Read Aghem Lûk 13 Bible Online

Lûk 13 - Aghem bible

Lûk 13

¹Ghî à li ghə n lo a fughu an nə̀gha e te zo, ghe n dzɛ̀ fughu tsughu â Yɛso ghəa Paelɛ̀t fə̀ wi ghî a Galèlîi ghò mo ghe fughuu Kə̀zə̀. Ù n nì kɔʼ kâŋ tə ghee nyɔ̀ɔm dzə̌əŋ kɔʼ aŋ kàŋ tə fʉgha vʉa ghe mò saā â Zə̀ kò.

²Yɛso m bɛ̀lɛ̀ tsughu ghee enyəa, “Ghɛ̀ sô yia moʼò enyəa ghî a Galèlîi ghən fə̀ fɛ kpuw ŋgòʼ è vʉ̀ è biigh zən bòʼ ghe fə ŋge lô ghî à biigh gho tsə̀ghàtàʼà ghî a Galèlîi à li ghən ŋkāa a?

³À yò êzə̀! Ǹ so Ǹ dzâa wô â ghɛ̀ enyəa, à bǔw mò ghɛ̀ kuuwn kɔʼ mwam zɛʼɛ è biigh zo, ghɛ̀ a dzə̀m lo bɔɔm ləŋe sùghò èzə̀.

⁴Kàa ghɛ̀ moʼò enyəa ghî ghə̀n èghəm à ghè ghò efāa bəgha kə ndughu kə fə̀ bɛlɛ̀ bvʉ̂ winlō an Silɔ̀m, à fə̀ fɛ ŋge lo ghî à biigh gho tsə̀ghàtàʼà ghì ghəla ghe mughu êzə̄ŋ an Yɛ̀lusalɛ̀m ŋkāa a?

⁵À yò êzə̀! Ǹ so Ǹ dzâa wô â ghɛ̀ enyəa, à bǔw mò ghɛ̀ kuuwn kɔʼ mwam zɛʼɛ è biigh zo, ghɛ̀ a dzə̀m lo bɔɔm ləŋe sùghò èzə̀.”

⁶Yɛso n daŋso kwə̀ən kə̀a tsùghù â ghee enyəa, “Ghùw ù lì fə̀ ki kâʼ fə kəgə̀m an sum u wə̄n. Ù mo e bughò lɛnlo enyəa kə m mʉ a, kè dɔ̂ɔm kôʼ kə̀tam a te.

⁷Mughùsum n dzɛ̀ â ghùw vʉ̀a ù lɛɛ̄n sum wo enyəa, ‘Ghù wɛ̀ɛ, à è zəŋ lo tənûu tə̀ təgha mò M̀ mgbɛɛ bùghò tsɔ̂ɔ kèe ko ghue fɛ alo fəkâʼ kòʼò yò tam ko a te. Fə luʼū tə fɛ pfʉso ŋgùʼn nàŋa aŋ kwò? Gbǒo màʼâ.’

⁸Ghùw vʉ̀a u lɛnlō â sum u te wo n dzɛ̀ enyəa, ‘Mughùbè, fughu kpeʼe tsughu nûm kò kə mɔ̀ʼ â ghè fò, tò Ǹ tsûun tsəghàa wô tsəla kə te ko, Ǹ dzəlà tsughu utwii a te.

⁹Abugho fə kpaʼ mʉ alo kənùm à fì lǒ dzɔ̀; buw êzə̀, ghù lo gbo maʼa nduw.’”

¹⁰A m bùghò ko Tsuʼntsə̄ u Tə̀dzûu ù li wo, Yɛso n zoʼnlo àghì an ndùghènē è lǐ fughu alo enaʼ.

¹¹Wìzən ù lì n lo a fughu ù dzàŋà tsəghà kwəlā ko mò ù n ndəmā dòʼò alo tənùu eghə̄m à ghè tò efāa, waatsūʼ a fə̀ bu bvuʼ naŋā, ù n yo alenùghùu teē kɔʼ tsəghatsəgha.

¹²A m bùghò Yɛso kòʼ nduw wə̄n, ù n tɔŋɔ tsə̀ghà ndùw wə̄n, dzɛ̀ â wə̄n enyəa, “Êwɛ̀, Zə̀ kə̀ ŋ ghù bəghasə an dzàŋ zə̀ghà.”

¹³Ghəa ù dzɛ̀ tsughu êzə̀, ù ŋ gaʼ ndùw kə̀ghu a zəŋò nùghò vʉ̀, kwəlā chi n daŋso è mia; yìzən vʉ n daŋso nùghù nə̀ghàan těe kɔʼ tsəghatsəgha, fughu ŋkɔʼso â Zə̀ kò.

¹⁴ Nʉghà wə̀ m pfʉ̄ ghùw wəla ù fə lô tuw ko fughu an Ndùghènē è Tə̀dzûu enyəa Yɛso bǎaŋ tsughu ghùw Tsuʼntsə̄, ù n dzɛ̀ â ghì ghò a fughu an ndughu enyəa, “Tsuʼ ŋ kə̀fwàʼ n lo tǔu alo ewə̄n, e bugho bāŋlō nlò ghue zo an tsùʼu n te mò, à yò nɛ Tsuʼntsə̄.”

¹⁵Mughu ù te n daŋso bɛ̀lɛ̀ ndùw wə̄n enyəa, “Ghê kə̀bàŋàdzə̀m tò ghɛ! Yìa n so ghɛ̀ mgbaŋa səa ko fɛ â kʉ̀anyòm wò Tsuʼutəntsə̄ ten tə̀ dzə̀m à, ndùw fùghuu ghee â mùghù mò a?

¹⁶To ghɛ̀ fɛ dzɛ̀ enyəa, yìzən wə̄n, wɛ ù Abə̀làhâm wəla ù fala tsɛlɛ̄ am fàŋà kə Satàn alo tənùu eghə̄m à ghè tò efāa, a ka wə̄n nɛ Tsuʼntsə̄ dɔ̂ɔm zè zə̀ghà a?”

¹⁷Ghəa Yɛso dzɛ̀ tsughu ghəa yì èzə̀, tuw kə n də̀n ndùw ghì ghə̀là à dzə̀m ghe fə̀ bâa tsəghà Yɛso ènyə. Ghî yi fughu an ndughu a dzə̀m n duʼn səso tsughu enyə an ndə̀mà tə aghəa tə̀ dzûŋ təla ù fə̀ ghəə̄ŋ fughu.

¹⁸Yɛso n nùghù bvʉ tsughu enyəa, “Fɔ̂e u Kəzə̀ ù lo tǒ kwò? Ǹ lo aleboʼō dzâa tsughu enyəa u lo tǒ kwò?

¹⁹U lo tò sam e mostàd [4] ghùw ù lì fə nî tam tsughu an sum u wə̄n, sam e te zə n noo tughu tsughu aŋ kàʼ fə̀ ne fo, nwə̀n mə̀ m bəghaa tə̀ndughu aŋ kwèe tə te to.”

²⁰Ù m bvʉ kpeʼe tsughu enyəa, “Ǹ lo aledzàa tsughu enyəa, Fɔ̂e u Kə̀zə̀ ù lo kpeʼe sugho tǒ kwò mboʼ a?

²¹U lo tǒ mbvùŋ yìzən nì kɔʼ, dzə̀n ndùw an tɔ̀e tə ŋkəa tə təgha, zə̀ n nyə̀ŋ kǎaŋ ndùw aŋ kəa n te mò n dzə̀m.”

²²Yɛso n zoʼn ndùw àghì naʼà tə̀nàʼà, ghəa ù ndǔuw an Yɛ̀lusalɛ̀m.

²³Ghùw ù lì m bvʉ â wə̄n enyəa, “Mughùbè, à lò enyəa, à kè tuw kə fɛ e zəā kô sə fə aghì a?” Yɛso n daŋso dzɛ̀ â ghee enyəa,

²⁴“Də̀ma tən tsughu nlò aletsə̀ghàa nyə am fanso fə fù u ndughu, nu Ǹ so Ǹ dzâa wô â ghɛ̀ enyəa, ndə̀m è àghì kè lə̀ghaa nù aletsə̀ghàa nyə, dzì è ke kuuwn m buw.

²⁵Abugho tsuʼ u kê kpe, mughù ù ndughu ù te nughù dzʉ̂a kɔʼ bâʼ kò, ghɛ̀ lo e ti a beē tsʉʉn kə̀bàʼ enyəa, ‘Mughùbè tsʉ tsughu ghaʼ â bàʼ kò.’ Ù ke e so â ghɛ̀ enyəa, ‘Ŋ̀ kwo yo luʼū kəla ghɛ̀ sə a te.’

²⁶Ghɛ̀ ke e dzaā keē nduw enyəa, ‘Sɛ̀ mò mgbaŋa dzeŋe zəa tsəgha ko a dzə̀m, mʉa sùghò a dzə̀m, ghù n zoʼn kaaŋ sùghò ghàʼ alo enaʼ.’

²⁷Ù kè kuūwn dzâa wô â ghɛ̀ enyəa, ‘Nùghu nlò a vʉ̀a mùghò, Ǹ dzɛ̀ â ghɛ̀ enyəa, Ŋ̀ kwo yo luʼū kəla ghɛ̀ sə a te; ghî à biigh ghən,’

²⁸Abugho ghɛ̀ kê kôʼ Abə̀làhâm, Aezìk, àsùghò Yàkɔ̂b ghèe ghê ghiīshʉ̀ghà gho a dzə̀m am fɔ̀e u Kəzə̀ mò ghe ŋ ghɛ̀ bâʼ nàŋa sə̀ wò a beē, ghɛ̀ ke e dinlō, pfʉā àsɔŋ.

²⁹Ghî à kê səā kaāŋ wô am bàa tə mbī ten tə̀ dzə̀m, ghe ke e doʼ am fɔ̀e u kə Kəzə̀, zəa èghue.

³⁰Kòʼ nlò, ghî ghəla ghe lô â bam ko êzə̄ŋ, ghe kê lò kəsə, ghəla ghe kuūwn lô sə ko, ghe kê lo kəbam.”

³¹Falàsîi tə̀ li tə n ndùw an nəgha zə̀ èzə̀, dzɛ̀ â Yɛso enyəa, “Nùghu tigh â tuw kə̀a kò, Hɛlɔ̀d so e wi ghû.”

³²Yɛso n dzɛ̀ â ghee enyəa, “Ndǔw dzɛ̀ â kəŋo fə te fo enyəa, Ǹ shûaan sə̌a zēe ùzʉ̀ a zəŋò ghì ghò nɛ àsùghò tsʉtsʉ, mùghò è miasō kɔʼɔ fwàʼ kaŋa ko â fǐigh.

³³Abugho à lò ko kwò, mùghò è nduūw ko â fwàʼ kaŋa ko â sə ko aŋghəa Ǹ tsughuu nduw an Yɛ̀lusalɛ̀m, nu ghùwshʉ̀gha yǒ tò ù è kpuw a beē, mò à yò an Yɛ̀lusalɛ̀m.

³⁴Wo Yɛ̀lusalɛ̀m, wo Yɛ̀lusalɛ̀m, ghɛ̀ ghəla ghɛ̀ wiīn ghîishʉ̀gha, tə̄əm sùghò ghì ghəla Zə̀ kə̀ tum wô â ghɛ̀ alo atia! À è zəŋ lo tənəghā tə sòʼ Ŋ̀ ghâa kêe alezùuŋ naŋā tsughu ghɛ to zə̂ ù mbvʉ lô kəŋò naāŋ tsughuu wɛ a wə̄n gho alo təghwò a, ghɛ̀ yia ləghaa yo à?

³⁵Kòʼô, Zə̀ kə̀ ŋ ghu ko a zəŋò ghɛ̀ nî nùghù, Ǹ so Ǹ dzâa wô sughò â ghɛ̀ enyəa, ghɛ̀ kê mùghò alo esə̄ tsuʼ yo, à gɔ̀ʼɔ̀ ko mò ghɛ̀ kê dzɛ̀ tsughù enyəa, ‘Bughuso e lo â ghùw wəla Mughu ù te tum wo.’”