Read Aghem Mâk 2 Bible Online

Mâk 2 - Aghem bible

Mâk 2

¹A m bùghò tsuʼu n lǒʼ n tsəghà tsughu, Yɛso ŋ kòom nùghù ndùw è bàm aŋ Kàpɛnòm, ghe n nàʼà ndùw enyəa ù ŋ kwə̄n nyə̄.

²Ghî ghə̀ n ndùw tsuŋ tsughu fughu enyə, buʼù fə tsəa fə n tə̀ghà fə̀ m buw, kɛ̀sò dzì alebùʼù tsə̀ghàa sə a beē, zə̀ m buw daŋso. Ù ŋ kə̂a ghee â shwaʼ u Kəzə̀ wò.

³Ghî à li gho a chìakò n ndùw bòʼò wò ghùw mò ù lò kəkə̀ŋlò a vʉ̀a wə̄n.

⁴A m bùghò dzì sò buw â ghee aletsə̀ghàa nyəā kôʼ Yɛso, ghî a màʼa fə̀ ŋge tsūŋ, ghe n tsʉ sə kɔʼ tuw kə ndughu edzūŋ an tuw kə wə̄n, a m bùghò ghe ghəə̄ŋ nyə̄ tsughu wô bûʼ kǒ fughu, ghe n nì zə̀ghàa nyə̀ tsùghù wò kə̀mbùŋ à kə̀əŋ chì ko a te.

⁵A m bùghò Yɛso kǒʼ fə̀ŋ zəla ghe ki ghè zò, ù n dzɛ̀ â kə̀əŋ chi ko enyəa, “Ŋ wɛ̄, Zə̀ kə̀ m bòo tə̀ghà tə̀ ghuuw màʼà.”

⁶Ghê dèekə̀làŋ à li ghə n doʼ fughu, bvʉnlo àghəa nʉghànʉghà enyəa,

⁷“Ghùw wən ghəa a kə̂a ènzə̂n enyəa à? Zən lò e sûwnlò â Zə̀ kò! À lò ndughoo ù lò aleghuūw maʼà bòo tə aghì a, mò à yò ko Kə̀zə̀ a?”

⁸Aŋghəa Yɛso lǒ mò ù ŋ kele moʼnlò e ghee zo enyəa ghe bvʉnlô àghəa nʉghànʉghà, ù n daŋso dzɛ̀ â ghee enyəa, “Ghɛ̀ tuw ko a, ghɛ̀ kəŋo, ghɛ̀ kəŋo aŋ kwò à?

⁹À bùghuun tsə̀ghà è ghɛ zo a, aledzàa tsughu â kə̀ŋgwûundughu kə te ko enyəa, ‘Ghe m bòo tə̀gha tə̀ ghuuw màʼà.’ Ŋkāa aledzàa tsughu enyəa, ‘Nùghu nǐi kɔʼ mbùŋ kə̀a kò, ghù bwii sə nduw a?’

¹⁰À lò ko enyəa ghɛ̀ kele tsughu enyəa Wɛ̀ ù ghùw kì kədaʼa fɛ aŋ ghueekətsə̄ aleghuuw maʼn bôo tə aghì tò.” Ù n dzɛ̀ â kə̀ŋgwûndughu chi ko enyəa,

¹¹“Ǹ dzɛ̂ â ghù enyəa ghù nughu ni kɔʼ mbùŋ kə̀a kò, ghù nduw alô ghù.”

¹²Ù n nùghù è kɔʼ, tsu kɔʼ mbùŋ kə wə̄n, mgbàŋ nùghù sə̀ ndùw enyə an sə kə ghì yì à dzə̀m; dzughu zə n zum ghee a te gho a dzə̀m, ghe ŋ kɛ̄ɛ Kə̀zə̀, dzàa tsùghuu enyəa, “A kaām ghəa è li e kôʼ kòʼ tò zən!”

¹³Yɛso n nùghù kpèʼe è tsughu, ndùw a ŋgùŋ è dzùghùntsòʼ, saʼ kə aghì chì kə̀ dzə̀m n nyə̀ŋ ndùw zùuŋ ŋgəa kɔ̌ʼ wə̄n, ù ŋ kàʼ ndùw ghee a lùʼù zoʼn wo.

¹⁴A m bùghò Yɛso tsə̀ghaa dzì è wə̄n, ù ŋ kòʼ tsùghù Lɛvì, Wɛ̀ ù Afìus, mò vʉ̀a ù dǒʼ an lùʼù kə kəfwàʼ kə wə̄n kə̀ dzə̀akə̀mwàʼsò kò, Yɛso n dzɛ̀ â wən enyəa, “Nùghuu wò a bǎà mùghò.” Lɛvì n sə̀ sùghò a bàâ wə̄n.

¹⁵A mo e tsûuŋ tsughu, Yɛso n ndùw də̀ghàan ndùw èzə an ndughu alô Lɛvì ghèe ghê tsə̀təndə̄ghā tə wə̄n to. Ghe n dzeŋe zəa ghèe ghê ghì à dzəā a kəmwàʼsò ghò ghee ndə̀m, àsùghò ghì à biigh à li gho, ghèe ghee mò bughōo a dzə̀m.

¹⁶A m bùghò ghî a kəmwàʼsò a tə̀ Falàsîi à kôʼ tsughu enyəa ù zə̌a dzə̄əŋ ghèe ghêe ghì à biigh gho, à ghê dzə̀akə̀mwàʼsò, ghe m bvʉ̄ â tsə̀təndə̄ghā tə wə̄n to enyəa, “À lǒ kwò ù sò kôom zəā dzəə̄ŋ ghèe ghê dzə̀akə̀mwàʼsò àsùghò ghì à biigh gho a?”

¹⁷Ghəa Yɛso zuw ndûw ghəa yì, ù n dzɛ̀ ndùw â ghee enyəa, “Ghî ghəla ghe tughuu dzɔɔ̄, ghe ki yo ghəa è ghəəŋ zo ghèe ghêe ghùwŋgàŋ, à gɔ̀ʼɔ̀ ko ghəla ghe dzaŋā. Ŋ̀ ka mo bughò dzə̀ alebùghò tɔŋɔ̂ ghì à tsəghatsəgha gho, mùgho mò bugho à biigh gho.”

¹⁸A m bùghò tsuʼ ù li wo tsə̀təndə̄ghā tə ghì a Falàsîi àsùghò tə Dzɔ̌n wəla ù fə̀ fughuu ghî ghò â mùghù ŋ Kə̀zə̀ mò tə baā dzughu zo, ghî à li ghə m bùghò bvʉ̀ â Yɛso enyəa, “À lǒ kwò tsə̀təndə̄ghā tə Dzɔ̌n tə sô baā dzughu zo àsùghò tə ghì a Falàsî tò, təghà tia tə kuūwn baā yo à?”

¹⁹Yɛso m bɛ̀lɛ̀ ndùw ghee enyəa, “To fən a nùuwìzən ghə̂ n dzughu e bam a, mò nùuwìzən lǒ ghèe ghee a? Abugho nùuwìzən lò dzə ghèe ghee, ghe yo alebam edzughu.

²⁰Tî kə lo bùghòo nù, ghe lo nîi nùghùun kɔʼɔ̄ nùuwìzən aŋ ghùu ghee, ghe ke baa nduw dzughu zo an tì kə̀ è chì.

²¹Ghùw yò dzə̂ alenìi kɔʼ bâ kə ndzʉ̄ kə̀ fughu ko, ù taā məghàa ndûw an ndzʉ̄ tə̀ wii to. Abugho ù fòʼ tsughu ghəa yì, bâ kə ndzʉ̄ kə̀ fughu chi sô pfʉ̌a nùghùun sə̌a wò nǔ ndzʉ tə̀ wii tì, bûʼ kə te kə kôom dûuw tsəghàa tsughu kə̀ wii ko.

²²Ghùw yò sughò alenìi kɔʼ sə̀ŋ è nlʉ̀ ù dzə̀là tsughu an sùʼ[1] è wǐi, bugho ù ghəəŋ tsughu êzə̀, lʉ̀ n te n sô buʼù maʼà tsughu sùʼ è te; lʉ̀ n sô kwəlà kɔʼ, suʼ boō kɔʼɔ̄ sughò. E laam lò enyəa a sə̀ŋ nlʉ̀ dzə̀là ko an sùʼ è fughu.”

²³ A m bùgho ko an Tsuʼntsə̄ u Tə̀dzûu ù li wo, Yɛso n tsəghàa dzì am bəghaa zo asāŋ è li zo ghèe ghê tsə̀təndə̄ghā tə wə̄n to. Ghəa ghe tsəghāa ezə̀, tsə̀təndə̄ghā tə wə̄n tə ŋ kàʼ ndùw saŋ à kəān pfʉ̄a gho.

²⁴Ghî a Falàsîi ghə̀ m bvʉ â Yɛso enyəa, “Mò à, ghe kə chi ghəəŋ kə̀ kwò èzə̂a mo lâŋ kə̀ tsuʼntsə̄ kə kâ bǒo dzə̌ a?”

²⁵Yɛso m bɛ̀lɛ̀ ndùw ghee enyəa, “Ghɛ̀ kaām tɔ̄ɔŋ kòʼ ghəa ghə̀là Dɛvìd fə ghəŋlo ghəa dzə̀ŋ fə̀ za tsughu wə̄n ghèe ghê ghì ghə̀là ghèe ghee mò lo a dzə̀m à, ù n laʼà kèe ùfʉ̀ghazəa a?

²⁶ An tì kə̀là Àbǐatà fə lo fɔ̀e è nē, Dɛvìd n nyə̀ ndùw an ndùghù è Kə̀zə̀, nyə̀ nì zə kɔʼ bɛ kə̀ baa kəla kə lɛɛ̄n ko fɔ̀e tò alezə̄, fùghù tsùghù sùghò ghì ghəla ghèe ghee mò lô a dzə̀m.”

²⁷Yɛso n daŋso dzɛ̀ â ghee enyəa, “Ghe mò tsuʼntsə̄ u ghəəŋ tsughu â ghùw, ghe ka mo ghùw ghə̌əŋ tsùghù dzə̀ â tsuʼntsə̄ wo.

²⁸À fi lo sugho enyəa Wɛ ù ghùw kì kədaʼa alefwàʼ fəgha kə̀là ù ləgha tsughu tsuʼntsə̄.”