Read Aghem Mâk 7 Bible Online

Mâk 7 - Aghem bible

Mâk 7

¹Tsuʼ ù li wo, ghî a Falàsîi ghə̀ n zùuŋ wò a vʉ̀a Yɛso ghèe ghê dèekə̀làŋ à li gho, ghe nughù sə wo an Yɛ̀lusalɛ̀m.

²Ghe ŋ kòʼ tsùghù enyəa tsə̀təndə̄ghā tə Yɛso tə̀ li tə zəa â ghu à dzəa gho, tɔŋlo enyəa ghe ka mo sûw dzə̀ ghu a ghee gho aŋ ghəa ghəla bughōo kə enaʼ kə deē.

³(Nu ghî a Falàsîi ghèe ghê Dzûu tò tə dzə̀m zəa tsə̀ghà yò mo ghe kâ ghu a tɔ̂ʼ sùw an dziī zən, mo ghe êzə ghəŋlo, alenaŋâ làŋ kə enaʼ kəla ghî à wii a fə̀ naāŋ tsəgha.

⁴Ghe zəa sùghò yò fəgha ko abugho ghe nughù wo â ghè kò am bekewə̄n, à gɔ̀ʼɔ̀ ko mo ghe m fəgha kə te kə sûw aŋ ghəa ghəla lâŋ kə enaʼ kə deē; ghe tsoo naaŋ sùghò ndə̀m è ùlwàŋ ù li wo tǒ wùa tə̀ suūw to, ntôo, àsùghò kwaŋ wōs.)

⁵Ghî a Falàsîi yì ghèe ghê dèekə̀làŋ yi fi bvʉ nû â Yɛso enyəa, “À lò kə kwò tsə̀təndə̄ghā təghà tə̀ naāŋ yô lâŋ kə ghê bə̀ghàbəgha ko a, ghe sô zəā â ghu à dzəa gho a?”

⁶ Yɛso n dzɛ̀ â ghee enyəa, “Èzayà mafə̄ kûum tɔm naŋa mɛ̀ʼɛ̀ ghəa ghɛʼɛ gho, ghê kə̀bàŋàdzə̀m am Mwàʼsò kə Kəzə̀ enyəa, ‘Ghî ghən mugho kɔʼso ko an dzughu a ghee, fə̂ŋ tə ghee tə kuuwn lɔʼso lò nû;

⁷ghe mugho kɔʼso màʼn kə̀nughùghù, zoʼnlo àghì aŋ ghəa a mbī gho enyəa à lò ghəa a Kəzə̀.’

⁸Ghɛ̀ zəghàa màʼà tsùghù lwâŋ u Kəzə̀, kwù nyə̀ ndùw ghəa ghə enaʼ gho aleghəŋlo.”

⁹Ù n nùghù dzɛ̀ tsùghù â ghee enyəa, “Ghɛ̀ tɔ̂ʼ kì tsughu dzì è dzùŋ ènyə aletuū maʼà tsughu lâŋ kə Kəzə̀ enyəa ghɛ̀ kuuwn naŋa lâŋ kə enaʼ kɛʼɛ̄ ko!

¹⁰ Musî fə̀ dzɛ tsughu fɛ enyəa, ‘E kɔʼso tsughuu tsùghò ghèe zùghùʼ; àsùghò enyəa, ghùw wəla ù tso tsɔ̂ɔm tsughu tsele ŋkāa zə̂, ù kì alekpūw.’

¹¹Ghɛ̌ yia kuuwn zoʼn ghî ghò enyəa abugho ghùw mò kpaʼ ki fəgha kə̀ li ko kə mô lo aleyòsò zə̀ ŋkāa tsele, vʉ̀a ù dzɛ̀ tsughu enyəa fəgha kə te kə lo Kobàn (mo e moʼò enyəa à fəgha kə te kə ki Kəzə̀)

¹²à fì lo enyəa ù n daʼa kə kele enyəa e yo alefughu e yôsò â zə̀ ŋkāa tsele.

¹³Abugho ghɛ̀ ghəŋlo enyə, ghɛ̀ ŋ ghəŋlo shwaʼ u Kəzə̀ wə m fwəən yo fəgha ko, ghɛ̀ sô fughuu ndûŋ wô ko lâŋ kə enaʼ ko. Ghɛ̀ bɔɔm ghəəŋ sùghò ndə̀mà tə aghəa tò ghən.”

¹⁴Yɛso ŋ kòom tɔ̀ŋɔ wò saʼ kə aghì chì ko ebàm, dzɛ̀ â ghee enyəa, “Ghɛ̀ a dzə̀m naŋa wo nlò tuūŋ wɛʼɛ wo fɛ â mùghò, ghɛ̀ zuw tsughu fəgha kə̀là Ǹ so Ǹ dzâa wô;

¹⁵Fəgha kə̀ li kə yo ghùw zəa nyəā nduw kə dzəsō wə̄n, à ghùw lǎam dzəsô fəgha kəla kə səā wô an dzughu e wə̄n.”

¹⁶[Ghùw wəla ù ki tuw ko, ù zuw.]

¹⁷Ghəa ù zə̀ghàa tsughu saʼ kə aghì chì, nyə̀ ndùw an ndughu, tsə̀təndə̄ghā tə n dzɛ̀ enyəa ù teso dzâa wô fəgha kəla kwə̀ən kə ushwāʼ kən mòʼnlo.

¹⁸Ù n dzɛ̀ â ghee enyəa, “À fi lo enyəa ghɛ̀ kâa zuwkɛlɛ sùghò à? Ghɛ̀ koʼò sùghò yò enyəa fəgha kəla kə nughù tsughu fɛ a beē, nyə̀ ndùw a zəŋò ghùw, kə yo dzə̂ aledzəso wə̄n,

¹⁹bòʼ kə nyəa tsughuu ndùw dzə̀ yò am fə̂ŋ, kə ndûuw an nʉ̀ghà, ù m bvʉ̀ màʼà è nduw a?” (Ù mǒ fi dzɛ mgbaaŋ wo enyəa fə̀ghàa n zə̌a mən n dzə̀m zɔ̀lɔ nù.)

²⁰Ù n dzɛ̀ kpèʼe tsughu enyəa, “À ghùw dzə̀sô fəgha kəla kə səā wô a zəŋò wə̄n.

²¹Tɔŋlo enyəa à lò a tèetè, am fə̂ŋ è ghùw, moʼnlò è biigh e səa kɔʼɔ̄ wo; aghəa tǒ alesəa nuuŋ kaŋlo, aletsɔ̄ŋ, alewī ghùw,

²²alesəā ndzāŋ (sə à səa gho), alekī fə̀ŋ è bǐigh, aletsè ghùw, aleghə̂əŋ ghəa à kwu gho, alemʉʉn ghùw, alemàʼà tə̀nùʼ, alekɔʼsō ùghue, alelàʼsò.

²³Ghəa à biigh ghən a dzə̀m sə̌a wò a tèetē, yia a dzəsō ghùw.”

²⁴Yɛso n zə̀ghàa tsùghu fughu nùghù ndùw am mbùʼ è Tayà ghèe Sidɔ̀n. Ù n ndùw nyə̀ doʼò ndùw an ndùghù è lǐ fughu, kuuwn ləghaa yo enyəa ghùw kele enyəa e lo a fughu, ǎ ŋ kuuwn būw ko dzì â wən alenàn ùghue.

²⁵Wìzən ù lǐ ŋ ki wɛ̀ ù wən ù zən à zʉ̀ ù biigh wo a zəŋo ughùe, ù n daŋso zuw tsughu zwɔ̂ŋ u Yɛso, bùghò tə̀m wò tə̀ŋguʼ a tsəlà wə̄n.

²⁶Nughò vʉ fə̀ lo Etoʼò â Dzûu tò, ghe fə̀ dzə am mbùʼ è Fònishìa an nāʼ e Silìa. Ù m buʼ nduw kə̀ghu â wə̄n enyəa ù dzùu səā wô zʉ̀ u te wo a zəŋò wɛ̀ ù wən.

²⁷Yɛso n dzɛ̀ â wə̄n enyəa, “A buʼù niī tsughuu dzə̂ wɛghêtùghu, e dzɔ̂ɔ yò alenìi nyâan maʼà fʉ̀ghàzəa u wɛghêtùghu â bvʉ to.”

²⁸Nughò vʉ ŋ kuuwn bɛ̀lɛ̀ ndùw Yɛso wən enyəa, “Òo mughùbè, bvʉ təla tə bûʼ lô ko a tsəla teblè, tə ŋgəəŋ kuum zəa nù sugho to am fʉ̀ghàzə u wɛghêtùghu.”

²⁹Yɛso n daŋso dzɛ̀ â wən enyəa, “Ghù lò nû alenùghù zə̀ghà zò, ghəa ghù dzɛ̀ dzə êzə̀, zʉ̀ u te wə ŋ wɛ wʉ̂a zə̀ghàa.”

³⁰Ù fi kwən nyə̀ ndùw nù, ndùw kòʼ ndùw wɛ̌ vʉ̀ mò vʉ̀a ù nyə̀ŋ a kə̀chʉ̀a, mo zə̀a fə te fə ŋ wə̄n zəghàa màʼà.

³¹Yɛso n daŋso kòom nùghù sə̀ wò èbàm am mbùʼ è Tayà, tsə̀ghà nyə̀ ndùw dzì è Sidɔ̀n am bà kə Nyʉ̀ e Galèlîi, am mbùʼ è tə̀ Dèkapōlès.

³²Ghe n nì wò kə̀kùʼ a vʉ̀a wə̄n, mo shwaʼ u zɔlɔ sùghò yǒ wə̄n lo edzughu; ghe m buʼ tsughu kəghu â wə̄n enyəa ù gaʼā tsughu kəghu zəŋò ghùw vʉ̀, ù baāŋ kɔʼ wə̄n.

³³Yɛso n nì nùghù sə̀ wò ghùw vʉ̀ an sāʼ kə aghì chì, nya bəŋso tēe ndùw ghèe wə̄n, dzə̀n nyə nduw waaghū an tùŋlo u wə̄n, fàm è tsughu, mɔ̀m tsùghù nom kə wə̄n.

³⁴Ù n lɛɛn kɔ̀ʼ ndùw kəwala dèmè tsùghù kədèmè, dzɛ̀ â ghùw vʉ enyəa, “Ɛ̀fatà.” E moʼò enyəa, “Tsʉ kɔ̀ʼɔ̀.”

³⁵Tuŋlo u wə̄n wə n daŋso tsʉ̀ è kɔʼ, nom kə n tsə̀ghà è nduw, shwaʼ u wə̄n wə n daŋso zɔ̀n sə̀ è wo.

³⁶Yɛso n daŋso kʉ̀ɛɛn tsùghu ghee enyəa e kwo ghe lô dzâa â ghùw; ghəa ù kuuwn kôom kʉ̂ɛɛn tsughu, ghe ŋ kuūwn kòom zùghòo tsùghù ghəa a te gho enyə̄.

³⁷Tuw kə m kpùw ndùw ghee enyə, tsə̀ghà kə̀bəŋ, ghe mo enyəa, “Ù fwàʼ ghəa a te gho a dzə̀m kədzûŋ; bùʼ ghə̌əŋ daŋso sùghò enyəa kùʼ ù è zuuw wo tuūŋ wo, mùʼ ù è kəaa wo ghəa gho.”