Read Aghem Matìo 8 Bible Online

Matìo 8 - Aghem bible

Matìo 8

¹A m bùghò Yɛso sə tsughu wo aŋ ukwàʼ, saʼ kə aghì kə̀ n tə̂əŋ wò enyə a bàâ wə̄n.

²A mo e koʼò ko ghùw ù tə̀tsùghò ù lì ù ndùw sə̀ kɔ̀ʼ wò a vʉ̀a Yɛso, tə̀m ndùw tuw wə anyʉ a vʉ̀a wə̄n, dzɛ̀ tsùghù enyəa, “Mughubè, abugho ghù tsə̀m tsughu, ghù lò nû alebaaŋ mùghò.”

³Yɛso n daŋso dàan ndùw kə̀ghu, mɔ̀m tsùghu wə̄n, dzɛ̀ tsùghù enyəa, “Mùghò n tsə̀m, tughu kɔ̀ʼɔ̀.” Tsùghò ti tə n daŋso zə̀ghàa tsùghù tûwbʉ̀ghà vʉ̀ an nə̀gha zə̀ èzə̀.

⁴ Yɛso n dzɛ̀ â tûwbʉ̀ghà vʉ enyəa, “Ghəəŋ tsughu enyəa e kwo ko ghùw ù li lò zuūw dzə, kuuwn nùghu tsughùu, ghù nduw de nduw ghue wo â tuw kə təfɔ̀e kò, ghù fughu nduw fəgha kəla lâŋ kə Musî kə̀ deē enyəa abugho ghe baāŋ kɔʼ ghùw wəla ù mò dzaŋa tsùghò tò u m fùghù ndùw tǒ tsə̌a aledèe wô â ghì ghò enyəa ù êzəŋ e zɔlɔ nù.”

⁵Ghəa Yɛso nyəā nduw aŋ Kàpɛnòm, komndzūghū ù tə̀sùghugòʼ ù lì m bùghò kòʼ wò wə̄n, buʼ kəghu â wən enyəa,

⁶“Mughùbè, kɔ̂ɔ faŋa fə nyəŋ an ndughu fə dzaŋa mo bâ kə ughùe kə wə̄n kə kpuw dòʼò nù, fia fə ŋgeē zuūw fɔɔn zo.”

⁷Yɛso n daŋso dzɛ̀ â wən enyəa, “M̀ bughò bǎaŋ nǔ wə̄n.”

⁸Komndzūghū vʉ ŋ kòom nùghù dzɛ̀ tsùghù enyəa, “Mughubè, Ŋ̀ kâ kɔ̀ʼ kpè tò ghù enyə am pfʉ̌a kaŋā, kuuwn saʼ tsughuu ko an dzə̂, kɔ̂ɔ faŋa fə sô tughuu kɔʼ.

⁹N aŋghə Ǹ lô fɛ, M̀ fwâʼà a tsəlà ghì à li gho, sùghugòʼ tia tə kuūwn fwaʼa a tsəlà mùghò. Abugho Ǹ dzɛ̂ nduw â sughugòʼ è zə̂ enyəa, ‘Ndùw a fî!’ Zə̀ mò è nduw. Mò n dzɛ̂ ndùw e zə enyəa, ‘Bùghò fɛ!’ Zə̀ mò è bugho. Mò Ǹ dzɛ̂ ndùw sùghò â kɔ̀ɔ faŋa fo enyəa, ‘Ghəəŋ ndùw ènyə!’ Ù m bɔɔm ghəəŋ ndùw sùghò êzə̀.”

¹⁰Dzughu zə n zum Yɛso aŋghəa ù zuw tsughu shwaʼ u tûwbʉ̀ghà vʉ wo, ù n dzɛ̀ â ghì yìa ghe mò lo a bàâ wən enyəa, “Kùmkùm, M̀ fɛ dzàa wò nù â ghɛ̀, Ŋ̀ kaām bûʼ kô kôʼ ghùw an naʼ zə Ezə̀lɛ̂ ù ŋgəmso kûum boō fughu â Zə̀ kò tǒ ghùw wən.

¹¹ M̀ fɛ dzàa wò nù â ghɛ̀ enyəa, ndə̀mà tə aghì tə̀ kè nùghùun wò am bàa tə mbī tən tə̀ dzə̀m, ghe e ke zəa dzəəŋ ghèe ghê Abə̀làhâm, Aezìk àsùghò ghê Yàkɔ̂b an naʼ e kəwālā.

¹² Ghe kê kuūwn dzûu naŋa səā wô wɛ a kətsə̄ a beē a tsəla kələ̄m; ghe səa wô ghe e diī a fughu, ghe e pfʉa sɔŋ gho.”

¹³Yɛso n dzɛ̀ â komndzūghū vʉ enyəa, “Ndùw, ghəa ghù boō fughu tsughu dzə, e sô bɔ̌ɔm lò ko êzə̀.” Kɔ̂ɔ fi n daŋso tùghù kɔ̀ʼ sùghò an nə̀gha zə̀ èzə̀.

¹⁴A m bùghò Yɛso ndùw an ndughu alô Pità, ù ŋ kòʼ ndùw nə̀ghàwì ù Pità mò vʉ̀a ù nyə̀ŋ â ghue wo.

¹⁵Ù m mɔ̀m tsùghù ghu kə wə̄n, ghue u te u mo è tsom. Nughò vʉ n nùghù è kɔʼ ghàʼn nì nàŋa wò wə̄n â fʉ̀ghàzəa wo.

¹⁶A m bùghò an nə̀gha è gûŋsò zò, ghe n nì wò ghì a uzʉ̀ a vʉ̀a wə̄n, ù n shʉàa sə̀so tsughu zʉ̀ u te wo mò ù tsə̀ghàsò tsughu ko kəlàŋ enyəa u səā nughù. Ù m baaŋ kɔʼ ghî ghə̀n à dzə̀m ghe mò dzaŋā.

¹⁷ Zən mò fɛ lo alelueso tsughu lâŋ kə̀là ghùwshʉ̀ghà Èzayà fə̀ dzɛ̂ naŋā enyəa, “Ù m baaŋ dzaŋà tə sɛ̀ tò tə dzə̀m.”

¹⁸A m bùghò Yɛso kòʼ tsughu enyəa ghî ghə̀ ŋ ŋgè tsùŋ wò, ù n dzɛ̀ tsùghù enyəa ghèe ghê tsə̀təndə̄ghā tə wə̄n tə daŋà səā ndûw a gùŋ è lì èzə̂ a fughu alo enyʉ̀.

¹⁹Dèekə̀làŋ ù lǐ fi daŋso ndùw sə̀ kɔ̀ʼ wò nù, dzɛ̀ â wən enyəa, “Mughùbè, abugho ghù ndùw ko a ghɛ, M̀ bughòo sùghò a fughu.”

²⁰Yɛso n daŋso dzɛ̀ â wən enyəa, “Kəŋo ŋ ki ubwûʼ, nwə̀n mìa ŋ ki ndughu to, Wɛ ù Ghùw bùʼ ki yo luʼū kəla ù lò alegaʼā tsughu kô kə̀tuw a te.”

²¹Tsə̀ndə̄ghā è lì n dzɛ̀ â wən enyəa, “Mughùbè, na Ǹ ndûw tsəlā wô dzə̂ bə̀ghà, Ǹ daŋso bughò.”

²²Yɛso m fwə̀n dzɛ̀ ndùw â wən enyəa, “Bùghò a nughù. Zə̀ghaa ndùw ghî ghəla ghe lo tò ghî à kpuuwn gho a tsəlā ndûw ghì à kpuwnlo a ghee gho.”

²³Yɛso n daŋso nyə kɔʼ alo kəkwə̀n ghèe ghê tsə̀təndə̄ghā tə wə̄n to, ghe n nùghùu ndùw enyəa ghe daŋasə̌a ndùw aŋ ŋgùŋ è lì ezə̂.

²⁴A mo e koʼò, ghuuw zə m gbən aletsughu, kwɛ̌ɛ kə ushʉ̀ghà kə li kə ŋ kaʼ tsughu aletsə̀ghà a fughu alo enyʉ̀, kwɛ̌ɛ kə te kə n tûuŋ kǎaŋ tsəghà kwə̀n kə ghee, a bən lò ko tò kwə̀n kə e məla; à n lo mo Yɛso kǔuwn bwii nù.

²⁵Ghe n ndùw zòm kɔʼ wə̄n, dzɛ̀ â wə̄n enyəa, “Bəghasə̄ ghaʼ a Mughùbè, a mîan ko nù.”

²⁶Ù n dzɛ̀ â ghee enyəa, “Ghɛ̀ tsəŋo kə̀ kwò, ghɛ̀ ghəla ghɛ̀ taʼkè boo fughu â Zə̀ kò a?” Ù n nùghù è kɔʼ, ke naŋa ndùw kwɛ̌ɛ kə te ko àsùghò tùŋutùŋu kəla kə mò tûuŋ kaāŋ kwə̀n ko; tùŋutùŋu kə te kə ŋ kòom tsùghù bvʉ̀ è tsughu.

²⁷Tuw kə m kpuw ghî yì, ghe m bvʉ enyəa, “Wən biso lǒ ŋgòʼ è ghùw ù ghɛ̌ wò, kwɛ̌ɛ kə sô zuūw nduw â wə̄n à, àsùghò dzùghù a?”

²⁸A m bùghò Yɛso dàŋsə nduw an naʼ e Dzɛ̀làsîn aŋ ŋgùŋ zə̀ enyʉ̀ è lì è zə̂, ù m kpeen kɔʼ ghèe ghê fɛ̀ɛn tə aghì tə̀ li to tə bə̀ghà mo ghe nughù sə wò aŋ gə̀maghùw. Ghî a tə ghə n biso zəgha tsughuu zʉ̀ ù biigh wo. Ghî ghən mò waʼso ŋgɛlɛ nû, ghî ghə̀ n tsəŋo ghaʼa aletsə̀ghà dzì a fughu êzə̀.

²⁹A mo e zuw bɔ̂ŋ kə edì ghî a zəgha yi maʼà sə wô enyəa, “Ghù ghàʼ kəŋo aŋ kwò à, mo a wɛ̀ ù Kə̀zə̀? Ghù sò yia fɛ bùghò alebùghò ndzaŋso tsughuu dzə̂ ghàʼ sěe nəgha e lo biso kpeē wo ŋkāa?”

³⁰À n lo êzə̀ mo saʼ kə kwə̀lebʉ̄ghā kə̀ li kə ŋ kuʼù zə̌a kaŋlo a fughu kùʼŋkùʼnlo.

³¹Zʉ̀ vʉ wə m buʼ tsughu kəghu â Yɛso enyəa, “Abugho ghù so e dzûu sə ghaʼ, ghù dzum naŋa nyə nduw ghaʼ an saʼ kə ukwə̀lebʉ̄ghā kə chî.”

³²Ù n daŋso dzɛ̀ â zʉ̀ vʉ wo enyəa, “Nùghu sə nlò!” Zʉ̀ u te u fi nughù sə̀ wò nù, nyə̀ ndùw a zəŋò kwə̀lebʉ̄ghā vʉ̀ wo. Nɔ̂e kə ukwə̀lebʉ̄ghā kə te kə n daŋso tə̀ŋò nyə̀ŋ nyə̀ tsùghù ndùw aŋ gwoo kə chì aŋ ŋgàŋlo e ukwàʼ zə̀, bvʉ̀ mə̀la nyə̀ tsùghù ndùw fughu alo enyʉ̀.

³³Ghî ghəla ghe fə̀ chiīn kwə̀lebʉ̄ghā u te wo n nùghù tɛ̀ɛn tì è tsughu. Ghəa ghe tiī kwəlā nduw enaʼ, ghe n nàʼà kwən tsughu kô ghəa yia a sə a zə̄ŋò ghì a zʉ̀ yi enyə dzîi dziī.

³⁴Naʼ zə n zòo sə̀ mɛ̀ʼɛ̀ wò è dzə̀m alendùw kôʼ Yɛso. A m bùghò ghe ndûw kôʼ nduw wə̄n, ghe m buʼ ndùw kəghu â wə̄n enyəa ù zə̀ghàa tsughu mbùʼ è ghee.