Read Aghem Mâk 9 Bible Online

Mâk 9 - Aghem bible

Mâk 9

¹Yɛso ŋ kə̀a ndùuŋ ndùw â ghee enyəa, “Ǹ dzâa wô â ghɛ̀ enyəa ghî à lo nû fɛ êzə̄ŋ mo vʉ e kê ghee â mbàŋ sɔ̂ŋ fùghù yo mo ghe kâ kòʼ tsùghù dzə̀ ghəa Fɔ̂e ù Kəzə̀ ù bughōo a te à daʼa ko.”

² Tsuʼ mə̀ n tsə̀ghà tsùghu tǔu, Yɛso n nì kɔ̀ʼ Pità, nì kɔ̀ʼ Dzɛ̂ms àsùghò Dzɔ̌n, kɔʼ saŋe dòʼò ndùw ghèe ghee an də̀ghàa kə ukwàʼ kə̀ li ko, ghee ko. Ù n nùghù kǔuwn kɔʼ ekôʼ fughu an sə kə ghee,

³ndzʉ tə wə̄n tə n nùghù fə̀m dòʼò tsùghù ènyə, nyəghaan ndùw an tùʼ è nyəghaan zo, mò ghùw tsò yò fɛ am mbī ù lò alesùw tə̀ndzʉ tə e lɔʼso zɔlɔ êzə̀.

⁴Elaedzà n nùghù gbə̀n sə kɔʼ fughu an sə kə ghee ghèe Musî, ghe ŋ kə̂aa àghəa ghèe ghêe Yɛso.

⁵Pità fi nughù dzɛ̀ nù â Yɛso enyəa, “Wàdè, e dzɔ̂ɔ nù aŋ ghəa ghàʼ nyɔ̂ʼ lò fɛ; to ghàʼ mô tsuŋū kɔʼ m pfʉ̌a n təgha, fə mɔ̀ʼ â ghù, fə mɔ̀ʼ â Musî, àsùghò fə mɔ̀ʼ â Èlaedzà.”

⁶Ù fə̀ ghəa ghən dzɛ tsughu, ù màʼa fə̀ biso kwo yo ghəa zəla ù lò alekə̀a, tɔŋlo enyəa ghe mǒ fughu lo ko alo etsə̄ŋ.

⁷ Mbàʼ è lǐ n daŋso nùghù bvʉ̀ ŋgwùu tsùghu ghee, dzə̀ è ghùw ù lì n sə̀ wò fughu am mbàʼ enyəa, “Wən lǒ wɛ waŋā ù tsùʼu; e zuuw nduw nlò â wə̄n!”

⁸Ghe n nùghù tsàaŋ lɛ̌ɛn kaaŋ wò tə̀luʼū, ghùw ù lì ŋ kôom yǒ ghèe ghee, ǎ ŋ kôom lò ko ghèe ghêe Yɛso.

⁹Ghəa ghe tsughuu wo ebàm an ukwàʼ, Yɛso m fughu tsughu ghee â làŋ kò enyəa ghe lô dzâa fəgha kəla ghe koʼ â ghùw, à gɔ̀ʼɔ̀ ko abugho Wɛ ù Ghùw kè kɔʼsə kɔʼ alo evʉ̄.

¹⁰Ghe n nàn nàŋa tsughu kô ghəa a te gho aŋ ghùe e ghee, kuuwn kəŋo ko kə̀tuw a te enyəa alekɔʼɔ̄sə̄ alo evʉ̄ sô yia moʼnlò èndūghō.

¹¹ Ghe fi nughù bvʉ̀ ndùw nù â wə̄n enyəa, “À kǔuwn lǒ kwò ghê dèekə̀làŋ sò kə̂a enyəa Èlaedzà kì àlebùghò dzə̂ â sə ko a?”

¹²Ù m bɛ̀lɛ̀ tsùghù enyəa, “Elaedzà kùm bùghòo ko nǔ esə̄ alebùghò kôom bəghāa tiso wô àghəa à dzə̀m. Ghe laʼa kuuwn tɔm êndùghò kùu ndùw Wɛ̀ ù Ghùw, ghəa ù lo zuūw tsughuu ŋgōʼ, ghe ghəə̄ŋ tsughu ù dòʼò tsughu chɔʼchɔʼ u ghueetsə̄ wo a?

¹³Ǹ so ŋ kuūwn dzâa wô a ghɛ̀ enyəa Elaedzà maā bughò ghe n tsôo ghə̌əŋ ndùw ko a zəŋò wə̄n aŋ ghəa ghe tsə̂m tsughu, ghəa mwàʼsò kə̀ deē kùu ndùw wən.”

¹⁴Ghe m bùghò kòʼ wò tsə̀təndə̄ghā tə̀ li tì mo saʼ kə ghì kə̀ ŋ ghee dzə̂əŋ ŋgə̀a kɔ̀ʼ, mò ghèe ghê dèekə̀làŋ yia baāŋ fom to.

¹⁵Ghəa saʼ kə aghì chì kə̀ dzə̀m daŋso nughù kôʼ ndûw Yɛso ènyə, dzughu zə n zum ghee, ghe n nùghù tə̀ŋò nyəŋ kəŋo ndùw alendùw tɔɔ̄ŋ zuw wə̄n.

¹⁶Ù m bvʉ â ghee enyəa, “Ghɛ̀ bâaŋ fom tə kwò tò fɛ a?”

¹⁷Ghùw ù lì m bɛ̀lɛ̀ sə kɔʼ wə̄n fughu an saʼ kə aghì chi ko enyəa, “Wàdè, M̀ mô nì wò wɛ̀ waŋā ù nùu a vʉ̀a ghù mò ù ki zʉ̀ ù biigh ù li wo, u ghəŋlo vʉ̀a ù kə̀a yô ghəa gho;

¹⁸abugho u nî kɔʼ wə̄n, wə n tə̄m tughu wə̄n a ghuu; tsə̀f zə̀ n səa wò wə̄n alo edzughu, ù n tsôo pfʉ̌a ko àsɔŋ; ù n tàn dòʼò è kɔʼ, yìa Ǹ dzɛ̂ enyəa tsə̀təndə̄ghā təghà tə̀ shʉ̂aa səā tsughu, ghe yia ghâ ke.”

¹⁹Ù m bɛ̀lɛ̀ tsùghu ghee enyəa, “Ghɛ̀, ghê làʼà tə̀ fə̀ŋ a nɛ ghən aŋ ghəa e Kəzə̀, Ŋ̀ kôom bùʼ kì ko ntsuʼ n sǒʼ sɛ̌ a? Bùghò â wən fɛ.”

²⁰Ghe n daŋso nì fùghù ndùw wɛ̀ ù te â Yɛso. A m bùghò zʉ̀ u te u kôʼ kɔʼ Yɛso, wə n nùghù kwù kɔ̀n tsùghu wɛ vʉ̀, ù m bvʉ̀ bə̌əŋ kɔʼ enyə a ghūeetsə̄, tsə̀f zə̀ n səa wò wən alo edzughu.

²¹Yɛso m bvʉ â tsele enyəa, “Ghəa a te a mò a zəŋo wən kaʼ zən?” Ù n dzɛ̀ enyəa, “Ghəa a te a mò kaʼ mò nǎam too nù.

²²Kə bugho kə m bòʼò màʼà nyə̀ ndùw wən alo etsə̄ àsùghò alo mmùghu an nə̀gha è li zo, aletsoō wi wə̄n; abugho ghù kpaʼ lo aleghə̂əŋ ghə̀a è li zo, ghù ŋ kwuso tsughu ese a zəŋò ghàʼ, yòsò kɔ̀ʼ ghaʼ.”

²³Yɛso m bvʉ â wə̄n enyəa, “À lǒ kwò ghù sə̀ bvʉ enyəa bugho M̀ kpaʼ lô a! To a ghə̂əŋ ghəa ghə̀n à dzə̀m â ghùw wəla ù boō fughu tsughu dzə̄.”

²⁴Tselè ù wɛ̂ɛtùghu vʉ n daŋso nùghù dì sə̀ wò enyəa, “Mùghò m boo fughu, yòso kɔʼ mugho abugho Ǹ taʼkè buʼù tɔʼɔ̀ boō mɛʼɛ̀ ko nù!”

²⁵A m bùghò Yɛso kòʼ tsughu enyəa ghî à nyəŋo zùuŋ wò nù, ù n zùghù tsùghu zʉ̀ ù biigh vʉ̀ enyəa, “Ghǔ zʉ̀ wəla ghù kùʼsò ghî ghò, ghəəŋ sùghò enyəa ghe doʼò ùmùʼ, Ǹ so Ǹ dzâa wô â ghù enyəa, zəghaa tsughu wə̄n, e kwo ghù ke kôom nyəa koʼò sughò a zəŋò wə̄n!”

²⁶Zʉ̀ u te wə ŋ kwù kɔ̀n tsùghu wɛ vʉ̀, ghəa ù dì sə wô ènyə, wə n lɔʼso zàʼ wə̄n enyə a ghūu, daŋso sə̀ nùghù è wo. Wɛ vʉ n nùghù dòʼò tsùghu tò ù kpùw nû, ghî à mo enyəa, “Ù m kpuw.”

²⁷Yɛso kūun kwu tsughu ko wə̄n aŋ kwē, nì nùghù kɔ̌ʼ wə̄n, ù n nùghù těe è kɔʼ.

²⁸A m bùghò Yɛso ndùw nyə nduw an ndughu, tsə̀təndə̄ghā tə wə̄n tə n (nyɛʼɛ) tsɔŋɔ bvʉa fughu â wən enyəa, “À kǔuwn lǒ kwò ghàʼ mô yô aledzùusə zə̀ kə te ko a?”

²⁹Ù n dzɛ̀ â ghee enyəa, “À mìaa ko è gɔ̀ŋlò alesəso ŋgòʼ zən.”

³⁰Ghê Yɛso n zə̀ghàa tsùghu fughu, tsə̀ghà nyə̀ ndùw dzì aŋ Galèlîi; ù n ləghaa yo enyəa ghùw kele;

³¹tɔŋlo enyəa ù mò zoʼn nduw tsə̀təndə̄ghā tə wə̄n enyəa, “Ghe lo fèen fùghuu nyəa tsughuu Wɛ̀ ù Ghùw aŋ ghu kə aghì, ghe lo nîi wiī tsughu, tsuʼ n tsəghàa tsughu n təgha aŋ ghəa ghe wi tsughu wən, ù kòom kɔʼɔ̄səā wô alo evʉ̄.”

³²Ghe m buʼù zǔuwkɛ̄lɛ̄ yo fəgha kə̀là ù kə̌a â ghè kò, tsəŋo ghaʼa sùghò alebvʉā zuw â wə̄n.

³³Ghê Yɛso n daŋso bùghò sə̀ wò aŋ Kàpɛnùm; a m bùghò ù lǒ an ndughu, ù m bvʉ tsughu â ghee enyəa, “Ghɛ̀ mô dzughu gho an dziī pfʉa wò aŋ kwò à?”

³⁴ Ghe n zuuw ko mɔŋ, tɔŋlo enyəa ghe mò sughu utuw aŋ ghùe e ghee an dziī enyəa à tsə̀ghàsə ndughoo wàazə̀ a.

³⁵ Ù n tsùghù gàʼ dòʼò è tsughu, tɔŋɔ tsughu ghee yì èghə̄m à ghè ghò a bə̀ghà, dzɛ̀ â ghee enyəa, “Ghùw wəla ù ləghaa aledòʼò kə̀sə, ù kì alefèe tsughu kəbam, ù è lo kɔ̂ɔ fò â ghì ghò a dzə̀m.”

³⁶Ù n daŋso nì kɔ̀ʼ wɛfêtùghu, naŋa nyə tsughu am bvʉa e ghee, tsùghù bòʼò è kɔʼ, dzɛ̀ â ghee enyəa,

³⁷ “Ghùw wəla ù kpenî wɛ fo tò fən bòʼ ghəa zāŋā, ù kpènì mùghò; mo e lo enyəa ghùw wəla ù kpenî mugho, u kà fi kpenì dzə̀ mugho, ù kpènì wən wəla ù fə̀ tum wô mugho.”

³⁸Dzɔ̌n n dzɛ̀ â Yɛso enyəa, “Wàdè, ghǎʼ mò koʼ ghùw ù lì dzùu səā zʉ̀ ù biigh wo an zən zəghà, ghǎʼ ŋ ke naŋa ndùw wən, tɔŋlo enyəa ù yò dzə̂ am fɔe kə sɛ̀.”

³⁹Yɛso m fwə̀n kə̀a tsùghù enyəa, “Kǎ nlǒ wə̄n ke; tɔŋlo enyəa ghùw yò dzə̂ aleghəə̄ŋ tsughu kɔ kə eghəa an zən zaŋā ù kòom ghaām nughù kə̂a boōn tsughu ghəa ghaŋa.

⁴⁰Nu ghùw wəla ù bwìi yo an tàaŋ tə efwē tə sɛ̀, ù fi taʼ sɛ̀.

⁴¹ M̀ fɛ kùu dzàa wò nù â ghɛ̀, ghùw wəla ù tso bûʼ tuūw fughu ko ghùw wɛʼɛ â wùa è mmùghu enyəa ghɛ̀ bǒo fughu tsughu â Kə̀lestò, ù lo tsò gùŋù yò namso ko.”

⁴²“Abugho ghùw wɛʼɛ u mɔ̀ʼ nɔm tsughu wɛfêtùghu fo fə mɔ̀ʼ aŋ wɛghêtùghu ghəla ghe boō fughu â mùghò enyəa fə ghəə̄ŋ tsughu ebo, ghùw ù te kpe to a e bòʼò kalà tia è gwuūn zo am mwè, a ndûw màʼà nyəā tsughu an dzùghùntsòʼ.

⁴³Abugho ghu kə̀a kə̀ tsoōm ghù enyəa ghù ghəəŋ bō zo, kə̌a màʼa fə̀; alenìi maʼà ghù am kpǎaghùw, aŋ wə̀n wəla u kê nyəə̄m koʼò yo, à kwe zo e bə̀ghà, dzɔ̀ lò enyəa ghù nyə am fɔ̀e ù Kəzə̀ à kə̀m kə kəkwe ko,

⁴⁴[4]

⁴⁵Abugho ghuw kə̀a kə̀ tsoōm kɔʼ ghû, ghù vʉ̀a ghù ghəə̄ŋ tsughu bo zo, kə̌a màʼâ; alenìi maʼà ghù am kpǎaghùw à ghuw gho a bə̀ghà, dzɔ̀ lò enyəa ghù nyə am fɔ̀e ù Kəzə̀ à kə̀m kə kəghùw kò,

⁴⁶[5]

⁴⁷Abugho sə zə̀ghà è nyəā kaŋlō am ufʉgha mo e lo aletsōm ghû ghù ghəəŋ bo zo, bùɛʼɛ màʼâ, nu alenìi maʼà ghù am kpǎaghùw à sə gho a bə̀ghà, dzɔ̀ lò enyəa ghù nyə am fɔ̀e ù Kəzə̀ à sə zo e mɔ̀ʼ,

⁴⁸ a fi a nyuuŋ təla tə muʼū ghee kpuūw tsəghà yo, mo wən wəla u pfʉā sugho ghee ghe kê nyə̀m kòʼ sùghò yò.

⁴⁹Tɔŋlo enyəa ghe lô ghì ghə̀n à dzə̀m kpɛ̂nlò aŋ wə̀n to ghe lô tsoʼsō nyòm alo ntsòʼ.

⁵⁰Tsòʼ n dzɔ̂ɔ nù; abugho tsòʼ ŋ kuūwn lɔ̂ʼ tsughu, ghù lò ênzə̂n alenìi wô kpə̀ŋ e te zo ebàm a? E kpəŋō tǒ ntsôʼ, ghù è səa dzɔɔ̄ ghɛ̀ à ghêe ghì ghò.”