Read Aghem Mâk 5 Bible Online

Mâk 5 - Aghem bible

Mâk 5

¹Yɛso ghèe ghê tsə̀təndə̄ghā tə wə̄n tə n dàŋsə̀ wo a ŋgùŋ è dzùghùntsòʼ è lì zən an naʼ e tə̀ Dzɛlàsîn.

²A m bùghò ù sə kɔʼ alo kəkwə̀n, ghùw ù lǐ m bùghò kòʼ wò wə̄n, ù nùghù sə wo aŋ gə̀mâghùw, mò zʉ̀ ù biigh u lo a zəŋò wə̄n,

³mò ù mùghù tsəgha ko fughu an tuw u təshìa aŋ gə̀mâghùw; mò ghùw kòom yò alekwuū kɔlɔ̀ kôʼ wə̄n abugho ghùw ù te bûʼ ki ko tsāʼ to.

⁴Nu ghe mò kwuu kɔlɔ̄ naaŋ tsəgha nu wən am ugbāʼ, ghe ŋ kùm alo tətsāʼ, ù n nùghù těen màʼà tsùghu tsāʼ tə te to, teen màʼà tsùghù sùghò bwaʼ u te wo; ghǔw ŋ ŋgəmso yò bughuso wə̄n.

⁵Ù m buʼn bwīi tsə̀ghà mbɔŋ a fughu an tuw u təshìaa, àsùghò alo təkàʼà, bùghò bùʼn zee ndùw, ù ŋ gûwn kǎaŋ tsə̀ghà ghue u wə̄n alo atīa.

⁶A m bùghò ù daŋso kôʼ wô Yɛso ènyə alo kədɛ̀, ù mo è nyəŋ, bùghò tə̀m wò tə̀ŋguʼ a vʉ̀a wə̄n;

⁷màʼà sə̀ wò kə̀bɔ̀ŋ enyəa, “Ghù so e dzə̂ èndugho â mùghǒ a Yɛso, Wɛ̀ ù Tsə̂ntəmbî? M̀ bvʉa wò â ghù an zən e Kəzə̀, kà mugho ndzāŋsō màʼà.”

⁸Ù fə̀ ghəa ghən enyə dzɛ tsughu bòʼ Yɛso sò dzɛ̂ nduw â wə̄n enyəa, “Sə nùghù a zə̀ŋo ghùw vʉ̀, zə̀ kə̀ biigh ko tǒ kə̀fùghùu!”

⁹Yɛso daŋso nùghù bvʉ tsughu â wən enyəa, “Zən zəghà è lo ndughoo a?” Ù mo enyəa, “Zən zaŋā e lo Ndza; nu ghàʼ lo ndə̀m.”

¹⁰Ù n daŋso tɔ̀ʼ buʼ tsughu kə ghu â Yɛso enyəa e kwo Yɛso lò dzûu nughùun səā nduw ghee a fughu alo enaʼ.

¹¹Sāʼ kə ukwə̀lebʉ̄ghā kə̀ li kə n zəa kaaŋ fughu aŋ ŋgàŋlo e ukwàʼ;

¹²zʉ̀ vʉ m buʼ tsughu kəghu â Yɛso enyəa, “Tum nyə̀ ndùw ghaʼ a zəŋò kwə̀lebʉ̄ghā u vʉ wo, ghàʼ nyəā ndûw a zəŋò ghee.”

¹³Ù fi zəghàa ndùw nǔ ghee. Zʉ̀ u te wə n daŋso sə̀ nùghù wò a zəŋò ghùw vʉ̀, nyə̀ ndùw a zəŋò kwə̀lebʉ̄ghā vʉ̀, mo u fə̀ lo tò təkām tə bə̀ghà an tāŋ, wə n daŋso nùghù tə̀ŋò nyə̀ŋ nyə̀ tsùghù ndùw aŋ gwōo chì, bvʉ̀ nyə̀ tsùghù ndùw an dzùghùntsòʼ zə̀, məla sàŋ ndùw fughu an dzùghùntsòʼ.

¹⁴Ghî ghela ghe fə̀ chiīn kwə̀lebʉ̄ghā a te wo n nùghù tì kwə̀n dzɛ̀ wò ghəa a te gho enaʼ, ŋgwə̀là tə̀ n zùw è sugho. Ghî ghə̀ n təŋò sə̀ wò alebùghò kôʼ enyəa à kùm kwǒ a.

¹⁵Ghe fi bughò kòʼ wò nù Yɛso, à ghùw vʉ̀a ù mò ki zʉ̀ wò mò vʉ̀a ù dǒʼ fughu, mò ù dzə̀là kèle tə̀ndzʉ̄, mò ù lǒ an tɔ u wə̄n; ghəa ghe kôʼ tsughu ghəa yi gho êzə̀, fə̂ŋ tə̀ m bàa ghee.

¹⁶Ghî ghəla ghe mò kôʼ ghəa yi n teso dzɛ̀ ndùw ghəa ghəla a mô sə a zəŋò ghùw vʉ̀a ù mò ki zʉ̀ ù biigh vʉ̀, à sùghò a zəŋò kwə̀lebʉ̄ghā wo.

¹⁷Ghî yi ghə n daŋso kàʼ tsùghu ghu kə̀ buʼu ko â Yɛso enyəa ù səā nùghù an nāʼ e ghee.

¹⁸Ghəa Yɛso so e nyəa kɔʼɔ alo kəkwə̀n enyə, ghùw vʉ̀a ù mo ki zʉ̀ ù biigh vʉ m bùʼ ndùw kə̀ghu â wə̄n enyəa to e mô lò nduw ko ghèe wə̄n.

¹⁹Ù mô è tue, dzɛ̀ â wə̄n enyəa, “Kwən kòʼo ndùw ghî ghə̀a ghò ghù dzɛ nduw fwàʼ kəla Mughubè ù te fwâʼ tsughu â ghù, ghù dzɛ nduw sugho ghəa ù kwuso tsughu se zo a te a zəŋò ghù.”

²⁰Ghù vʉ̀a ù mò ki zʉ̀ ù biigh vʉ n nùghù è ndùw, ndùw kàʼ ndùw alenàʼà kâaŋ tsəghà ghəa ghəla Yɛso ghəə̄ŋ tsughu a zəŋò wə̄n an naʼ zəla ghe mò tɔŋlo enyəa à lǒ Dìkapōlès, ghəa ù nàʼn ndûw ghəa ghən gho, dzughu zə n zuu àghì a dzə̀m.

²¹A m bùghò Yɛso dàŋsə wo alo kəkwə̀n a ŋgùŋ zən, nɔ̂e ko aghì kə̀ n zùuŋ wò a vʉ̀a wə̄n mò ù tì a ŋgùŋ è dzùghùntsòʼ è te.

²²Ghùw u mɔ̀ʼ aŋ ghì ghəla ghe mò lô tuw wo an Ndùghène è Tə̀dzûu, ghe mò tɔŋlo enyəa à lò Dzaelùs, n ndùw è bugho, aŋghəa ù bùghò kôʼ wô Yɛso, ù n tə̀m ndùw tə̀ŋguʼ a tsəlà wə̄n,

²³buʼ ndùw kə̀ghu â wən enyəa, “Nyàaŋ fə fəzən faŋā fə so e kpuw. Bùghò, ghù bugho gaʼ tsughu ghu ghə̀a ghò a zəŋò wə̄n, tò ù tughūu doʼò wô, ù dòʼò wô â tuw ko.”

²⁴Ù fi nughù nùghù ndùw nǔ ghèe wə̄n. Nɔ̂e kə aghì chi kə̀ n tə̀ŋò nùghù ndùw a bǎà wə̄n, ghèe ghee n tsɔ̂ɔn dzə̌əŋ kɔ̀ʼɔ ko èghue, kaʼkəkaʼ ghe nduūw.

²⁵Wìzən ù lì n lo an saʼ kə aghì kə te ko mò ù n tsoʼn bǎà zee ndzɔ̄ŋ, à lo mò ù m fala tsɛ̀lɛ̀ an dzàŋ zən alo tənùu eghə̄m à ghè tò tə bə̀ghà.

²⁶Ù m biso fala tsùghù sùghò ènyə aŋ ghùu ghì a təŋgàŋ ghò, boon mɛ̀ʼɛ̀ fəgha kə̀là ù mò ki, tsoo kele yo bughuun zo. Ghəa a wə̄n ghə fəŋso kòom tə̀əm bǒo mɛ̀ʼn ndùw.

²⁷Nughò wən n zuw tsughu zwɔ̂ŋ u Yɛso, ù n sə̀ kɔ̀ʼ wò a bǎà wə̄n am faʼnlo e aghì, bùghò kɔ̀ʼ mɔ̀m tsùghu ndzʉ tə wə̄n,

²⁸tɔŋlo enyəa à fə̀ lo mò nughò ù te maā dzɛ̂ enyəa, “Abugho M̀ bûʼ mɔ̂m tsughu ko ndzʉ̀ è wə̄n, Ǹ sô tùghu nù.”

²⁹Ghəa ù mòʼ tsughu dzə êzə̀ ndùw mɔ̀m è tsughu, fɔ̂n e wən zə n daŋso kə̀a è kɔʼ; ù n ndòʼ zə̌ən zuwkɛlɛ tsughu ghue u wən enyəa dzâŋ e te zə ŋ ghee zəghàa.

³⁰Ghəa Yɛso zəə̄n zuw tsughu enyəa daʼa kə mo a zəŋò wə̄n sə nùghù, ù n daŋso fə̀n tsùghù ughue fughu an saʼ kə aghì, bvʉ tsughu enyəa, “À mùghò mɔ̂m ndùghò à?”

³¹Tsə̀təndə̄ghā tə wə̄n tə n dzɛ̀ â wə̄n enyəa, “Ghù vʉ̀a ghù mgbaŋā koʼò aŋghəa ghî à zʉɛʼɛ̄ nyəā wô a te a zəŋò ghù, ghù vʉ̀a ù lɛɛ̄n kôom bvʉa zee wô enyəa, ‘À mùghò mɔ̂m ndùghò à?’ ”

³²Yɛso ŋ kuuwn naam lɛɛn kaaŋ ko alekòʼò tsughu ghùw wəla ù mɔ̀m tsughu wə̄n.

³³Ghəa nughò vʉ sô kòʼ ghəa yia a sə a zəŋò wə̄n, ù n tsə̀ghà sə è wo, kàʼ, kàʼ, kàʼ, kàʼ, kàʼ, ù tsəŋlō, tə̀m ndùw tuw wə anyʉ̄ a tsəlà Yɛso, dzɛ̀ tsùghù ghəa a te gho kpe.

³⁴Yɛso n dzɛ̀ â wə̄n enyəa, “Ŋ wɛ̄, fə̀ŋ zə̀ghà ghù gaʼ tsughu a zəŋò Zə̀ kò ŋ ghəŋlo ghù vʉ̀a ù tughu; ndùw kədzûŋ, ghe baāŋ kɔʼ dzə̂ ghû an dzàŋ zə̀ghà.”

³⁵Aŋghəa Yɛso kə̀a ghəa ghən, ghî à li ghe n têeŋ wò ghe nughù wo alô Dzaelùs, ghe n dzɛ̀ wò â wə̄n enyəa, “Wɛ wʉ̂a m kpuw, ghù sə̀ mughùbè kòom fəmso aŋ kwò à?”

³⁶Yɛso ŋ kuūwn zùw tsə̀ghà ndùw ghəa yì, kè naŋa kətuŋlō a te, dzɛ̀ â tuw kə Ndùghène chi ko enyəa, “Kà tsəŋ, kuuwn gaʼ tsughu ko fə̀ŋ zə̀ghà a zəŋò Zə̀ kò.”

³⁷Ù ŋ kè boo enyəa ghî à bùghò a bǎà wə̄n, ù n nì kɔʼ ko Pità, àsùghò Dzɛ̂ms ghèe Dzɔ̌n, waazə̂.

³⁸Ghəa ghe bugho tɛ̂ tsughu alô tuw kə Ndùghène chì, ù ŋ kòʼ ko mo luʼū tə lo ko dzaʼàkòkò tə lo, kwukwu zə edì zə̀ ŋ kûu, ghî ghə̀ n dîi ghǒʼn mìasò ndùw ènyə.

³⁹A m bùghò ù tsə̀ghà nyə nduw, ù n bvʉ â ghee enyəa, “À lǒ kə kwò ghɛ̀ sô fəmso ghue zo alo edì a? Wɛ̀ ù te kâ kpùw dzə̀, ù bwǐi nù nû.”

⁴⁰Ghe ŋ kàʼ ndùw wə̄n a lùʼù tsoʼo wo. Ù n daŋso dzùm nàŋa sə̀ wò ghee a dzə̀m a beē, nì kɔʼ ko zə̂awɛ̀ ghèe tselèwɛ̌ vʉ̀, à ghì ghəla ghèe ghee mô lô a dzə̀m, nyə̀ ndùw a fiā wɛ vʉ mò nyəŋ.

⁴¹Ù ŋ kwu tsughu ghu kə wɛ̀ fi fo, dzɛ̀ â wə̄n enyəa, “Tàlità Kumɛ̀.” Mo e moʼnlò enyəa, “Êwɛ̀, nùghu kɔʼɔ̀!”

⁴²Zən fi fə n daŋso nùghù è kɔʼ, kàʼ ndùw è bwìi (fə mò lo tənûu èghə̄m à ghè tò tə bə̀ghà). Ghəa ghe kôʼ tsughu ghəa yì, dzughu zə n zum ghee.

⁴³Ù n tɔ̀ʼ kʉ̀ɛɛn tsùghu ghee enyəa ghùw lò zuūw ghəa zə̀, dzɛ̀ enyəa ghe kəŋo fughu kəfəgha wɛ vʉ̄ zə.