Read Aghem Matìo 25 Bible Online

Matìo 25 - Aghem bible

Matìo 25

¹ “Tsuʼ u wəla Wɛ ù Ghùw kè bughōo a te, fɔ̂e u kəwālā u kê lǒ tǒ zə̀azə̀a fə təŋgɔ̀e eghə̄m, ghe mò nî kɔʼ tɔlɔkaŋ to, nùghù ndùw alendùw kpeēnî nùuwìzən.

²Ghe a tɛ̀ fə̀ laʼsō nû, a tɛ̀ n tɔɔ.

³À laʼsō ghən fə̀ so e nîi tə ghee to tə̀tɔlɔkaŋ, ghe ŋ kè nîi kpeʼē kɔʼ mùghù n lâm n li mò;

⁴à tɔɔ ghən a mo e kuūwn nìi tə ghee to tə̀tɔlɔkaŋ, ghe n nì dzə̌əŋ kɔʼ sɔ̀ʼ tə mmùghu n lâm ŋ ghee.

⁵Ghəa nùuwìzən loʼn tsughu, mgbii tə n dzoʼ tsughu ghee, ghe m bvʉ̀ ndùw tə̀mgbii.

⁶A mo e bughò â fə̂ŋ è utsūʼ, bɔ̂ŋ kə̀ ŋ kùm nyə̀ ndùw enyəa, ‘Wo nùuwìzən wən lo, sə kòʼ nlǒ wə̄n!’

⁷Ŋgɔ̀e tə te to tə dzə̀m n daŋso nùghù è kɔʼ, ndzùuŋ tsùghu ghee â tɔlɔkaŋ to.

⁸À laʼso a yi ghə n dzɛ̀ ndùw â tɔɔ yi enyəa, ‘Tsoom dzə̀la wò nlò ghaʼ â mùghù n lâm mɛʼɛ mò, tɔlɔkaŋ taʼā tə so e nyə̄mā.’

⁹À tɔɔ yi n kuūwn dzɛ̀ â ghee enyəa, ‘Ǹ sò yò alekpē â sɛ̀ a dzə̀m, biso ndǔw zue kɔʼ nlò m mɛʼɛ mò aŋ ghùu ghì ghəla ghe fêenlo.’

¹⁰A m bùghò ghe nughù nduw mùghù n lâm n zǔu mò, nùuwìzən n səŋ tee è wo, nùghù nyə̀ ndùw ghèe ghê ŋgɔ̀e tə̀ tɔɔ tì tə̀ tɛ̀ an ndughu e zəā ghe zɔʼɔ̀ ghî ghò a fughu, dzʉ̀a wò kə̀bàʼ.

¹¹ A mo e tsûuŋ tsùghuu nù, wâazən à li yi n ndùw è bugho, dzàa nyə̌a ndùw enyəa, ‘Mughùbè, mughùbè, tsʉ tsughu ghaʼ â bàʼ kò.’

¹²Ù m fwə̀n bɛ̀lɛ̀ sə̀ wò ghee enyəa, ‘Ŋ̀ kwo yo ghɛ, Ǹ dzɛ̂ èsəŋò.’ ”

¹³Yɛso n daŋso tsughu tsən tsughu enyəa, “À fi lo enyəa ghɛ̀ ki alenì èghòmlò, nu ghɛ̀ kwo naŋa yo nəgha e te zo ŋkāa tsuʼ u te wo.”

¹⁴ “Fɔ̂e u Kəzə̀ ù kê lò aŋghəa ghùw ù lì fə̀ so e səā bwînlò, ù m fughu naŋa tsughu ghəa a wə̄n â kɔ̀ɔ ŋ wə̄n mò.

¹⁵Ù m fughuu tsughu ko chìa â fʉgha wo kuū tɔ e ghûw aŋghəa ù lo alekwuū kelê fʉgha u te wo a te; ù m fùghù tsughu u mɔ̀ʼ â mbə̀ghà ŋ ùkua mò n tɛ̀, ù lì wən, m bə̀ghà, ù lì u vʉ̂, fə mɔ̀ʼ. Ù n zə̀ghàa è tsughu, nùghù sə̀ bwìnlò è nduw.

¹⁶Ghùw wəla ù fə̀ ni mbə̀ghà ŋ kua mò n tɛ̀ ŋ kwūun ndùw də̀ghàan ndùw bekewə̄n a te; kele kpeʼe kɔ̀ʼ sùghò m̀mbə̀ghà n tɛ̀.

¹⁷Wəlà ù fə̀ ni mbə̀ghà m bə̀ghà m bɔɔm fwàʼ sùghò ghəa è mɔ̀ʼɔ̄ zo, kele kpeʼe kɔ̀ʼ sùghò m bə̀ghà.

¹⁸Wəlà ù fə̀ nî mbə̀ghà fò fə mɔ̀ʼ ŋ kuuwn ndùw tsəm kɔʼ ghueekətsə̄, gə̀mà nàn nàŋa ndùw kua u mughùbè ù wə̄n a te.

¹⁹A m bùghò gha kə ndôʼ sə tsughu, mughùbè ù ghee n ndùw è bùghò alebùghò naŋsô kɔ̀n kə ghəa a ukʉ̄a chì ghèe ghee.

²⁰Wəla ù fə̀ ni mbə̀ghà ŋ kua mò n tɛ̀ n tsə̀ghàsə̀ wò â mbə̀ghà mò eghə̄m, dzɛ̀ enyəa, ‘Mughùbè, ghù fə̀ aŋ ghu kaŋā fughu nyə tsughu mmbə̀ghà n tɛ̀; M̀ fɛ fwàʼ kpèʼe kɔ̀ʼ sùghò n tɛ̀.’

²¹Mughùbè ù wə̄n n dzɛ̀ â wə̄n enyəa, ‘Ghù n nyɔ̀ʼ fwàʼ, ghù lǒ ghùw ù kə̀fwàʼ ù dzùŋ to a e naŋa aŋ ŋgòʼ; ghù n sə fən kwu kele dzɔ̀, Ǹ naaŋ ghù êzəŋ tò ghù e lɛnlo â ndə̀m. Nyə wò tò ghɛ̀ à mughùbè wùa saŋlo.’

²²Wəlà ù fə̀ ni mbə̀ghà mò m bə̀ghà n sə kɔ̀ʼ wò è sugho, dzɛ̀ enyəa, ‘Mughùbè, ghù fə̀ mugho â mbə̀ghà m fughu m bə̀ghà, yia Ŋ̀ kele kpeʼē kɔʼ m bə̀ghà.’

²³Mughùbè ù wə̄n n dzɛ̀ à wə̄n enyəa, ‘Ghù n nyɔ̀ʼ fwàʼ, ghù lǒ ghùw ù kə̀fwàʼ ù dzùŋ to a e naŋa aŋ ŋgòʼ; Ǹ naaŋ nù ghû êzə̄ŋ, ghù è lɛɛn ndə̀m, tɔŋlo enyəa ghù n sə fən fə kwu kele dzɔ̀; nyə wò tò ghɛ̀ à mughùbè wùa saŋlo.’

²⁴Wəla ù fə̀ nî mbə̀ghà fò fə̀ mɔ̀ʼ n sə̀ kɔ̀ʼ wò è sugho, dzɛ̀ enyəa, ‘Mughùbè, Ŋ̀ kwo tsəgha nû enyəa mwam wùa ù tughuu nù, ghù lə̀ghaa enyəa ghî ghə̀ è tsəma ghù è nɛɛ̄, ghù è zəa sugho aŋ kwe e aghì.

²⁵Zə̀ lò e ghee mùgho mò tsəŋō, mùghò n nyoʼn nì kɔ̀ʼ kua wùa, ndùw nàn nàŋa ndùw a ghueetsə̄. Kʉa wùa wəla u nyoʼn ti.’

²⁶Mughùbè ù wə̄n m fə̄ŋsō bɛ̀lɛ̀ ndùw wə̄n enyəa, ‘Boòbò kə bɔ̀lɔ̀bɔ̀n kə wɛ̂ɛtùghu tò ghû! Ghù mò fɛ nyɔʼ kwo nû enyəa Ǹ ləghaa enyəa ghî ghə̀ è tsəma mùghò è nɛɛ̄, yìa Ǹ zəa sugho aŋ kwe e aghì à?

²⁷Ghù mò yo alendùw maʼà naŋā ndûw kua waŋa alo kədzeŋe enyəa mò M̀ bughò nù à, mùghò n nəəŋ zə kəfəgha an zə̂ u ùkua u te a?’

²⁸Mughu ù te n daŋso dzɛ̀ à kɔ̀ɔ fə wə̄n fə̀ li fo enyəa, ‘Nǐi nùghu kɔʼ kua u te wo aŋ ghùu wə̄n, ghù baʼso ndùw â ghùw vʉ̀a ù ki mbə̀ghà mò eghə̄m.

²⁹ Tɔŋlo enyəa ghùw wəla ù bùʼ ki dzə̂ fəgha ko, ghe lo fughuu kpeʼe nǔ wə̄n â ndə̀m, ù lo kele tsəghàsò tsughu; a kê kuūwn bughò wəla ù ki yô fəgha ko, nyàaŋ fəla ù bùʼ ki, ghe lo nîi nughùu mɛʼɛ̀ kɔʼ aŋ ghùu wə̄n.

³⁰ Yia a bughò bɔ̀lɔ̀bɔ̀n fə fəkɔ̀ɔ fən fo, ghɛ̀ sɔn maʼa sə nduw a beē a tsəla kələ̄m fə e ke diī a fughu pfʉa sùghò àsɔŋ.’ ”

³¹ “Abugho Wɛ ù Ghùw kè bugho â dwaʼa wəla ù ki tò Kədə̀ŋ ghèe ghê tsə̀təndə̄ghā tə Kəzə̀ to tə dzə̀m, ù lo kɔʼɔ̄ nyaʼā kɔʼ an ndàŋ è kə̀də̀ŋ è wə̄n.

³²Ghî ghən an nàʼà mə̀n n dzə̀m n dzə̀m lo kwelē wô a vʉ̀a wə̄n. Ù lo dzughùu tsughu alo ushwāʼ u bʉ̀ghà tò bàʼàtə̀ndzì lò baʼà nughùun səā wô ndzì tò an sāʼ kə tədzə̄

³³Ù kè baʼà naŋā tsə̀ghàa wô tə̀ndzì aŋ kwe u wə̄n ù təma wo, ù bàʼà naŋa ndûw tə̀dzə aŋ kwe u wə̄n ù kwû wò.

³⁴Də̀ŋ kə te kə lo daŋso dzɛ̂ â ghì ghəla ghe lo aŋ kwe u wə̄n ù təma wo enyəa, ‘Bùghò nlò, ghɛ̀ ghəla Bəghà lǒ mò ù ŋ ghɛ̀ â bughuso e fughu, ghɛ̀ e lo an fɔ̀e u kədə̀ŋ wəla ghe fə ki naŋa to â ghɛ̀ tèetèe aŋghəa mbī fə̀ kaʼ tsughu.

³⁵Tɔŋlo enyəa dzə̀ŋ fə̀ zaa mugho, ghɛ̀ m fughu mugho â fʉ̀ghàzəa wo, fə̀ŋ è mmùghu zuʼso mùghò, ghɛ̀ m fughu mugho â mùghù m mʉ̌a mò. Mùgho mò lo ghùw ù kə̀tūm alô ghɛ̀, ghɛ̀ m bɔ̄ŋ naŋa mùghò,

³⁶mùgho fə̀ lo â ghue ù gha wo, ghɛ̀ n dzə̀là wò tə̀ndzʉ a zəŋò mùghò, mùghò n dzaŋà ghɛ̀ n lɛnlo â mùghò, mùghò n lo an ndughutsāʼ, ghɛ̀ m bùghò tɔ̌ɔŋ zuw mugho.’

³⁷Ghî a tsəghatsəgha a kê daŋso bɛlɛ̀ ndûw wən enyəa, ‘Ghǎʼ mò ghû koʼ ghɛ a Mughùbè ghù dǐi dzə̀ŋ a, a m fughu ufʉghàzəa â ghǔ a, ŋkāa tɔŋ u baam ghù a, a m fughu fəgha kə̀ bvʉʉ̄n kə tə utɔ̀ŋ kò a?

³⁸A mò ghû koʼ ghɛ tǒ ghùw ù kə̀tum a, a m bɔ̄ŋ naŋa ghǔ a? Kàa, a mò ghû koʼ sugho ghɛ à ghue ù zum wo, a m fughu ghû â ndzʉ to a?

³⁹A mò ghû koʼ sugho ghɛ ghù dzàŋa à, ŋkāa ghù lǒ an ndùghùtsàʼ à, a m bùghò tɔ̌ɔŋ zuw ghu a?’

⁴⁰Də̀ŋ kə te kə lo daŋso bɛlɛ̀ tsughu ghee enyəa, ‘M̀ fɛ kùm dzàa wò nù â ghɛ̀, aŋghəa ghù fə̀ ghəə̄ŋ dzə̄ wàazə̀ waŋa u mɔ̀ʼ â ghəa ghən gho, wəla ù fə̀ tsoō fweēn yô fəgha ko, ghù mǒ fi ghəŋlo â mùghò.’

⁴¹Ù lo daŋso dzɛ̂ â ghì yia aŋ kwe u wə̄n ù kwû wò enyəa, ‘Nùghu nlò an sə kaŋā, fə̀ghàan ŋ kə̀lòʼ mə̄n, ndǔw nlò aŋ wə̀n wəla u doʼò tən; wəla ghe fə̀ fəghaan naŋā â Vʉatsə̄a gho ghèe ghê tum tə wə̄n to;

⁴²dzəŋ fə̀ za mugho fɛ̄, ghɛ̀ ŋ kè ŋgəmsō fughu kəfəgha enyəa n zə, fə̌ŋ n zuʼso mùghò, ghɛ̀ ŋ kè fughu kəfəgha enyəa M̀ mʉ.

⁴³Mùghò m bwìin wò alô ghɛ̀, ghɛ̀ ŋ kè kpeēnî mùghò, mùghò n lo â ghue ù zum wo, ghɛ̀ ŋ kè dzəlà tə̀ndzʉ a zəŋò mùghò, mùghò n dzaŋà, ndùw dòʼò sùghò an ndùghùtsàʼ, ghɛ̀ ŋ kè bughò bwîin kôʼ mùghò.’

⁴⁴Ghe lo daŋso bɛlɛ̀ ndûw sughò enyəa, ‘Mùghù ù te, ghǎʼ mò ghû koʼ zən mò ghù lǒ dzə̀ŋ a, ŋkāa mò fə̀ŋ zuʼso ghù a, ŋkāa mò ghù bwìin wò alô ghàʼ a, ŋkāa mò ghù lò â ghue ù zum wo a, ŋkāa mò ghù dzàŋà nù a, ŋkāa mò ghù lo an ndùghùtsāʼ a, ghàʼ ŋ kè yôsò ghù a?’

⁴⁵U lo daŋso bɛlɛ̀ tsughu ghee enyəa, ‘Ŋ̀ kûu dzàa wò nù â ghɛ̀, aŋghəa ghɛ̌ fə̀ tue aleyòsò ghùw ù ulwən ù li u mɔ̀ʼ, ghɛ̀ fə̀ fi tue aleyòsò mùghò.’

⁴⁶ Ghe lo daŋso nîi tuū zəghàa ndûw ghee ghən an lùʼù wəla ghe lo koʼò tsɛlɛ̄ mùlǔŋ a fughu. Ghî a tsəghatsəgha a kê kuūwn kelê mùghù zəla e doʼò tən.”