Read Aghem Lûk 14 Bible Online

Lûk 14 - Aghem bible

Lûk 14

¹A fə̀ bugho Yɛso nyəā ndûw alendùw zə Tsuʼntsə̄ an ndughu lô də̀ŋ kə tə̀ Falàsîi kə̀ li ko, ghe n tɔʼɔ̀ tsêe ndùw ko wə̄n kuʼkuʼ.

²Yɛso fi kôʼ kɔ̀ʼ nû ghùw ù lì an sə kə wə̄n mò ù dzàŋà dzàŋ è muūwn zo.

³Ù n dzɛ̀ â ghê dèekə̀làŋ àsùghò Falàsîi tò enyəa, “À lò kəlâŋ alebaŋlo àghì an Tsuʼntsə̄ ŋkāa à yò kəlaŋ a?”

⁴Ghe ŋ kè kuūwn bɛlɛ̀. Yɛso fi nî bǎaŋ tsughu nû tûwbʉ̀ghà vʉ̀, zə̀ghà ndùw wə̄n.

⁵ Ù n daŋso dzɛ̀ â ghee enyəa, “À lò ndugho fɛ aŋ ghɛ̀ ghən a, wɛ ŋkāa mbɔ̀ŋ è wə̄n lô alebvʉ̀a nyəā tsughu alo kəbùʼ Tsuʼntsə̄ a, ù dòʼŋkè kwuūn ndûw sêe nughù səā kɔʼɔ̄ wo a?”

⁶Ghe ŋ kè bɛlɛ̀ zən.

⁷Ghəa Yɛso kòʼ aŋghəa ghî yia ghe fə naʼā fughu shîaa doʼò kaāŋ nduw am gbə̄lā ù ne wo, ù ŋ kwə̀ən kə̀a ndùw ghee â shwaʼ wən wo enyəa,

⁸ “Abugho ghùw nàʼà tsughu ghû an lʉ̀ ŋ wì, e kwo ghù lò ndûw nyaʼn kɔʼɔ̄ am bəla è ghûw ù nē, à làʼà lo mò ghe ŋ ghùw wəla ù tsə̀ghà sə ghû nàʼà sùghò;

⁹Ghùw wəla ù nàʼà ghɛ vʉ̀a ù bùghò dzɛ̀ â ghù enyəa, ‘Fughu tsughu ndàŋ â ghùw wə̄n,’ ghù koom doʼō tsughu tsughu am bəla kəla kə lwənsō tsə̀ghàtàʼà gbəla wo u dzə̀m an tuw kə̀ dəla ko.

¹⁰Abugho ghe laam naʼà tsughu ghû èzə̀, ndǔw dòʼo tsughu am bəla e ghì a lwə̄n, enyəa mò ghùw wəla ù nàʼà ghɛ bughò nù, ù ŋ kuuwn lò aledzàa wô â ghù enyəa, ‘Fə̄n waŋā, kɔʼ dòʼo ndùw fî.’ Ghî yìa ghɛ̀ à ghee doʼ sə̀ kɔʼso ghù.

¹¹ Nu ghî ghəla ghe kɔʼsō ghue zo, ghe lo lwənso naaŋ nǔ ghee a dzə̀m, ghəla ghe zumso tsughu ghue zo, ghe lo laam kɔʼso ghee.”

¹²Yɛso n dzɛ̀ ndùw sùghò â ghùw vʉ̀a ù nàʼa wə̄n enyəa, “Abugho ghù sə zɔ̂ʼ àghì, kà naʼà fən ghə̂a ghò ŋkāa waazughù ŋkāa tom ghə̀a ŋkāa ghî a kɔ̄n ghə̂a à kuu gho, e kwo ghe lô se kôom nùghù nàʼn wò sùghò ghù, e doʼò tsughu enyəa ghe ŋ ghù tsə tsə̀ghà wò ebàm.

¹³Abugho ghù se kuuwn naʼà àghì, ghù n laam nàʼà tsughu ghî à laa gho, ubvuʼ, ghî à foō gho àsùghò ùŋgwûundughu,

¹⁴Zə̀ kə̀ kê bughuso ghù, tɔŋlo enyəa ghe kê yò aletsəā tsə̄ghàa wô ghù ebàm. Zə̀ kə̀ kê ghù tsəa tsə̀ghàsò wò bugho ghî ghəla ghe lô tsəghatsəgha kê kɔʼɔ̄ səā alo evʉ.”

¹⁵A m bùghò ghùw u mɔ̀ʼ aŋ ghì yia ghèe ghee fə̀ zəā, zuw tsughu ghəa yì, ù mo â wə̄n enyəa, “Dzɔ̀ lǒ ghùw wəla ù kè zəā bɛ ko am fɔ̀e ù Kəzə̀!”

¹⁶Yɛso fi dzɛ̂ nù â wə̄n enyəa, “Ghùw ù lì fə̀ naʼā tsughu nāʼ fə aghì an zə è ne zo tsuʼ ù li wo;

¹⁷ghəa nəgha e kpe tsughu, ù n tum tsughu kɔ̂ɔ fə wə̄n enyəa, fə ndûw tɔŋɔ̂ ghì ghəla ù fə̀ naʼà enyəa, ‘Bùgho ko nlò nû; tɔŋlo enyəa a ŋ ghəa a bian naŋa mɛʼɛ̀.’

¹⁸Ghee a dzə̀m m buʼ kaaŋ ndùw ko kə̀ghu. Ù sûesʉ n dzɛ̀ â wə̄n enyəa, ‘A so Ǹ zue naŋa kə̀luʼū ma, kee â ghù, zyəən zə̀gha kɔʼ mugho, Ǹ so n ndûw koʼò tsughu luʼu kə te ko.’

¹⁹Ù lì mo enyəa, ‘A soō mùgho mò zue tsughu mbɔ̀ŋ tə̀ gwəə̄n to eghə̄m, M̀ fɛ so n soʼō mɔ̂ɔ kôʼ, kee â ghù, zyəən zə̀ghaa kɔʼ mugho.’

²⁰Ù lì mo enyəa, ‘A so Ŋ̀ kuʼù nì tsùghu wi, Ǹ yo aledɔ̀ɔm bughò.’

²¹Kɔ̂ɔ fi m bùghò dzɛ̀ wò sùghò ghəa yì â mughùbè ù wə̄n. Nʉghà wə̀ m pfʉ kɔʼ mughùndughu vʉ̀, ù n dzɛ̀ â kɔ̀ɔ fə wə̄n fo enyəa, ‘Kwuun nùghu tsughu ko êzə̄ŋ enyə, ghù sə tɔɔŋ kaaŋ wo ghî à laa gho, à bvuʼ wo, à ghì foō gho àsùghò ùŋgwûundughu enyəa ghe bughò.’

²²Kɔ̂ɔ fi fə n ndùw bùghò ebàm bùghò dzɛ̀ â wə̄n enyəa, ‘Mughùbè, mùghò m fwàʼ ghəa ghə̀là ghù mò tum mugho a te, bûʼ chia kə naam lo.’

²³Mughùbè vʉ̀ n dzɛ̀ â wən enyəa, ‘Ŋgəa nyə̀ ndùw ghɔ̀ɔŋ wə enaʼ wo, lùʼu mən an dziī à məla n sɔʼ doʼò nduw n dzə̀m, ghù è tɔɔŋ wo ghî ghò, to ndughu zaŋā luū tsughu.

²⁴Naʼàghəa, ghùw sə̀ tso kɔʼ nəgha yo ghu ko fɛ an ndughu, aŋ ghì ghəla a mò naʼā.’”

²⁵Êzə̄ŋ, ghəa ghî à ŋgeē tə̂əŋ nduw a bàâ Yɛso, ù m fə̀n tsughu ughue dzɛ̀ â ghee enyəa,

²⁶ “Abugho ghùw so e nî ghuw kaŋa, mò ù kà tsele bɛ̂ ghèe zə̀, bɛ̀ wì, bɛ̀ wɛ a wə̄n, bɛ̀ sùghò waazə̂, bɛ̀ dàŋso sùghò à ghue u wə̄n wo, M̀ fɛ kùum dzɛ̀ nù, ù kà kɔ̀ʼ kpè tò ù è doʼò tsə̀ndə̄ghā zaŋa.

²⁷ Abugho ghùw tàʼkè nɔɔ̄ tsughu aghəa, nùghù wò à bàâ mùghò, ù kà kɔ̀ʼ kpè aledòʼò tsə̀ndə̄ghā zaŋa.

²⁸À lò ndugho fɛ ù tsə̀m tsughu alebəgha ŋgɔ̀ʼɔ̀ kə ndughu lo a, vʉ̀a ù dòʼŋkè buʼù doʼò tsughu, taŋso tsùghù dzə̀ enyəa ndùghù è te lo alekwū kwǒ a, to e koʼò tsughu enyəa e ki kpeen to nû kua wo alebəghāa mɛʼɛ̀ ndùghù è te a tè à?

²⁹Abugho ù tsò fûw kaʼ tsughu ko bəghàan kò, vʉ̀a ù də̀m kê tsughu alemìasò, ghî ghə̀ è ke e bugho shwəla daŋā tsəgha wə̄n,

³⁰enyəa ‘Tûw wən fə̀ bɔŋ kaʼ tsughu to fɛ enyəa e so e bə̄ghā ndughu, ghà kè tsughu alemìasò.’

³¹Kàa à lǒ də̀ŋ kə̀ ghɛ ko kə so e naʼà tsàm a, kè buʼù doʼò tsughuu dzə̂ enyəa e taŋsō kɔʼ enyəa kam tə təsùghugòʼ tə̀n èghəm, to tə n yia a bu bàan to ŋgè kò ghèe ghê kam tə təsùghugòʼ tə də̀ŋ kə̀ li kə chiā, ŋghəm m bə̀ghà a?

³²Abugho ù kòʼ tsughu enyəa è kâ buʼ e tsam e tɔ̂ʼ kɔ̀lɔ, ù ŋ kwuun tum zìi ndùw tum â də̀ŋ loʼ kə chî, mo kə nāam lò alo kədɛ̀, enyəa, to ghe mô bianlo.

³³E fi lo enyəa, ghùw wəla ù yò alezə̀ghàa taʼà fʉgha wəla ù ki u dzə̀m, ù yò aledòʼò tsə̀ndə̄ghā.”

³⁴“Tsòʼ n dzɔ̂ɔ nù a bugho m kpə̀ŋò dzə, abugho ŋ kòom kpəŋò yo, a lo alekòom kpə̂ŋsò naŋa ênzə̂n?

³⁵Mə̀ n tsən kòom yǒ tò ghùw è ghəŋlo èghəa à tè, à m bɔɔm lò ko fəgha kə̀ kwəlā maʼn ko. Ghùw wəla ù ki tuūŋ ko, ù zuw.”