Read Aghem Lûk 20 Bible Online

Lûk 20 - Aghem bible

Lûk 20

¹Tsuʼ ù li wo Yɛso n tsʉ̂a àghì an be kə̀ ne ko, fughuu sùghò ghee â Làbəlà è Kəzə̀, Tuw u təfɔ̀e wə̀ n ndùw sə̀ kɔ̀ʼ è wo ghèe ghê ghì à deē a kəlàŋ ghò àsùghò noo n lǐ mò,

²bvʉ â wə̄n enyəa, “Ghù kì daʼa kə̀ ghɛ ko aleghəəŋ ghəa ghə̀n à, à ghù â daʼa kə te kə fughu ndughoo?”

³Ù m bɛ̀lɛ̀ tsùghu ghee enyəa, “Na M̀ bɔŋɔ̄ bvʉā wô sughò ghɛ̀ â ghəa zo; dzǎa wò nlò â mùghò,

⁴Dzɔ̌n fə̀ ghî a fɛ fughuu â mùghù ŋ Kə̀zə̀ mò ù daʼa kə nî ghɛ̀, à fə̌ wə̄n â daʼa kə te kə fughu aghî ŋkāa Kə̀zə̀ a?”

⁵Ghe n daŋso tsɔ̀ŋ tsə̀əm kǎaŋ wò aŋ ghùe e ghee enyəa, “Abugho a dzɛ̂ tsughu enyəa, ‘À fə̀ fughu Kəzə̀, ù è so e so enyəa, ghɛ̀ ŋ kè sô boo mò à lǒ kwò à.’

⁶Abugho a dzɛ̂ tsughu sughò enyəa, ‘À fə̀ fughu aghî.’ Ghî ghən fɛ a dzə̀m sò təəm sɛ̀ alo atīa; nu ghe boo fughu tən nû enyəa Dzɔ̌n fə̀ kûum lo ghùwshʉ̀ghà ù Kə̀zə̀.”

⁷Ghe fi bɛlɛ̀ ndùw sùghò nǔ wə̄n enyəa, “Ghàʼ kwo yo luʼū wəla daʼa kə wə̄n kə fə̀ nughù wo a te.”

⁸Yɛso n dzɛ̀ ndùw sùghò â ghee enyəa, “À fi lo enyəa Ǹ yo sughò aledzɛ̀ luʼū wəla kaŋā ko kədaʼa kə nughù wô a te, â mùghò aleghəəŋ ghəa ghən gho.”

⁹ Yɛso ŋ kə̀a ndùw ghee â kwə̀ən kə ushwāʼ kən enyəa, “Ghùw ù lì fə̀ tam tsughu tələma an sum u wə̄n, tsòʼò fùghù sə̀ ndùw sum u te wo â ghì à li gho, nùghù sə̀ bwìnlò è nduw.

¹⁰A m bùghò ləma tə bùghò bâŋ tsughu, mughùsum n tùm ndùw tum a vʉ̀a ghì yia ghe mò tsoʼò nî ndûw sum wo enyəa ghe kûɛɛ tuū wô wə̄n â ləma tə̀ li to, ghî yì m bu tum zə̀, dzùm nùghù wə̄n kwêekwe.

¹¹Mughùsum vʉ̄ n tum kpeʼe ndùw tùm è lì, ghî yi mo è bu, ghəəŋ wə̄n â ghəa dənso â kətuw gho, dzùm nùghù wən kwêekwe.

¹²Ù n naam tum kpeʼe ndùw ko tum è lòʼ alo tənə̀gha tə təghā; ghî yì m bu wə̄n, nomso wə̄n, bòʼò màʼà sə̀ wò à beē.

¹³Mughùsum vʉ m bvʉ tsughu enyəa, ‘Mùghò è dzə̂ èndūghō? Ǹ tuu ndùw nǔ wɛ waŋā ù tsùʼu ù nùu wə̄n; zêekwò ghe sô nə̌əŋ tsəŋo nù sə a wə̄n gho.’

¹⁴Ghəa ghî yi tso fəghaān kôʼ kɔʼ wɛ ù wə̄n vʉ̀, ghe mo enyəa, ‘Wə̄n nyɔ̀ʼ lǒ zə̀a kə̀bè ù wə̄n; bùghò a wi, a lô kpaʼā nîi kele sum wə̄n.’

¹⁵Ghe n sè nùghù sə̀ ndùw wə̄n fughu an usum, ndùw bù wì è tsughu.” Yɛso n nùghù bvʉ̀ ndùw â ghì yi enyəa, “Ghɛ̀ moʼò enyəa to mughùsum vʉ bughò dzə̂ ênzə̂n â ghì ghə̀n à?

¹⁶Ù bùghò mìasò nǔ ghee a, ù daŋso nìi fughuu səā ndûw sum u te wo â ghì à nughù ghò.” Ghəa ghî yi zuw tsughu ghəa ghən, ghe mo enyəa, “Kà boo!”

¹⁷ Yɛso n nə̀m lɛ̌ɛn ko ghee enyə, dzɛ̀ â ghee enyəa, “Ghe laʼa kuūwn tɔ̄m naŋâ kwò am mwàʼsò kə Kəzə̀ enyəa, ‘Tia zəla ghê bɔ̀ɔtə̀ndughu mò shîaa maʼa, zə ŋ kòom bùghò dòʼò tia zə e būw zo a?’

¹⁸Ghùw wəla ù tsughu tsəghà bvʉ̂ an tia e te zo ù mò è sanlo; mò abugho tia e te e kuūwn bvʉ̂ tsughu a zəŋò ghùw, ghùw ù te mò è ndzaʼso.”

¹⁹Ghê dèekə̀làŋ ghə̀ ŋ kəŋo dzì ghèe ghê tuw u təfɔ̀e wò alekwuū təla kɔʼ wə̄n an nə̀gha e te zo, ghe n sô kǔuwn tsəŋo ghaʼa àghì; ghî a màʼa fə̀ zuwkɛlɛ̄ tsughu enyəa ù mò kwə̀ən kə ushwāʼ kən kə̀a â ghee.

²⁰Ghe n tsêe ko Yɛso, tum tsughu aghî enyəa ghe bughò doʼò tsughu tǒ làŋà tə aghì, ghee e nəəŋ ghəəŋ ko enyəa ghe ki yo moʼnlò è li zo. E ghì yia ghe mò tseē Yɛso fə̀ lo ko aletɔ̀ʼɔ̀ zyənlo enyəa ù lò kpaʼā kə̂aa boon tsughuu ghəa zo to ghe kwuū fughu wə̄n â gɔvə̀nò ù Lumà.

²¹Ghe m bvʉ̄ fì â wə̄n enyəa, “Wàdè, ghàʼ ŋ kùum kòʼ enyəa ghù kə̀aa èsəŋò, ghù vʉ̀a ghù tsʉ̀a dzɔ̂ɔ sughò ghî ghò, bàa yò kpiī wo, ghù lǎam bɔɔm zoʼnlo àghì an dzə̂ è Kə̀zə̀.

²²Lâŋ kə̀ sô yia dêe nù enyəa a e chuuw mwàʼsò kò â Kaesà ŋkāa kə dêe yò a?”

²³Ghəa Yɛso kòʼkɛlɛ̄ tsughu enyəa ghî yi sʉ̂a tɔ è li zo, ù n dzɛ̀ â ghee enyəa,

²⁴“Děe wò nlò mugho â kua u fəŋgɔ̀ʼ wò fɛ.” Ghe m fùghù è nduw. Ù m bvʉ â ghee enyəa, “Tuw kən a te à lò kə ndugho ko a, àsùghò zən à?” Ghe mo enyəa, “À lò kə Kaesà kò.”

²⁵Ù n dzɛ̀ â ghee enyəa, “E fi dêe enyəa ghɛ̀ è fughuu nduw fʉgha u Kaesà wò â Kaesà, fughuu ndùw u Kəzə̀ wò â Zə̀ kò.”

²⁶Ghe ŋ kəŋ kè dzì alekwu wə̄n an shwaʼ wən, ghî a màʼa fə̀ lô kaŋlō; dzughu zə n zum ghee an dzì zəla ù bɛ̀lɛ̀ ghəa gho a te. Ghe m bɔɔm dòʼò ko mɔŋ.

²⁷ Sadùwsîi tə̀ li to, tɔ̂ɔŋ ghì ghəla ghe dzɛ̂ enyəa a kpuuw kɔʼɔ sə̄a yo alo evʉ, ghe m bùghò kòʼ wò Yɛso tsuʼ ù li wo,

²⁸ ghe m bvʉ â wə̄n enyəa, “Wàdè, Musî fə̀ tɔm naŋa â ghàʼ enyəa abugho ghùw ki wi, vʉ̀a ù kpuw naŋa taʼà tsughu mò ù kà wɛ̀ a te dzə, wàazə̀ n nyə̀ŋsò tsùghu yìzən ù tè, dzə fughu kɔʼ wàazə̀ â wɛ gho a te.

²⁹Êzə̄ŋ, ghùw ù lì fə̀ ki waazə̂ a wə̄n à nûu ghò tǔu, ù n nì tsùghu wī, kpuw naŋatàʼà è tsughu mò ù kà wɛ̀ a te dzə;

³⁰wəla ù mə̀ghàa wo m bùghò nyə̀ŋsò tsùghù nughò vʉ̀, kè dzəā sughò wɛ̀ a te.

³¹Ù lì wən ŋ kòom bùghò è nyəŋso, è zum zo. Ghee ghən tǔu n nyə̀ŋsò tsə̀ghà wò nùghò vʉ̀, kpùw mɛ̀ʼɛ̀ è tsughu mò ghùw ù ghee u mɔ̀ʼ kà wɛ̀ a te dzə.

³²Yìzən vʉ m bùghò kpùw ndùw è sugho.

³³Êzə̄ŋ, bugho ghî ghə̀n à dzə̀m kè kɔʼ sə kɔʼ alo evʉ̄, nughò wə̄n kê lǒ wì ù ndùghò a tè à? Nu ghî ghə̀n sə̀ghàmbəgha maā wə̄n nî tsə̀ghà ŋgə̀a wò.”

³⁴Yɛso n daŋso dzɛ̀ â ghee enyəa, “Ghəa à niī ghə eghùe à lo ko â ghì a mbī gho.

³⁵Ghî ghəla ghe kuūwn kɔʼ kpē alekɔʼɔ̄sə̄ alo evʉ an tì kə te ko, ghe kê kòom nìi yò ghue zo fughu;

³⁶tɔŋlo enyəa ghe kê kòom kpùw yo, ghe sô lô eghəla ghèe ghê tsə̀təndə̄ghā tə Kəzə̀ tò àsùghò wɛ a Kəzə̀ ghò, bòʼ ghe ŋ kɔʼ sə alo evʉ.

³⁷ Ghuūghùe u Musî ù mafə̄ dê an də̀ŋò kəla zʉ e fə̀ bəghanlō a te am mwàʼsò kə wə̄n, ù fə̀ dê tsughu enyəa ghî a kpuuwn gho, ghe kɔʼɔ səa nù alo evʉ, aŋghəa u tɔŋɔ̄ tsughu Mughu ù te enyəa à lǒ Zə̀ kə Abə̀làhâm, Zə̀ kə Aezìk, Zə̀ kə Yàkɔ̂b.

³⁸Zə̀ kə̀ yo â ghì ghəla ghe kpuw dzə, Kə lo â ghì ghəla ghe naam lô â tuw ko, tɔŋlo enyəa â wə̄n, aghî à dzə̀m nǎam lò â tuw ko.”

³⁹Ghê dèekə̀làŋ à li ghə n daŋso bɛ̀lɛ̀ ndùw wə̄n enyəa, “Wàdè, ghù n nyɔ̀ʼ kə̀a.”

⁴⁰Nu ghe fə̀ koōm yo alelūʼ alebvʉ̄ wə̄n â ghəa zo.

⁴¹Yɛso n daŋso bvʉ â ghee enyəa, “Ghɛ̀ lo ênzə̂n alekəaa kaŋlo enyəa Kə̀lestò lǒ wɛ ù Dɛvìd lo?

⁴²Mò Dɛvìd, ghuūghùe u wə̄n u dzɛ̂ am Mwàʼsò kə Sâams enyəa, ‘Mughu ù te fə̀ dzɛ â Mughùbè waŋā enyəa, “Dòʼo tsughu ko fɛ̄ aŋ kwe waŋā ù təma wo,

⁴³tò Ŋ̀ kê ghəə̄ŋ tsughuu dzə̂ ghì à kətūw ghə̂a ghe è zuuw â ghù.”

⁴⁴Abugho Dɛvìd lò aletɔ̄ɔŋ Wə̄n enyəa à lò Mughu; Ù kòom lò ênzə̂n aledòʼò wɛ ù Dɛvìd à?

⁴⁵Yɛso n dzɛ̀ â tsə̀təndə̄ghā tə wə̄n to an sə kə ghì ghəla ghe fə̀ ti fughu a dzə̀m enyəa,

⁴⁶“E ghomlō nlò a zəŋo ghê dèekə̀làŋ, ghe tughūu ləghaa dàla tə̀ ne tən aledzə̀là, ləghaa sughò enyəa ghî ghə̀ è ŋgɔɔ zee wo ghee bugho ghe tsəghāa dzì; ghe tughuu ləghaa sùghò ndàŋ tə̀ ne to an ndùghènē, à gbəla ù ne wo an lùʼu tə̀ zɔʼɔ̄ tə aghì tò.

⁴⁷Ghe nɔɔm zə̂a fʉgha u yiikpūw, gɔ̀ɔŋ də̀ghàdə̀ghà tə egɔ̀ŋlò, ghe fwəlà sə a ghee gho. Ghe kê kòʼò kùu ndùw mùlùŋ.”