Read Aghem Matìo 3 Bible Online

Matìo 3 - Aghem bible

Matìo 3

¹An tsuʼu n te mò, Dzɔ̌n fùghùu mùghù ŋ Kə̀zə̀ ŋ kaʼ tsughu tsə̀ndə̄ghā è Kə̀zə̀ a lùʼû naʼn wo aŋ ŋgwə̀n è Dzùdîa.

² Ù n nâʼn wò enyəa, “Ti màʼa nlò ghəa ghɛʼɛ à biigh gho, tɔŋlo enyəa fɔ̂e u kəwālā wə n sū.”

³ Dzɔ̌n wən lǒ ghùw wəla ghùwshʉ̀ghà Èzayà fə dzɛ̂ naŋā kùu ndùw wən enyəa, “Ghùw buʼu kwəla wò kə̀bɔ̀ŋ aŋ ŋgwən, nàʼn wò enyəa, ‘Fəghaan naŋa nlò dzì â Mughu ù te, nə̀ghàso nlò dzǐi mò â wə̄n.’ ”

⁴ Dzɔ̌n fə̀ dzəə̄n tsəgha təndzʉ̄ mo ghe təm sughu aŋ gûw è kə̀anyòm kə̀ lì ko ghe tɔŋlo enyəa à lò kɔʼdzəm, mò ù ŋ kɔlɔ tsəghà wò kwùu fə gûw fò alo esā. Fʉghàzəa u wə̄n wə n lo təbe àsùghò fə̀dɔ̂ŋ.

⁵Aghî am mbùʼ è Dzùdîa e dzə̀m n nyəŋo tsə̀ghà ko a vʉ̀a wə̄n; a àsùghò ghì a Yɛ̀lusalɛ̀m ghò àsùghò ghî a nàʼà mə̀là n lǒ a ŋgùŋù tə dzughù è Dzodàn.

⁶Ghe m bughò zàa wò vùŋ u ghee enyəa ghe ŋ ghəəŋ bonlo, Dzɔ̌n m fughuu tsughu ghee â mùghù ŋ Kə̀zə̀ mo an dzughù è Dzodàn.

⁷ Ghəa Dzɔ̌n kôʼ ghî a Falàsîi à ŋgee bughōo, àsùghò ghì a Sadùwsîi ghò, ghe bughoo alebùghò nî mùghù ŋ Kə̀zə̀, ù m fəŋso dzɛ̀ â ghee enyəa, “Ghɛ̀ fwi wən, à ghɛ̀ bɔŋ tsʉ̀ ndùghò enyəa ghɛ̀ lo nû alenɔ̀ɔsə an ndzəgha kəla kə bughò lo a?

⁸E ghəəŋ nduw nlò ghəa ghəla a lo aledèe tsughu enyəa ghɛ̀ ŋ ghəa ghɛʼɛ à biigh a ti màʼà.

⁹ E kwo ghɛ̀ lô moʼò enyəa ghɛ̀ lo nû alezə kətuw abugho ghɛ̀ dzâa tsùghù dzə̂ enyəa, ‘Abə̀làhâm lǒ tsele waʼa.’ Tɔŋlo enyəa to Zə̀ kə̀ nîi kɔʼ tia ghən kə fənsò fughuu kɔʼ awɛ a te â Abə̀làhâm.

¹⁰ Ndzàm bùʼ lò nû êzə̄ŋ ghe shia naŋa an chi e fəkàʼ, è ləmlo enyəa mo kâʼ fə̀ yo alemʉ twam ù dzûŋ wò, a m gbò kpàa màʼà kàʼ fə te fo.

¹¹Ŋ̀ ghɛ fɛ fughuu â mùghù ŋ Kə̀zə̀ mò aledèe tsughu enyəa ghɛ̀ n tì màʼà ghəa ghɛʼɛ à biigh gho. Ghùw wəla ù lo kuūwn bughōo a bàâ mùghò m mùghò tsəghà sə; Ŋ̀ kâ bùʼ kɔʼ kpè alebòʼò gùw tə wə̄n, ù lô ghɛ̀ à mùghù ŋ Kə̀zə̀ ŋ kuuwn fughuu an Zuʼ tə Kəzə̀ àsùghò wə̀n mò a te.

¹²Ù lò â kwònɛ̀lɛ aŋ ghu alefoōn nughù kɔʼ təŋgòʼ a te, ù fwə̀là naŋā ndûw an tɔ̀e a kə̀twɛ̄; ù daŋso kâaŋ kpâa ndûw ghùw u te wo aŋ wə̀n wəla u nyəə̄m tsəghà yo.”

¹³A n tsùʼu n te mò, Yɛso n zə̀ghàa wò Galèlîi enyəa e bughò tò Dzɔ̌n fughu wə̄n â mùghù ŋ Kə̀zə̀ mò an dzughù è Dzodàn.

¹⁴Dzɔ̌n m fəma kèe aletūe, ù m bvʉ â Yɛso enyəa, “Ghù sò bùghò ênzə̂n enyəa M̀ fughuu wô ghù â mùghù ŋ Kə̀zə̀ mò a, mò à kì ghû alelaām fughu mugho â mùghù ŋ Kə̀zə̀ mò a?”

¹⁵Yɛso m fwə̀n bɛ̀lɛ̀ ndùw wən enyəa, “Na to e doʼo tsughuu ko êzə̀; tɔŋlo enyəa e lo tsəghatsəgha an sə kə Kə̀zə̀.” Dzɔ̌n fi boo kɔʼ nû.

¹⁶Ghəa ghe fughu tsughu Yɛso â mùghù ŋ Kə̀zə̀ mò êzə̀, ù mo e daŋso səa kɔʼɔ wò an dzughù, wala kə n nùghù tsʉ̀ è tsughu, ù ŋ kòʼ Zuʼ tə Kəzə̀ tə̀ zəgha tsughu wô aŋ ghùe wə ebùŋu, tsùghù bùghò mǎa tsughu an tuw kə wə̄n.

¹⁷ Ghe mo e zuw dzə̀ saʼ tsughu wô alo kəwālā enyəa, “Wən lǒ wɛ waŋā, Ǹ duʼn nû ghàʼ à wə̄n.”