Read Aghem Matìo 6 Bible Online

Matìo 6 - Aghem bible

Matìo 6

¹ “Nì nlò ghôom zò enyəa e kwo ghɛ̀ lô ghəəŋ ghəa a Kəzə̀ à dzûŋ ghò an sə kə aghì enyəa ghe e tɔʼɔ̀ koʼò wô; tɔŋlo enyəa Tsele wɛʼɛ alo kəwālā lô ghɛ̀ â namso kə̀ li kə fughu yo abugho ghɛ̀ ghəŋlo êzə ndɛ.

²À fi lo enyəa, abugho ghɛ̀ namso ghùw ù lǎa â fəgha, kà nlò sə tɔŋ mbuwlè o a beē tò aŋghəa ùbàŋàdzə̀m ghəŋlo an Sàŋ tə Tə̀dzûu, àsùghò alo enaʼ enyəa to ghe mô kɛ̌ɛ wò ghee. M̀ fɛ kùu dzàa wò nù â ghɛ̀, ghe ŋ kele tən namso kə ghee ko.

³Abugho ghùw wɛʼɛ so e kuūwn fughuu èyôsò, kà ghəŋlo kwe wʉ̀a ù kwû ù kelê fəgha kəla kwe wʉ̀a ù təma u ghəŋlo,

⁴to yosò zə̀ghà zə̀ è lo tsənetsən, to Tsele wʉ̂a wəla ù kòʼò ghəa ghəla a tsə̀ghàa tsənetsən lo namso ghù.”

⁵ “Abugho ghɛ̀ so e gɔ̂ɔŋ sùghò nù, kà nlò ghəəŋ dzə̀ tò ghî a kə̀bàŋàdzə̀m; nu ghe ləghaa alenughūn teen kɔʼɔ an Ndughutə̀ne te Tədzûu tò àsùghò am fwànlò u tədzǐi enyəa to ghî à mô koʼò wô ghee. Kùmkùm, M̀ fɛ dzàa wò nù â ghɛ̀ enyəa ghe ŋ kele kə ghee ko kənamso.

⁶Abugho ghùw wɛʼɛ so e gɔ̂ŋlò, laam nyə̀ ndùw an dzughu e ndughu zəghà, dzʉ̌a sə wò bâʼ kò, ghù gɔɔŋ nduw â Tsùghò wəla ù lǒ mò ghù wən koʼò yò, Tsele wɛʼɛ wəla ù koʼò ghəa ghəla a nân doʼō kê fughu ghû â namso ko.

⁷Abugho ghù gɔ̀ŋlo kà è buʼn bɔ̀ŋ mò tò Etoʼò; nu ghe moʼò enyəa Zə̀ kə ghee fɛ e zuw an dəghà kə e gɔŋlò kəla ghe gɔɔŋ tsughuu.

⁸Kà è ghəŋlo tǒ ghee, tɔŋlo enyəa tò ghù è bvʉ kefəgha, à n lo mò Tsùghò kwò ziī nû fəgha kə̀là ghù ləghaa.

⁹Abugho ghɛ̀ so e gɔ̂ŋlò, ghɛ̀ ŋ gɔ̀ɔŋ tsùghù enyə, ‘Tsele waʼā wəla ù lò alo kəwālā, To ghî à mô kɔ̂ʼsô zən zəghà.

¹⁰E saʼa mbī e dzə̀m, mbī e bwiī an dzə̂ zə̀ghà to e lô alo kəwālā.

¹¹Fughu ghaʼ â fə̀ghàzəa kə nɛ ko, ghù è fughuu ghaʼ â fə̀ghàzəa ko alo fətsūʼ;

¹²ghù ghuūw maʼa bôo taʼa to, tò ghàʼ ghuūw mâʼn ndûw sughò bòo tə ghì ghəla ghe boō a zəŋò ghàʼ,

¹³Kà boo sùghò enyəa ghəa e tsoom ghàʼ, laam bəghasə̄ ghaʼ nû aŋ ghùu fəgha kə̀ biigh ko.’[2]

¹⁴ Abugho ghù ghuūw mâʼn bôo tə aghì tò, Tsele wɛʼɛ alo kəwālā kê ghuūw maʼà sughò bòo tə̀ghà.

¹⁵Abugho ghù kuūwn tue aleghuūwmaʼà bòo tə aghì, Tsele lo ghuuw màʼn sùghò yò təghà tò təbôo.”

¹⁶“Abugho ghɛ̀ baā dzughu zo kà èmuŋe nlò tǒ ùbàŋàdzə̀m, nu ghe nughùun mgbèe nǎaŋ tsughuu èsʉ enyəa ghî à koʼò wô enyəa ghe baa èdzughu. M̀ fɛ kùu dzàa wò nù â ghɛ̀ enyəa, ghe fi kele dzə̀ namso kə ghee aŋ kòʼ e ghee zə̀.

¹⁷Abugho ghɛ̀ baā dzughu zo, e laam kɛlɛ̄ tsughuu nlò sʉ zo, ghɛ̀ n sɛ̀ʼɛ̀ kɔ̀ʼ tuw wɛʼɛ,

¹⁸e kwo ko ghî à lô koʼòkɛlɛ enyəa ghɛ̀ bǎa èdzughu, à è kwo ko Tsele wɛʼɛ wəla a koʼò yo; Tsele wɛʼɛ wəla ù kòʼò ghəa ghə̀là ghɛ̀ ghəŋlo a fiā ghɛ̀ nân lo, lo namso ghɛ̀.”

¹⁹ “Kà fʉgha wɛʼɛ ù səŋò ù zuūŋ naaŋ fɛ am mbī, an lùʼù kəla u lô fwoʼō, ŋkāa soʼosoʼ tə lo alebùgho pfʉā kɔʼ; ŋkāa ghî a tsɔŋo a lo alebùghò tsɔŋɔ nughùu kɔʼ.

²⁰E laam naŋlo nlò fʉgha wɛʼɛ ù səŋò wò alo kəwālā, a fia u yô aledzèe bo, mò ghùwtsɔ̀ŋo yo sughò aletsɔ̄ŋ.

²¹Tɔŋlo enyəa fə̀ŋ è ghùw bɔ̌ɔm lò ko an lùʼu kəla fʉgha u wə̄n ù səŋò ù lo a te.

²²Sə e lo lâm â gwən e ughùe zò. Abugho sə ghə̀a à lô kədzûŋ, ghue wʉ̀a u dzə̀m u fi ki nu kɛ̀ʼɛ̀ kò.

²³Abugho sə ghəa à kuūwn yò kədzûŋ, ghue wʉ̀a u dzə̀m u fi lo alo kələ̄m. Abugho kɛ̀ʼɛ̀ kəla kə lô a zəŋò ghù lò ləm ko, ləm kə te kə lo aletsoō boʼò doʼò ênzə̂n!

²⁴Ghùw u mɔ̀ʼ yò aledzeŋe fwaʼā â ghì ghò a bə̀ghà alo e nə̀gha e mɔ̀ʼ. Abugho ù lò alefwàʼ êzə̀, ù sò bàa nù u mɔ̀ʼ, ù è ləghaa ù lì wən. Ŋkāa ù è ŋgee fwaʼā â u mɔ̀ʼ, ù è koʼō lʉghaa ù lì wən. Ghù yò alekɔʼso Zə̀ kò, kɔʼso sughò ùkua.”

²⁵Yɛso n daŋso nùghù dzɛ̀ tsùghù enyəa, “Ezə̄ŋ, Ǹ so Ǹ dzâa wô â ghɛ̀ enyəa, kǎ nlò bâŋsò fə̀ŋ tò am mùghù zɛʼɛ enyəa ghɛ̀ lô yia zəa tsə̀ghà kə̀ kwò, ŋkāa enyəa ghɛ̀ lo mʉa tsə̀ghà kwò, ŋkāa aŋ ghùe zɛʼɛ̄ enyəa ghɛ̀ lo dzə̀ən tsə̀ghà kwò tò təndzʉ a. To tuw kə ghûw kə̀ mgbaŋ tsə̀ghàsə̀ ufʉghàzəa à, gwən e ghùe zə e tsəghàsə ndzʉ̄ to a?

²⁶Kǒʼ nwə̀n mò a, n tǎa yo fʉghàzəa wo, n dûum nǎaŋ sùghò yò fʉghàzəa wo a kə̀twɛ̀, Tsele wɛʼɛ alo kəwālā vʉ̀a ù naām tsʉā ko ghè mò. À lǒ mò ghɛ̀ kâ nwən n te mò mgbaŋ tsə̀ghàsə̀ à?

²⁷À lò ndugho am bvʉa zɛʼɛ̄ ù nòʼò â ghue wo alo aghəa, ù lǒ alebaʼso tsughu nyàaŋ fə e nə̀gha an nə̀gha zəla ù ki alemùghù fɛ am mbī à?

²⁸Ghɛ̀ ghue zɛʼɛ buʼù fə̀msô aŋ kwò aŋ ghəa e təndzʉ a? Kòʼ nlò aŋghəa le a noōm dzɔɔ̄ a te aŋ ukwàʼ a, ghe dəmà yò, ghedzə̀ən sùghò yò ndzʉ to aŋ ghùe e ghee.

²⁹ Ǹ dzâa wô â ghɛ̀ enyəa ghuūghùe u Solomòn wəla ù fə̀ tsoō buʼù ghaʼa ko nû, ù fə̀ ki yo ndzʉ to tə dzɔɔ̄ tò ele e mɔ̀ʼ.

³⁰Abugho Zə̀ kə̀ lo aledzə̀là tə̀ndzʉ a zəŋò le gho mo a noom kɔʼɔ nɛ, tsʉtsʉ a mò è kpuw, â n nì kpàa kɔ̀ʼ alo etsə̄, à è səasəa ghɛ a, Ù bòʼò lò alelaso ghɛ̀ ênzə̂n? Ŋ̀ghê làʼà tə̀fə̀ŋ mə̄n.

³¹E fi lo enyəa ghɛ̀ ki yo alebaŋso fə̂ŋ tò enyəa, ‘Ghàʼ lo zə̄a kwò a?’ Ŋkāa, ‘A lo mʉa kwò à?’ Ŋkāa, ‘A lo dzə̀ən kwò à?’

³²À lò Etoʼò ghe dəmà alekelê fʉgha wə̄n. Yia a bughò ghɛ, Tsele wɛʼɛ alo kəwālā vʉ̀a ù kwo enyəa ghɛ̀ ləghaa nù alekelê fʉgha u te wo u dzə̀m.

³³Kuuwn bùʼu tughuso tsùghù dzə̀ nlò kè tò aŋ ghəa e fɔ̀e u Kə̀zə̀ àsùghò aŋ ghəa ghəla a ghəŋlo enyəa ghùw è lo tsəghatsəgha, ghɛ̀ ke kele tsughu sugho fʉgha u te wo u dzə̀m.

³⁴E fi lo enyəa ghɛ̀ ndôʼ kì yo alebaŋso fə̂ŋ tò enyəa tsʉtsʉ kê yia lo ênzə̂n a; nu tsʉtsʉ ki nû fəm kə wə̄n ko. Tsuʼ ù li u yo, u laʼà fəm kə wə̄n ko.”