Read Aghem Lûk 17 Bible Online

Lûk 17 - Aghem bible

Lûk 17

¹Yɛso n daŋso dzɛ̀ â tsə̀təndə̄ghā tə wə̄n to enyəa, “À lò èsəŋò enyəa ghùw lo nû alekele kə̀tsòmlo aleghəŋlo eghəa, e kuuwn lò enyəa ghùw wəla u tsoō kɔʼɔ ghùw, ù lò an tsù!

²Â wə̄n alekuūwn tsom wɛ̂ɛtùghu u mɔ̀ʼ aŋ wɛghêtùghu ghən enyəa ù ghəŋlo èbo, e bɛso lo enyəa ghe nî də̀làdə̀n kə etia, ghe kɔ̂n a zəŋo ughùe, ghe ndûw maʼà alo kətsə̀m.

³ E ghomlō nlò aŋ ghùe zɛʼɛ̄; abugho wàazùghù ghəə̄ŋ tsughu bo zo, komso ndǔw wə̄n, mò ù n tigh kuwnlo, ghù ŋ ghuuw màʼà bo e wə̄n;

⁴abugho ù bùʼ ghəə̄ŋ boōn ko ghû â ghəa gho tənəghā sə̀ghàmbəgha alo fətsuʼ, vʉ̀a ù kòom buʼ wô sughò ghu ko tənəghā sə̀ghàmbəgha enyəa e ŋ kūwnlo, ghù ghuuw maʼa bo e wə̄n zo, ghù kì alewuūwmaʼà bo e wə̄n.”

⁵5 Tum tə Kə̀lestò tə̀ n dzɛ̀ â Mughu ù te enyəa, “Ghəəŋ tsughu boo zaʼa zə e tughuu.”

⁶Mughu ù te fi dzɛ̂ nù â ghee enyəa, “Abugho ghɛ̀ mô bûʼ boōm fughuu tsughu ko fənyàŋlò tò aŋ sam e kàʼ fə̀ mostàd[6] fə̀ nyâaŋ toō a te, to ghɛ̀ mò lò nû aledzàa tsughu â faŋkwu kə fəkàʼ kən ko enyəa, ‘Dwə̀la nùghu kɔʼ ghue wʉ̀a wò, ghù tsughu tam tsughu an dzùghùntsòʼ!’ Kâʼ fə te fə sò zuūw wô â ghɛ̀.”

⁷“Ghùw wɛʼɛ ù lì kpaʼ lò nû ù ki ghùw ù kə̀fwàʼ ù wə̄n ù gwə̀nlo â wə̄n ŋkāa ù chǐin ndzì tə wə̄n to, ghùw ù kə̀fwàʼ ù te vʉ̀a ù ndùw kwən wo, ghùw wɛʼɛ ù te vʉ̀a ù dzɛ̀ â wə̄n enyəa mba bùghò dòʼo tsughù ghù zə kɔʼ à?

⁸To ù sə̀ lǔum dzàa ndùw â ghùw ù kə̀fwàʼ vʉ̀ enyəa, ‘Fəghaan tsughu ghue wo, ghù ghəəŋ tsughu fəgha kə̀ zəa ko â mùghò tò Ǹ zəā kɔʼɔ̄ dzə̂, sěe ghù sə̀ zəā mʉā kɔʼɔ sughò lo a?’

⁹Ù sə̀ fùghuu to nǔ zɔ̀ɔŋ kò â ghùw ù kə̀fwàʼ vʉ̀a fwǎʼ fwàʼ kə̀là ù mò tum wə̄n a te a?

¹⁰E bɔɔm lò sugho êzə̀ à ghɛ̀, abugho ghɛ̀ fwâʼ mɛʼɛ̀ tsughu fwàʼ kə̀là ghe fughu â ghɛ̀, ghɛ̀ ki aledzàa tsughu enyəa, ‘Ghàʼ lo ko bvùʼù mə̀ ŋkɔ̀ɔ, ghàʼ fɛ fwàʼà kô fwàʼ kaʼa.’ ”

¹¹Yɛso n tsəghàa dzì an twee Sàmalìa ghèe ghê Galèlîi, ù tsughuu an Yɛ̀lusalɛ̀m.

¹²Ghəa ù kuʼso ndûw naʼà fə̀ li fo, ù m kpeen ndùw ghèe ghê ghì ghò eghə̄m mo ghe dzaŋà tə̀tsùghò, ghe n lɔʼso ti alo kədɛ̀,

¹³nàʼn zɛ̀ʼɛ wò an dzə̂ tə̀ tughu to enyəa, “Kee â ghù a Mughùbè Yɛso, kwuso se zo a zəŋò ghàʼ.”

¹⁴ A m bùghò ù kòʼ nduw ghee, ù n dzɛ̀ â ghee enyəa, “Ndǔw děe ndùw nlò ghue zo â fɔ̀e tə Kəzə̀ tò.” A m bùghò ghe nduūw, ghe n tùghù kòom kɔ̀ʼ an dziī.

¹⁵Ghəa ghùw ù ghee u mɔ̀ʼ zyəə̄n zuw tsughu enyəa dzâŋ zə̀ ŋ wə̄n zəghàa, ù ŋ kòom kɔ̀ʼ ebàm, kɔʼso ndùw Kə̀zə̀ dzîidziī.

¹⁶Ù m bɔ̄ɔm ndùw nyə̀ŋè pfʉ̌a ndùw ùsʉ̄ a tsəlà Yɛso, fughu zɔ̀ɔŋ kə wə̄n. Tûw wən fə̀ lo ghùw ù Sàmalìa.

¹⁷Yɛso fi daŋso bvʉ nû enyəa, “Yìa Ǹ so a mô ghɛ̀ baŋlo èghəm a? Ghən tɛ̀ndzughu sô kǔuwn lò ghɛ â ghee à?

¹⁸To e fɛ kùum lò enyəa ghùw mò ŋgə̀mso yò alekòom bughò fughu kəzɔ̀ŋlò â Zə̀ kò a, gɔ̀ʼɔ̀ ko yo ghùw ù kə̀tum wən à?”

¹⁹Yɛso fi dzɛ̂ nù â bə̀ghà vʉ enyəa, “Nùghu kɔʼɔ̀, ghù nduw è zəghà zò, boo zəghà zə ŋ ghù bəghasə.”

²⁰Ghəa Falàsîi tə̀ bvʉ â Yɛso enyəa Fɔ̂e u Kəzə̀ ù laʼà bughòo zə̀n a, ù m bɛ̀lɛ̀ tsùghu ghee enyəa, “Fɔ̂e u Kəzə̀ ù lo bùghòo yò wə e deē wo tsə̌a to, tò ghùw è koʼōkɛlɛ enyəa Fɔ̂e u Kəzə̀ wə̀ ŋ kaʼ,

²¹ghùw mɔʼɔ̄ yo ù kè sɔʼɔ̀ dêe tsughuu â ghù enyəa, ‘Kòʼô, wən à!’ Ŋkāa, ‘Vʉ̀a!’ Tɔŋlo enyəa Fɔ̂e u Kəzə̀ ù lo ziī am bvʉa zɛʼɛ̄.”

²²Ù n daŋso dzɛ̀ â tsə̀təndə̄ghā tə wə̄n to enyəa, “Nəghā e kê kpěe nù, ghɛ̀ ke di kē tsughu alekɛ̀sò kôʼ Wɛ ù Ghùw alo fətsuʼ fə mɔ̀ʼ etɔ̀ŋ, ghɛ̀ ke ŋgəmso yo alekòʼ.

²³Ghî à ke so â ghǔ a, ‘Ghù wɛ̀ɛ, à lò fɛ!’ Ŋkāa, ‘Ghù wɛ̀ɛ, à lò fî!’ E kwo ghɛ̀ è ke e ndûw, kà kê è nlò dɔ̂ɔm tsə̀ghà tə̀ŋò a bàâ ghee;

²⁴Tɔŋlo enyəa ghɛ̀ lo kòʼòkɛ̀lɛ̂ tsuʼu Wɛ ù Ghùw tò aŋghəa ghɛ̀ koʼòkɛlɛ kɔʼɔ aŋghəa ghuuw e nughùun mwâa tsughuu a te alo kəwālā.

²⁵À kǔuwn lò ko enyəa, ù lo ki alebùʼù fala dzə̂ an ndə̀mà tə aghəa, ghɛ̀ a nɛ ghən ke tue maʼa tsughu wə̄n.

²⁶ Tî kə Wɛ ù Ghùw kə̀ kê bɔ̌ɔm nyoʼn lò sugho tò kə Nôa ko.

²⁷An tì kə Nôa kə te ko, ghî a fə̀ zuuw ko alezə̄a, mʉa, duʼnlo, zuʼso nìi kǎaŋ ko àyi, yîzən ghə n nîi ndùw ànum, ndùw tɛ̀ ndùw an nə̀gha zəla Nôa fə̀ nyəā kɔʼɔ̄ alo kəkwə̀n. Fʉ̀ghàdzughù tə̀ n daŋso è sə, bùghò lə̀ŋe tsughu ghee a dzə̀m.

²⁸ À fə̀ lo sugho eghəla an tì kə Lɔ̂t, ghî ghə̀ n zuuw ko èzə, mʉa ndùw zuʼso zueen ndùw sùghò bekewə̄n, ghəəŋ ko ghee â bekewə̄n ko, gwə̀ən ndùw èsum, bəghaa ndùw tə̀ndughu.

²⁹Tsuʼ wəla Lɔ̂t fə̀ zəghàa tsughu Sodòm, Zə̀ kə̀ n zə̀ghàsò sə̀ tsùghù wò chia tə ŋwə̀n, tə n tsughu a zəŋò ghee tò eghuuw, ləŋe tsughu ghee a dzə̀m.

³⁰À kè bɔ̌ɔm lò sugho êzə̀ tsuʼ wəla Wɛ ù Ghùw kè dêe wô sʉ wo a te.

³¹ An tsuʼ fə̀ è fì, mò ghùw kè lo an gɔ̀ŋ kə ndughu, mo fʉgha u wə̄n u lo an ndughu, e kwo ù lò lɛso ndûw səā tsughuu wô enyəa e se bughò kûum sə, wəla ù kè lo aŋ ŋgwə̄n, e kwo ù lò kôom lɛsō kwəlā wo.

³² Mòʼn tsughu nlò ghəa zə̄lā e fə̀ sə a zəŋò wì ù Lɔ̂t.

³³ Ghùw wəla ù bəghāa səā mughù e wə̄n zo, ù lo gùuŋ nù, wə̄n ù laam nî tsughu enyəa e yo dzə̂ fəgha ko, ù lo zə kətuw.

³⁴M̀ fɛ dzàa wò nù â ghɛ̀, â tsuʼ wo, an tsuʼ wə e vʉ̀, ghî ghə̀ e kē nyəŋ a bə̀ghà akə̀ ùchùa, ghe n nì ù mɔ̀ʼ, naŋatàʼà ù mɔ̀ʼ.

³⁵Yîzən ghə e ke e dzoo fʉgha wo ghee a bə̀ghà an tia è gwuūn zo, ghe n nì ù mɔ̀ʼ, naŋatàʼà ù mɔ̀ʼ.”

³⁶[Mo yînûu à lo a bə̀ghà an usum, a n nì ù mɔ̀ʼ, naŋatàʼà ù mɔ̀ʼ.]

³⁷Ghe fi daŋso bvʉ nû â wə̄n enyəa, “À kè lò ghɛ a Mughùbè?” Ù n dzɛ̀ â ghee enyəa, “Dzʉghadzʉgha u alo kəlùʼù zuʼù ko abugho gwən e nyôm è nyəŋ fughu.”