Read Aghem Lûk 15 Bible Online

Lûk 15 - Aghem bible

Lûk 15

¹ A fə bugho tsuʼ ù li wo, ghê dzə̀akə̀mwàʼsò n dzeŋe wò a vʉ̀a Yɛso àsùghò ghî à biigh à li gho alebùghò zyə̂ən shwaʼ u wə̄n.

²Ghê Dèekə̀làŋ ŋ kaʼ tsughu ghèe ghê Falàsîi tò alenyuūŋ sāʼ Yɛso enyəa, “Bəghà wən ŋgɔ̂ɔm ghì à biigh gho, zəa dzəəŋ sùghò ghèe ghee.”

³Yɛso ŋ kuuwn kwə̀ən tsʉ̀ ndùw ghee enyəa,

⁴“À lò ndugho am bvʉa zɛʼɛ̄ ù lò alekī bɔm fə tə ndzì fò a, vʉ̀a ù dzə̀ən kê tsughu e mɔ̀ʼ a te, dòʼŋkè zəghàa taʼà tsughu ghə̀m n lì mən tɛ̀ndzūghū à ghè tǒ tɛ̀ndzūghū alo e bəghaa, nùghù ndùw tèlè kə̀ŋ kòʼ wò dzə̀ zə̀n è mìa â?

⁵Mò ù ŋ kòʼ, ù ghɛ̀ɛn ghɔ̀ kɔ̀ʼ am mbòʼ, kwə̀n wò à ghè zò.

⁶Ù m bùghò daŋso nàʼà tsùghù fən a wə̄n ghèe ghê kɔn u wə̄n wo, dzɛ̀ enyəa, ‘Mùghò ŋ kǒʼ ndzì zaŋa zəla mùgho mò dzə̂nlo, bùghò nlò to sɛ̀ duʼnlo.’

⁷À lò sugho êzə̀, aŋghəa Ǹ dzâa wô fɛ â ghɛ̀ enyəa à kè lò duʼnlo è nêene zo alo kəwālā abugho ghùw ù bǐigh u mɔ̀ʼ kuuwn kɔʼ fə̀ŋ è wə̄n tsə̀ghàtàʼà ghì à dzûŋ ghən ŋghəm tɛ̀ndzūghū à ghè ghǒ tɛ̀ndzūghū ghe moʼò enyəa ghe lo ghî à dzûŋ ghò, ghe kôom yô alekuūwn fə̀ŋ tə ghee to.”

⁸Yɛso ŋ kwə̀ən dzɛ̀ kpèʼe ndùw â ghì a Falàsîi ghò àsùghò ghì à biigh yi enyəa, “Kàa à lǒ wìzən ù ghɛ̌ wò ù lò aleki kua u ŋgɔ̀ʼ wò eghə̄m a, vʉa u mîa tsughu u mɔ̀ʼ, vʉ̀a ù dòʼŋkè dâa tsughu lâm a, zè kǎaŋ wò chìndùghu a, tɔ̀ʼ fùʼ tsùghù təluʼū enyəa e telè kəŋo koʼò tsughùu nù a?

⁹À m bùghò ù kòʼ tsughu, ù n nàʼà tsùghù fən a wə̄n ghèe ghê kɔn u wə̄n wo, dzɛ̀ â ghee enyəa, ‘Bùgho nlò sɛ̀ duʼnlo, nu mùgho ŋ kua u fəŋgɔ̀ʼ waŋa wəla u mò miā kəŋ kòʼ.’

¹⁰M̀ fɛ dzàa wò nù â ghɛ̀ enyəa à bɔ̌ɔm lò sugho êzə̀ Tsə̀təndə̄ghā tə Kəzə̀ tə̀ duʼnlo abugho ghùw ù bǐigh u mɔ̀ʼ ti kuūwn kɔʼ am bòo tə wə̄n.”

¹¹Yɛso ŋ kwə̀ən dzɛ̀ kpèʼe ndùw â ghì Falàsîi yi gho ghèe ghê ghì à biigh yi enyəa, “Bəghà ù lì fə̀ lo nû, ù fə̀ ki wɛ a wə̄n à nûu ghò a bə̀ghà.

¹²Ù èbàm wən n dzɛ̀ â tsele an tsuʼ fə̀ li fo enyəa, ‘Tsele waŋa, fughu nùghu wò tuʼ zaŋa zo am fʉgha wəla ghàʼ kê ki alezə am fʉgha wʉ̂a.’ Ghùw vʉ n dzùghù tsùghù sùghò fʉgha u wə̄n an tuw u ghee vʉ̀ ù bʉ̀ghà, fùghù ndùw u wɛ ù ebàm vʉ wo.

¹³Tsuʼu mə̀ n tsə̀ghà tsughu ko n sòʼ ènyə, wɛ vʉ ŋ kùum tsùghù fʉgha u wə̄n u dzə̀m, nùghù ndùw an lɔʼkədzam, ndùw zə̀ sàŋ tsùghù fʉgha u wə̄n u te wo a fughu am fùw kə emùghù.

¹⁴A m bùghò ù zə sàŋ mɛʼɛ̀ tsughu fʉgha u wə̄n u te wo dzə̀m, dzə̀ŋ è lì n nyə fughu alo enaʼ mò è tɔ̀ŋɔ ndɔ̄ŋ. À n lo êzə̀ mò ù kòom ki yo fəgha kə li ko kə doʼò â wə̄n enyə a kə lo kə wə̄n ko.

¹⁵Ù fi ndûw kàʼ nû alefwàʼ a tsəlà ghùw ù enaʼ ù li fughu a naʼ e te zo. Ghùw vʉ n tùm ndùw wə̄n an sum enyəa ù è tsʉa kwə̀lebʉ̄ghā u wə̄n wo.

¹⁶Ù m buʼù mbùuŋ kèe ko enyəa to e mô zə̌a fʉ̀ghàzəa u kəkwə̀lebʉ̄ghā, ghùw m bûʼ yò bən sughò alefughu wə̄n â fəgha ko

¹⁷A m bùghò tɔ u wə̄n u kwən nyə̄ wo, ù mo enyəa, ‘Ghî a kəfwàʼ a bəghà yia a zəā kuūw, bùʼù nǎaŋ səa sùghò ù li wo, yìa Ŋ̀ kuūwn lô fɛ ŋgòʼò kpǔuw ndùw dzə̀ŋ à!

¹⁸Ǹ zəghàan nù, Ǹ ndûw èbàm a vʉ̀a bə̀ghà, Ǹ dzɛ̂ â wə̄n enyəa, Tsele waŋā, mùghò ŋ ghəəŋ bonlo â Zə̀ kò àsùghò â ghù;

¹⁹Ŋ̀ kâ bùʼ kòom kɔ̀ʼkpè to ghe etaŋ mugho aŋ kɔ̀n kə wɛ ghə̂a. Nǐi naŋa mugho tò luʼū wəla kɔ̂ɔ fə̀ghà fə̀ lo a te.’

²⁰Ù n daŋso zə̀ghàa è tsughu, nùghù ndùw a lùʼu ù nduūw wo ebàm alô tsele. Aŋghəa ù səgha sə wo alo kədɛ̀, tsele n lɔʼso kòʼ ndùw wə̄n, kwuso èse, è nyəŋ, ndùw bvʉ̀ mǎaŋ kele wɛ.

²¹Wɛ vʉ mo â tsele enyəa, ‘Tsele waŋā, mùghò ŋ ghəəŋ bo zo an sə kə̂a àsùghò an sə kə Kəzə̀. Ŋ̀ kâ kòom kɔ̀ʼkpè to ghe etaŋ mugho aŋ kɔ̀n kə wɛ̄ ghə̂a.’

²²Tsele m fwə̀n dzɛ̀ ndùw â kɔ̀ɔ ŋ wə̄n mò enyəa, ‘Mba nǐi wò nlò dàla zəla è dzɔ̀ buʼ, ghɛ̀ təm tsughu a zəŋò wə̄n, ghɛ̀ dzəla tsughu sugho wə̄n â tee fo aŋ ghu kə wə̄n, ghɛ̀ dzəla kɔʼ sugho wə̄n â gùw tò alo aghùw.

²³Ghɛ̀ daŋso ni kɔʼ nùumbɔ̀ŋ è kǎa zə̀, ghɛ̀ ghəəŋ nduw zə zo a te, to sɛ̀ zə, a e duʼnlo;

²⁴nu wɛ waŋā wə̄n fɛ̀ lǒ tò ù mò kpuw nû, vʉ̀a ù kòom kɔʼsə̄ alo evʉ̄, ù mafə̄ lâʼ mìa yia a kôom kôʼ tsughu wə̄n.’ Zə kə fi daŋso zìi tsùghù nû êzə̀.

²⁵À n lo êzə̀ mò wɛ ù sûesʉ wən mô nǎam lò aŋ ŋgwə̄n, a m bùghò ù kuʼso wô be ko aŋghəa ù kwəlā wo, ù n zuw fʉgha ù bəla u kuū.

²⁶Ù n tɔŋɔ tsughu kɔ̂ɔ fə tsēlē fə̄ mɔ̀ʼ, bvʉ â wə̄n enyəa, ‘À tsə̀ghàa kə̀ kwò fɛ à?’

²⁷Kɔ̂ɔ fi n dzɛ̀ enyəa, ‘Wàazùghù ŋ kwən nyə ebàm, tsùghò vʉ̀a ù wi tsughu nùumbɔ̀ŋ ù kǎa ù vʉ̂ enyəa e nda kòʼ wɛ ù wə̄n mò ù lò â ghue ù tughu wo.’

²⁸Wɛ ù sûesʉ vʉ m pfʉso mìasò ndùw ùnʉ̀ghà enyə, tue daŋso alenyə alo kəbe. Tsele n tsə̀ghà sə̀ è wo, buʼ kəghu â wə̄n.

²⁹Wɛ vʉ n dzɛ̀ â tsele enyəa, ‘Yìa Ǹ fwâʼ tsɛlɛ̀ fɛ â ghù an ndə̀m è tə̀nùu, kè tsoō tsughòsò koʼò sughò làŋ kə̀a; ghù kaam tso nì kòʼ wò ko tsʉa u dzə wo enyəa Ǹ dan a te ghàʼ à ghê fən ghaŋā gho.

³⁰Yia a bugho wɛ wʉ̀a wən ndûw bugho, ghù vʉ̀a ghù bòʼò wi fughu tsughu nùumbɔ̀ŋ è kǎa â wə̄n; mò ù m fʉgha wʉ̀a ù ndûw sàaŋ màʼà tsùghu ghèe ghê kpàlà wò.’

³¹Tsele n daŋso dzɛ̀ â wə̄n enyəa, ‘Ŋ wɛ̄, ghàʼ à ghù fɛ lo tsəgha ko a dzə̀m, fʉgha waŋa u dzə̀m à kì ghû.

³²E dzɔ̂ɔ nù enyəa to sɛ̀ mô zə, a duʼnlo, tɔŋlo enyəa wàazùghù fɛ lo tò ù fə̀ kpuw nû, vʉ̀a ù kòom zôo wô ebàm. Ù maā lâʼ mìa, yia a kôom koʼ wə̄n ebàm.’”