Read Aghem Matìo 4 Bible Online

Matìo 4 - Aghem bible

Matìo 4

¹ Zuʼ tə̀ Zɔlɔ tə te tə n daŋso nì sòʼ â Yɛso, aŋ ŋgwən enyəa vʉatsə̄a a ndûw tsoom wə̄n fughu.

²Ù n dòʼò fùghù êzə̀ alo ntsuʼu ŋghəm n chìakò, zee ndùw bùghò bwîi ndùw mò zə̌a yo fəgha kə̀ li ko a fùghù êzə̀. Dzə̀ŋ n daŋso bùghò zà tsughu wə̄n aŋghəa tsuʼu n te n tsəghà tsughu.

³Vʉatsə̄a yi n daŋso ndùw è bugho, dzɛ̀ â wən enyəa, “Aŋghəa e lô enyəa ghù lǒ Wɛ ù Kə̀zə̀, dzàa tsughu enyəa tia zən fə̀là kɔʼ ufʉghàzəa.”

⁴ Yɛso ŋ kuuwn dzɛ̀ â wən enyəa, “Ghe tɔm naŋa am mwàʼsò kə Kəzə̀ enyəa, ‘Ghùw yò dzə̂ alekaā mughùu ko alo ufʉ̀ghàzəa, to ù laām mughùu aŋ ghəa zəla Zə̀ kə̀ dzɛ̂ sə wo.’ ”

⁵Vʉatsə̄a yi ghə n daŋso nì nùghù ndùw wən an Yɛ̀lusalɛ̀m, Naʼ è Zɔlɔ zo, kɔʼ naŋa kɔʼ wə̄n an ndɔ̀ŋɔ̀ndɔ̀ŋɔ̀ fə gɔ̀ŋ kə ndughu è Kə̀zə̀ e ne,

⁶ dzɛ̀ â wə̄n enyəa, “Abugho ghù lǒ wɛ̀ ù Kə̀zə̀, tǎa sə tsùghù ndùw fɛ, nu ghe tɔm naŋa am Mwàʼsò kə Kəzə̀ enyəa, ‘Zə̀ kə̀ lo tsə̀ghàsò tsùghuu kə̀làŋ â tsə̀təndə̄ghā tə wə̄n to, tə e lɛnlo â ghù, bɔɔm sùghò ghù enyəa e kwo ko ghù lò tsɔ̂ɔ taʼn ghuw ko alo etīa.’ ”

⁷ Yɛso n dzɛ̀ â wə̄n enyəa, “Ghe tɔm naŋa kpeʼe sùghò enyəa, ‘Kà mɔ̂m kòʼ Mughùbè wʉ̂a, Kə̀zə̀.’ ”

⁸Vʉatsə̄a yi ghə n naām nì nùghù kpèʼe ndùw wə̄n aŋ kwàʼ ù də̀ghàadə̀ghàa ù li wo, dè tsùghù wò wə̄n â nàʼà tə mbī to tə dzə̀m, ghəa tə ghaʼa a te;

⁹daŋso dzɛ̀ â wə̄n enyəa, “Naʼà tə̀n tə̀ dzə̀m ènyə, M̀ fughuu nù â ghù abugho ghù təm wo ŋguʼ to a tsəlà mùghò.”

¹⁰ Yɛso n daŋso dzɛ̀ â wə̄n enyəa, “Nùghù fɛ a Satàn wə̄n! Tɔŋlo enyəa ghe tɔm naŋa enyəa, ‘E kɔʼso kɔ Mughu ù te, Zə̀ kə̀a, ghù è tele fwaʼā ko â wə̄n.’ ”

¹¹Vʉatsə̄a yi ghə n daŋso zə̀ghà tsùghu wə̄n, tsə̀ndə̄ghā è Kə̀zə̀ m bùghò yòsò kɔʼ wə̄n.

¹² Êzə̄ŋ, ghəa Yɛso zuw tsughu enyəa ghe n Dzɔ̀n kwu, ù n nùghù ndùw aŋ Galèlîi.

¹³ Aŋ Galèlîi, ù ndùw an naʼ e Nazalɛ̀t, ù n zə̀ghàa tsughu Nazalɛ̀t, ù n ndùw mùghùu ndùw aŋ Kàpɛnòm a ŋgùŋ è dzùghùntsòʼ, am mbùʼ è Zɛbulùn àsùghò Naftalè,

¹⁴alebɔɔ̄m luesō tsughu lâŋ kə fəgha kəla ghùwshʉ̀ghà Èzayà fə̀ dzɛ̂ naŋa enyəa,

¹⁵ “Ghî a Zɛbūlùn ghò, ghî a Naftalì ghò; an dzì è dzùghùntsòʼ, a ŋgùŋùtsə kə Dzudà, Galèlîi naʼ zə Etòʼò;

¹⁶tɔɔŋ ghɛ̀ ghəla ghɛ̀ mò naām mughù alo kələ̄m, n tsə̀ è tùghuu kôʼ. Ghɛ̀ ghəla ghɛ̌ fə̀ lo fughu am mbù è te, mò à lə̀mà kɔ̀ʼɔ ko èvʉ fughu, tsuʼ wə n zuw an tuw wɛʼɛ.”

¹⁷ Yɛso fə̌ tsə̀ndə̄ghā è Kə̀zə̀ kaʼ nughu wo alenàʼà an tì kə te ko enyəa, “Ti màʼa nlò ghəa ghɛʼɛ à biigh gho, tɔŋlo enyəa fɔ̂e u kəwālā wə n su.”

¹⁸Aŋghəa Yɛso tsə̀ghaa a ŋgùŋ è dzùghùntsòʼ è Galèlîi, ù ŋ kòʼ tsùghù ghî à li gho a bə̀gha mo ghe lo waazə̂, Sǎemòn wəla ghe tɔŋlo enyəa à lò Pìtà, ghèe wàazə̀, Andùlù, mo ghe maʼnlò èghuūw fughu an dzùghùntsòʼ; ghe fə̀ lo tsəgha ghî à kwuu a tətsəghaa gho.

¹⁹Ù n dzɛ̀ â ghee enyəa, “Bùghò nlò a bàâ mùghò, Ǹ lo ghəə̄ŋ tsughu ghɛ̀ è kwuu ghî ghò tò tətsəghaa.”

²⁰Ghe n daŋso zə̀ghà tsughu ghuūw e ghee, nùghù ndùw a bàâ Yɛso.

²¹Yɛso mo e kôom səā kəŋo ndûw â sə ko, ù ŋ kòʼ kpèʼe tsughu waazə̂ à li gho a bə̀ghà, Dzɛ̂ms ghèe Dzɔ̌n, wɛ a Zɛbɛ̀dîi. Ghe n lo alo kəkwə̀n ghèe ghê tsele tɔɔŋ Zɛbɛ̀dîi, mo ghe yia fəghaan ghuūw e ghee zo alemàʼà nyəā tsughu, ù n tɔŋɔ tsughu ghee.

²²Wɛ yi ghə n daŋso zə̀ghàa tàʼà tsùghu tsēlē alo kəkwə̀n, nùghù ndùw a bàâ wə̄n.

²³ Yɛso m bwìi ŋgəa tsughu Galèlîi e dzə̀m, zoʼn ndùw ghee an Ndughu tə Tə̀dzûu tə̀ ne to, nàʼn ndùw Làbəlà è te kùu ndùw Fɔ̀e u Kəwālā, baaŋ ndùw ghì ghəla ghe mò dzaŋā ŋgòʼ è dzàŋà tə̀n tə dzə̀m.

²⁴Zwɔ̂ŋ u wə̄n wə m fuŋ ŋgəa tsughu naʼ e Silìa e dzə̀m, ghî ghə̀ n nîi wò mbī tə aghì tə̀ dzaŋā ten tə̀ dzə̀m; ghəla ghe dzaŋā ŋgòʼ e dzàŋà tə̀n tə̀ dzə̀m àsùghò luʼū tə eghùe tò, ghəla ghe ki zʉ̀ ù biigh wo, ghəla ghe bvʉā bvʉ̀ kò, à ghəla ghe kpuw doʼō â luʼū tə ghùe tò, ù m baaŋ kɔʼɔ ghee.

²⁵Nê kə aghì kə̀ n tə̂əŋ bwìi kǎaŋ ko a bàâ wə̄n, ghe nughù sə kaāŋ wo am mbùʼ è Galèlîi àsùghò an Nàʼà mən Eghəm[1] an Yɛ̀lusalɛ̀m, an Dzùdîa àsùghò a ŋgùŋ è tsə kə Dzodàn.