Read Aghem Lûk 16 Bible Online

Lûk 16 - Aghem bible

Lûk 16

¹Yɛso n daŋso dzɛ̀ â tsə̀təndə̄ghā tə wə̄n to enyəa, “Ghùw ù kǔu ù lì fə̀ ki ghùw ù kə̀fwàʼ ù wə̄n, ghe m mgbɛɛ bughò dzàa fùghuu tsə̀ghà ko enyəa ghùw ù kə̀fwàʼ ù wə̄n bəla nyàa fʉgha u wə̄n tò fʉgha u dzʉghadzʉgha.

²Ghùw ù kǔu vʉ fi bughò tɔ̀ŋɔ naŋa tsughu nû ghùw ù kə̀fwàʼ ù wə̄n vʉ̀, bvʉ â wə̄n enyəa, ‘Ŋ̀ kən zuuw kâaŋ kə̀ kwò enyəa an zən zəghā a? Ghəŋlô ghù fughu nyə wo tàŋ è kə̀fwàʼ zə̀ghà, mbuu ghù lo kòom fwaʼà yo fɛ.’

³Ghùw ù kə̀fwàʼ vʉ m bvʉ enyəa, ‘Mùghò è dzə̂ èndūghō êzə̄ŋ à, mùghùbè waŋā sô so e buū tsɔ̄ʼ mugho alo kəfwàʼ a? M̀ fɛ lǒ, Ŋ̀ ki yo nûŋ wò alebwiī tsəmā kaaŋ luʼū to, yìa Ǹ də̂nsò sughò tuw ko alenɔɔ nɔ̄e ko.

⁴Mùghò ŋ kele ghəa zəla Ǹ lo tò mùghò è ghəŋlo, to abugho M̀ bûʼ guŋù ko fwàʼ kò fɛ, to ghî ghə̀ è ke e naam koʼō kɛ̄lɛ̄ mugho an lùʼù tə ghee.’

⁵Ù fi kaʼ nû, tɔ̄ɔŋ tsughuu ko kə̀chìa aŋ ghì ghə̀là ghe fə̀ ki mughùbè ù wən â ndàŋ kò. Ù m bvʉ â ù sûesʉ vʉ̀ enyəa, ‘Ghù mughùbè waŋā ki â ndàŋ kò aŋ kwò?’

⁶Ù te n dzɛ̀ enyəa, ‘Kɔ̀n tə mvʉ̄ ŋghəm èfāa.’ [5] Ù n daŋso dzɛ̀ â ghùw vʉ enyəa, ‘Nǐ mwàʼsò kə kəndàŋ kò, mba dòʼo tsughùu, ghù tɔm tsughu ko kɔ̀n tò ŋghəm n chìakò.’

⁷Ù m bvʉ â ù lì wən enyəa, ‘Ghù kǔuwn ki kwò?’ Ù te n dzɛ̀ enyəa, ‘Mbə̀ghà tə asāŋ ŋghəm èfāa.’ Ù n dzɛ̀ â wə̄n enyəa, ‘Nǐ mwàʼsò kə kəndàŋ kò, tɔm tsughu enyəa ghù kì ko ŋghəm tǔu.’ Ù m bɔɔm ghəəŋ kô ghəa yì èzə̀ â ghì ghəlà à dzə̀m ghe fə̀ ki mughùbè ù wə̄n â ndàŋ kò.

⁸Mughùbè vʉ m fùghù ndùw kɛɛ u mbaaŋ kə ghûw ù kə̀fwàʼ vʉ̀ an tsə̀ n utɔ ŋ wə̄n mì; nu wɛ a nɛ ghən ŋgee mbāaŋ ghəəŋ nù aŋ ghùe e ghee tsə̀ghàtàʼà ghəa wɛ a Kəzə̀ à ghəŋlo aŋ ghùe e ghèe.

⁹Ǹ so Ǹ dzâa wô â ghɛ̀ enyəa, nǐi kɔʼ nlò fʉgha u mbī wo, ghɛ̀ kwu nduw fwən wo a te ghɛ̀ à ghê ghì ghò, mo u kê bùghò mìa tsùghù nû, ghe lo kpeē nî ghɛ̀ alo Kəwālā.

¹⁰Ghùw wəla ù lǒ alenyɔ̀ʼɔ̀ kwuū kēlê nyàaŋ fə fəfə̀ghà, ù lò nû alenyɔ̀ʼɔ̀ kwuū kele sughò ndə̀m. Ghùw wəla ù yò aledòʼò tsəghatsəgha an nyàaŋ fə fəfə̀ghà, ù yò sughò aledòʼò tsəghatsəgha an ndə̀m.

¹¹Ghəa ghɛ̀ yô alenyɔ̀ʼɔ̀ kwuū kēlê kum è səŋò zò, à kǔuwn lò ndughoo alefughūu wô ghɛ̀ â fʉgha ù səŋò wò enyəa ghɛ̀ kwu kelê à?

¹²Abugho ghɛ̀ yô alenyɔ̀ʼɔ̀ kwūu kēlê fʉgha u ghûw nùghù, à kǔuwn lò ndughoo alefughūu wô ghɛ̀ â ù wɛʼɛ wo ufʉgha à?

¹³ Kɔ̂ɔ fə̀ li fə yo dzə̂, fə lo alefwaʼā aŋ ghùu ghê mughùbè a bə̀ghà alo enə̀gha e mɔ̀ʼ; tɔŋlo enyəa to ù sə̀ lə̀ghaa u mɔ̀ʼ, bàa ù lì wən, ŋkāa ù è tumso u mɔ̀ʼ, kòʼò kèe ù lì wən. Ghù yò alekɔʼso Zə̀ kò, kɔʼso sùghò fʉgha u mbī wo.”

¹⁴Falàsîi tə̀ n tsōʼ wə̄n aŋghəa ghe zuw tsughu shwaʼ wə̄n, ghe maʼâ ŋgee ləghaa kua wo.

¹⁵Yɛso n dzɛ̀ â ghee enyəa, “Ghɛ̀ lo ghî à dzûŋ ghò an sə kə aghì, Zə̀ kə̀ kuuwn kwō fə̂ŋ tɛʼɛ; nu fʉgha wəla ghî à kuūwn kɔʼsō, à lò udzʉ an sə kə Kəzə̀.

¹⁶ Ghɛ̌ fə̀ bwiī ko an làŋ kə Musî, zuuw sùghò tsʉ̀ e ghîishʉ̀gha bùghò kùm wò an tì kə Dzɔ̌n Fùghùu mùghù ŋ Kə̀zə̀; alenìi nughù wô an tì kə te ko, ghî à fɛ tsòo mgbɛ̌ɛ kə̀aa tsə̀ghà kô ghəa e Fɔ̀e u Kəzə̀, ndə̀m è àghì yia a dəmà aleŋgaām nyə aŋ ghəa e te zo.

¹⁷ À lò nɛ̀ɛn kə eghəa â mbī aletsə̀ghà mîa à Wala ko, zə e kuuwn ŋgee tughuu â nyàaŋ fə eghəa fo alesəā nughù kɔʼ alo kəlàŋ.

¹⁸ Ghùw wəla ù dzùm sə kɔʼ wī, kòom nì tsùghu ù nùghù, ù n sə̀ nùŋlò; ghùw wəla ù nì tsughu wìzən wəla ù lǒ mò ù maā num sə, ù fi naam sə̀ nùuŋ sùghò nù.”

¹⁹Ghùw ù kǔu ù lì fə̀ lo nû mò ù ghue u laa tsə̀ghà ko an dàla tə̀ səŋò tò, à fə̀ghà mə̀ ŋ̀ghùe n nyə̀ghaan mò tò kədə̀ŋ; ù n zəa zēe tsə̀ghà wə̄n â fə̀ghà n dzûŋ mò nəgha tən tə dzə̀m.

²⁰Ghùw ù lǎa ù lì m bughò dòʼn zěe tsə̀ghà a fǔumbɛ̀ u ghûw ù kǔu vʉ̀, mo ba zə ŋ wə̄n kwu pfʉ̄. Ghe fə̀ tɔɔŋ wə̄n enyəa à lò Lazālùs.

²¹Ù m mbûuŋ kèe tsə̀ghà alebuʼū nə̄əŋ kūum zəa ko sugho təla tə tsɔʼn tsughuu būghō ghùw ù kǔu vʉ zəā; bvʉ tə n yian bùghò kàʼ wò sùghò alenəghā sə̀ghà ŋ wə̄n mī a zəŋo ughùe.

²²Zə m bùghò sə kɔʼ enyəa ghùw ù lǎa wən bùghò kpuw tsughu nû, tsə̀təndə̄ghā tə Kəzə̀ tə n nì ndùw wə̄n a vʉ̀a Abə̀làhâm. Ghùw ù kǔu wən m bùghò kpùw tsùghù è sugho, ghe n tsəla tsughu wə̄n.

²³Ù n nyə̀ kàʼ ndùw a lùʼù faan wo an nāʼ zə evʉ̄. Ghəa ù sə̀ faān fughu êzə̀, ù mo e baŋà lɛ̌ɛn kɔʼɔ nù, lɔʼso kòʼ kɔ̀ʼ ndùw Abə̀làhâm, à Lazālùs a vʉ̀a wə̄n.

²⁴Ù n dì sə̀ wò enyəa, “Tsele waŋā Abə̀làhâm, kwuso se zo a zəŋò mùghò ghù tum tsughu Lazālùs, tò ù tsùu kɔʼ wàakə̀ghu ù wə̄n alo mmùghu, ù bùghò bvʉ̂ʉn wô tɔŋ waŋa a te; nu ŋ ŋgee zuuw èfɔnlo fɛ aŋ wə̀n wən.”

²⁵Abə̀làhâm ŋ kuūwn dzɛ̀ ndùw â wə̄n enyəa, “Ŋ wɛ, kele tsughu enyəa, ghəa ghù mò mughù am mbī, ghù mò ki fʉgha ù dzûŋ wò, Lazālùs ŋ kuuwn mùghù an tsù; êzə̄ŋ, ù kǔuwn mùghù alo nsəghanyəgha fɛ̄, ghù vʉ̀a ghù kuūwn lo an tsù.

²⁶Səm vʉa u fəghaan lô sugho ghe sùghù naŋā an tsə̀tèʼè fə sɛ̀ enyəa mò ghùw nùghù tsùghù fɛ enyəa e daŋà wò fì, ù ŋ ghà è ke, ghùw è yo sughò alenùghù tsughu fì, ù bùghò fɛ.”

²⁷Ù fi daŋso dzɛ̀ nù â Abə̀làhâm, â wən enyəa, “Ǹ so Ŋ̀ kuūwn buʼū wô kə̀ghu â ghù a tsēlē waŋā enyəa, ghù kuuwn tum tsughu ko wə̄n enyəa ù ndùw am be kə bəghà,

²⁸ù ndùw kwɛ̂ɛn tsughu waazə̂ ghaŋa yì fughu a te, e kwo ko ghe ke bughòo sughò fɛ an lùʼù kə ŋgōʼ kən.”

²⁹Abə̀làhâm ŋ kuuwn dzɛ̀ enyəa, “Ghe ki nû lâŋ kə Musî kò àsùghò tsʉ̀ e ghîishʉ̀gha zò, ghe e bwiī nduw a te.”

³⁰Tûw vʉ mo enyəa, “Ɛ̂ŋgaŋ a tsēlē, abugho ghùw laam ndûw a vʉ̀a ghee, mò ù nùghù tsùghù fɛ an naʼ zə evʉ̄, to ghe zuw, ghe kuwnlo.”

³¹Abə̀làhâm n dzɛ̀ â wə̄n enyəa, “Abugho ghe yô alebwìi an làŋ kə Musî, àsùghò tsʉ̀ e ghîishʉ̀gha zò, to ghe kâ ŋgə̌əŋ zùw sùghò bugho ghùw bùʼ sə ko an nāʼ zə evʉ̄.”