Read Aghem Mâk 11 Bible Online

Mâk 11 - Aghem bible

Mâk 11

¹A m bùghò Yɛso bùghò tɛ̂ tsughu an naʼ e Bɛtfàch, àsùghò an naʼ e Bɛtānì, mo ghe sô kùʼso ndùw Yɛ̀lusalɛ̀m am bà kə kwàʼ u tə̀ Olèf, ghèe ghê tsə̀təndə̄ghā tə wə̄n to, ù n dzə̀ kɔ̌ʼ tsə̀təndə̄ghā tə wə̄n tə bə̀ghà, tùm è tsughu,

²dzɛ̀ â ghee enyəa, “Ndǔw nlò an nàʼà fə̀ fi â sə ko, ghɛ̀ sə nduw koʼ tsughu tsʉa u fəndzàkâs ù nûu wò ghe təŋɔ̀ naŋā; zěe wò nlò â ghè wò.

³Abugho ghùw bvʉ â ghɛ̀ enyəa, ‘Ghɛ̀ ghəa ghən ghəŋlo enyəa à lǒ kwò à?’ Tsǒo dzǎa tsughu ko nlò enyəa, ‘Mughubè kì kəfwàʼ a te, ù kòom tǔu fughuu wò nù ebàm êzə̀ŋ èzə̀ŋ.’ ”

⁴Ghe n nùghù è tsughu ndùw kòʼ ndùw tsʉa u fəndzàkâs ù nûu wò mo ghe n tə̀ŋò nàŋa a fǔundughu kə̀ li ko an dziī, ghəa ghe zeē,

⁵ghî à li gho ghe mò kuʼù ti fughu m bvʉ â ghee enyəa, “Ghɛ̌ chi ghâa kwǒ chìa, ghɛ̀ sô gbəlà zeē ndzàkâs fì à?”

⁶Ghe m bɔɔm bɛ̀lɛ̀ ndùw ghee aŋ ghəa Yɛso mò dzɛ â ghee; ghe n zə̀ghàa ndùw sùghò ghee â ghè fò.

⁷Ghe n daŋso nì wò ndzàkâs fə te fo a vʉ̀a Yɛso, zəghaan kɔʼ ndzʉ tə ghee a te; ù ŋ kɔʼ nyaʼa kɔʼ an ndzàkâs fə te fo.

⁸Ndə̀m è àghì n nîi zìi ndùw ndzʉ tə ghee an dziī, à li ghə m fâan sə̌a wò kùee mə̀ ŋkàʼ n zʉ̀ mò alo esūm, zìi wò an dziī enyəa Ù è bwiī wo a te.

⁹ Ghî ghəla ghe mò tə̂əŋ nduw â sə ko, à ghəla ghe mò tə̂əŋ wo a bǎà wə̄n m fughuu wò mbaŋa enyəa, “Hòsana! Hòsana! Zə̀ kə̀ bughuso ghùw wəla ù bùgho mò ù bùghò an tuw kə Mughubè ù te!

¹⁰Zə̀ kə̀ bughuso fɔ̀e u tselè ù ghê tselè sɛ̀, Dɛvìd, wəla u bughōo! Ukɛɛ alo kəwālā edzuŋ èdzùŋ!”

¹¹Ù n daŋso nyə̀ ndùw an naʼe Yɛ̀lusalɛ̀m, tsə̀ghà ndùw an Ndùghèkə̀zə̀ è nē; lɛɛn kaāŋ wò ghəa ghən à dzə̌m fughu; ghəa nəgha e màʼa fə̀ lo mo zə n ndùw, ù n sə̀ nùghù wò an Yɛ̀lusalɛ̀m ghèe ghê tsə̀təndə̄ghā tì èghəm à ghè tò tə bə̀ghà, ghe n nùghù ndùw am Bɛtānì.

¹²Tsuʼ u tsʉtsʉ vʉ̀, ghəa ghe zəghàan səā wô Bɛtānì, dzə̀ŋ n za tsughu Yɛso.

¹³Ù ŋ kòʼ ndùw ndzə̀mè kə kàʼ fə fîʼ alo kədɛ̀, ù n ndùw alekòʼ enyəa tam kə lô kpaʼ lo mo kə mʉ̀ dòʼò a te. A m bùghò ù bùghò tɛ̂ tsughu fughu, ù ŋ kòʼ kɔʼ ko tə̀fòo, kè kôʼ kə̀tam, nu a fə̀ yo dzə̂ an nəgha e tə̀ fîʼ è mʉa zo.

¹⁴Ù n dzɛ̀ â kàʼ fi fò enyəa, “Ghù kè kòom mʉ̀ fùghù kòʼ yǒ ghùw â tam ko!” Tsə̀təndə̄ghā tə wə̄n tə n tsò zùw sùghò ghəa yì ù dzɛ̀ tsughu.

¹⁵Ghe m bùghò an Yɛ̀lusalɛ̀m, ù n daŋso tsə̀ghà nyə̀ ndùw am mbɛ̀, nyə̀ kàʼ ndùw aledzùusə ghî ghəla ghe mò fêen fʉgha wo fughu à ghəla ghe mò zuenlō. Ù n nì təmpfʉʉn tsughu teblè tə ghì à kuuwn ghə ŋ kə̀a ghò, à ndàŋ tə ghì à feēnlō a təbùŋù gho.

¹⁶Ù ŋ kɛ̀ kə̀fəgha enyəa e kwo ghî à lô niī be kə Ndùghèkə̀zə̀ è nē an Yɛlusālɛ̀m tǒ dzì â ghee alebùghò boʼn tsəghāa â fʉgha wo.

¹⁷ Ghəa ù tsʉ̌a ghee, ù m bvʉ â ghee enyəa, “Ghe kâ mgbaŋ tɔm naŋa enyəa, ‘Ghe lô ndughu zaŋā tɔŋlo enyəa à lǒ è gɔ̀ŋlo â ghì a nàʼà tə̀n tə̀ dzə̀m.’ Ghɛ̌ yia nî naŋā tsughu enyəa à lò bûʼ kə ghì à tsəŋo gho.”

¹⁸Tuw u təfɔ̀e wə̀ n zuw tsughu ghəa yì ghèe ghê ghǐimwàʼsò ghò ŋ kàʼ tsughu alekə̄ŋ dzì zəla ghe lo alenìi nughù tuw kə wə̄n a te. Ghe mò tsəŋo nu wə̄n, bòʼ tuw u mò kpuuw ghî yì à dzə̀m an tsʉ̀ e wə̄n.

¹⁹A m bùghò tsuʼ u nyəŋō nyəghàan wo, Yɛso n zə̀ghàa tsùghù naʼ e te zo ghèe ghêe tsə̀təndə̄ghā tə wə̄n to.

²⁰À m bùghò ghe bwəlā tsəghāa dzì, ghe ŋ kòʼ dàŋ tsə̀ghà kàʼ fə fîʼ fia Yɛso mò lɔʼ mo fə ŋ gwə̀n nyə̀ tsùghù tɛ̀ alo təghàŋ.

²¹Pità n tɛ̀mòʼn wò ghəa a te gho, dzɛ̀ â Yɛso enyəa, “Mughubè, kòʼ kâʼ fə fîʼ fə̀là ghù mò lɔ̂ʼ lo, fə ŋ gwə̀n.”

²²Yɛso m bɛ̀lɛ̀ tsùghù enyəa, “Gaʼ tsughu fə̀ŋ a zəŋò Zə̀ kò.

²³Ǹ so Ŋ̀ kûu dzâa wô â ghɛ̀ enyəa, abugho à lò ko ndughoo ù dzɛ̀ tsughu â kwàʼ wən wo enyəa, u nùghu kɔʼɔ̀ u bvʉ nyə tsughu ndûw an dzùghùntsòʼ, mò ghùw ù te ki yo ndzùghùun kə emòʼn kò, vʉ̀a ù kuuwn ki ko am fə̂ŋ enyəa ghəa zəla ù dzɛ̀ tsughu ki nû alesə̄, Zə̀ kə̀ sô ghəə̄ŋ fughuu kɔʼ â wə̄n.

²⁴Zən lò e ghee Ǹ so Ǹ dzâa wô â ghɛ̀ ènyə̀a abugho ghù bvʉ ko kwò kò mò ghù gɔ̀ɔŋ tsùghù nù, ghù vʉ̀a ù boo tsughu enyəa ghù ŋ kele, à sə̀ lò kə̀ kə̂a kò.

²⁵ À kǔuwn lò ko enyəa abugho ghù gɔ̀ŋlo, bùʼu ghuuw màʼa tsughu dzə̀ ghəa à biigh ghəla ghî à ghəŋlo â ghù, tò Tsele wʉ̂a alo kəwālā e lo sugho aleghuūwmaʼà ghəa ghə̀a à kwu gho.”

²⁶[Abugho ghù kuūwn yô alewuūwmaʼà bòo tə ghì à li to, Tsùghò alo kəwālā yo sughò alewuūwmaʼà bòo tə̀ghà.]

²⁷Yɛso ŋ kòom bùghò kpeʼe an Yɛ̀lusalɛ̀m ghèe ghê tsə̀təndə̄ghā tə wə̄n to. A m bùghò ù ŋgəaā kaāŋ tsəgha an Nùghìkə̀zə̀ è nē, tuw u təfɔ̀e ghə̀ n ndùw bùghò ghèe ghê tsoʼ to àsùghò ghê dèekə̀làŋ,

²⁸bùghò bvʉ â wə̄n enyəa, “Ghù ghəa ghən ghəŋlo an daʼa kə̀ ghɛ ko a, ŋkāa à ghù â daʼa kə fughu ndughoo aleghəəŋ ghəa ghə̀n à?”

²⁹Yɛso n dzɛ̀ â ghee enyəa, “Ǹ so Ǹ bvʉā wô ghɛ̀ â ghəa zo; bɛ̀lɛ̀ wò nlò mugho, Ǹ dzâa wô sughò luʼū kəla daʼa kəla Ŋ̀ ghəə̄ŋ ghəa ghə̀n a te nughù wo a te.

³⁰Ghəa Dzɔ̌n mô mùghù ŋ Kə̀zə̀ m fughu mò a daʼa kə te kə fughu Kəzə̀ ŋkāa mò à fùghù aghî a? Bèle wò nlò mugho.”

³¹Ghe ŋ kàʼ ndùw tuw ù sughuu wo fughu aŋ ghùe e ghee enyəa, “A sô yəa e dzâa ndûw èndūghō, abugho a bɛlɛ̀ ndûw enyəa, ‘À fùghù Kəzə̀.’ U è sò dzɛ̂ enyəa, ‘Ghɛ̀ ŋ kè sô boō fughuu ndûw â wə̄n bòʼ kwò à?’

³²A yo aledzɛ̀ enyəa, ‘À fùghù aghî.’ ” Ghe fə̀ tsəŋo ghaʼa aghî bòʼ ghee a dzə̀m fə̀ boo fughu nû enyəa Dzɔ̌n mò lo kùm kə ghûwshʉ̀ghà ù Kə̀zə̀.

³³Ghe fi nughù bɛ̀lɛ̀ ndùw nù Yɛso enyəa, “Ghàʼ kwo yo.” Yɛso n dzɛ̀ â ghee enyəa, “À fi lo enyəa Ǹ yo sughò aledzɛ̀ luʼū wəla daʼa kə nughù wo a te â mùghò aleghəəŋ ghəa ghən.”