Read Aghem Mâk 1 Bible Online

Mâk 1 - Aghem bible

Mâk 1

¹Ghən lò ghəa ghə̀là làbəlà è dzùŋ fə̀ dəghàan tsughu a te kùu ndùw Yɛso Kə̀lestò, Wɛ̀ ù Kə̀zə̀.

² Aŋ ghəa Èzayà, ghùwshʉ̀ghà, fə̀ tɔm naŋā tsughu shwaʼ u Kəzə̀ wò enyəa, “Kòʼo nlò, Ǹ lo tūu naaŋ ndùw tsə̀ndə̄ghā zaŋa â sə ko, è ndùw biāan naŋā tsughu təluʼū â ghù;

³ bɔ̂ŋ kə ghûw kə kûu kwə̀la wò â ŋgwən enyəa; Biaan naŋa nlò luʼū to â Mughu ù te, nə̀ghàso nlǒ dzǐi mò â wə̄n.”

⁴Dzɔ̌n ghùw wəla ù mò fughuu mùghù ŋ Kəzə̀ mò m gbə̀n sə kɔʼ aŋ ŋgwə̄n, tsʉ̀a wò àghì enyəa ghî à kuūwn fə̀ŋ tə ghee, ghe nî mùghù ŋ Kə̀zə̀, tò Zə̀ kə̀ ghuūw maʼà bòo tə ghee.

⁵Mbùʼ è Dzùdîa e dzə̀m, à ghì a Yɛ̀lusalɛ̀m ghò a dzə̀m n nyəŋ tsughu a vʉ̀a Dzɔ̌n enyə; ghe m bughò zàa wò vùŋ kə ghee enyəa ghe ŋ ghəəŋ bonlo a sə̀a Zə̀ kò, ghe yia a mʉŋe a te, ù m fughuu ghee â mùghù ŋ Kə̀zə̀ mò an dzughù è Dzodàn.

⁶Dzɔ̌n fə̀ dzəlā kele təndzʉ̄ mo ghe təm aŋ gùw kə̀anyòm kə̀ li ko ghe tɔŋlo enyəa à lò kɔʼdzəm, à kwùu fə gûw è nyòm fò mǒ ŋ kɔ̀n tsə̀ghà wò alo esā, ù m pfʉa tsə̀ghà təbe, nə̄ghāa tsə̀ghà fə̀dɔ̂ŋ.

⁷Ù n tsʉ̂a wò àghì enyəa, “Ghùw wəla ù ghaʼ mugho nāam bùghòo nù, Ŋ̀ kâ bùʼ kɔ̀ʼ ŋgàla ghùw wəla ù lò alezè bwaʼ u təgùw u wə̄n.

⁸Ŋ̀ ghɛ â mùghù ŋ Kə̀zə̀ m fughuu alo mmùghu; ù lô ghɛ̀ â mùghù ŋ Kə̀zə̀ ŋ kuuwn fughuu an Zùʼ tə̀ Zɔlɔ to.”

⁹An tsùʼu n te mò, Yɛso n zə̀ghàa tsùghù Nazalɛ̀t nùghù ndùw am mbùʼ è Galèlîi, Dzɔ̌n m fughu tsughu wēn â mùghù ŋ Kə̀zə̀ mò an dzughù è Dzodàn.

¹⁰Aŋghəa ù bɔɔ̄m səā kɔʼɔ̄ wô ènyə fughu an dzughù, ù n daŋso kòʼ wala kə nughù tsʉ tsughu, Zuʼ tə te tə n səā tsughuu wò an tuw kə wə̄n tò embuŋū.

¹¹ Dzə̀ è ghùw ù lì n daŋso nùghù dzɛ̀ sə̀ tsùghù wò alo kəwālā enyəa, “Ghù lǒ wɛ ù fə̀ŋ waŋa; fə̀ŋ ŋgěe zɔ̄lɔ̄ mùghò aŋ ghû.”

¹²Zuʼ tə Zɔlɔ tə te tə n daŋso tsom kɔʼ Yɛso, ù n nùghù sòʼ ndùw à ŋgwə̄n.

¹³Ù n dòʼò fughu à ŋgwə̀n ghə̀m mə̀ ntsuʼ n chìakò mo Satàn n tsoom kaaŋ ko wə̄n; ù n lo ghèe ghêe nyòm tə ŋgwə̄n to, tsə̀ndə̄ghā è Kə̀zə̀ n lɛnlo â wə̄n.

¹⁴Ghəa ghe kwu kɔʼ Dzɔ̌n êzə̄ŋ, Yɛso n nùghù nyə̀ ndùw aŋ Galèlîi, nàʼn ndùw tsə̀ndə̄ghā è Kə̀zə̀ è dzùŋ,

¹⁵dzàa ndùw enyəa, “Nəghā e te zə m kpē, fɔ̂e u Kə̀zə̀ ù lo ko êzəŋ aŋ ghu; ti màʼa nlò ghəa ghɛʼɛ à bii gho, ghɛ̀ boo tsughu tùm è dzùŋ zən!”

¹⁶Tsuʼ ù li wo, ghəa Yɛso tsə̀ghǎa a ŋgùŋ è dzùghùntsòʼ è Galèlîi, ù ŋ kòʼ tsùghù Sǎemòn ghèe wàazə̀, Andùlù, mo ghe yia maʼn ghuūw zo fughu an dzùghùntsòʼ; nu ghe fə kwuu tsəgha tətsə̄ghāa.

¹⁷Yɛso n dzɛ̀ â ghee enyəa, “Bùghò nlò a bàâ mùghò, Ǹ lo ghəə̄ŋ tsughu ghɛ̀ è laam kwuu wo ghî ghò tò aŋ ghəa a kwuū tətsəghaa to.”

¹⁸Ghe n daŋso, ghe zəghàa tsughu ghuūw e ghee zo, ghe n nùghù ndùw a bàâ Yɛso.

¹⁹Â wən alesəā kəŋo ndûw â sə ko, ù ŋ kòʼ tsùghù Dzɛ̂ms ghèe Dzɔ̌, wɛ a Zɛbɛ̀dîi, mo ghe yia lô aŋ kwə̀n kə ghee, ghe n nemê ghuūw e ghee.

²⁰Ù n tɔŋɔ tsughu ghee; ghe n daŋso zə̀ghàa tàʼà tsùghu tsēlē tɔɔŋ Zɛbɛ̀dîi alo kəkwə̀n ghèe ghê ghì a kəfwàʼ a ghee gho, nùghù ndùw a bàâ wə̄n.

²¹Yɛso n nùghù nyə̀ ndùw aŋ Kàpɛnùm ghèe ghê tsə̀təndə̄ghā tə wə̄n to. A kâ tsùŋlò, Tsuʼntsə̄ u Tə̀dzûu wə̀ m kpè è tsughu, Yɛso n nyə̀ kàʼ ndùw ghì à zoʼn gho an Ndùghène.

²²Dzughu zə n zuu àghì an dzì zəla ù zoʼn ghee a te; tɔŋlo enyəa ù fə̌ ghee zoʼnlo an dò tə aghəa, à fə̀ yo dzə̂ aŋ ghəa ghê dèekə̀làŋ zoʼn ghî ghò a te.

²³Ghəa Yɛso zoʼn ghî ghò êzə̀, ghe n nùghù tɛ̀ fìi kɔ̀ʼ tûwbʉ̀ghà ù lǐ fughu an Ndùghène è ghee zə̀ mò ù kǐ zʉ̀ ù biigh wo.

²⁴Tûw vʉ n daŋso nùghù dì sə̀ wò enyəa, “Ghù kǐ kwò sɛ̌ a Yɛso, ghùw ù Nazalɛ̀t wə̄n? Ghǔ m bùghò sə alebùghò ləŋe ghàʼ à? Ŋ̀ kwo nû ghùw wəla ghù lò â ghè wò, ghù lǒ ghùw ù Kə̀zə̀ ù Zɔ̀lɔ.”

²⁵Yɛso m fwə̀n ke naŋa ndùw wə̄n, â wə̀n à, “Dòʼò mɔŋ, ghù sə nughu a zəŋò wə̄n!”

²⁶Zʉ̀ u te wə ŋ kwù kɔ̀n tsùghu ghùw vʉ̀, ghəa kə dî sə wo an dzə̂ è tughu enyə, kə n daŋso sə̀ nùghù wò a zəŋò wə̄n.

²⁷Dzughu zə n zūm ghî a te gho a dzə̀m, ghe m bvʉʉn kaŋlo aŋ ghùe e ghee enyəa, “Zən lò Tsʉ e kwo zo enyəa à? Ù dòo tsə̀ghàsò sùghò kə̀làŋ â zʉ̀ wò, vʉa u zuūw â wə̄n.”

²⁸Zwɔ̂ŋ u Yɛso wə̀ n daŋso nùghù kùm ŋgəa kaaŋ ndùw luʼū ten tə̀ dzə̀m am mbùʼ è Galèlîi.

²⁹Yɛso n daŋso zə̀ghàa tsùghu Ndùghène zə̀, ghèe ghê Dzɔ̌n, à Dzɛ̂ms, nùghù ndùw alô Sǎemòn wəla ù fə̀ mughu sugho ghèe Andùlù.

³⁰À n lo mò nə̀ghàwì ù Sǎemòn vʉ̀a nyə̀ŋ â ghue wo, ghe n daŋso nì dì dzɛ̀ ndùw ghəa a ughùe a wə̄n a te gho â Yɛso.

³¹Ù m bùghò dàŋso kwù nùghùsò kɔ̌ʼ wə̄n aŋ kwē, nì nùghù kɔ̌ʼ wə̄n, ghue u te wə n daŋso zə̀ghàa tsùghu wə̄n; ù n daŋso nùghù tsə̀ghàsò wò ghee â fʉ̀ghàzəa wo.

³²An nə̀gha è guŋsò zò, aŋghəa zuuw e saŋà nyə tsughu nduw, an tsuʼ fə̀ è fì, ghe m bòʼn wò ghì à dzaāŋ ghən à dzə̀m a vʉ̀a Yɛso, à ghə̀là zʉ̀ ù lo a zəŋò ghee.

³³Naʼ zə n zòo sə̀ wò è dzə̀m, tsuŋ tsughu enyə a fǔundughu.

³⁴Ù m baaŋ tsùghù sùghò ndə̀m è ghee zəla ghe mò dzaŋā ŋgòʼ tə tədzàŋà tò, dzùm sə̀ sùghò ùzʉ̀; tsoo boom tsughuu yo enyə zʉ̀ u te u kɔʼɔ̄ kʉ̄ɛɛ, bòʼ ghe mò kwo nu wə̄n.

³⁵Â lə̌əmlə̌əm to, Yɛso n nùghù è kɔʼ, ndùw sàŋe dòʼò è nduw, kàʼ ndùw fughu a lùʼù gɔɔ̄ŋ wo.

³⁶Sǎemòn ghèe ghê fən a wə̄n a fi nughù dzùum ndùw nǔ wə̄n,

³⁷ndùw kòʼ ndùw wə̄n, dzɛ̀ â wən enyəa, “Enaʼ è dzə̀m fɛ tsôo kə̀ŋo kaaŋ ko ghù.”

³⁸Yɛso n dzɛ̀ â ghee enyəa, “Bùgho nlò sɛ̀ nughù daŋso nduw an nàʼà n lǐ m mî, tò M̀ bɔŋɔ̄ ndûw kə̂a ndûw sughò shwaʼ u Kəzə̌ a fughu; nu M̀ mô fɛ sə wò ghəa zə̀ èzə̀.”

³⁹ Ù m bwìi ŋgəa tsughu Galèlîi e dzə̀m, kə̀a ndùw shwaʼ u Kə̀zə̀ an ndughutə̀ne tə Tə̀dzûu to, shùaan sə̌a ndùw sùghò ùzʉ̀ a zəŋò ghì ghò.

⁴⁰Ghùw ù tə̀tsùghò ù lǐ n ndùw sə̀ kɔ̀ʼ wò à vʉ̀a wə̄n â ghu kə̀ buʼu ko, nyaʼa ndùw a sə̀a wə̄n, dzɛ̀ â wə̀n enyəa, “Abugho ghù tsə̀m tsughu, to ghù ghəŋlo Ǹ zɔn.”

⁴¹Se zə ŋ ŋge kwū Yɛso, ù n dàan ndùw kə̀ghu, mɔ̀m ndùw wə̄n, dzɛ̀ â wən enyəa, “Mùghò n tsə̀m, ghù zɔn tsughu.”

⁴²Tsùghò tə̀ n daŋso zə̀ghàa tsùghù tûwbʉ̀ghà vʉ̀, ù fi dzâŋ tughu nû.

⁴³Yɛso mo e zəghàa ndûw wə̀n, tɔ̀ʼ kùɛɛn tsùghu wə̄n,

⁴⁴ dzɛ̀ â wə̀n enyəa, “E kwo ghù lò dzaā â ghùw ù lì, ndǔw děe ndùw ghue wo â fɔ̀e, ghù fughu nduw təma ko ghəa ghù zɔn dzə̄, aŋ ghəa lâŋ kə Musî kə̀ deē, aledèe ndûw â naʼ zo enyəa ghù êzəŋ e zɔlɔ nù.”

⁴⁵Ù ŋ kuūwn kòom nùghù è tsughu, ndùw kàʼ ndùw ghəa yia lùʼù ndzɛɛ̄n kəaa gho â ghì ghò, nàʼà tsughu ghəa yi enyə, Yɛso ŋ kôom yò alendzìin tsəghàa nyə enaʼ, dòʼò kòom tsughu ko alo təŋgwə̀là, ghî ghə̀ n naam nùghùuŋ wò kô bàa tə̀n tə̀ dzə̀m, bùghòo ko alebùghò kôʼ wə̄n.