Read Aghem Mâk 10 Bible Online

Mâk 10 - Aghem bible

Mâk 10

¹Yɛso n daŋso zə̀ghàa tsùghu Kàpɛnùm, nùghù ndùw am mbùʼ è Dzùdîa, ndùw dàŋ sə kɔʼ dzùghù è Dzodàn, ghî ghə̀ n tsuŋ kpeʼe wò sùghò a vʉ̀a wə̄n; ù ŋ kàʼ ndùw sùghò ghee a lùʼù zoʼn wo aŋ ghəa ù kiī ghəə̄ŋ tsəgha.

²Ghî a Falàsîi à li ghə n ndùw bùghò alebùghò chwəlà kôʼ Yɛso, bvʉ â wə̀n à, “Lâŋ kə̀ boo nù enyəa ghùw sɛ̀ɛ ghèe wì à?”

³Yɛso m bɛ̀lɛ̀ tsùghu ghee enyəa, “Musî fə̀ â ghɛ̀ laʼa dzɛ êndūghō a?”

⁴ Ghe mo enyəa, “Lâŋ kə Musî kə̀ boo nù enyəa ghùw lò nu aletɔɔ̄ tsughu kəmwàʼsò enyəa e n sɛ̌ɛ ghèe wì, ù dzùu səā kɔʼ wə̄n.”

⁵Yɛso ŋ kuūwn dzɛ̀ â ghee enyəa, “Musî fə̀ ghəa ghən tɔm tsughu â ghɛ̀ bòʼ ghɛ̀ ŋgee də̀là â fə̀ŋ tò.

⁶Alekuūwn nîi nughù wô aŋ ghəa mbī fə̀ kaʼ wo, ‘Zə̀ kə fə̀ bɔm tsughu wìnûu à wìzən.’

⁷ ‘Zən lǒ e ghee wìnû ki alezəghaan taʼn tsughuu tsele ghèe zə̀, ù n ndùw təmdzəəŋ kɔʼ ghèe wì,

⁸ghee a bə̀ghà n dòʼò tsùghù kəfəgha kə̀ mɔ̀ʼ.’ Ghe fi kôom yò dzə̂ a bə̀ghà, ghe lo ko kəfəgha kə̀ mɔ̀ʼ.

⁹À fi lo enyəa fəgha kəla Zə̀ kə̀ lo mo kə n tə̄mdzə̄ŋlō, e kwo ghùw lò se gbôo sɛ̀ɛ nù.”

¹⁰A m bùghò ghe nduw ebàm an ndughu, tsə̀təndə̄ghā tə wə̄n tə ŋ kòom bvʉ kpeʼe ndùw wə̀n â ghəa ghən.

¹¹ Ù n dzɛ̀ â ghee enyəa, “Ghùw wəla ù dzùm sə kɔʼ wī, nì tsùghu ù nùghù, e fi lo enyəa ù ŋ ghəəŋ boon nù aletsè mughùndughu ù wə̄n;

¹²abugho wìzən kuūwn sə kɔʼ sugho num, nì tsùghu ghùw ù nùghù, ù fi ghəəŋ boon nù aletsè nùm.”

¹³Ghî ghə̀ m bughòo â wɛghêtùghù gho enyəa to Yɛso mò mɔ̂ɔ tsughu ghee, ù bughūsō tsughu ghee; tsə̀təndə̄ghā tə wə̄n tə ŋ kee naaŋ ndùw ghee.

¹⁴Yɛso ŋ kòʼ ghəa ghən, nʉghà wə̀ m pfʉ wə̄n, ù n dzɛ̀ â ghee enyəa, “Zə̀ghaa màʼa nlò wɛghêtùghù gho ghe bughò kôʼ mùghò; kǎ nlǒ ghee bâʼ; nu fɔ̂e u Kəzə̀ ù lo â ŋgòʼ è àghì tò ghən.

¹⁵M̀ fɛ kùu dzàa wò nù â ghɛ̀, ghùw wəla ù dòʼŋkè nyə am fɔ̀e u Kəzə̀ tǒ wɛ̂ɛtùghu, ù kè tsə̀ghà nyə̀ kòʼ yò a te.”

¹⁶Ù n daŋso bòʼn kɔ̀ʼ wɛghêtùghù a te gho, mɔ̀ɔ tsùghuu ko chìa alo kətūw, fughu tsughu ghee â bughuun zo.

¹⁷Ghəa Yɛso zə̀ghàan tsughuu â nùghù kò, ghùw ù lǐ n nyə̀ŋ ndùw tə̀m ndùw tuw wə anyʉ̄ a vʉ̀a wə̄n, bvʉ â wə̄n enyəa, “Wàdè ù dzùŋ, Ŋ̀ ki aleghəə̄ŋ tsughu êndūghō, Ǹ zə etsɛlɛ̀ lo a?”

¹⁸Yɛso m bvʉ â wə̄n enyəa, “Ghù mùghò tɔŋlo enyəa Ǹ lo ghùw ù dzùŋ aŋ kwò à? Ghùw ù lì yo dzə̄ ghùw ù dzùŋ, à gɔ̀ʼɔ̀ ko Kə̀zə̀.

¹⁹ Ghù kwò nû lwâŋ u te wo; lâŋ kəla kə dzɛ̂ enyəa, ‘Kǎ ghùw wì,’ kəla kə dzɛ̂ enyəa, ‘Kà è səa nuŋlo ghɛ̀ à nùm ù ghùw ŋkāa wi ù ghùw,’ kəla kə dzɛ̂ enyəa, ‘Kà è tsɔŋɔ,’ kəla kə dzɛ̂ enyəa, ‘Kà è boom fughu gha gho,’ kəla kə dzɛ̂ enyəa, ‘Kà è fwəlā sə a aghì ghò am fʉ̄ghā u ghee,’ kəla kə dzɛ̂ enyəa, ‘E zuuw nduw â tsùghò àsùghò â zùghù.’ ”

²⁰Tûw vʉ n dzɛ̀ â wə̄n enyəa, “Wàdè, M̀ fɛ noo naŋa sə̀ kɔ̀ʼ wò kô lwàŋ wən wo ù dzə̀m.”

²¹Yɛso n lɛɛn ko wə̄n enyə, è ləgha, dzɛ̀ â wə̄n enyəa, “Ghù làʼà èghəa è mɔ̀ʼ, ndǔw fěe tsughu fʉgha wəla ghù ki u dzə̀m, ghù dzughuu fughu nduw kua u te wo â ghì à laa gho, ghù lo e kūu alo kəwālā; ghù daŋso bugho doʼō ghàʼ à ghù; ghù è lo tsə̀ndə̄ghā zaŋā.”

²²A m bùghò tûw vʉ zuw tsughu ghəa zən, sʉ wə dzə dòʼò tsùghu wə̄n enyə, ù n nughùun ndùw èbàm alo esē; nu ù fi ŋge ki ufʉgha.

²³Yɛso n nùghù lɛ̌ɛn kaaŋ wò tsə̀təndə̄ghā tə wə̄n, dzɛ̀ â ghee enyəa, “À tɔ̀ʼ lǒ tùghùtùghù kə eghəa â ghì à kuu gho aletsə̀ghà nyə am fɔ̀e ù Kəzə̀!”

²⁴Dzughu zə n zūm tsə̀təndə̄ghā tə wə̄n aŋ ghəa ghe zuw tsughu shwāʼ wə̄n. Yɛso ŋ kòom dzɛ̀ tsùghù â ghee enyəa, “Ghəa e tughu, tò ghəa è tsəghāa nyəa zən am fɔ̀e ù Kəzə̀ wɛ ghaŋā gho!

²⁵E bughunlo â kɔʼdzəm[6] aletsə̀ghàa nyə an sə e fəsāʼ tsə̀ghàtàʼà aŋ ghəa ghəla ghùw kǔu aletsə̀ghàa nyə am fɔ̀e ù kəwālā.”

²⁶Tuw kə ŋ kè lɔ̀ʼso kpùw ndùw ghee enyə, ghe m bvʉ enyəa, “À kǔuwn lò ndugho alezə̄ kətuw à?”

²⁷Yɛso n lɛɛn ko ghee enyə, nùghù dzɛ̀ tsùghù enyəa, “Â ghì ghò e yo alesə̄, à kǔuwn yo dzə̂ êzə aŋ ghùu Zə̀ kò; aŋ ghùu Zə̀ ko ghəa ghə̀n à dzə̀m lò nû alesə̄.”

²⁸Pità n də̀ghàan tsùghù aledzɛ̀ â wən enyəa, “Kòʼô, ghàʼ fɛ lǒ a m fʉgha waʼa wo u dzə̀m zəghàa tàʼà ndùw, nùghù wò a bǎà ghù.”

²⁹Yɛso n dzɛ̀ tsùghù enyəa, “M̀ fɛ kùu dzàa wò nù â ghɛ̀, abugho ghùw zə̀ghàa maʼà nduw ndughu è wə̄n ŋkāa waazə̂, ŋkāa tsele, ŋkāa zə̂, ŋkāa wɛ a wə̄n, ŋkāa esum, bòʼ ghəa zaŋa àsùghò aŋ ghəa e làbəlà è dzùŋ zə̀n,

³⁰ghùw ù te lo kele tə̀ndughu, ù lo kelê waazə̂, ghê zə̀ àsùghò ghê tsele, àsùghò wɛ gho, àsùghò sum zo ndə̀m tò mughu fədzughù an tì kə̀n àsùghò an tì kəla kə lô â sə ko ù lo zəā yô tsɛlɛ̀ zò, ù è ke koʼo sugho yo tsû wò.

³¹ Ndə̀m zəla è kuūwn lo â sə ko êzə̄ŋ, ghe lo fèe kə̀bam, ghəla ghe fê bam ko êzə̄ŋ, ghe lo e lo â sə ko.”

³²Yɛso ŋ kɔʼɔ ndùw an Yɛ̀lusalɛ̀m ghèe ghê tsə̀təndə̄ghā tə wə̄n to. Ù n ndûw â sə ko. Tsə̀təndə̄ghā tə wə̄n tə n ndûuw êzə̀ mo dzughu e zuu ghee, fə̂ŋ tə̀ n tsəəŋ sùghò ghì ghəla ghe mò bughōo a bàâ ghee.

³³Ù n dzɛ̀ â ghee enyəa, “Ghɛ̀ ghɛ̀ɛ, sɛ̀ fɛ êzəŋ kɔʼɔ ndùw an Yɛ̀lusalɛ̀m, a fia ghe lo feēn fughuu tsughuu Wɛ ù Ghùw â Tuw u təfɔ̀e wò ghèe ghê dèekə̀làŋ, ghe tsəghàsò tsughu kəlâŋ enyəa ghe wi wə̄n ghe daŋso nîi fughuu ndûw wīn â Tòʼò e tə̀dzûu zò,

³⁴ghe lo e təma wə̄n â nduw, ghe tsəən tə̀ghà mò a zəŋò wə̄n, ghe te wə̄n alo təkwùu, ghe buū wiī tsughu wə̄n; ù kè daŋso kôom nughù kɔʼɔ̄səā wò alo evʉ̄ bugho tsuʼ n tsəghà tsughu n tə̄ghā.”

³⁵Dzɛ̂ms ghèe Dzɔ̌n, tɔ̂ɔŋ wɛ a Zɛbɛ̀dîi; ghe n tsə̀ghàsə̀ è wo, dzɛ̀ â Yɛso enyəa, “Mughùbè, ghəa è li e lo nû ghàʼ mô ləghaa enyəa ghù biaan fughu tsughu â ghàʼ bugho ghàʼ lô alebvʉ̄.”

³⁶Ù m bvʉ â ghee enyəa, “Ghɛ̀ ləghaa enyəa M̀ fwâʼ kə̀ kwò â ghɛ̌ a?”

³⁷Ghe dzɛ̀ â wə̄n enyəa, “Naŋa tsughu ghaʼ â bəla zo am bùghu zəghà abugho ghù kè doʼ an ndàŋ è kədə̀ŋ zəghà; ghùw waʼa u mɔ̀ʼ aŋ kwē wʉ̂a ù təma wo, u mɔ̀ʼ aŋ kwē ù kwû wò.”

³⁸ Yɛso ŋ kòom dzɛ̀ â ghee enyəa, “Ghɛ̀ bûʼ kwò yo fəgha chìa ghɛ̀ bvʉa â ghè kò. Ghɛ̀ lo nû alefala aŋghəa Ǹ lo fanlo a te, ghɛ̀ ke kpuw sugho ŋgòʼ è evʉ zəla Ǹ lo kpuūw ghè zò à?”

³⁹Ghe m bɛ̀lɛ̀ ndùw wə̄n enyəa, “Ghàʼ lo nû.” Yɛso n dzɛ̀ â ghee enyəa, “Ghɛ̀ lo nû alefala aŋghəa Ǹ lo fanlo a te, ghɛ̀ kpuw ŋgoʼ è èvʉ zəla Ǹ lo kpuūw ghè zò.

⁴⁰Aledòʼò aŋ kwe waŋā ù təma wo ŋkāa alô ù kwû wò, à kǔuwn yò dzə̂ mugho alefughu daʼa kə te ko, bəla e tə e lɛ̂ɛn ghì ghəla Zə̀ kə̀ naŋā â ghee.”

⁴¹A m bùghò tsə̀təndə̄ghā tə̀ li tì èghəm zuw ndûw ghəa yì, ghe ŋ kàʼ ndùw nʉ̀ghà ù pfʉso wo a zəŋò Dzɛ̂ms ghèe Dzɔ̌n.

⁴² Yɛso fi tɔŋɔ naŋa tsughu nu ghee, dzɛ̀ â ghee enyəa, “Ghɛ̀ kwo nû enyəa Toʼò zəla e nîi ghue e ghee zo enyəa ghe lo udwə̀ŋ lèghaa aletsəghaso kaaŋ lwâŋ wò â ghì a ghee gho. Ghî a ghee à ne ghəla ghe lô tuw am bùʼ ufwàʼ yia ki dwaʼa wo a zəŋò ghì ghəla ghe lɛnlo.

⁴³ E ki dzə yo alelo êzə̀ am bvʉa zɛʼɛ̄, bòʼ enyəa ghùw wəla ù ləghaa aledòʼò kə̀tuw ki alelaām doʼò tsughu fəkɔ̂ɔ â ghɛ̀ a dzə̀m.

⁴⁴Ghùw wəla ù ləghaa aledòʼò kə̀sə ki aledòʼò tsughu kəkɔ̂ â ghɛ̀ a dzə̀m.

⁴⁵Tɔŋlo enyəa Wɛ ù Ghùw ka mo bughò dzə̀ enyəa ghî ghə̀ è fwaʼā â wə̄n, ù mò laam bugho aledòʼò fə̀kɔ̀ɔ â ghì ghò, àsùghò alefughūu ndûw tuw kə wə̄n alezuū sə tuw u è ndə̀m è àghì.”

⁴⁶Ghe n daŋso bùghò an Yɛ̀lekò; a m bùghò Yɛso nùghùun səā nduw an Yɛ̀lekò ghèe ghê tsə̀təndə̄ghā tə wə̄n to, à saʼ kə aghì kò. Bàtìmayòs, ghùwfǒo ù lì ù fə̀ nɔɔ̄ nɔe ko, wɛ̀ ù Tìmayòs, n doʼ am bùghu e dziī.

⁴⁷A m bùghò ù zuw tsughu enyəa à lò Yɛso, ghùw Nazalɛ̀t, ù ŋ kaʼ tsughu bɔ̂ŋ kə̀ buʼu ko enyəa, “Yɛso, Wɛ̀ ù Dɛvìd, sə kwuso se zo a zəŋò mùghò a!”

⁴⁸Ndə̀m è àghì ŋ kēe ndùw wən enyəa ù dòʼò mɔŋ; ù kôom fə̀ghaan kuūwn màʼn sə̌a kɔʼɔ kə̀bɔ̀ŋ enyəa, “Wɛ̀ ù Dɛvìd, kwuso se zo a zəŋo mùghò!”

⁴⁹Yɛso n daŋso tee è tsughu, dzɛ̀ tsùghù enyəa, “Tɔŋɔ wò nlǒ wə̄n.” Ghe n tɔŋɔ wò ghùwfǒo vʉ̀, dzɛ̀ â wə̄n enyəa, “Dzə̀la fə̀ŋ; nùghu kɔʼɔ̀, u vʉ̂a ù tɔɔ̄ŋ ghû.”

⁵⁰Ù m wele màʼà ndùw ndzʉ tə wə̄n, zə̀ghà nùghù kɔ̀ʼ ènyə, bùghò kòʼ wò Yɛso.

⁵¹Yɛso n dzɛ̀ â wən enyəa, “Ghù lə̀ghàa enyəa Ǹ dzə̂ ênzə̂n â ghǔ a?” Ghùwfǒo vʉ n dzɛ̀ â wə̄n enyəa, “Mughubè, Ǹ ləghaa alekoʼō luʼū to.”

⁵²Yɛso n dzɛ̀ â wə̄n enyəa, “Nùghù luʼū təghà tò; boo zəghà zə̀ ŋ ghù baŋlo.” Sə a wə̄n ghə n daŋso tsʉ̀ è kɔʼ, ù n nùghù ndùw ghèe Yɛso an dziī.