Read Aghem Mâk 8 Bible Online

Mâk 8 - Aghem bible

Mâk 8

¹A m bùghò an tsùʼu n te mò ko, ghî à kôom bughò tsuŋ tsughu sugho, ki sugho yo fəgha kə̀ zəa ko, Yɛso n tɔŋɔ tsughu tsə̀təndə̄ghā tə wə̄n, dzɛ̀ â ghee enyəa,

²“Se e kwuu mùghò a zəŋò nɔ̀e kə aghì kən aŋ ghəa ghe doʼō ghàʼ à ghee alo n tsuʼu n təgha mo ghe ki yo fəgha kə̀ zəa ko.

³Abugho Ǹ zəghàa ndûw enyəa ghe kwəlānyə tədzəŋ, ghe sô vǔuŋ nù an dziī, mo ghee à li a lɔʼso bwìi wò sùghò də̀ghàa kə dziī.”

⁴Tsə̀təndə̄ghā tə wə̄n tə m bɛ̀lɛ̀ tsùghù enyəa, “Ghùw lò alezɔ̀ʼ ghì alo kəbɛ̄ fɛ aŋ ŋgwən mò ù kaʼ tsughu ênzə̂n?”

⁵Ù m bvʉ â ghee enyəa, “Ghɛ̀ ki sə a ugbɛ a shwǒʼ fì à?” Ghe m bɛ̀lɛ̀ wò enyəa, “Sə̀ghàmbəgha.”

⁶Ù n daŋso dzɛ̀ enyəa ghî yi tsughuu doʼò tsughu a ghūu; daŋso nì kɔ̀ʼ sə a ugbɛ yì sə̀ghàmbəgha, a m bùghò ù fughu tsughu zɔ̀ɔŋ kò â Zə̀ kò, ù m boʼn fughu tsughu â tsə̀təndə̄ghā tə wə̄n to enyəa ghe dzughù ndûw â ghì yì; ghe n nì dzùghù fughu tsughu gbɛ u te wo â saʼ kə aghì chì.

⁷Ghe ŋ ki sugho sə̀ lò n tə̀tsəghaa n sòʼ ènyə; a m bùghò ù fughu tsughu sugho zɔ̀ɔŋ â Zə̀ kò, ù n dzɛ̀ enyəa ghe nîi dzughù ndûw sughò.

⁸Ghe n zə enyə, zə̀ kùw è tsughu; ghe ŋ kòom kǔum kaaŋ wò (bòʼò məlà n səa tsughu) à sugho to, wə n lue kɔʼ ù kʉ̌a sə̀ghàmbəgha.

⁹À fə̀ lo êzə̂ mo ghî a lo nû tò kam tì aghì tə chìakò.

¹⁰Ù n daŋso zə̀ghàa ndùw ghee. Dzə̂ tə̀n tə̀ bə̀ghà mò ghèe ghê tsə̀təndə̄ghā tə wə̄n tə n nǐ kwə̀n kò, nùghù ndùw am mbùʼ e Dàlmanutà.

¹¹ Ghî a Falàsîi à li ghə n ndùw è bugho, bùghò kàʼ wò dzughu à pfʉa gho ghèe ghê Yɛso, ghe m bvʉa tsə̌a è lì enyəa ù dèe wô enyəa à wə̄n â daʼa kə fughu Kəzə̀, mo ghe êzə bvʉa ghe bəlā an tɔ u wə̄n.

¹²Ù n sɔ̀m mìasò ndùw enyəa am fə̂ŋ è wə̄n, dzɛ̀ tsùghù enyəa, “À lǒ kwò mweē e nɛ zən ləghaa alekòʼ tsə̌a è ùshʉ̀ghà lo a? Ǹ so Ŋ̀ kûu dzâa wô a ghɛ̀ enyəa mweē e nɛ zən yo to ghee e kôʼ tsə̌a è lì.”

¹³Ù n zə̀ghàa tsùghu ghee kòom nì kɔ̀ʼ kəkwə̀n, nùghù dàŋ ndùw a ŋgùŋ è lì èzə̂.

¹⁴À n lo ezə̀ mò tsə̀təndə̄ghā tə Yɛso tə̀ mâa zə̀ alemuʼū nîi kɔʼ kəbɛ; ghe ŋ ki ko sə e kəbɛ̄ e mɔ̀ʼ alo kəkwə̀n.

¹⁵ Aŋ ghəa ghe daŋà nduw, ù n nùghù kʉ̀ɛɛn ndùw ghee enyəa, “Nì nlò nəgha zo am mbvùŋ è ghì a Falàsîi àsùghò am mbvùŋ è Hɛlɔ̀d.”

¹⁶Ghe n nyūuŋ kə̀a tsùghù aŋ ghùe e ghee enyəa, “Ù ghəa ghən fɛ kə̀a bòʼ a sô bɛ ko.”

¹⁷A m bùghò Yɛso kele tsughu ghəa yia ghe mô kəaa, ù n dzɛ̀ â ghee enyəa, “À lǒ kwò ghɛ̀ sô dzɛ̂ enyəa ghɛ̀ ki yo bɛ kōʼ a? Ghɛ̀ kaam kòʼò tɔ̌ɔ to yo ghəa gho, zuuwkɛ̄lɛ̄ sùghò yò à? Ghɛ̀ saa â fə̀ŋ tò à?

¹⁸Ghɛ̀ ki ko asə, kòʼò yò a te a? Ghɛ̀ ki utuŋlō zuuw yo a te a? Ghɛ̀ tsoo tàa mòʼn wò sùghò yò ghəa gho a?

¹⁹Ghɛ̀ moʼn n yò ghəa ghə̀là mùgho mò boʼn fughu tsughu sə a ugbɛ gho utwɛ̀ â kam tə aghì tò tə tɛ̀ à? Ghɛ̀ mò sugho tə kuum lueso kɔʼ ushwaʼnlō u shòʼ?” Ghe mo â enyəa, “Eghə̄m à ghèwò u bʉ̀ghà.

²⁰A m bugho M̀ boʼn fughu tsughu sughò sə a ugbɛ ghən sə̀ghàmbəgha â ghɛ̀ enyəa ghɛ̀ dzughu fughu nduw â kam tə aghì tə̀ ti tə chìakò, ghɛ̀ mò sugho təla tə səā tsughu kuum lueso kɔʼ alo ushwaʼnlō u shòʼ?” Ghe mo â wən enyəa, “Sə̀ghàmbəgha.”

²¹Ù n daŋso bvʉ tsughu â ghee enyəa, “Ghɛ̌ yia kaām zuuwkɛlɛ yo a?”

²²Yɛso m bùghò am Bɛ̀dsǎedà ghèe ghê tsə̀təndə̄ghā tə wə̄n to. Ghî à li ghə n nì wò ghùwfǒo ù lì a vʉ̀a Yɛso, bùghò bùʼ kəghu â wə̄n enyəa ù mɔ̀ɔ tsughuu ghùwfǒo vʉ aŋ ghu tò ù tughū kɔʼ.

²³Yɛso ŋ kwu tsughu ghùwfǒo vʉ aŋ kwē, tɛ̀ɛ nùghù sə̀ ndùw wə̄n alo enaʼ, a m bùghò ù ndùw fam tsughu sə a wə̄n gho, mɔ̀m tsùghu wə̄n, bvʉ tsughu â wə̄n enyəa, “Ghù kpàʼa kòʼò nù fəgha kə̀ li ko a?”

²⁴Ghùw vʉ n nùghùsò kɔ̀ʼ kətuw, dzɛ̀ enyəa, “Ŋ̀ koʼò nù ghî ghò, mo ghe kuuwn lǒ ko tò ŋkâʼ m bwìi wo.”

²⁵Yɛso n daŋso gaʼ kpeʼe ndùw ghu a wə̄n an sə a tûwbʉ̀ghà vʉ̀; tûw vʉ n tɔ̀ʼ zìso kɔʼ asə, sə ghə ŋ kòom tsʉ̀ è kɔʼ, ù ŋ kòʼ tɔ̀ ndùw tə̀luʼū.

²⁶Yɛso n zə̀ghàa ndùw wə̄n enyəa ù ndùw alô wə̄n an ndughu, dzɛ̀ â wə̄n enyəa, “Kà tso bùʼ nyə̀ enaʼ.”

²⁷Yɛso n tsəghàa dzì ghèe ghê tsə̀təndə̄ghā tə wə̄n to ghe nduūw an nàʼà fə Sìsɛlìa Felèpǎe, ù m bvʉ â tsə̀təndə̄ghā tə wə̄n to an dziī enyəa, “Ghî à dzɛ̂ enyəa Ǹ lo ndughoo?”

²⁸ Ghe n dzɛ̀ enyəa, “Ghî à li a dzɛ̂ enyəa ghù lǒ Dzɔ̌n Fùghùu mùghù ŋ Kə̀zə̀; à li yia dzɛ̂ enyəa ghù lǒ Èlaedzà, à li yia dzɛ̂ enyəa ghù lǒ ghùw aŋ ghǐishʉ̀ghà.”

²⁹Ù m bvʉ â ghee enyəa, “Ghɛ̀ kuuwn kwo enyəa Ǹ lo ndughoo a?” Pìtà m bɛ̀lɛ̀ ndùw wə̄n enyəa, “Ghù lǒ Kə̀lestò.”

³⁰Ù n tɔ̀ʼ kʉ̀ɛɛn tsùghu ghee enyəa e kwo ghe lô kə̂a ghəa a ghee gho â ghùw.

³¹Yɛso n daŋso kàʼ ndùw tsə̀təndə̄ghā tə wən alezōʼnlō enyəa Wɛ ù Ghùw kì aleŋgeē zuw ŋgōʼ, tsoʼ tə lo tuū maʼà wə̄n ghèe ghê tuw u təfɔ̀e ghò, à ghê dèekə̀làŋ. Ghe lo wiī tsughu wə̄n, tsuʼu n tsəghàa tsughu n təgha, ù kòom kɔʼɔsəā kɔʼ alo evʉ̄.

³²Ù fə̀ ghəa ghə̀n à dzə̀m tso kəaa an ndɛ. Pità n daŋso nì kɔ̌ʼ wə̄n ghèe wə̄n m bəŋso tee è nduw, ù n zùghù tsùghu wə̄n enyə.

³³Ù m fə̀n lɛ̌ɛn ndùw tsə̀təndə̄ghā tə wə̄n, zùghù sùghò Pità, dzɛ̀ â wə̄n enyəa, “Nùghu a bǎà mùghò, Satàn wə̄n! Ghù kà tuw kə gaʼ aŋ ghəa e Kəzə̀, ghù tɔ wʉ̂a ù bɔɔm naŋa ndùw ko aŋ ghəa ghəla ghì à moʼn ghəa gho a te.”

³⁴ Yɛso n tɔŋɔ tsughu saʼ kə aghì chi à tsə̀təndə̄ghā tə wən to dzɛ̀ â ghee enyəa, “Abugho ghùw ləghaa ale dòʼò tsə̀ndə̄ghā zaŋā, ù nìi tsughu enyəa e yo dzə̂ fəgha ko, ù boō tsughu alefala a bòʼ mùghò.

³⁵ Tɔŋlo enyəa ghî ghəla ghe tsâʼ tsughu ko tuw kə ghee ko, ghe lo gùuŋ nù, ghəla ghe guŋù tsughu tuw kə ghee ko aŋ ghəa zaŋā àsùghò aŋ ghəa e tùm è dzùŋ zən, ghe lo kuūwn zə kətuw.

³⁶Ghùw zə̌a kə̀ kwò abugho ù kele mɛʼɛ̀ fʉgha u mbī wo ù dzə̀m kè kuūwn zə kətuw à?

³⁷Ghùw lò alefughu kə kwò alezuūsə tuw kə wə̀n à?

³⁸Ghî ghəla ghe də̂nsò tuw ko aŋ ghəa zaŋa àsùghò aŋ tsʉ̀ zaŋā am mwěe e nɛ zəla e tsəŋo yò Zə̀ kò, ghəəŋ tsughuu sùghò ghəa à biigh gho enyə, Wɛ̀ ù Ghùw kè bɔ̌ɔm də̀nsò sùghò kə̀tuw êzə̀ a zəŋò ghee abugho ù kè bugho ebàm am Nsəghanyəgha n Tsele ghèe ghê tum tə Kə̀zə̀ tə̀ zɔlɔ to.”