Read Aghem Lûk 2 Bible Online

Lûk 2 - Aghem bible

Lûk 2

¹Ghe fə Dzɔ̌n dzə tsughu an sùghù e Də̀ŋ kə̀ nêe ne kəla kə fə saʼa am mbùʼ e Lumà e dzə̀m tɔŋlo enyəa à lò Agûsì. An tì kə̀n, Agûsì m fùghù sə̀ wò kə̀làŋ enyəa ghe taŋ aghî a fughu am mbùʼ è te e dzə̀m.

²Ghe fə̀ ghî à fɛ zeʼe taŋa nû aŋ ghu è chìa Kwə̀lenùs fə̀ kɔʼ ndàŋ tò gɔvə̀nò ù Silìa.

³Kə̀chìa n nughùun ndùw ko an naʼ e ghee alendùw tɔm zən e wə̄n.

⁴Dzùghùsî fi zəghàa tsùghù sùghò nù naʼ e Nazalɛ̀t zò am mbùʼ è Galèlîi, nùghù kɔ̀ʼ ndùw am mbùʼ è Dzùdîa am Bɛtə̀lɛ̀hɛ̂m, an naʼ e Dɛvìd, ù màʼa fə̀ lo mò ù sə̀ an tigh kə Dɛvìd.

⁵Ù fə̌ fughu nduw alendùw tɔm a ghee gho a zən ghèe Mèle tɔɔŋ wìzən wəla ù fə̀ kpôom naŋā. Wìzən vʉ n lo unʉghà.

⁶Ghəa ghe sô lo fughu, nəgha e wən è dzəa zə m kpe è tsughu.

⁷Ù n daŋso chuaso dzə̀ wò wɛ̂ɛnùu, nyəm kɔʼ wə̄n am gbà u təndzʉ̄, nyə̀ŋsò nàŋa nyə tsughu wə̄n an kpaa wəla dzə tə fə̀ zəa a te, bûʼ kə̀ bwii kə màʼa fə̀ buw fughu alo atsə̄ â ghee.

⁸À n lo êzə̀ mo ghî a baʼā a təndzì à lo fughu am bəghaa è li zo ghe chîin bwiī ghee â ndzì tò.

⁹Tsə̀ndə̄ghā è Kə̀zə̀ m gbə̀n sə̀ wò fughu an sə kə ghee, daʼa kə Kəzə̀ kə̀ n nùghù mwɛ̀ è tsughu, bàŋ tsùghu tò uwən a zəŋò ghee. Ghe n tɛ̀ è tsəŋ.

¹⁰Tsə̀ndə̄ghā zə n laam dzɛ̀ â ghee enyəa, “Kà nlò tsəŋ, M̀ bughò ghɛ̀ â Làbəlà è Kə̀zə̀ zəla è lo nîi wô duʼnlo è ne zo â ghì ghò a dzə̀m.

¹¹Nɛ an tsuʼ u nɛ wən, ghe ŋ ghɛ̀ â tisûŋ dzə an naʼ e Dɛvìd mò à lǒ Kə̀lestò [1] Mughu ù te.

¹²Zən sə̀ lǒ tsə̌a â ghɛ̀, ghɛ̀ sô ndùw kòʼò tsughuu wɛ mo ghe ŋ wə̄n nyəm naŋā alo təndzʉ̄, mò ù nyə̀ŋ alo ukpāa.”

¹³Ghe mo e koʼò ko mò tsə̀təndə̄ghā tə Kəwālā tə m gbə̀n sə̀ wò ndə̀m, təm dzəəŋ wò è sûesʉ zə̀, ghe n zoo àghəa, fughuu ùnyoʼ â Zə̀ kò, dzàa tsùghuu enyəa,

¹⁴“Kɔʼso n lo â Zə̀ kə̀ edzuŋ ko. Ghî ghəla ù taʼ sugho ghèe ghee am mbī, ghe n dòʼò nyə̀ wò alo ebughunlo.”

¹⁵A m bùghò tsə̀təndə̄ghā ti tə nughù nyə̀ ndùw ebàm alo Kəwālā, ghî à baʼā a təndzì yi n saan tsughu enyəa, “To sɛ̀ mô nughù ndûw am Bɛtə̀lɛ̀hɛ̂m a ndûw kôʼ ghəa zə̄lā Tsə̂ntə̀mbî dzɛ̀ â sɛ̀ enyəa e sə nû.”

¹⁶Ghe n daŋso nùghù shùaa ndùw èghue fughu, ndùw kòʼ ndùw Mèle ghèe Dzùghùsî àsùghò wɛ̌ vʉ̀, mò vʉ̀a ù nyə̌ŋ alo ukpāa.

¹⁷Ghəa ghe ndûw kôʼ tsughu ghəa yì, ghe n dzɛ̀ ndùw ghee â ghəa yia tum zə mô bughò naʼà â ghee.

¹⁸Ghî ghəla ghe mò zuw ghəa a te gho dzughu zə n zūm ghee a dzə̀m.

¹⁹Mèle m mgbɛɛ mòʼn tsə̀ghà kô ghəa a te gho, kəŋo tsə̀ghà kə̀tuw a te.

²⁰Ghî à baʼā a təndzì yi n nughùun ndùw èbàm, fughuu ndùw ùnyoʼ, kɔʼso ndùw Kə̀zə̀ alo ezōm aŋ ghəa ghəla ghe mô zuw bɔɔm ndùw kòʼ ndùw sùghò an tə̀ŋ kə̀là tum zə mô dzɛ̂ â ghee.

²¹ A m bùghò wən e fê tsughu, aŋghəa ghe dzə tsughu wə̄n, ghe n so e sugho tigh kə wə̄n, ghe n tèlè tsʉ̀ tsughu kô zən e wə̄n enyəa à lò Yɛso, zən zəla tum mò fughu ziī, to ghe e bughò bɔŋ wə̄n.

²²Ghəa ghe dzə̂ kɔʼ ŋgàŋ tə ghee to aŋghəa lâŋ kə Musî kə̀ deē, ghe n daŋso nì kɔ̀ʼ ndùw wɛ an Yɛ̀lusalɛ̀m alendùw dèsò an sə kə Mughu ù te,

²³ (aŋghəa ghe tɔm naŋa an làŋ kə Mughu ù te enyəa, “Ghe lô wɛ à nûu a sûesʉ ghə̀n à dzə̀m nîi tsə̀ghà enyəa ghe lo ghî à zɔlɔ gho â Mughu ù te.”)

²⁴Ghe fə̀ a fughu nduūw sugho alendùw sâa fughu Kə̀zə̀ â fəgha kə təkàŋ kò, lâŋ kə Mughu ù te kə̀ n dêe enyəa ghe ki alefughuu mbuŋū to tə bə̀ghà ŋkāa kuŋ e təmbùŋu e bə̀ghà.

²⁵Êzə̄ŋ, noo kə ghûw kə li kə n lo tsəgha an Yɛ̀lusalɛ̀m, ghe fə̀ tɔɔ̄ŋ wə̄n enyəa à lò Simìon. Ghùw wən n lo ghûw ù tsəghatsəgha, boo fùghù sùghò â Zə̀ kò. Ù n ləəm tsə̀ghà tsuʼ fəla Zə̀ kə̀ bəghaasəa Ezə̀lɛ̂ a te. Zuʼ tə̀ Zɔlɔ tə n lo tsəgha ghèe wə̄n.

²⁶À n lo mò zə̀a fə̀ dzûŋ fi mafə̄ â wə̄n dzɛ̂ fùghù â wən enyəa, vʉ e kê wə̄n â mbàŋ sɔ̂ŋ fùghù yo mò ù kà də̀ŋ kə̀ tsuʼu kə Mughu ù te kə te kə kôʼ nùghù tsùghù dzə̀.

²⁷Zʉ̀ u te wə n tsom kɔʼ wə̄n, ù m bɔɔm kɔʼ kpeen ndùw mo ghê tselè Yɛso nìi nyə̌a wò sùghò Yɛso am be kə̀ ne ko, alebùghò fôʼn kɔʼ bughōo kə enaʼ ko; aŋghəa lâŋ kə̀ deē,

²⁸bəghà vʉ n toʼn wò Yɛso, fughu kəzɔ̀ŋlò â Zə̀ kò, taŋ aghəa dzàa tsùghu enyəa,

²⁹“Tsə̂ntə̀mbî, ghù n to kə̂a kə naŋa aŋghəa ghù fə̀ to naŋa, to ghù mo zəghaa kɔ̂ɔ fə̀ghà fo êzə̄ŋ fə kwəlā nyə nyàʼànyàʼà.

³⁰Nu mùghò ghùw wəla ghù fə̀ to naŋa enyəa ghù kè ghì a bəghaasə am bam e wə̄n kôʼ an sə ghaŋa a bə̀ghà,

³¹wəla ghù nì dê sə wo an sə kə aghì ghən a dzə̀m,

³² Tsə̀ zəla è dèe Toʼò zò â ghəa gho, fughuu sùghò ŋkɔʼso â ghî ghə Ezə̀lɛ̂ ghò, ghî ghə̀a.”

³³Dzughu zə n zuu tsele ghèe zə̀ an ŋgòʼ è ghəa ghəla Simìon taŋa an tuw kə wɛ vʉ̀.

³⁴Simìon n daŋso gɔ̀ɔŋ tsughu an tuw u ghee, dzɛ̀ â zə̀awɛ̀ enyəa, “Kòʼô, wɛ vʉ̀a ghɛ̀ koʼō fì, Zə̀ kə̌ wə̄n tum wò alebvʉ̀sò maʼà ndə̀m è aghì àsùghò alekɔʼso naŋa à li gho fɛ an naʼ zə Ezə̀lɛ̂. Ù kè lǒ tsə̌a Zə̀ kə̀ tum wo, ndə̀m è àghì kè tsɔ̂mlò,

³⁵dèe fùghuu wò mòʼn zəla ghe ki am fə̀ŋ tə ghee. Ghù ke e lo alo ese, ghəa e te e kê nyuɛʼɛ̀ ghù, e nyəā tâa ndûw ghù alo kəghoo.”

³⁶Wìzən ù ùshʉ̀gha ù lì n lo fughu ghe fə̀ tɔŋlo enyəa à lò Anà, wɛ ù Fanwɛ̀l, ghùw ù Ashà. À fə̀ tso lo noo kə yîzən, num fə̀ kpuw naŋā taʼà to mo ghe nî nàŋa ko eghue alo tənùu sə̀ghàmbəgha.

³⁷Ù n dòʼò ko êzə̀ aŋ wìikpūw noo kpe tsughu ghə̀m n tə̀nùu efāa à ghè tò tə chìakò. Ù m mughu zee ko am be kə̀ ne ko, baa èdzughu, kɔʼso Kə̀zə̀, gɔ̀ɔŋ zěe ndùw, gɔ̀ɔŋ bwǐi ndùw.

³⁸Yìzən vʉ̀ n daŋso bùghòo sùghò an nəgha e te zo, bùghò fùghu zɔ̀ɔŋ kə Kəzə̀, kə̀a sùghò ghəa a wɛ vʉ̀ â ghì yia ghe fə̀ ləə̄m tsəghà enyəa to Yɛ̀lusalɛ̀m mò zə kətuw.

³⁹A m bùghò ghe fwâʼ mɛʼɛ̀ kɔʼ ghəa gho an lwàŋ u Tsə̂ntə̀mbî, ghe n nùghù ndùw èbàm an tsə kə ghee, tɔɔŋ Nazalɛ̀t am mbùʼ è Galèlîi.

⁴⁰Wɛ vʉ̀ n nùghù bwìi è kɔʼ; ù ŋ ki utɔ, Zə̀ kə̀ n ti sugho an tuw kə wə̄n.

⁴¹ Êzə̄ŋ, ghê tsele Yɛso n ndûuw tsə̀ghà an Yɛ̀lusalɛ̀m nûutə̀nùu alendùw zə zə kə̀ Zə̄ŋsō naaŋ ko.

⁴²A m bùghò Yɛso noō kpe tsughu nûu tò eghə̄m à ghè tò tə bə̀ghà, ghe n nùghù kɔ̀ʼ ndùw alendùw zə zə kə te ko aŋghəa bughōo kə enaʼ kə deē.

⁴³A m bùghò tsuʼu ŋ kə̀zə n te n tsəghà tsughu, ghê tselè Yɛso n sə kwu ndùw dzì ebàm an Nazalɛ̀t, ghî fì, tɔɔŋ Yɛso, fə m bə̀n dòʼòdòʼò ndùw ebàm an Yɛ̀lusalɛ̀m. Ghê tsele n sô kǔuwn kwo yo.

⁴⁴Ghe m bwìi zěe ndùw tsuʼ fə̀ zəŋè fò fə mɔ̀ʼ, kwo ko enyəa Yɛso lǒ ghèe ghee. Ghe fi daŋso nùghù lɛ̌ɛn kè tsùghù nu wə̄n, kāʼ ndùw wə̄n alekəŋo kaŋlo am bvʉ̄a e tom a ghee àsùghò am bvʉ̄a e fən a ghee.

⁴⁵A m bùghò ghe kəŋ kê tsughu wə̄n, ghe n nùghù ndùw èbàm an Yɛ̀lusalɛ̀m alendùw kəŋ wə̄n.

⁴⁶Ghe ŋ kəŋ wə̄n ntsuʼu n təgha, ndùw kòʼ ndùw wə̄n am be kə̀ ne ko, mò vʉ̀a ù dòʼ am bvʉ̄a e ghê wàdè, zyə̂ən ghəa ghəla ghe kəaa, bvʉʉn sùghò ghee â ghəa gho.

⁴⁷Dzughu zə n zuu àghì aŋghəa ù zuūwkɛlɛ ghəa gho a te, tɔ̀ʼɔ̀ bɛ̀lɛ̀ sùghò.

⁴⁸Dzughu zə n zum sùghò ghê zə̀ ghəa ghe kôʼ tsughu wə̄n: zə̂ mo â wə̄n enyəa, “Ŋ wɛ, ghù ghàʼ ènyə am bàŋ kə fə̂ŋ naŋa bòʼ kwò, ghàʼ à tsùghò sə̀ laʼā kaāŋ ko luʼū to enyəa a kəŋo ghù a?”

⁴⁹Ù m bvʉ â ghee enyəa, “Ghɛ̀ mô mùghò kəŋo aŋ kwò, ghɛ̀ məghaa nù enyəa Ŋ̀ ki alelō alô bə̀ghà à?”

⁵⁰Ghe ŋ kè buʼù zuūwkɛlɛ̂ ghəa yìa ù kə̀a â ghee.

⁵¹Yɛso n nùghù tsùghù ndùw ghèe ghee an Nazalɛ̀t. Ù m bɔɔm zuuw ndùw ko â ghê tsele, zə̂ n tsôo mìin nǎaŋ tsə̀ghà sùghò ghəa a te gho am fə̂ŋ, e wə̄n zo.

⁵² Yɛso m məla wò aŋ ghûw, sə ghə n tee wò sùghò, ghî ghə n ləghaa wə̄n, Zə̀ kə n tsuʼu sùghò wə̄n.