Read Aghem Lûk 1 Bible Online

Lûk 1 - Aghem bible

Lûk 1

¹Ndə̀mà tə aghì tə̀ mafə̄ bɛso fwàʼ alekòʼ enyəa ghe tɔɔ̄ naŋā tsughuu wô ghəa ghəla a fə̀ tsəgha am bvʉa e sɛ̀.

²Ghe fə̀ tɔɔ fəgha kəla sɛ̀ fə̀ zuw aŋ ghùu ghì ghəla ghe fə̀ kôʼ aŋghəa ghəa a te a fə̀ kaʼ tsughu alenì kə̀bəla a te, ghe m bwîi dzàa wò.

³Zən lò eghēe, Waʼāwaʼ, Ŋ̀ kôʼ tsughu enyəa e mô dzɔ̀ɔ nù, aŋghəa Ǹ tɔ̂ʼ tɔ̂ʼn sə kɔʼ see kə te ko, enyəa Ǹ naŋso səā tsughu wô â ghù alo kəmwàʼsò,

⁴tò ghù kele tsughu enyəa fəgha kəla ghe fə̀ dzɛ̂ â ghù, kə mafə̄ kûum nì bəla ko.

⁵ A fə̀ bugho Hɛlɔ̀d lǒ də̀ŋ kò an Dzùdîa, fɔ̀e è lì n lo a fughu ghe fə̀ tɔŋlo enyəa à lǒ Sàkàlîa ù m fwaʼà dzə̌əŋ ghèe ghê fɔ̀e tə Àbidzà ghò. Zən e wi e fə̀ lo Èlesabì, ù fə̀ lo wɛ ù sə an tigh kə Ɛlɔ̀n wəla ù fə̀ lô sugho fɔ̀e.

⁶Ghe m mughu tsəgha an làŋ kə Kəzə̀, lò tsəghatsəgha an sə kə Kəzə̀.

⁷Ghe n lo mo ghe n dwə̀n ŋgòʼnlo, ki yo wɛ, Èlesabì màʼa fə̀ lo kɛ̀ kò.

⁸Tsuʼ u kəfwàʼ u Sàkàlîa wə n tsə̀ghà kpè è wo, ù m fwàʼ zěe fwàʼ kə wə̄n tǒ fɔ̀e a tsəlà Zə̀ kò.

⁹Ghe fə̌ wə̄n shîaa kɔʼ mo ghe təm tsughu ndzwàʼ, à màʼa fə̀ lô bughōo kə ghee ko êzə̀; zə n lo enyəa à lô nyeē e nɛ e nyəā kpâa wə̄n alo ekə̀ŋ.

¹⁰Ghəa ù kpɛ̀ɛn nyeē zo, kwele kə aghì kə̀ ŋ kuuwn lò a beē, ghe gɔ̂ŋlo.

¹¹Êzə̄ŋ, tsə̀ndə̄ghā è Kə̀zə̀ m gbə̀n sə kɔʼ an sə kə wə̄n, zə̀ n ti am bùghu e ti kə enyěe aŋ kwe u Sàkàlîa ù kwû wò.

¹²Fə̀ŋ n sə Sàkàlîa aŋghəa ù bàŋ kôʼ kɔʼ, ù ŋ kàʼ ndùw a lùʼû tsəəŋ wo.

¹³Tùm è te ŋ kuuwn dzɛ̀ â wə̄n enyəa, “Kà tsəŋ a Sàkàlîa, wi wʉ̂a lo dzəa wò ghù â wɛ ù nùu, ghù lo tsʉ tsughu zən zo enyəa à lǒ Dzɔ̌n.

¹⁴Ù kè ghəəŋ nù ghù è duʼnlo, tsoʼn sùghò. Ndə̀mà tə̀ aghì tə̀ kê dùʼn sùghò nù abugho ghe lo dzə tsughu wə̄n;

¹⁵ tɔŋlo enyəa ù kè lò tsəgha ghùw ù sə̀ŋò a tsəlà Zə̀ kò. Ù kè ki yo alemʉa koʼò tsəghà nlʉ̀ n li mò, n tughu mò ŋkaā m bùghuu mò. Zə̂ lô wə̄n dzəa sə̄a tsughuu təla wò ko â Zuʼ tə̀ Zɔlɔ to a zəŋò wə̄n.

¹⁶Ù lo fə̀nsò wò sùghò fə̀ŋ tə ndə̀ma tə wɛ ghə Ezə̀lɛ̂ a vʉ̀a Tsə̂ntə̀mbi, Zə̀ kə ghee.

¹⁷ Ù kè zìi tsùghuu fwàʼ kə Mughu ù te an dzə̀ tə daʼa kə Kəzə̀ kela Èlaedzà fə̀ ki. Ù lo fə̂nsò wô fə̀ŋ tə ghê tselèwɛ̀, ghe e ke lo alo kəfəgha kə mɔ̀ʼ ghèe ghê wɛ gho. Ù lo fə̂nsò wô sughò ghê tùghùukə̀tūw, ghe zumsō doʼò tsughu. Ù kè ghəa ghən fɛ ghəŋlo alebiaān naŋā zîi tsughu ghî ghəla ghe kê zuūwkɛlɛ̄ Mughu ù te.”

¹⁸Sàkàlîa mo â Tum zə enyəa, “Ǹ lo tò mùghò è kele ênzə̂n, ghàʼ à wi waŋā sô lo mo a n lɔʼso nōo dwə̀n tsùghù ènyə à?”

¹⁹ Tum zə m bɛ̀lɛ̀ tsughu enyəa, “Ǹ lo Gabèleyà, M̀ fɛ ti an tuw kə Kəzə̀. Zə̀ kə mugho tùm wò enyəa M̀ bughò kə̂aa wô àghəa â ghù, Ǹ naʼà wô sughò làbəlà è dzùŋ zən.

²⁰Kòʼô, ghəa ghù tàʼkè bôo shwaʼ waŋa, ghù fə̀là dòʼn kə̀mùʼ êzə̄ŋ, ghù è kəaa yo ghəa gho, à bǔw mo ghəa ghən kê bùghò sə̀ nû; nu à kè bɔ̌ɔm lò ko aŋghəa Ǹ dzɛ̂ sə wô fɛ abugho tsuʼ u te u kê kpe.”

²¹Ghî ghə̀ n ləəm kèe Sàkàlîa a beē, ghe m bvʉa enyəa, ù sə̀ yia alo etsūghū boʼò ghàâ kwò?

²²A m bùghò ù ndùw tsəghà sə wo, ù n yo alekə̀a àghəa â ghee, ghe n daŋso è kele enyəa ù m fɛ̀ɛn kə eghəa ko fughu alo etsūghū kôʼ. Ù m fôʼn ndùw ghee â ghəa gho an ghu tò kəkùʼ; ù màʼa fə̀ yô alekə̀a àghəa.

²³Ghəa nəgha e Sàkàlîa è kpe tsughu alekəla sə kəfwàʼ, ù n nùghùu ndùw an ndughu alô wə̄n.

²⁴Tsuʼu m mo e tsəghàa tsùghuu ko n sòʼ enyə, Èlesabì, tɔɔŋ wi ù wə̄n n daŋso bɔ̀ŋ è nduw. Ndzɔŋɔ tə m kpuw tsughu tə tɛ̀ mò ù mùghù ko an ndughu, tso səa ndùuw yò luʼu kə li ko, ù m mgbɛɛ mòʼn tsə̀ghà ko am fə̂ŋ enyəa,

²⁵“Wən lò mugho a, Zə̀ kə̀ nda bâŋ kôʼ wo a?”

²⁶A m bùghò Èlesabì lò nʉghà wò alo təndzɔŋɔ tǔu, Zə̀ kə̀ n tùm ndùw tsə̀ndə̄ghā e wə̄n zəla ghe tɔŋlo enyəa à lǒ Gabèleyà an nàʼà fə Nazalɛ̀t am mbùʼ è Galèlîi,

²⁷a vʉ̀a ŋgɔ̀e è lì mò ù kǎam kwo yo wìnûu, mo ghe fə̌ wə̄n tɔŋlo enyəa à lǒ Mèle. Tûuw fə Ŋgɔ̀e fi fə n lo êzə̀ mo ghe mafə wə̄n kpôom nàŋa â Dzùghùsî, mò ù fə̀ sə an tigh kə Dɛvìd.

²⁸Tum zə m bùghò dzɛ̀ â tûuw fə̀ ŋgɔ̀e fi fo enyəa, “Hô êwɛ̀, fə̀ tsuʼu fo! Dzɔ̀ kè lò â ghù an yìzən ghə̀n a dzə̀m, nu Zə̀ kə biso ti an tuw kə̂a!”

²⁹Shwaʼ wən wə ŋge fəmso Mèle, kwə̀ən kə̀ ŋ kɔʼ wə̄n enyəa, zən sə̀ yia lo ŋgòʼ è etɔŋlo è ghɛ zo enyə à.

³⁰Tsə̀ndə̄ghā è Kə̀zə̀ zə n dzɛ̀ â wə̄n enyəa, “Mèle, kà tsəŋ dzə̀, Zə̀ kə̀ ŋ ghù ləgha.

³¹ Kòʼô, ghù lo bɔŋɔ kɔʼɔ nù, ghù lo bugho dzə wo wɛ̂ɛnùu, ghù lo tsʉ tsughu zən e wə̄n zo enyəa à lò Yɛso.

³²Ù lo ghaʼa tsə̀ghà nù, ghî ghə e ke tɔɔŋ wə̄n enyəa ù lǒ Wɛ ù Zə̀ kə̀ ghaʼa kən kə̀ dzə̀m. Tsə̂ntə̀mbî Kə̀zə̀ lo tsuʼu naaŋ kɔʼɔ wə̄n alo kədə̀ŋ, tò aŋghəa tsele ù ghê tsele Dɛvìd fə̀ lo sugho də̀ŋ kò a te.

³³Ù e ke də̀ŋ ko â wɛ a awɛ a Yàkɔ̂b gho to mbī kê bughò mîaa; fɔe u kədə̀ŋ u wə̄n ù mìaa kòʼ tsəghà yo.”

³⁴Mèle m bvʉ â wə̄n enyəa, “Ghəa ghən lo alekuūwn sə ênzə̂n, Ǹ sô lo mò Ŋ̀ kwo yo wìnûu a?”

³⁵Tum zə n dzɛ̀ â wə̄n enyəa, “Zuʼ tə̀ Zɔlɔ tə lo nyəən tsughuu a zəŋò ghù, ghù lo e mughu an daʼa kə Kəzə̀, Tsə̂ntə̀mbî. Zən lò e ghee ghe lo tɔɔ̄ŋ tsəgha wɛ wəla ghù lo dzəā wô enyəa, à lǒ Wɛ ù ŋgòʼ; tɔɔŋ Wɛ ù Kə̀zə̀.

³⁶Kòʼo sùghô, tòm wʉ̀a Èlesabì ŋ wɛ̂ɛnùu bɔŋ an dwə̀la. Ù èzəŋ lo təndzɔ̄ŋɔ̄ tǔu, mo ghe mò so enyəa ù lò kəkɛ̀.

³⁷ Nu ghəa è li e yo Zə̀ kə yo alefwàʼ.”

³⁸Mèle n dzɛ̀ enyəa, “Òo, Ǹ sô lô kɔ̂ɔ fə Tsə̂ntə̀mbî fo a, Ǹ zuuw wò ko â ghù.” Tsə̀ndə̄ghā zə mô è nughu.

³⁹Mèle n zə̀ghàa tsùghù an tsùʼu n te mò, nyə̀ŋ kɔ̀ʼ ndùw aŋ kɔn ù li wo an naʼ e Dzùdîa u doʼò kɔʼ nduẁ aŋ ukwàʼ

⁴⁰Ù ŋ kɔ̀ʼ nyə̀ ndùw an ndughu alô Sàkàlîa, tɔɔŋ zuw tsughu Èlesabì.

⁴¹A m bùghò Èlesabì zuw ndûw tɔŋlo e Mèle zə̀, wɛ n nùghù sòʼn kɔ̀ʼ ughue an nʉ̀ghà ù wə̄n, Zuʼ tə̀ Zɔlɔ tə n nyəən tsughu Èlesabì a zəŋo ughùe.

⁴²Ù daŋso dzɛ̀ sə wò an dzə̂ è tughu zo enyəa, “An yìzən ghən a dzə̀m, Zə̀ kə̀ ŋ ghù bughuso to Kə lo bughuso sugho wɛ wəla ghù lo dzəā wo!

⁴³M̀ boʼò kǐ kwò tuw kə̀ dzûŋ kò enyə à, zə̂ Mughu ù te ndôʼ bughò bwîin kôʼ mughò à?

⁴⁴[Ŋ̀ kwo enyəa ghù lò zə̂ Mughùbè waŋa] bòʼ enyəa aŋghəa Ǹ daŋso zuw wô tɔɔŋ zəghà zò, wɛ wən an nʉ̀ghà waŋa vʉ̀a ù nùghù sôʼn kɔʼ alo eduʼnlō.

⁴⁵Dzɔ̀ lò â ghùw wəla ù fə̀ zuw shwaʼ u Mughù ù te wo, ù m boo tsughu enyəa e lo səa nù êzə̀.”

⁴⁶Mèle n dzɛ̀ enyəa, “M̀ fughuu ŋkɔʼso â Mughu ù te am fə̂ŋ zaŋa e dzə̀m.

⁴⁷Fə̀ŋ zaŋa zə̀ èduʼnlo bòʼ Kə̀zə̀, ti usûŋ waŋa,

⁴⁸Ù m mùghò, bvuʼù fə fəkɔ̀ɔ fə wə̄n fən, bàŋ kòʼ. Tɔŋlo enyəa alenùghù ndûw â sə ko, ghî ghən à dzə̀m an nə̀gha tən tə̀ dzə̀m lô mùghò nɛ e tɔɔŋ tsəgha enyəa à lò Duʼnzo,

⁴⁹kɔʼso n lo â Zə̀ kə̀ ghaʼa ko, nu Ù m mùghò â kɔ tə aghəa tə ghəŋlo; zən e Wə̄n e lo fəgha kə̀ zɔlɔ ko.

⁵⁰Se e wən è kwuso zo e lo a zəŋò ghì ghəla ghe tsəŋo wə̄n ndùw kùu ndùw a zəŋò waawɛ a wɛ a sɛ̀ ghən à dzə̀m ghe kê dzəā ndûŋlo.

⁵¹Ù n daʼa kə aŋ kwe u wə̄n dê, vʉ̀a ù dzùm sâaŋ ghî a ghaŋso ghə eghùe ghò am mòʼn zəla ghe ki am fə̀ŋ tə ghee.

⁵²Ù m bu tsɔʼ ghî à ne gho am fwàʼ u ghee, naŋa kɔʼ bvùʼù mə̄n am bùʼ u te wo.

⁵³Ù m fughu ghî à laa gho â ndə̀m è fʉgha ù dzûŋ wò, kuuwn dzùm nùghù ghì à kuu gho kwêekwe.

⁵⁴Vʉ̀a Ù yòsò kɔʼ sugho kɔ̂ɔ fə wə̄n fo, Ezə̀lɛ̂, kùu ndùw to kə wə̄n kəla ù fə̀ to naŋā

⁵⁵ tò aŋghəa Ù fə̀ kə̂a wô ghəa gho â ghê tselè a sɛ̀, â Abə̀làhâm, àsùghò waawɛ a wɛ a wə̄n gho to mbī kê bughò mîa.”

⁵⁶Mèle m bùʼ dzə̀ mùghùu kə̀ŋo ndùw dzə̀ tò tədzɔŋɔ tə təgha ghèe Èlesabì sěe ù sə̀ kôom ndûuw ebàm alô wə̄n.

⁵⁷Êzə̄ŋ, ghəa nəgha zə Èlesabì è dzəa e kpe tsughu, ù n dzə̀ wò wɛ̂ɛnùu.

⁵⁸Ghəa kɔn u zuw tsughu à tom a wə̄n gho enyəa Mughù ù mbī n se e ŋge kwuso a zəŋò Èlesabì, ghèe ghee n duʼn mìasò ndùw ènyə.

⁵⁹ Ghəa tsuʼu m kpe tsughu efāa, ghe ŋ ki alesugho tigh kə wɛ vʉ̀, ghe n so e bəlā tsʉ̂ zən e wɛ enyəa à lǒ Sàkàlîa, tɔ̂ɔŋ zən e tsēlē.

⁶⁰Zə̂ fi daŋso dzɛ̀ nù enyəa, “Ɛ̂ŋgaŋ, à yò êzə̀; a lô wə̄n tɔŋlo enyəa à lǒ Dzɔ̌n.”

⁶¹Ghe mo a wə̄n enyəa, “Tom wʉ̀a ù lì yo ù fə̀ ki zən zə̀.”

⁶²Ghe n daŋso fòʼn ndùw àghəa â tselè ù wɛ̀ an dzə̀ tə kəkùʼ alekele kɔʼ enyəa ghe lô wə̄n tɔŋlo ênzə̂n a.

⁶³Tsele m bvʉ̀ ndùw baaŋ kə̀ tɔɔ kə aghəa ko, ù n tɔm tsughu a te enyəa, “Zən e wə̄n e lo Dzɔ̌n.” Dzughu zə n zum ghee a dzə̀m.

⁶⁴Dzə̀ è Sàkàlîa n daŋso sə̀ è wo, nom kə n tsə̀ghà ndùw wə̄n, ù ŋ kə̀a sə̀ wò àghəa, fùghù ndùw kə̀zɔ̀ŋlò â Zə̀ kò.

⁶⁵Fə̂ŋ tə̀ n sə ghî a ukɔn a te gho a dzə̀m. Ghe n zɔ̀ŋ ndùuŋ ndùw ghəa a te alo kəzɔ̀ŋ an nàʼà fə Dzùdîa fi fughu aŋ ukwàʼ.

⁶⁶Ghî ghəla ghe fə̀ zuw ghəa yì, ghe ŋ ki ko am fə̂ŋ è ghee, bvʉa tsughuu ko enyəa, “Wən kè yia lo ŋgòʼ è Wɛ ù ghɛ̌ wò?” Bòʼ enyəa Mughù ù te fə̀ ki kəghu aŋ wɛ wən.

⁶⁷Zuʼ tə̀ Zɔlɔ tə n nyəən tsughu tselè Dzɔ̌n, tɔɔŋ Sàkàlîa; ù n tɛ̀tsə̀n ko mò ù sò kə̀aa enyəa,

⁶⁸“Ŋkɔʼso â Tsə̂ntə̀mbî, Zə̀ kə Ezə̀lɛ̂, bòʼ kə ŋ ghì a wə̄n a bughò bwìin kòʼ, chia kə tsəmsō ghee.

⁶⁹Chia kə nyə nduw an tigh kə Dɛvìd, kɔ̂ɔ fə wə̄n, nì fùghù sə̀ wò sɛ̀ â kàʼ fə ghûw fò a fughu enyəa ù bəghaasə sɛ̀.

⁷⁰Zə̀ kə fə̀ ghəa ghən ki to naŋa to â wîiwì â ghîishʉ̀gha a wə̄n à zɔlɔ gho;

⁷¹enyəa kə kê bə̀ghaasəa sɛ̀ aŋ ghùu ghì a kətuw a sɛ̀ ghò àsùghò ghì ghə̀là à dzə̀m ghe baā sɛ̀,

⁷²aledèe tsughu se è kwuso zəla kə fə̀ boō naŋā â ghê tselè tsele a sɛ̀ àsùghò alefòʼn kɔʼ kàa ŋ wə̄n m bǎa mò;

⁷³tɔ̂ɔŋ kàa ŋ wə̄n məla ù fə̀ zə naŋa ghèe ghê tselè ù tsele a sɛ̀, Abə̀làhâm.

⁷⁴Zə̀ kə fə̌ to kən kə to naŋa wo enyəa, abugho kə lo bəghasə̄ tsughu sɛ̀ aŋ ghùu ghì a kətuw a sɛ̀ ghò, sɛ̀ ke e fwaʼā â wə̄n mo a ki yo tsəŋ zo.

⁷⁵Sɛ̀ ke e lo tsəghatsəgha, zɔlɔ sùghò an sə kə wə̄n to mbī kê bughò mîa.

⁷⁶ [Sàkàlîa ŋ kwə̀n dzɛ̀ tsùghù â wɛ enyəa.] Ghǔ a, wɛ wən, ghe lô ghù tɔɔŋ tsə̀ghà enyəa, ghùwshʉ̀gha ù Zə̀ kə edzuŋ ko, Tsə̂ntə̀mbî; tɔŋlo enyəa ghù kè nùghùun ndùw â sə ko alendùw biaān naŋā tə̀luʼu â Mughu ù te.

⁷⁷Ghù kè ndùuw alendùw tsʉ̂a naŋâ ghì a wə̄n enyəa ghe kele tsughu enyəa ghe lo ko alezə̄ kətuw abugho Zə̀ kə̀ kê zə̂ bôo tə ghee to.

⁷⁸Zə̀ kə sɛ̀ kə̀ ki se è kwuso zo, Chia kə ŋgɔɔ̄m sɛ̀. Kə lo ghəəŋ nù tsuʼ u zuw a zəŋò sɛ̀ aŋghəa kə kê bəghaasəa sɛ̀ a te.

⁷⁹ Kə lo ghəəŋ sùghò nù tsə̀ kè tughu an tuw u ghì ghəla ghe lô alo kələ̄m, àsùghò an tuw u ghì ghəla ghe lô fʉgha wə evʉ wo, aledèe wô sɛ̀ â dzì è dzùŋ am mbī.”

⁸⁰A m bùgho wɛ ù te noō kpe tsughuu aŋ ghûw, kele tsughu fə̀ŋ, ù n nyə̀ mùghù dòʼò ndùw aŋ ŋgwən, dòʼò ko a fughu, ndùw kùm ndùw an tsuʼ fəla ù fə̀ kaʼ tsughu ghî ghə Ezə̀lɛ̂ ghò a alezoʼnlo a te.