzûu tò, dzùu kàŋlo à li gho naʼà tə̀nàʼà.

³⁵ To kâŋ tə ghì à dzûŋ ghə̀n à dzə̀m ghɛ̀ lo mò ghɛ̀ ŋ winlo am mbī tsughuun tsughuu an tuw wɛʼɛ; alenìi nughù wô aŋ kàŋ tə Ɛbɛ̀l wəla ù fə̀ kwo yô ghəa è biigh è li zo, bùghò kùm wò aŋ kàŋ tə wɛ̀ ù Bàlakìa, tɔɔŋ Sàkàlîa wəla ghɛ̌ fə̀ wi an də̀ŋɔ̀ kəla kə lo an faʼn zə ekəŋ àsughò Tsùghù è baa zo.

³⁶M̀ fɛ kùu dzàa wò nù â ghɛ̀, ghəa ghə̀n à dzə̀m lo tsughuun tsughuu an tuw kə ghì a nɛ ghən.”

³⁷“Hɛɛ̄ mūghō a ghî a Yɛ̀lusalɛ̀m ghò, ghî a Yɛ̀lusalɛ̀m ghò, wiin ghɛ̀ ghiīshʉ̀ghà a Kəzə̀ ghò ènyə, təəm sùghò ghì ghəla Zə̀ kə̀ tum wo a vʉ̀a ghɛ̀ alo atīa! À è zə̀ŋ lo tənəghā tə sòʼ Ǹ dəmà ko aletsəla nalà naŋā tsughu ghɛ to mbvʉ lô tsəla zûuŋ wô wɛ a wə̄n gho an ghùoo tə wə̄n a, ghɛ̀ yia boom yo à?

³⁸ Êzə̀, Zə̀ kə̀ n Ndughu e wə̄n è ne n chiaa naŋatàʼà â ghɛ̀, zə̀a è dòʼò kɔʼ è zūm.

³⁹ Ghəa Ǹ dzâa wô fɛ à ghɛ̀, ghɛ̀ lô mùghò kôom kòʼ yò, à gɔ̀ʼɔ̀ mò ghɛ̀ n lo dzɛ̀ tsùghù enyəa, ‘Dzɔ̀ lò â ghùw wəla ù mò bùghòo an zən a Mughu ù te.’ ”