Read Aghem Mâk 6 Bible Online

Mâk 6 - Aghem bible

Mâk 6

¹Yɛso n zə̀ghà tsùghù bâ kə enaʼ chìa ù mò lo a te, nùghùu wò an nāʼ zəla ù noō a te, tsə̀təndə̄ghā tə m bùghò dzə̌əŋ ko ghèe ghee.

²A m bùghò Tsuʼntsə̄ u Tə̀dzûu, ù n nyə kàʼ ndùw ghì à zoʼn gho an Ndùghène è Tə̀dzûu. Tuw kə m kpuuw ndə̀m è àghì ghəla ghe mò zuw ghəa yìa ù mò kəā, ghe n dzâa tsùghu enyəa, “Tûw wə̄n fə̀ ghəa ghən ni wo ghɛ? À wə̄n â ŋgòʼ è utɔ zən bòʼò fùghù ndughoo a? Kòʼo to kɔ tə aghəa təla ù ghənlō à!

³Wən mgbàŋ yò kɔmfəndàŋ wə̀n à, wɛ̀ ù Mèle wən a? Yia a so wə̄n lǒ wàazə̀ Dzɛ̂ms, ghèe ghê Dzosɛ̀s, à Dzudàs, àsùghò Sǎemòn a, wàazə̀ Dzɛ̂ms, waazə̂ à zən a gbaŋ yò ko fɛ sɛ̀ à?” Nə̀ghà mə̀ m mbè ndùw ghee a zəŋò wə̄n.

⁴Yɛso n daŋso dzɛ̀ â ghee enyəa, “Ghî à tsəŋo ghùwshʉ̀ghà ù Kə̀zə̀ luʼū tən tə̀ dzə̀m, à gɔ̀ʼɔ̀ ko an naʼ e wə̄n, kèndughu kə wə̄n, àsùghò ndùm è ghee.”

⁵Ù n yo aledè fənlo è li zo a fughu, à fə̀ gɔ̀ʼɔ̀ kô ghəa ù fə̀ gaʼ ndûw ghu a wə̄n gho a zəŋò sə fə aghì à dzaŋa à li gho, baaŋ kɔʼ ghee.

⁶Dzughu zə zum wən aŋghəa ghe taʼkè boō fughu â wə̄n. Yɛso n daŋso nùghù è tsughu, ŋgəaa ndùw nàʼà n te məla m mò lô kaāŋ fughu, zoʼn ndùw àghì.

⁷Yɛso n tɔŋɔ zùuŋ wò tsə̀təndə̄ghā tə wə̄n tən èghəm à ghè tò kə bə̀ghà a vʉ̀a wə̄n, zìi tsùghu ghee a lùʼù tuu səa wo, a bə̀ghà à bə̀ghà, fughuu tsughuu ghee â dwaʼa wəla u ghaʼā wo zʉ̀ ù biigh wo.

⁸Ù n dzɛ̀ â ghee enyəa, e kwo ghe lô nîi fəgha ko am bwìnlò e ghee, ghe nîi kɔʼɔ̄ ko mbàŋ; enyəa ghe ka nî fəgha kə̀ zəa ko, ghe ka ni mbə̀ghà, ghe ka dzə̂n kua wo alo mmbə̀ghà;

⁹ghe dzəlà kɔʼɔ̄ ko tə̀gùw, ghe ka sɔ̀ʼn wo u bʉ̀ghà dzəlà.

¹⁰Ù n dzɛ̀ â ghee enyəa, “Mò ghɛ̀ nyə ko an ndughū alô ndùghò, ghɛ̀ m bɔɔm mùghùu ko fughu tò ghɛ̀ ke bugho zəghāa luʼū kə te ko.

¹¹ Abugho ghe doʼŋkè kpeēnî ghɛ̀ an lùʼu kə̀ li ko, tue enyəa ghe zuuw yo shwaʼ wɛʼɛ wo, mò ghɛ̀ zəghàan naʼ e te zo, ghɛ̀ m bùʼ màʼà tsùghù gbə̂n chia aŋ ghùw ghɛʼɛ̄ tǒ tsə̌a enyəa ghɛ̀ n dzə̀m â ghee nyuʼu, bòʼ enyəa ghe ŋ ghəəŋ bonlo.”

¹²Ghe fi sə ndùw nù, nàʼn ndùw enyəa ghî ghə̀n à dzə̀m màʼà èbo.

¹³ Ghe n dzùm sə̀ ndə̀m è ùzʉ̀, ghe n zɔʼn[2] sùghò ndəm è aghì à dzaŋā gho alo mvʉ̄, baaŋ tsughu ghee.

¹⁴ Hɛlɔ̀d, tɔɔŋ Kə̀də̀ŋ, n zuw ghəa ghəla Yɛso mò ghəŋlo, nu zwɔ̂ŋ u Yɛso ù maā ŋge ndza luʼū to. Ghî à li a fə̀ dzaā enyəa, “Ghe n Dzɔ̌n, ghùw wəla ù fughuu mùghù ŋ kə̀zə̀ mò zôm nùghù kɔ̀ʼ alo evʉ̄; zən lò e ghee dwaʼa u te u fwaʼà a zəŋò wə̄n enyə.”

¹⁵À li ghə ŋ kuuwn dzàa enyəa, “À lǒ Elaedzà.” À li ghə n dzâa enyəa, “À lǒ ghùwshʉ̀ghà ù lì, ù lǒ tò ghiishʉ̀ghà à wii ghən.”

¹⁶A m bùghò Hɛlɔ̀d kuūwn zuw tsughu, ù mo enyəa, “Dzɔ̌n wəla mùgho mò gbô tuw ko, ghe ŋ wə̄n zôm nùghù kɔʼ alo evʉ̄.”

¹⁷ Ù mo êzə dzɛ̀ tsughu bòʼ enyəa, ghuūghùe u wə̄n u fə̀ tum sə aghî, ghe n ndùw kwù dzə̀n ndùw Dzɔ̌n an ndùghùtsaʼ enyəa à lò ghəa e Hɛ̀lòdìa, wì ù Felêp, wàatsele, ù mò nî tsughu aŋ wi.

¹⁸Ù mò ghəa ghən a zəŋò Dzɔ̀n ghəəŋ tsughu, Dzɔ̌n màʼà mgbɛɛ dzaā tsəghà ko â wə̄n enyəa, “Lâŋ kə̀ kâ bǒo dzə̀ enyəa ghù koom ni wì ù wàatsùghò aŋ wī.”

¹⁹Hɛ̀lodìa n nì nyə̀a nàŋa ndùw Dzɔn aŋ ghəa e te zo, kəŋo tsə̀ghà alewī wə̄n kuuwn ghàa kèe tsə̀ghà,

²⁰Hɛlɔ̀d màʼa fə̀ tsəŋō tsəgha Dzɔ̌n, ù sò kwo enyəa à lǒ ghûw ù tsəghatsəgha, zɔlɔ sùghò. Ù m baʼà mbàŋ an tuw kə wə̄n. Hɛlɔ̀d mò zuūw tsughuu shwaʼ u Dzɔ̌n wo, ghue wə m kpuw tsughu wə̄n enyə; ù n naam ləghaa ko alezə̂ən shwaʼ u wə̄n u te wo.

²¹Ghuw kə m bùghò tsə kɔʼ Hɛ̀lodìa enyəa Hɛlɔ̀d fə̀ duʼnlo enyəa ghuw ghə edzə̄ a wə̄n a tsəghà kpè nû, ù ŋ kəan fughuu ghî a wə̄n; ghî a tɔ̀ʼ è wə̄n, ghî a tuw u ufwàʼ, à tsoʼ tə Galèlîi tò.

²²A m bùghò wɛ fə Hɛ̀lodìas fə̀ zən fə bughò nyə kaʼ tsughu bən zo, fə ŋ ghəən tsughu Hɛlɔ̀d n tsoʼn ndùw ènyə ghèe ghêe ghì ghəla ghe mò lo a fughu, də̀ŋ kə te kə n dzɛ̀ â zən fə te fo enyəa, “A bugho ghù ləghaa ko kwò kò, dzǎa wò, Ǹ sô fughu.”

²³Ù n dzə̀m kɛ̀ sə wò enyəa, “A bugho ghù bvʉ ko kwò kò, M̀ fughuu nù, abugho à bùʼ lô ko bâ kə enaʼ kaŋā.”

²⁴Zən fi n nùghù sə̀ èndùw, sə bvʉ tsughu â zə̀ enyəa, “Ǹ ndûw bvʉā ndûw kwò à?” Zə̂ mo enyəa, “Ndùw bvʉ ndùw tuw kə Dzɔ̌n wəla ù fughuu ghî ghò â mùghù ŋ Kə̀zə̀ mò.”

²⁵Dzə̂ tə̀n tə̀ bə̀ghà mo fə sô kòom tì a vʉ̀a də̀ŋ kò, â wə̀n à, “Ǹ ləghaa enyəa ghù fughu wo mugho â tuw kə Dzɔ̌n Fùghùu mùghù ŋ Kə̀zə̀ kò aŋ kwônɛ̀lɛ aŋ ghəa a ti fɛ.”

²⁶Ghəa a te ghə n zà ndùw də̀ŋ chi ko enyə am fə̂ŋ; ghəa ù màʼa fə̀ lo mò ù ŋ kɛ̀ bònlo, àsùghò ghəa ghî a mò lô sugho an ndughu, u ŋ kôom yò aletuū maʼà ghəa ghəla zən fi bvʉā.

²⁷Də̀ŋ chi kə n daŋso tum tsughu gbè e mɔ̀ʼ enyəa è ndùw gbôo wô â tuw kə Dzɔ̌n ko, ghùw vʉ n ndùw gbò tsùghù tuw kə Dzɔ̌n an ndùghùtsāʼ,

²⁸bòʼò wò â ghè kò aŋ kwônɛ̀lɛ, bùghò fùghù wò â zən fi fo. Zən fi n daŋso bòʼò fùghù ndùw â zə̀.

²⁹A m bùghò tsə̀təndə̄ghā tə Dzɔ̀n tə̀ zuw tsughu ghəa a te gho, ghe m bùghò bòʼò nùghù ndùw â gwən e wə̄n zo, ndùw tsə̀la è nduw.

³⁰Tum tə Yɛso tə̀ ŋ kwə̀n nyə wò e bàm a vʉ̀a wə̄n. Ghe n nì kɔ̀ʼ fəgha kəla ghe fwaʼ à ghəa ghəla ghe zoʼnlō, dzɛ̀ tsùghù â wə̄n kpe.

³¹Yɛso n dzɛ̀ â ghee enyəa, “Bùghò nlò sɛ̀ ndûw doʼò tsughu an saŋe kə kəlùʼu tò ghɛ̀ nya zʉʉ̄n tsughu ghue zo.” Ù mo êzə dzɛ tsughu bòʼ ghî a mò mgbɛɛ nyəŋo ko a vʉ̀a ghee, ghe m bûʼ kì yo nəgha zo alezə̄.

³²Ghe n nùghù tsùghù alo kəkwə̀n alendùw doʼò an saŋe kə kəlùʼu ghee à nəŋ ko.

³³Ndə̀mà tə aghì tə̀ ŋ kòʼ tsùghù ghəa ghe nughùun nduw a te, kòʼkɛ̀lɛ ndùw ghee, ghî a te ghə n sə̀ tsə̀ghà tsughu ko alo aghùw, nyə̀ŋ ndùw dòʼò zìi ndùw fia ghe mò nduūw.

³⁴ A m bùghò Yɛso ndùw a ŋgùŋ è dzùghùntsòʼ, ù ŋ kòʼ nɔ̀ɛ kə aghì; kwuso tsughu ese a zəŋo ghee, bòʼ ghe mò lo tǒ ndzì təla tə ki yo ghùw wəla ù bàʼa ghee; ù ŋ kàʼ ndùw ghee alezōʼnlō an ndə̀mà ndə̀mà tə aghəa.

³⁵A m bùghò tsuʼ u nyə̀ghàan wo, tsə̀təndə̄ghā tə wə̄n tə m bùghò dzɛ̀ â wən enyəa; “À fɛ lò an saŋe kə kəlùʼu, nəgha zə ŋgè tsə̀ghà sùghò;

³⁶dzǎa tsughu enyəa ghe sɛ̂ɛ ghe lô nəə̄ŋ kwəlā zuū zəa fəgha ko enaʼ ŋkāa aŋ ŋgwə̀là tən fɛ.”

³⁷Ù m fwə̀n dzɛ̀ â ghee enyəa, “Fughu tsughu nlǒ ghee â fəgha kə̀ zəa ko.” Ghe n dzɛ̀ â wə̄n enyəa, “A bɔ̀m n tə̀ dɛnalì[3] mò m bə̀ghà boʼò nìi wò gh tò sɛ̀ è zuū fughu ufʉ̀ghàzəa wo a te à ghì ghə̀n à, enyəa ghe zə a?”

³⁸Ù m bvʉ â ghee enyəa, “Ghɛ̀ ki ugbɛ ù shòʼ a? Ndǔw lɛɛn tsùghùu.” A m bùghò ghe ndûw kôʼ tsughu, ghe mo enyəa, “U twɛ̀, à sə a tətsə̄ghāa gho a bə̀ghà.”

³⁹Ù n dzɛ̀ â ghee enyəa, “Ghɛ̀ ghəəŋ tsughu enyəa ghî ghən tsughuu doʼò tsughu alo ntùʼù an uzwǐi wən”

⁴⁰Ghe fi tsughu dòʼò tsùghù sùghò nù alo ntuʼù, mo fetuʼù fə mɔ̀ʼ fə̀ ghəəŋ kɔʼɔ àghì fəbɔm, fə̀ li fo aghî ŋghəm n tɛ̀.

⁴¹Ù n nì kɔ̀ʼ gbɛ vʉ̀ ù twɛ̀ à tsəghaa tì to tə bə̀ghà, lɛɛn kɔ̀ʼ ndùw kəwala, fughu ndùw kə̀zɔ̀ŋlò â Zə̀ kò. Boʼn fughu tsughu â tsə̀təndə̄ghā tə wə̄n to enyəa ghe dzughùu fughuu ndûw â ghì yì gho; ù ŋ dzùghùun fughu kaaŋ wò tsəghaa tì to â ghì yì à dzə̀m.

⁴²Ghee a dzə̀m n ndòʼ zə̀ kùw è tsughu;

⁴³kuum lueso kɔʼ boʼò mə̀ mbàa àsùghò sugho tətsə̄ghāa to alo ushwàʼnlo eghə̄m à ghè wò u bʉ̀ghà.

⁴⁴Ghî yia ghe mò zə gbɛ vʉ mò lo kam tə a yìnû tə tɛ̀.

⁴⁵Yɛso n daŋso lùum dzə̀n kɔ̌ʼ tsə̀təndə̄ghā tə wə̄n alo kəkwə̀n enyəa ghe nughù ndûw am Bɛ̀dsǎedà â sə ko, e kuūwn ghəə̄ŋ tsughu ghî à sɛ̂ɛ tsughu.

⁴⁶Ghəa ù təmā nduw ghee, ù n nùghù kɔ̀ʼ ndùw aŋ kwàʼ alekɔʼɔ̄ gɔ̂ŋlò.

⁴⁷A m bùghò tsuʼ u nyəghàan wo, kwə̀n kə te kə n lo an dzughù tèetè, ù ŋ kuuwn lǒ wən à nəŋ ko a beē.

⁴⁸A m bùghò u kòʼ ghəa ghəla ghe dəmā ghèe ghêe kpaʼa ko, kʉ̌ɛɛ kə màʼà tə̂əm tsəghàa foō mâʼn wo ghee ebàm, ù m bwìi kə̀ŋo wò an sə kə ghee, â lə̌mlə̌m to enyə, mò ù bwìi wò an tuw kə mmùghu. Ù ŋ kəəŋ wò tò ù se bughò zəə̄ŋ kɔʼ u ghue ghèe ghee.

⁴⁹A m bùghò ghe kuūwn kôʼ ndûw ghəa ù bwìi wo an tuw kə mmùghu, ghe n dzɛ̀ ko à lò avʉatsə̄a, màʼà sə̀ kə̀bɔ̀ŋ,

⁵⁰nu ghe mò koʼ nduw wə̄n fə̌ŋ m bàa ghee. Ù n daŋso kə̀a ndùw ghee ghəa gho, dzɛ̀ â ghee enyəa, “Kele tsughu nlǒ fə̂ŋ, kǎ nlò tsəŋ; à lò mugho.”

⁵¹Ù n daŋso nyə dzəəŋ kɔʼ alo kəkwə̀n ghèe ghee, kʉ̌ɛɛ chi kə n tsùghù bvʉ̀ è tsughu. Tuw kə ŋ kè wàʼsò kpùw ndùw ghee enyə,

⁵²tɔŋlo enyəa ghe ka mō zuwkɛlɛ̄ sùghò ghəa a ugbɛ a yî, ghe màʼa fə̀ tughū â fə̀ŋ tò alezuūwlɛlɛ̂ ghəa a te gho.

⁵³A m bùghò ghe dâŋ sə wo, ghe m bùghò an naʼ e Dzɛ̀nɛ̀salɛ̀t, tə̀ŋò nàŋa ndùw kə̀kwə̀n.

⁵⁴Ghəa ghe sə tsughu alo kəkwə̀n ghî ghə̀ n daŋso kòʼkɛ̀lɛ wò wə̄n,

⁵⁵nyəŋ ŋgəa tsughu mbùʼ è te e dzə̀m, kàʼ tsughu alebòʼn wô ghì à dzaāŋ gho a vʉ̀a wə̄n aŋ ŋghàm ŋ ghee bugho ghe tso zuw tsughu dzə̂ enyəa ù lò alo kəlùʼu.

⁵⁶Mò ù ndùw ko ghɛ an nyàaŋ mə̀ n nàʼàʼ ŋkāa an naʼà tə̀ ne to, ŋkāa alo təŋgwə̀là, ghî ghə̀ m bòʼn nàŋa wò ghì à dzaāŋ gho am fwànlò u tə̀dzǐi. Ghe m buʼu kə̀ghu â wə̄n enyəa to ghe mô mɔ̀ɔ tsùghuu kô dzughu e təndzʉ̄ e wə̄n. Ghee a dzə̀m ghəla ghe mò mɔ̂m tsughu, ghe mo è tughu.