Read Aghem Matìo 26 Bible Online

Matìo 26 - Aghem bible

Matìo 26

¹Ghəa Yɛso fughu mɛʼɛ̀ tsughu tsʉ̂ zə̀n zo, ù n dzɛ̀ â tsə̀təndə̄ghā tə wə̄n to enyəa,

² “Ghɛ̀ kele tsughu nlò enyəa à tsə̀ghàa tsùghuu ko ntsuʼ m bə̀ghà a zə zə kə̀ Zəŋso naaŋ ko, ghe daŋso nîi kɔʼ Wɛ̀ ù Ghùw ghe fughuu tsəghàa ndûw enyəa ghe təghàa.”

³Tuw u təfɔ̀e wə̀ n daŋso zùuŋ tsùghù am be kə fɔ̀e è nē ghèe ghê tsoʼ tə enaʼ to alo Kaefàs, wəlà ù fə̀ lô Fɔ̀e è ne.

⁴Ghe n dzeŋe zə tsughu fə̀mbɛ̀ enyəa ghe welè kwu Yɛso, ghe wi.

⁵Ghe ŋ kuuwn tsughu boo naŋa tsughu enyəa, “À kǔuwn yò dzə an nə̀gha e kəzə̄, e kwo ghî à lô nughùun teēn kɔʼ fɛ̄ alo efwēe.”

⁶Êzə̄ŋ, Yɛso n lo am Bɛtānì, am be kə Sǎemòn, tɔɔŋ ghùw wəla ù fə̀ bûʼ ki tsəghà tsughò tò.

⁷ Wìzən ù lǐ m bùghò kòʼ wò wə̄n à tòo fò ghe bɔm tsughu an tia e àlàbastà, à kɔ kə mvʉ kə̀ li ko a te. Ù m bùghò kwèlè tsùghù an tuw kə Yɛso.

⁸Tsə̀təndə̄ghā tə Yɛso tə ŋ kuūwn kòʼ tsùghù ghəa yì, nə̀ghàa mə̀ m mbè ndùw ghee aŋ ghəa a te gho, ghe mo enyəa, “Ù ènyə pfʉso sàaŋ maʼnlò aŋ kwò?

⁹A mô lò nû alebəlā fêe vʉ mən an ndə̀mà tə ukʉa, a nîi yosò ghì à laa gho a te.”

¹⁰Yɛso ŋ kelê ghəa yì, dzɛ̀ â ghee enyəa, “Ghɛ̀ nughò wə̄n fəmso aŋ kwò? À lò ghəa è dzûŋ zò ù fwàʼ tsughu zəŋò mùghǒ.

¹¹ Ghî à laa a kê tsò lo tsəgha ko am bvʉa zɛʼɛ̄, sɛ̀ kê kǔuwn yò tsəgha dzə̂ a dzə̀m.

¹²Ghəa ù kwèlè tsughu vʉ mən a zəŋò mùghò, ù fɛ fəghaan naŋa dzə̀ mùghò aŋ ghəa à tsəən gho.

¹³M̀ fɛ kùu dzàa wò nù â ghɛ̀, abugho ghe naʼn ko làbəlà è dzùŋ zən am bà kə mbī kə̀ ghɛ ko, ghe m bùghò mɔ̀m ghəa ghə̀là ù ghəə̄ŋ tsughu fɛ, alezə̀əŋ tsughu zən e wə̄n.”

¹⁴Ghùw u mɔ̀ n sə kɔʼ am bvʉ̄a e tsə̀təndə̄ghā ten èghəm à ghè tò tə bə̀ghà ghe fə̀ tɔŋlo enyəa à lò Dzudàs Eskàlìot, ù n nduw kòʼ ndùw tuw u tə fɔ̀e,

¹⁵ bvʉ â ghee enyəa, “Ghɛ̀ moʼò alefughu kə kwò â mùghǒ abugho M̀ fêe fughu wo wə̄n â ghɛ̌ a?” Ghe n tsə̄ tsughu wə̄n aŋ ŋghə̀m ŋ kua wə ŋgɔ̀ʼ u silvà n təgha.

¹⁶Ù fi daŋso kāʼ tsughu nû alekə̄ŋ tədziī alefèe fughu Yɛso.

¹⁷A m bùghò an tsuʼ fə sûesʉ fo an tsuʼu n zə kə Bɛ kəla Mbvùŋ buw a te, tsə̀təndə̄ghā tə m bùghò kòʼ wò Yɛso, bvʉ â wən enyəa, “Ghù mò lə̀ghaa enyəa ghàʼ biāan naŋā tsughu luʼū kə̀ ghɛ ko â ghù alezə̄ zə kə̀ Zəŋso naa ko a te à?”

¹⁸Ù n dzɛ̀ â ghee enyəa, “Nyə ndùw nlò enaʼ, ghɛ̀ nduw alô tûwbʉ̀ghà ù lì, ghɛ̀ dzɛ â wə̄n enyəa, ‘Wàdè dzɛ̀ enyəa, Nəgha zaŋā zə m kpē; à sò lò alô ghù Ǹ sô zəā zə kə̀ Zəŋso naaŋ ko ghàʼ à ghê tsə̀təndə̄ghā taŋā to.’ ”

¹⁹Tsə̀təndə̄ghā tə ŋ ghəəŋ ndùw sùghò aŋghəa Yɛso teso tsughu â ghee, ndùw fə̀ghaan naŋa tsùghù sùghò fʉ̀ghàzəa u zə kə̀ Zəŋso naaŋ ko.

²⁰A m bùghò â kùun tò, Yɛso n tsùghù dòʼò tsùghù ezə ghèe ghê tsə̀təndə̄ghā tə wə̄n ten èghəm à ghè tò tə bə̀ghà.

²¹Aŋghəa ghe zəā, ù n dzɛ̀ â ghee enyəa, “M̀ fɛ kùu dzàa wò nù â ghɛ̀, ghùw am bvʉa sô fèen fùghuu mùghò.”

²²Ghue zə kpuw lɔŋe tsughu ghee enyə, chìa m bvʉ â wə̀n à, “À yia lo a, Mughùbè?”

²³Ù m bɛ̀lɛ̀ tsùghu ghee enyəa, “Ghùw wəla ù sò dzeŋe nyəso nyəa ghu ko alo kəkaŋ ghàʼ à wə̄n an nə̀gha è zəa zo lo ghùw wəla ù sò fêen fughuu mugho.

²⁴Wɛ̀ ù Ghùw fɛ bɔɔm nùghùun ndùw aŋghəa ghe tɔm naŋā an tuw kə wə̄n. Tsû ù ne lo â ghùw wəla ù kuūwn feē fughu Wɛ̀ ù Ghùw! Dzɔ̀ mò so e lo â ghùw ù tè abugho ghe mò tâʼkè dzə wə̄n.”

²⁵Dzudàs wəla ù fə̀ so e fêe fughu wə̄n n dzɛ̀ enyea, “Wàdè, à sò yia lo mugho a?” Yɛso m bɛ̀lɛ̀ tsùghu wə̄n enyəa, “Ghù dzɛ̀ êzə̀.”

²⁶Aŋghəa Yɛso sò zəā ghèe ghê tsə̀təndə̄ghā tə wə̄n to, ù n nì kɔ̂ʼ kəbɛ, gɔ̀ŋlò è tsughu, fughu tsùghù sùghò kə̀zɔ̀ŋlò a te, boʼn dzùghù fùghù ndùw â tsə̀təndə̄ghā tə wə̄n to, dzɛ̀ â ghee enyəa, “Nǐ nlò, ghɛ̀ zə; zən lò gwən e ughùe zaŋā.”

²⁷Ù n daŋso nì kɔ̌ʼ wùa è nlʉ̀, a m bùghò ù fughu tsughu zɔ̀ɔŋ kò â Zə̀ kò, ù m fùghù ndùw â ghee, dzɛ̀ â ghee enyəa, “Mʉ nlò, ghɛ̀ a dzə̀m;

²⁸ Nu tən lò kâŋ taŋa təla Zə̀ kə fə̀ nî zə kàa mò kàa a te, ghe kwə̂n sə wo an tuw u ndə̀mà tə aghì enyəa to Zə̀ kə̀ mô ghuūw maʼà bòo tə ghee a te.

²⁹M̀ fɛ dzàa wò nù â ghɛ̀ enyəa Ŋ̀ kê kòom mʉ̀ kòʼ yǒ lʉ̀ mə̀n, àgɔ̀ʼɔ̀ kô an tsuʼ wəla Ǹ lo mʉā m fùghu mò sɛ̀ am fɔ̀e u Bəghà.”

³⁰Ghe n daŋso zom tsughu aghəa, nùghù sə̀ kɔ̀ʼ ndùw aŋ kwàʼ u tə̀ Olèf.

³¹ Ghəa ghê Yɛso lò aŋ kwàʼ u tə̀ Olèf, ù n dzɛ̀ â tsə̀təndə̄ghā tə wə̄n to enyəa, “Nɛ â tsuʼ wo, ghɛ̀ a dzə̀m sò tǐi zə̀ghàan tàʼn tsùghuu mùghò; aŋghəa tɔm naŋa am mwàʼsò kə Kəzə̀ enyəa, ‘Ǹ lo fùŋù màʼn wò bàʼàtə̀ndzì, saʼ kə təndzì kə̀ lo tiī sɛ̂ɛ tsughu.’

³² Abugho Zə̀ kə̀ kê kuūwn zôm nughù kɔʼ mugho alo evʉ̄, Ǹ lo nughùu ndûw aŋ Galèlîi â sə ko, sěe ghɛ̀ sô bughōo.”

³³Pità n dzɛ̀ sə̀ ndùw â wən enyəa, “Abugho ghee a dzə̀m bùʼ ti zəghàa ko ghû, Ŋ̀ kê kǔuwn zə̀ghàa kòʼ yò ghû!”

³⁴Yɛso n dzɛ̀ â Pità enyəa, “Kùmkùm, Ǹ so Ǹ dzâa wô â ghù enyəa nɛ â tsuʼ wo, â mbvʉ aletɔ̄ŋ à sò lǒ mò ghǔ m mùghò tue màʼà tənəghā tə təgha.”

³⁵Pita m bɛ̀lɛ̀ ndùw wən enyəa, “Ǹ tuū maʼà kô ghù, a lo ko evʉ, to M̀ buʼù kpuūw daŋso ghàʼ ghù.” Tsə̀təndə̄ghā tì tə̀ dzə̀m m bɔ̄ɔm dzɛ̀ sùghò ghə̀a è mɔʼɔ̄ zo.

³⁶Yɛso n daŋso ndùw ghèe ghê tsə̀təndə̄ghā tə wə̄n to an lùʼu kə̀ li ko ghe tɔŋlo enyəa à lǒ Gɛ̀tsɛ̀manè, ù n dzɛ̀ â ghee enyəa, “Dòʼo tsughu nlò fɛ, Ǹ ndûw gɔ̂ɔŋ wô fî.”

³⁷Ù mo e nduūw nù, nì kɔ̀ʼ Pità àsùghò wɛ a Zɛbɛ̀dîi yì à bə̀ghà, ù n nùghù mùŋe dòʼò è tsùghù ènyə, kaʼ tsughu alebàŋsò fə̀ŋ.

³⁸Ù n nùghù dzɛ̀ tsùghù â ghee enyəa, “Fə̀ŋ è lì baŋà mùghò fɛ to vʉ zə e nîi daŋso mùghò a te; dòʼodòʼo tsughu nlò fɛ, sɛ̀ è chiīn tsughuu.”

³⁹Ù n daŋso nyɛʼɛ nùghù dàan kə̀ŋo è nduw, ù n tsughu nyaʼa è tsughu, pfʉa ndùw ùsʉ a ghueetsə̄, kàʼ ndùw alegɔ̀ŋlò enyəa, “Tsele waŋā, abugho dzì mò lo, to ghù mo ni nughu wùa zə̀ e fala zən aŋ ghùu kaŋa; yia a bugho e sô buw aledòʼò aŋghəa M̀ mòʼnlo, ghəəŋ ndùw ko ghəa zəla fə̀ŋ zə̀ghà dè kɔʼ.”

⁴⁰Ù n daŋso bùghò kòʼ wò mò tsə̀təndə̄ghā tì tə̀ təgha bwii nù, ù m bvʉ â Pità enyəa, “To e fɛ kùm lò enyəa ghɛ̀ yo aledòʼò tsûuŋ tsughu edzūŋ sɛ̌ a?

⁴¹Ghǒom tsughu nlò, ghɛ̀ e gɔɔ̄ŋ tsughuu enyəa e kwo fəgha kə lô tsoō ghɛ. Ghɛ̀ ki nû moʼnlò e te zo alefwàʼ, ghue zə e kuūwn bughuu ghaʼa ghɛ.”

⁴²Ù ŋ kòom nùghù kpèʼe è tsughu, ndùw də̀ghàan ndùw ègɔ̀ŋlò enyəa, “Tsele waŋā, abugho ghù yo alenìi nughù wùa zə̀ èfala zən aŋ ghùu mùghò, buw mò M̀ mʉ nû, e doʼò tsughuu ko aŋghəa ghù tsə̌m.”

⁴³Ù naam bùghò kòʼ kpèʼe wò ko mo ghe yia bwiī; nu mgbii tə mò kala ghee.

⁴⁴Ù ŋ kòom nǎam nùghù kpèʼe tsughu ko nù, ndùw gɔ̀ŋlò è kpèʼe alekɔʼɔ̄ sə tənəghā tə təgha, dzɛ̀ kô ghəa è mɔʼɔ̄ zo.

⁴⁵Ù n daŋso bùghò kòʼ wò tsə̀təndə̄ghā tə wə̄n, dzɛ̀ â ghee enyəa, “Ghɛ̀ naam zuuw ko tə̀mgbii a, ghɛ̀ zʉ̂ʉn ghue zo a? Nəgha zə m kpe, ghe ŋ Wɛ̀ ù Ghùw fêe fughu â ghì à biigh gho.

⁴⁶Nùghu kɔʼ nlò sɛ̀ nughù, ghùw wəla ù fèe fughu mugho m bùghò.”

⁴⁷Ghəa Yɛso naām kə̂a ghəa gho êzə̀, Dzudàs, tsə̀ndə̄ghā e mɔ̀ʼ an tsə̀təndə̄ghā tən èghəm à ghè tò tə bə̀ghà, n səŋ tee è wo, ghèe ghê nɛ̀ kə aghì kò, tuw kə təfɔ̀e à tum wo, àsùghò tsoʼ to. Ghe ŋ ki nnyə àsùghò kasəŋgùʼ tò.

⁴⁸À n lo mò ghùw vʉ̀a ù fèe fughu Yɛso mâa dzɛ̀ nàŋa tsughu â nè kə aghì chi ko enyəa, “Ghùw wəla Ǹ sô ndûw maāŋ kele nduw, à fi lo wə̄n; nǐ nlò.”

⁴⁹Dzudàs n daŋso tiso ndùw ko ùghue an sə Yɛso, â wə̀n à, “Yìa n tɔɔŋ ghû a Wàdè!” Ù n daŋso maaŋ kele ndùw wə̄n.

⁵⁰Yɛso n dzɛ̀ â wən enyəa, “M fə̄n, mba ghəəŋ ndùw ghəa ghə̀là ghù bùghò fɛ alebùghò ghəŋlo.” Ghe n daŋso ndùw kwu tsuŋ tsughu Yɛso, nì kɔ̌ʼ wə̄n.

⁵¹Tsə̀ndə̄ghā è Yɛso e mɔ̀ʼ n daŋso sɔ̀ŋ kɔʼ fənyə, tswɛ̀ kə̀a màʼà ndùw tuūŋ kə kɔ̀ɔ fə Fɔ̀e è ne.

⁵²Yɛso fi nughù dzɛ̀ nù â tsə̀ndə̄ghā zə enyəa, “Zughu naŋa nyə fəghà fò ebàm; tɔŋlo enyəa ghî ghəla ghe wiī ghî ghò alo nnyə, ghe lô ghee wii sùghò alo nnyə.

⁵³Ghù kwo yo enyəa to Ǹ dzâa tsughu, Bəghà tuū wô mùghò â shwaʼ u tsətəndə̄ghā tə wə̄n wo eghə̄m à ghè wò u bʉ̀ghà à, ghe bughò yosò mùghò à?

⁵⁴À kuuwn lò enyəa abugho Ǹ dzɛ̂ tsughu êzə̀, to ghəa a laʼà bùghò sə kpenlo ênzə̂n an shwaʼ u Kə̀zə̀ wəla u dzɛ̂ tsughu enyəa ghəa ghən ki alebùghò sə êzə̀ à?”

⁵⁵ An nə̀gha zə̀ èzə̀, Yɛso n dzɛ̀ â nɔ̀e kə aghì chi enyəa, “Ghɛ̀ fɛ tsò sə̀ wò à nyə mò àsùghò gə̀m u təmbàŋ wò tò ghɛ̀ tsoo kəŋo ghùwtsɔ̀ŋɔ, alebùghò kwuū ko mùghò à? Mùghò n zoʼn zee ko àghì an Ndùghène è Tə̀dzûu an tsuʼu mən n dzə̀m, ghɛ̀ ŋ kwuu yo mugho.

⁵⁶Ghəa ghən fɛ kuuwn bùghò sə kɔʼ aleluesō tsughu lâŋ kə Shwaʼ u Kə̀zə̀ kəla ghiīshʉ̀ghà a Kəzə̀ a fə̀ tɔm naŋā.” Tsə̀təndə̄ghā tə n daŋso zə̀ghàa tàʼà tsùghu wə̄n, sɛ̀ɛ tìnlo èkɔʼ.

⁵⁷Ghî yia ghe mô kwu kɔʼ Yɛso, ghe n nì ndùw wə̄n a vʉ̀a Kaefàs, tɔɔŋ Fɔ̀e è ne mo ghê dèekə̀làŋ m fughu zûuŋ dòʼò, ghèe ghê tsoʼ to.

⁵⁸Pità ŋ kuuwn dzùum ndùw ko wə̄n alo kədɛ̀, ndùw tɛ̀ mìasò ndùw am be kə̀ ne ko alô Fɔ̀e è ne, tsə̀ghà nyə dòʼò dzə̌əŋ tsughu ghèe ghê gbè tò alekòʼ enyəa ghe sô ghə̌əŋ kùu ndùw ènzə̂n a.

⁵⁹Tuw u təfɔ̀e àsùghò ghì à li yì a dzə̀m aŋ kaaŋsì ŋ kəŋo kâaŋ ghəa zəla ghe lô alekwu wə̄n a te, to wi wə̄n.

⁶⁰Ghe ŋ kè kele èghəa, mo ndəm è aghì mâa ŋgə̌əŋ kàʼ kɔ̀ʼ wò ko nû gha gho an tuw kə wə̄n. Ghî ghə̀ n ndùw sə̀ kɔ̀ʼ gùŋsò wò à bə̀ghà,

⁶¹ bùghò dzɛ̀ wò enyəa, “Ghùw wən dzɛ̂ enyəa, ‘To M̀ gbɛlɛ̀ maʼà tsughu Nùghù è Kəzə̀ è ne zən, Ŋ̀ kôom bəghaa naŋa kɔʼ ebàm alo ntsuʼ n təgha.’ ”

⁶²Fɔ̀e è ne zə fi nughù těe kɔʼ nû, bvʉa â Yɛso enyəa, “Ghù kì nû ghəa zo alebɛ̀lɛ̀ aŋ ghəa ghəla ghe kwuū ghû fɛ à te a?”

⁶³Yɛso ŋ kuuwn zuuw ko mɔŋ. Fɔ̀e è ne zə n daŋso dzɛ̀ â wə̄n enyəa, “M̀ bvʉa wò â ghù an zən e Kəzə̀ enyəa ghù dzɛ̀ wo â ghàʼ enyəa ghù lǒ Kə̀lestò, wɛ̀ ù Kə̀zə̀.”

⁶⁴ Yɛso m bɛ̀lɛ̀ ndùw wən enyəa, “Ghù dzɛ̀ sə̀ wò êzə̀. Ǹ so Ŋ̀ kuūwn dzâa wô ghɛ̀ enyəa, alenìi nughù tsughu êzə̄ŋ nùghù ndùw â sə ko, ghɛ̀ kê kòʼò wò Wɛ̀ ù Ghùw ù te ù dòʼ aŋ kwè ù təma u Zə̀ kə̀ ghaʼa ko, mò vʉ̀a ù bùghoo am mbà è kəwala.”

⁶⁵ Fɔ̀e è ne sùʼ bàa tsùghu ndzʉ tə Yɛso, dzɛ̀ tsùghù enyəa, “Ù sùuwn sə̀ wò Kə̀zə̀, zən lɛɛn kòom yò dzə̂ ghəa zəla a ləghaa ghùw ù lì bùghò teso dzɛ̀, ghɛ̀ n zuw ghəa ū sǔuwn Zə̀ kò a te.

⁶⁶Ghɛ̀ moʼnlò èndūghō a?” Ghe m bɛ̀lɛ̀ tsùghù enyəa, “Ù kpè alekpūw.”

⁶⁷ Ghe n daŋso kàʼ ndùw aletsə̄nlō ntə̀ghà an sʉ u wə̄n, buu wə̄n; à li ghə n səghàan wə̄n alo uswɛ̄ɛ.

⁶⁸Ghe mò à wə̄n à, “Dzǎa wò ghùw wəla u mɔ̀m ghû a Kə̀lestò. À ghùw nwə̀n ndughoo?”

⁶⁹À n lo êzə̀ mo Pità dòʼ a beē am be kə sə ko, kɔ̂ɔ fə Fɔ̀e è ne fə̀ zən fə m bùghò kòʼ wò wə̄n, dzɛ̀ â wə̄n enyəa, “Ghù wən mô lò sugho ghɛ̀ à ghê Yɛso, ghùw ù Galèlîi wən.”

⁷⁰Pità n tùe màʼà fughu an sə kə aghì enyəa, “Ǹ zuuw tɔ̄ɔ yo ghəa yìa ghù kə̌a ghè ghò.”

⁷¹Ù mo e tsəghàasə̌a ndùw alo kəfālā, kɔ̂ɔ fə̀ zən fə̀ li fə ŋ kòom kòʼ kpèʼe tsughu wə̄n, dzɛ̀ tsùghù â ghì ghəla ghe mò kùʼù ti kaāŋ fughu enyəa, “Bəghà wən mò lo ghèe Yɛso, ghùw Nazalɛ̀t ù vʉ̂.”

⁷²Ù n tùe è kpeʼe, â ghee enyəa, “Ŋ̀ kwo yo ghùw ù te.”

⁷³A mo e tsûuŋ tsùghuu ko enyə, ghî yia ghe mò ti kaāŋ fughu m bùghò dzɛ̀ â Pità enyəa, “Kùmkùm, ghù lǒ ghùw aŋ ghì ghən, tɔŋlo enyəa ghù ghəa a bɔɔm kə̀a ko tǒ ghùw ù Galèlîi.”

⁷⁴Pità n daŋso kaʼ tsughu ghəa à kɛɛ̄n gho fughu enyəa, “Ŋ̀ kwo yo ghùw ù te.” Nùumbvʉ fi daŋso nùghù tɔŋ kɔʼ nû.

⁷⁵Pità n tɛ̀mòʼn wò shwaʼ u Yɛso wən enyəa, “Tò nùumbvʉ e tɔŋ, à sə̀ lǒ mò ghǔ m mùghò tue màʼà nàŋà nəgha to təgha.” Ù fi nughù tsə̀ghà sə̀ ndùw nù a beē, sə̀ dì tsɔ̌ʼn tsughu enyə.