Read Aghem Mâk 4 Bible Online

Mâk 4 - Aghem bible

Mâk 4

¹ Yɛso ŋ kòom ndùw kaʼ kpeʼe ndùw ghì à zoʼn gho a ŋgùŋ è ènyʉ̀ e Galèlîi. Nɔ̂e kə aghì kəla kə fə̀ zûuŋ ŋgəa kɔʼ wə̄n fə̀ ŋgee duūw nû; ù m bīsō nyə̀ dòʼò kɔ̀ʼ alo kəkwə̀n an dzughù è te, nɔ̂e kə aghì chi kə ŋ kuuwn tēe tsughu a ŋgùŋ è dzùghù.

²Ù n zoʼn tsughu ghee enyə â ndə̀mà tə aghəa to aŋ kwə̀ən tə ushwāʼ, dzɛ̀ â ghee ghəa ù zoʼn ghee enyəa,

³“Zəən tsughu nlò! Ghùw ù lì fə soʼ nduw alendùw tam ufʉgha an usum.

⁴A m bùghò ù təmā ndûw fʉgha wo, ù loʼ wə m bvʉ̀ ndùw an dziī, nwə̀n mə̀ m bùghò chǔuwn pfʉ̀ è kɔʼ.

⁵Ù loʼ wə n bvʉ̀ ndùw alo ugɔ̀ʼɔ̀, mo zu tə biso yǒ fughu. Sə a te ghə n tsùuŋ ko enyə, fùw è kɔʼ, zu tə màʼâ fə məə̄n yo an lùʼù kə te ko.

⁶A m bùghò zuuw e sə kɔʼ wo, zə n zùʼ è tsughu, ghəa u ki yô ghaŋ to, wə ŋ gwə̀n bò è kɔʼ.

⁷Sə à li ghə m bvʉ̀ nyə tsughu an lùʼu kəla nyɔ̌ɔŋmgbê ù nomlō a te, nyɔ̌ɔŋmgbê wə̀ n noo kwù ŋgwùu è tsughu, tsuʼn wì è tsughu, ghə ŋ kè bɔŋ.

⁸Sə à li ghə m bvʉ̀ ndùw am fòon kə kəlùʼu, noo bɔ̀ŋ dzɔ̀ è tsughu, ebuʼ è mɔ̀ʼ m fughuu kɔʼɔ̂ ghə̀m mə̀ àsə n təgha, buʼ à li ghə m fughuu kɔʼɔ ŋ̀ghəm tǔu, buʼ à li ghə m bɔŋɔ kɔʼɔ ndùw ŋ̀ghəm è ghəm.”

⁹Yɛso n tsughu tsən tsughu enyəa, “Ghùw wəla ù ki tuw ko, ù zuw!”

¹⁰A m bùghò Yɛso sə̀ lo wən â nəŋ ko, ghî à li gho, aŋ ghì ghəla ghe fə̀ zəə̄n shwaʼ u wə̄n wo, n ndùw bùghò ghèe ghêe tsə̀təndə̄ghā tə wə̄n tən èghəm à ghè tò tə bə̀ghà, dzɛ̀ â wən enyəa ù teso dzâa wô kwə̀ən kə ushwāʼ kən.

¹¹Yɛso n dzɛ̀ â ghee enyəa, “Ghe n sə ghɛʼɛ a tsʉ aŋ ghəa e fɔ̀e u Kəzə̀ ghəla a nân doʼō. Yia kuūwn bughò â ghî à li ghən a beē, ghəa ghə̀n à dzə̀m lò aŋ kwə̀ən kə ushwāʼ;

¹² to ghe e mgbaŋa koʼō nduw, kòʼòkɛ̀lɛ yo, ghe e zuuw nduw, kuuwn zuuwkɛ̄lɛ̄ yo; ghe lô tiī kuwnlō, ghe bvʉ̂a wô â tsəlà Zə̀ kò Zə̀ kə̀ ghuūw maʼà kɔʼ bôo tə ghee.”

¹³Yɛso ŋ kòom bvʉ â ghee enyəa, “Ghɛ̀ zuuwkɛ̄lɛ̄ yo kwə̀ən kə ushwaʼ kən a? Ghɛ̀ sô kwə̀ən u ushwāʼ ù li wən ù dzə̀m êzəŋ zuūwkɛ̄lɛ̄ ênzə̂n?

¹⁴Ghùwsum wən fɛ̄ tâa shwāʼ u te wo.

¹⁵Ghî à li ghən lo tǒ sə ghəla a bvʉ̂ tsughu an dziī; abugho ghe daŋso zuw tsughu shwaʼ u te wo, satàn m bùghò tsù nùghù kɔ̀ʼ shwaʼ u te wo am fə̀ŋ tə ghee.

¹⁶Ghî li ghən nyoʼn lò sugho tǒ sə ghəla a bvʉ̂ tsughu alo ugɔ̀ʼɔ̀, abugho ghe zuw kɔʼ shwaʼ u te wo, ghe n chʉɛ boo tsughu alo eduʼnlo;

¹⁷wə ŋ kè sô kuūwn nyəā məla ghee alo təfə̀ŋ, wə n tsùuŋ dòʼò tsughu ko aŋ kəmà fə enə̀gha; abugho tsû ù sə kɔʼ, ghe fala tsughu am fwàʼ kə Kəzə̀; ghe n tì zə̀ghà è tsughu.

¹⁸Ghî à li a lo tò ghəla a mò tsɔʼn nduw an nyɔ̌ɔŋmgbê. Ghe lo ghî ghəla ghe zuw tsughu shwaʼ u te wo,

¹⁹yìa à kuūwn lô enyəa ghe nəŋlo aŋ ghəa a mbī gho, ləghâa kum e mbī, àsùghò ndə̀mà tə aghəa tə mbī to; ghəa a te yia a boōn maʼà tsughu ghəa a Kəzə̀ ghəla a lo ghee alo təfə̀ŋ enyəa a ka noo bɔ̄ŋ.

²⁰Sə ghəla a mò kuūwn bvʉ̂ tsughu an zù tə̀ ləə̄m to lo tò ghî ghəla ghe zuw tsughu shwaʼ u Kəzə̀ wò, tɔ̀ʼ bǒo tsughu am fə̂ŋ è dzùŋ, mʉ̀ ndùw ùtwam, à li gho ŋghəm n təgha n təgha, à li gho ŋghəm tǔu, à li gho fəbɔm.”

²¹ Yɛso n dzɛ̀ kpèʼe ndùw â ghee enyəa, “Ghùw lò nû aledàa tsughu lâm, ù nìi naŋā nyəā ndûw a tsəla kəkə̌a ŋkāa a tsəla uchʉ̀a, mò ù kà tìso kɔʼ am fəgha kəla kə dâ sə kɔʼ tò ti kə lâm à?

²² Ghəa è li e yo ghe nân naŋā mo e kê bùghò sə̌a yo ndɛ; ghəa è li e yo sughò ghe tsɔŋ ghəŋlo, e kê səā yo an tsə̂.

²³Abugho ghùw ki tûuŋ ko alezūw, ù zuw!”

²⁴ Ù n dzɛ̀ kpèʼe ndùw a ghee enyəa, “Naŋa nlò tuw ko aŋ ghəa ghəla ghɛ̀ zuūw; fòʼ zəla ghù fòʼo fughu səā nduw, à lò sugho fòʼ zəla ghù lo kele, ndə̀m è lì ke nāam buʼ lo kpeʼe.

²⁵ Nu ghùw wəla ù ki, ghe kê fùghuu kpeʼe wə̄n; wəla ù ki yo, nyàaŋ fə̀là ù bùʼ ki, ghe kê nìi nùghùun nù.”

²⁶Yɛso n nùghù ndùuŋ ndùw â ghəa à kəā gho enyəa, “Fɔ̂e u Kəzə̀ ù lo tò ghùw lò təmā naāŋ nduw ŋgòʼ a ghuu,

²⁷ù ŋ ghəəŋ zee ndùw ghəa a wə̄n â tsə̀ tò, fəŋò bwii ndùw wə̄n â mgbii to, ŋgòʼ zə m fwə̄n è kɔʼ, noo è kɔʼ mò ghùw u te kwo yo tuw ko a te.

²⁸Zə n tsò fwə̀n sùghò aŋ ghùe fughu a ghueetsə̄, bùʼ mgbə̄n sə̀ kɔ̀ʼ è dzə, fughu kɔʼ ebuʼ, daŋso nyə tsughu am būʼ e te zo.

²⁹Abugho sə a te a biso tsughu, nəgha e fi kpē nû â fʉ̀ghàzəa wo alekwə̄n, ù n daŋso sugho alo fənyə̄.”

³⁰Ù n daŋso nùghù bvʉ tsughu enyəa, “A lo alenìi fòʼsò ndûw fɔ̀e ù Kəzə̀ ghèe kwò kò à, ŋkāa a lo alekə̀a tsughu kwə̀ən kə ushwāʼ kə̀ ghɛ ko aleteso a tè à?

³¹U lo tǒ nyàaŋ fə esam fə̀ li fo ghe taā tsughuu, ghe tɔŋlo enyəa à lò sam e mostàd, fə to tsəghà sam to tə dzə̀m aŋ ghueetsə̄;

³²abugho a tam tsughu, zə ŋ kuuwn nōo dùw tsə̀ghà tsùghu kàʼ mə̀n n dzə̀m, fughu sə̀ wò kùee tə̀ ne to, nwə̀n mə̀ m bughò bə̀ghaa tə̀ndughu a te.”

³³Yɛso n tsò kə̀a tsùghu ghee â kwə̀ənlò u ushwāʼ wo enyə ndə̀m aŋ ghəa ghe fə̀ tso ki alezuūwkɛlɛ;

³⁴ù kaa ŋgəmso kə̀a ghəa zo â ghee mò ù kà kwə̀ən kə ushwāʼ ko a te bughò dzə̀n, kuuwn nyɛʼɛ ndùw tèso dzàa tsùghûu ghəa a te gho a dzə̀m â tsə̀təndə̄ghā tə wə̄n to.

³⁵An tsuʼ fə te fo ko an nə̀gha è guŋsō zo, Yɛso n dzɛ̀ â tsə̀təndə̄ghā tə wə̄n to enyəa, “Bùghò nlò sɛ̀ daŋà səā ndûw a ŋgùŋ èzə̂.”

³⁶Ghe n zə̀ghàa tsùghù saʼ kə aghì chì, nyə kɔʼ aŋ kwə̀n chia Yɛso mò lo a te, dzə̄ŋē nùghù è nduw. Kwə̀n ù li wə n tso lò sugho fughu.

³⁷Bòobò kə zə̄ŋ kə̀ li kə n nùghù nùghù sə kɔʼ fughu an dzughù, tùŋutùŋu kə n tûuŋ kǎaŋ tsə̀ghà kwə̀n chi enyə, mùghù mə̀ ŋ kàʼ ndùw alenyə a te.

³⁸Yɛso n lo am bàm kə kəkwə̀n, bwii fughu, mò n tuw kə gaʼ alo kətàlà; ghe n ndùw zòm kɔ̌ʼ wə̄n, dzɛ̀ â wən enyəa, “Wàdè, à lò enyəa ghù dɔ̀m tǎa yo e zəghà zò abugho a kpuw ŋkāa a?”

³⁹Ù n nùghù è kɔʼ, daŋso kē tsughu kʉ̀ɛɛ kə te ko enyəa, “Bughu dòʼô! Dòʼò mɔŋ!” Zəŋ zə m bùghù dòʼò è kɔʼ, luʼū tə ŋ kòom nùghù zuw dòʼò tsùghù mɔŋ.

⁴⁰Ù n daŋso bvʉ â ghee enyəa, “Ghɛ̀ tsəŋô kwò à? Ghɛ̀ naam ki ko yo fə̂ŋ tò a zəŋò Zə̀ kò à?”

⁴¹Ghue zə m kpuw lɔŋe tsughu ghee enyə, chìa m bvʉ â chìa enyəa, “Wən lò ndughoo, kʉ̌ɛɛ kə sô zuūw â wə̀n à, à dzùghù a?”