Read Aghem Matìo 9 Bible Online

Matìo 9 - Aghem bible

Matìo 9

¹Yɛso n daŋso nyə kɔʼ alo kəkwə̀n, nùghù dàŋ wò an naʼ zə̀a ù mò mughu a te.

²A mo e kôʼ ghe m bòʼò wô ghùw ù kə̀ kə̀ŋlò ù li alo kəmbùŋ. A m bùghò Yɛso kòʼ tsughu enyəa ghî a te ŋge boo fughu â wə̄n, ù n dzɛ̀ â ghùw ù kəkə̀ŋlò ù te enyəa, “Dzə̀la tsughu fə̀ŋ a ŋ wɛ̄; Zə̀ kə̀ m bòo tə̀ghà tə̀ ghuuw màʼà.”

³Ghê dèekə̀làŋ à li ghə n daŋa kaʼ tsughu aletsə̀əm kaŋlo aŋ ghùe e ghee enyəa, “Tûw wən bəla sùuwn Kə̀zə̀ lu.”

⁴Yɛso n lo mò ù ŋ kele zìi moʼnlò e ghee zo, ù n dzɛ̀ â ghee enyəa, “Ghɛ̀ ghəa à biigh gho ghɛ̀ nî naŋā alo təfə̀ŋ a, ghɛ̀ nî nàŋa bòʼ kwò à?

⁵À bùghuun tsə̀ghà è ghɛ zo alembaā dzâa səā wo a, aledzɛ̀ â ghùw enyəa ‘Ghe m bòo tə̀ghà tə̀ ghuuw màʼà.’ Ŋkāa aledzɛ̀ â wə̄n enyəa, ‘Nùghu kɔʼɔ̀ ghù bwii səa nduw a?’

⁶Ŋ̀ ghəəŋ tsughuu nù, ghɛ̀ kele tsughu enyəa Wɛ̀ ù Ghùw ki nû daʼa ko aleghuūw maʼn bôo tə aghì to am mbī.” Ù n daŋso nùghù dzɛ̀ tsùghù â ghùw ù kəkə̀ŋlò vʉ enyəa, “Nùghu nǐ kɔʼ mbùŋ kə̀a kò, ghù nduw alô ghù.”

⁷Kə̀əŋ chi kə n nùghù è kɔʼ, nùghù ndùw alô wə̄n.

⁸A m bùghò nê kə aghì chi kə kôʼ tsughu ghəa yi gho, fə̂ŋ tə̀ n sə ghee, ghe ŋ kàʼ ndùw alekɔʼso Kə̀zə̀, kəla kə mò fughu ŋgòʼò dàʼà kən â ghì ghò.

⁹Ghəa Yɛso zə̀ghàa tsughu luʼu chi ko, nughùun ndùw, ù ŋ kòʼ tsùghu dzə̀akə̀mwàʼsò ù lì ghe mò tɔŋlo enyəa à lò Matìo, mò ù lǒ an lùʼù kə kəfwàʼ kə wə̄n. Ù n dzɛ̀ â wə̄n enyəa, “Nùghù wò a bǎà mùghò.” Matìo n nùghù ndùw sùghò a bàâ Yɛsò.

¹⁰Yɛso n ndùw gùŋsò alô Matìo, a m bùghò ghe sô zəā, ghê dzə̀akə̀mwàʼsò à li gho ndə̀m ghèe ghê ghì ghəla ghe fə̀ bâʼzəghā enyəa ghe bwîi yò an làŋ kə Musî m bùghò nyàʼa dzəəŋ wò alezə ghèe ghê Yɛso àsùghò tsə̀təndə̄ghā tə wə̄n to.

¹¹A m bùghò ghî a Falàsîi à kôʼ ghəa ghən gho, ghe m bvʉ â tsə̀təndə̄ghā tə wə̄n to enyəa, “À lǒ kwò Mughùbè wɛʼɛ sô zəa dzəə̄ŋ ghèe ghê dzə̀akə̀mwàʼsò a, àsùghò ghì à biigh à li ghən a?”

¹²Yɛso n zə̂ən ghəa a te gho, dzɛ̀ â ghee enyəa, “Ghî ghəla ghe tughūu dzɔɔ̄ ki yo ghəa è li zo aleghəŋlo ghèe ghê ghùwŋgàŋ, à gɔ̀ʼɔ̀ kô ghì ghəla ghe dzaŋa.

¹³ Nduw kəŋ sə kɔʼ nlò enyəa shwāʼ u Kəzə̀ wə̄n moʼnlò èndughō enyəa, ‘Ǹ tsâʼ ghì ghəla ghe fə̂ŋ tə̀ dzûŋ to aŋ ghùe e ghee, Ŋ̀ kâ lə̀ghà dzə̀ enyəa ghe e gboō nyòm tò kɔʼso mùghò a te.’ Tɔŋlo enyəa Ŋ̀ kâ bùghò dzə̀ alebùghò tɔŋɔ̂ ghì a tsəghatsəgha gho, Ǹ laam bughò bòʼ ghì à biigh gho.”

¹⁴Tsə̀təndə̄ghā tə Dzɔ̌n tə m bùghò kòʼ wò Yɛso, bvʉ â wə̄n enyəa, “À lǒ kwò ghàʼ à ghê ghì a Falàsîi à sô baā dzughu zo, tsə̀təndə̄ghā təghà tia tə baā yô a?”

¹⁵Yɛso n dzɛ̀ â ghee enyəa, “To fən a num ù wìzən ghə n dòʼò alo ese mò ù lǒ ghèe ghee a? Nəghā e lo bùghòo nù ghe lo nîi nughùun kɔʼɔ̄ num ù wìzən aŋ ghùu ghee, ghe laʼa baa nduw dzughu zo an nə̀gha e te zo.

¹⁶Ghùw ù lì yo ù lò alenìi kɔʼ bâ kə ndzʉ̄ kə̀ fughu ko ù taā mə̀ghàa naŋā ndûw an ndzʉ tə̀ wii to; nu bâ kə ndzʉ̄ kə te kə lo pfʉ̄a nùghùun sə̌a wò nǔ ndzʉ tə̀ wii tə te to, bûʼ kə te kə kôom dûuw tsəghàa tsughu ghəa kə mò bûʼ lo a te.

¹⁷Ghùw yò sughò alenìi kɔʼ sə̀ŋ è nlʉ̀ ù kùu naŋa tsughu an suʼ[3] mò zə̀ n kɔm mɛ̀ʼɛ̀; nu è sò gbə̀la kɛʼɛ nù, lʉ̀ m fɔlɔ̀ səa tsughu, mo suʼ ŋ wì sùghò. A laam kùu nǎaŋ sə̀ŋ è nlʉ̀ an suʼ e fughu zəla è naām ki fô kò, suʼ e te àsùghò lʉ̀ mə n zə kətuw.”

¹⁸Ghəa Yɛso sò naām kə̂a ghəa gho, a mo e kôʼ, ghùw ù ne ù lì an Dzudà ù n sə̀ ndùw nyàʼa ndùw a sə̀a wə̄n, dzɛ̀ â wə̄n enyəa, “Wɛ waŋā ù zən fɛ tsò kùʼn kpuw tsughu nû, bùgho mɔ̌ɔ tsughu ko wə̄n an tuʼ è mɔɔ̄ zo ko, ù sò zòom nùghùn wò nù ebàm.”

¹⁹Yɛso n nùghù ndùw ghee ghê tsə̀təndə̄ghā tə wə̄n to a bàâ ghùw vʉ̀.

²⁰Aŋghə ghe nduuw alô ghùw ù ne vʉ̀, wìzən ù lì n ndùw sə̀ kɔʼ wo a bǎà Yɛso, mò ù m fɔ̀n tsɛ̀lɛ̀ alo tənùu eghə̄m a ghè tò tə bə̀ghà, ù m bùghò mɔ̀m tsùghù dzughu e təndzʉ e Yɛso.

²¹Nu ù fə̀ ki am fə̂ŋ è wə̄n enyəa, “Abugho M̀ bûʼ mɔ̂m tsughu ko ndzʉ tə wə̄n to, Ǹ sô tùghuu nù.”

²²Yɛso m fə̀n tsùghù ughue, kòʼ tsughu wə̄n, dzɛ̀ tsùghù enyəa, “Kele tsughu fə̀ŋ è dzùŋ a ŋ wɛ̄; fə̀ŋ zəla ghù gaʼ tsughu a zəŋò Zə̀ kò, zə̀ ŋ ghù baŋlo.” Wizən vʉ n tughu tən kɔʼ ko an nə̀gha e te zo.

²³A m bùghò Yɛso ndùw tɛ̂ tsughu am be kə tûwbʉghà vʉ̀, ù n ndùw kòʼ ndùw ko mo luʼū tə dəma a fughu aŋ ghùu ghì ghò, mo ndɔŋ zə̀ è kuu.

²⁴Ù n dzɛ̀ tsùghù enyəa, “Sɛ̌ɛ nùghu tsughu nlò; nu zən fə te fə bwii nù, fə kâ kpùw dzə̀.” Ghee a dzə̀m ŋ kuuwn kàʼ ndùw wə̄n aletsōʼ.

²⁵A m bùghò ghe sô dzûm naŋā sə mɛʼɛ̀ wô ghî ghò a beē, Yɛso n tsə̀ghà nyə̀ è nduw, kwu tsughu wɛ fə̀ zən fə te fo aŋ ghu, fə n nùghù dòʼò è wo.

²⁶Zwɔ̂ŋ u te wə ŋ kùm ŋgəa tsughu mbùʼ è te e dzə̀m.

²⁷Ghəa Yɛso zə̀ghàa tsughu alô tûwbʉ̀ghà ù te, nùghùun dàŋso ndùw, ghî à foō à li gho a bə̀ghà n nùghù ndùw à bàâ wə̄n. Ghe n dîi dzàa ndùw â wə̄n enyəa, “Wo wɛ ù Dɛvìd, so kwuso se zo a zə̄ŋò ghàʼ a.”

²⁸A m bùghò Yɛso ndùw nyə nduw an ndughu, ghî à foō a te ghə m bùghò kòʼ wò wə̄n; Yɛso n daŋso bvʉ â ghee enyəa, “Ghɛ̀ m boo enyəa to mùghò ŋ ghəəŋ ŋgòʼ è èghəa tò zən a?” Ghe m boo ndùw enyəa, “Òo à Mughùbè, ghàʼ m boo.”

²⁹Yɛso n daŋso mɔ̀m tsùghù sə a ghee, dzɛ̀ tsughu enyəa, “E doʼò ndûw ko êzə̀, aŋghəa ghɛ̀ boō fughu tsughu dzə.”

³⁰Ghe n daŋso kàʼ ndùw luʼū tə̀ koʼo to. Yɛso n daŋso kùɛɛn tsùghu ghee enyəa, “E kwo ko ghùw lò zuūw ghəa ghən gho!”

³¹Ghe ŋ kuūwn nùghù tsughu ko nù, zùghòo ŋgəa tsughu làbəlà e te am mbùʼ è te e dzə̀m.

³²Ghəa ghî yi nughùun ndùw, ghî à li ghə n nì wò ghùw ù lì a vʉ̀a wə̄n mò ù kə̀a yò ghəa gho, bòʼ ù mò ki zʉ̀ u kəmùʼ.

³³A m bùghò Yɛso shùaa sə tsughu zʉ̀ u mùʼ kə te ko, ghùw ù kə̀mùʼ vʉ ŋ kə̀a sə̀ wò àghəa. Tuw kə m kpuw ghî yì, ghe n dzɛ̀ enyəa, “A kaām kôʼ kǒʼ ŋgòʼ è èghə̀a tò zən fɛ alo Ezə̀lɛ̂.”

³⁴ Ghî a Falàsîi ghə̀ ŋ kuuwn kə̀a enyəa, “Ù ghəa ghən ghəŋlo mò à wə̄n â daʼa kə fughu də̀ŋ kə zʉ̀ ù biigh wo.”

³⁵ Yɛso ŋ ŋgəaa ndùw nàʼà tə̀ ne to tə dzə̀m àsùghò n tughoon mò a te, zoʼn ndùw àghì, kə̀aa ndùw sùghò ghəa a Kə̀zə̀ an Ndughutə̀ne tə Tə̀dzûu tò, baaŋ ndùw dzàŋà tə ghì ghə̀n a dzə̀m àsùghò ndzughu tə ghee to.

³⁶ A m bùghò ù kô nɔ̂e kə aghì kò, ù ŋ kwuso èse a zəŋò ghee, bòʼ ghe mò mughu alo kəfə̄m, làʼ lò sugho tò ndzì təla tə ki bàʼàtə̀ndzì.

³⁷ Ù n daŋso dzɛ̀ â tsə̀təndə̄ghā tə wə̄n to enyəa, “Fʉghàzəa u ghaʼa an usum, à fɛ̀ kuuwn buw ko ghî a kəfwàʼ ghəla ghe lo aledùum kwən â ghə̀ wò;

³⁸Ghɛ̌ fì ki alegɔ̀ɔŋ ndûw â Mughu ù usum tò ù tuū wô ghì a kəfwàʼ.”