Read Aghem Lûk 22 Bible Online

Lûk 22 - Aghem bible

Lûk 22

¹ Zə kəla ghe zəā tsəghà bɛ kə̀là mbvùŋ buw a te, kəla ghe tɔŋlo enyəa à lò Ezəŋsō naŋā, kə n suu wò,

²à n lo mo tuw u təfɔ̀e ghèe ghê dèekə̀làŋ a kə̀ŋo dzì alewī Yɛso, sò kǔuwn tsəŋo ghaʼa àghì alewī wə̄n an ndɛ.

³Vʉatsə̄a ghə n daŋso tsom kɔʼ Dzudàs, tɔɔŋ Eskàlìot, wəla ù fə̀ lô sugho tsə̀ndə̄ghā an tsə̀təndə̄ghā tə Yɛso ten èghəm à ghè tò tə bə̀ghà.

⁴Dzudàs fi ndûw nyə̀ nû tsəm u Yɛso wò ghèe ghê tuw u təfɔ̀e wò àsùghò ghì à ne a təgbè ghò am be kə̀ ne ko.

⁵Ghe n lə̀ghà ndùw yòsò e wə̄n enyə, boo naŋa tsughu sùghò enyəa ghe ki aletsə̄ wə̄n.

⁶Dzudàs mo è boo, kàʼ ndùw alekə̄ŋ dzì alefèe fughu Yɛso â ghee an nə̀ghà zəla ndə̀m è àghì sò buw.

⁷Tsuʼ u zə kə kəbɛ kəla mbvùŋ buw a te n daŋso kəŋo è wo, tsuʼ wəla ghe ki alegbò ndzì è zə kə Ezəŋsō naŋā a te.

⁸Yɛso n tum tsughu Pità ghèe Dzɔ̌n â ghee enyəa, “Ndǔw ghəəŋ tsughu nlò fəghàzəa kə kəzə kə̀ Ezəŋsō naŋa ko, a lô zəā.”

⁹Ghe m bvʉ â wə̄n enyəa, “Ghù mò dzɛ̀ enyəa to a mô ndûw ghəəŋ ghɛ ghəa ghə̀n à?”

¹⁰Ù m bɛ̀lɛ̀ ndùw ghee enyəa, “Kòʼô, ghəa ghɛ̀ nyəā nduw enaʼ, ghɛ̀ sô kpěen dùw ghɛ̀ à ghê ghùw mò ù bòʼò kelê tom kə mmùghu; ghɛ̀ so nughu ndǔw nlò a bàâ wə̄n, ghɛ̀ nduw am be kəla ù sò nyəā nduw a te.

¹¹Ghɛ̀ dzɛ â mughùndùghù ù te enyəa, ‘Wàdè bvʉ̀ wò a ghù enyəa, Dzughu e ndughu zəla ghàʼ à ghê tsə̀təndə̄ghā taŋā tə sô bùghò zə̌a Zə̄ kə Zəŋsō naaŋ ko a te zɛ̂ɛ?’

¹²Ù sò daŋso dêe ndûw ghɛ̀ â dzughu e ndughu è ne zo edzūŋ an ndùghù è kɔ̀ʼɔ daŋso mo fʉgha u lo tən fughu; biaan naŋa tsughu nlò a fughu.”

¹³Ghe m bɔ̄ɔm ndùw kòʼ kpěen ndùw ko àghəa aŋghəa ù mò dzɛ̂ â ghee; ghe m biaan naŋa tsughu sùghò ghəa a zə kə Ezəŋsō naŋa fughu.

¹⁴A m bùghò nəgha e kpe, Yɛso n tsùghù dòʼò tsùghù ezə ghèe ghê tum tə wə̄n to.

¹⁵Ù n dzɛ̀ â ghee enyəa, “Mùgho mò ŋgee diī keē alezəā gûŋsò kɔʼ zə kə Ezəŋsō naŋā kən sɛ̀, Ǹ lo fanlo.

¹⁶Tɔŋlo enyəa ghəa Ǹ dzâa wô fɛ â ghɛ̀, Ŋ̀ kôom zə̀ yo à gɔ̀ʼɔ̀ ko mo Fɔ̂e u Kəzə̀ wə̀ m bəla kə nî.”

¹⁷Ù n daŋso nì kɔ̌ʼ wùa è nlʉ̀; a m bùghò ù fughu tsughu zɔ̀ɔŋ kò â Zə̀ kò, ù n dzɛ̀ tsùghù enyəa, “Nǐ nlò, ghɛ̀ muʼn tsəgha nduw aŋ ghùe zɛʼɛ̄;

¹⁸nu Ǹ dzɛ̂ â ghɛ̀ enyəa, alekaʼā nughù tsughu êzə̄ŋ, Ŋ̀ kê kòom mʉ̀ yo lʉ̀ mən mò, à kè gɔ̀ʼɔ̀ ko mò Fɔ̂e u Kəzə̀ wə̀ m bùghò.”

¹⁹Ù n daŋso nì kɔ̀ʼ sùghò kə̀bɛ; a m bùghò ù fughu tsughu sugho zɔ̀ɔŋ kò â Zə̀ kò, ù m bòʼ è tsughu fùghù ndùw â ghee dzàa tsùghu enyəa, “Zən lò gwən e ughùe zaŋā M̀ fughuu wo â ghɛ̀, ghɛ̀ è ghəəŋ tsəgha enyə, alemoʼn tsughuu mugho.”

²⁰Ù ŋ kòom nì kpèʼe kɔ̀ʼ sùghò wùa è nlʉ̀ an dziī è mɔ̀ʼɔ aŋghəa ghe zə kɔʼ kûun tò, dzâa tsùghuu enyəa, “Wùa è nlʉ̀ zəla Ŋ̀ kwə̂n fughu tsughu fɛ â ghɛ̀, à lǒ kàa m fughu mò â ghɛ̀; aŋ kàŋ taŋa.

²¹ Kòʼô, ghùw wəla ù sə̀ fêen fughuu mugho ù lò fɛ, ghàʼàwə̄n fɛ dzeŋe zəa ko a dzə̀m.

²²Wɛ ù Ghùw kwə̀la səa ko nù aŋghəa e doʼò boōn dzə êzə̀. Ghùw wəla ù fèe fughu wə̄n kuuwn lò an tsù.”

²³Ghe n daŋso kāʼ tsughu alebvʉ̄nlō aŋ ghùe e ghee alekele ghùw wəla ù lò alefòʼ ŋgòʼ è èghə̀a tò zən.

²⁴ Ghe ŋ kàʼ tsùghù sùghò alepfʉ edzughu aŋ ghùe e ghee alekele ghùw wəla ù tsə̀ghà sə ghee a dzə̀m.

²⁵Yɛso n daŋso dzɛ̀ tsùghù enyəa, “Dwə̀ŋ u tənàʼà u kɔʼ nyaʼa an tuw u aghì a ghee; ghe yia a ləghaa enyəa ghî ghə̀ è lɛɛn wo ghee tò ghî ghəla ghe yôsò ghî ghò.

²⁶ Â ghɛ̀, e kuuwn yò dzə̂ êzə̀, ghùw wəla ù tsə̀ghà sə an saʼ kɛʼɛ̄ lāam ki aledòʼò tsughu tǒ wɛ̂ɛtùghu, tuw kɛʼɛ kə kuūwn doʼò tsughu tǒ fəkɔ̂ɔ.

²⁷À tsə̀gha ghùw wəla ù dòʼ am bəla è zəa zo ŋkāa ghùw wəla ù lò kɔ̂ɔ fəla fə tsəghàsò fʉghàzəa wo a? À mgbàŋ yǒ wəla ù dǒʼ zəa a? M̀ fɛ kuuwn lò am bvʉa zɛʼɛ̄ tǒ fəkɔ̂ɔ.

²⁸Ghɛ̀ lo ghî ghə̀là ghɛ̀ kɔlɔ̄ kɔʼ wô fə̂ŋ tǒ sɛ̀ am fə̄m kaŋā.

²⁹M̀ fɛ fùghù wò ghɛ̀ â fɔ̀e wò to Bəghà fə̀ fughu â mùghò,

³⁰enyəa sɛ̀ e ke e dzeŋe zəa, mʉa sùghò nlʉ̀ am Fɔ̀e waŋa, dòʼ an ndàŋ tə udwə̀ŋ, saʼâ nàʼà tə Ezə̀lɛ̂ tə̀n èghəm à ghè tò tə bə̀ghà.”

³¹Yɛso n dzàŋ tɔ̀ŋɔ tsughu Pità enyəa, “Sǎemòn, Sǎemòn, zuw ghɛ à, Satàn n daʼa kə nɔe â Zə̀ kò enyəa e tsâʼà səā wô ghɛ̀,

³²Sǎemòn, mùghò ŋ kuuwn gɔ̀ŋlò an tuw kə̂a enyəa boo zəghà è lô dɔ̂ɔm tsughuu bvʉ̂a tsughuu. Abugho ghù teē wô ebàm an tsə̀n tə̀ghà, tughuso tsùghù sùghò waazughù ghò.”

³³Sǎemòn m fùghù ndùw fə̀n kə edzughu â wə̄n enyəa, “Mughùbè, mùghò m boo alekɔʼ ndùghùtsāʼ ghàʼ à ghù àsùghò alebùʼù kpuūw daŋso bugho à lò ko evʉ.”

³⁴Yɛso n dzɛ̀ enyəa, “Ǹ so Ǹ dzâa wô â ghǔ a Pità, â nùumbvʉ̄ aletɔ̄ŋ an tsuʼ u nɛ wən, à sò lǒ mò ghǔ m mùghò tue màʼà sə nəgha to tə təgha.”

³⁵Ù fi daŋso dzɛ̀ nù â ghee a dzə̀m enyəa, “Fɛ a mùgho fə̀ tum sə ghɛ kwêekwe mò ghɛ̀ bûʼ kì bən sugho yo kua wo, mbə̀ghà ŋkāa təgûw à, ghɛ̌ fə̀ kpaʼ nduw lāʼ nû fəgha ko fughu a?” Ghe mô e tue enyəa, “Ɛ̂ŋgaŋ!”

³⁶Ù fi dzɛ̂ nù â ghee enyəa, “Êzə̄ŋ, abugho ghùw ki mbə̀ghà fə ukʉa fo àsùghò mbə̀ghà, ù nìi kɔʼ. Abugho ghùw ki sughò yô nyə fo, ù fèe tsughu sàŋ è wə̄n, ù zue.

³⁷Ǹ so Ǹ dzâa wô â ghɛ̀ enyəa nəgha zə m kpē â Shwaʼ u Kəzə̀ wəla ghe fə̀ tɔm naŋa alenì kə̀bəla alo kətə̀ŋ kùu wò mùghò, mbuu ghe mò taŋ wə̄n aŋ kɔ̀n kə aghì à biigh gho; tɔŋlo enyəa fəgha kela ghe fə̀ tɔm bòʼ mùghò, kə ki alesə̄.”

³⁸Tsə̀təndə̄ghā tə wə̄n tə mo enyəa, “Mughùbè, ghàʼ ki nu nyə mò fɛ m bə̀ghà.” Ù n daŋso dzɛ̀ tsughu â ghee enyəa, “Zə̀gha màʼa ndùw nlò êzə̀.”

³⁹Ù n daŋso sə̀ wò fughu, bùghò tsə̀ghà kɔ̀ʼ ndùw aŋ kwàʼ u tə̀ Olèf, ghəa ù fə̀ kiī kɔʼɔ̄ tsəgha; ghèe ghê tsə̀təndə̄ghā tə wə̄n to, kaʼkəkaʼ.

⁴⁰A m bùghò ghe kɔʼ tɛ̂ tsughu fughu, Yɛso n dzɛ̀ tsùghù â ghee enyəa, “E gɔɔ̄ŋ nduw nlò enyəa ghəa è li e lô tsoō ghɛ, ghɛ̀ ghəəŋ ghəa è biigh zo.”

⁴¹Ù n zə̀ghà tsùghu ghee, nyà zə̀m ndùw ènyə tò kwe u etīa u ghûw, nyaʼa è tsughu, kàʼ ndùw alegɔ̀ŋlò enyəa,

⁴²“Tsele, abugho ghù tsə̌m, bòʼo nùghu mbùŋ kən aŋ ghùu mùghò; à kǔuwn yǒ an daʼa kaŋā, à lǒ an daʼa kə̂a.”

⁴³[8] [Tsə̀ndə̄ghā è Kə̀zə̀ m gbə̀n sə wò fughu a vʉ̀a wə̄n, dzə̀n tsughu wə̄n â sə̀ŋ zò.

⁴⁴Ù n tughuso kè tə̀ gɔɔ̄ŋ to à sə̀ mò alo kətuw, zuʼso ŋ wə̄n mə̀ n tsomlo enyə a ghueetsə̄ tò tuʼ u təkàŋ.]

⁴⁵A m bùghò ù sò gɔ̂ɔŋ mɛʼɛ̀ tsughu, ù n nùghù è kɔʼ bùghò kòʼ wò mò tsə̀təndə̄ghā tə wə̄n tə m bvʉ̀ mgbii to, ghe màʼa fə̀ lo mo ghe ŋge bughu aŋ ghùu ghəa gho a fəmso ghee.

⁴⁶Ù n dzɛ̀ â ghee enyəa, “Ghɛ̀ bwîi kwò? Nùghu gɔ̀ŋlo nlò, enyəa e kwo fəgha kə lô tsoō ghɛ enyəa ghɛ̀ ghəəŋ tsughu ghəa è biigh zo.”

⁴⁷Yɛso kà bùʼ mìasò ghəa à kəaa gho, nɔ̂e kə aghì kə n səŋo tēmē wò, mò à bù wò ghùw wəla ghe fə̀ tɔŋlo enyəa à lò Dzudàs, tsə̀ndə̄ghā an tsə̀təndə̄ghā tì èghəm à ghè tò tə bə̀ghà. Dzudàs ŋ kuʼso kə̄əŋ wò ko fì alemaāŋkelē wô Yɛso.

⁴⁸Yɛso n nùghù bvʉ tsughu â wə̄n enyəa, “Mo a Dzudàs, ghù Wɛ ù Ghùw so e fêe fughu aŋ ghùe è maaŋ zo a?”

⁴⁹A m bùghò tsə̀təndə̄ghā tə wə̄n tə kôʼ tɔ tsughu ghəa zəla e so e sə, ghe m bvʉ â wə̄n enyəa, “Mughùbè, ghàʼ sughùnlò alo nnyə a?”

⁵⁰Tsə̀ndə̄ghā e mɔ̀ʼ n daŋso shùaa ndùw fə̀nyə a zəŋò kɔ̀ kə Fɔ̀e è ne fo fə mɔ̀ʼ, chwɛ̀ màʼà ndùw tuūŋ kə wə̄n kə kwe ù təma wo.

⁵¹Yɛso m fwə̀n è ke, dzɛ̀ â ghee enyəa, “E kwo ko ghùw è kôom fôʼ.” Ù n daŋso mɔ̀m ndùw tuūŋ kə tûwbʉ̀ghà vʉ̀, kə mo è ke.

⁵²Yɛso n daŋso dzɛ̀ â ghì yia ghe fə̀ gboō kaāŋ wo wə̄n, tɔɔŋ tuw u təfɔ̀e, àsùghò gbè tə be kə̀ ne ko, à tsoʼ to enyəa, “Ghɛ̀ ènyə bòʼò sə̀ wò à nyə mò à mbàŋ tò, mò ghɛ̀ tsoo bòʼò kə̀ŋo ghùw ù tsɔ̀ŋɔ ŋkāa a?

⁵³Sɛ̌ fə̀ mgbaŋa dôʼn zeē tsəgha ko am be kə̀ ne ko ntsuʼu n dzə̀m, ghɛ̀ ŋ kè kwu mugho. Zən fɛ̄ kuuwn lò nəgha zɛʼɛ̄, nəgha e kədaʼa e waatsūʼ.”

⁵⁴Ghî yi n daŋso kwu kɔʼ Yɛso, nì ndùw wə̄n an ndughu alô Fɔ̀e è ne. Pità ŋ kuuwn dzùum ndùw ko ghee alo kədɛ̀.

⁵⁵A m bùghò ghe dzeŋe tsughu doʼò tsughu, mo ghe m kpàa wən wo an tsə̀tèʼè fə kəbē, Pità n ndùw dòʼò nyə tsughu am bvʉ e ghee.

⁵⁶Ghəa Pità sə̀ doʼ a vʉ̀a ùwə̀n, kɔ̂ɔ fə̀ zən fə̀ li fə fi kôʼ nù Pità, tɔ̀ʼ è fwe, nùghù dzɛ̀ tsùghù enyəa, “Ghùw wən mò lo sugho ghèe Yɛso.”

⁵⁷Pità n tùe màʼà ghəa yì, dzɛ̀ enyəa, “Êwɛ̀, Ŋ̀ kwò dzə yo wə̄n.”

⁵⁸Gha kə kâ sə, tûwbʉ̀ghà ù lì ŋ kòʼ kpèʼe tsùghù sùghò Pità, dzɛ̀ tsùghù enyəa, “Ghù wən lo sugho ghùw ù ghee.” Pità ŋ kuūwn bɛ̀lɛ̀ tsughu ko enyəa, “Tûw, Ǹ yo dzə ghùw ù ghee.”

⁵⁹Â tàm zə èzuuw alekɔʼɔ̄ sə, tûwbʉ̀ghà ù lì n nùghù kaʼ è tsughu, mgbɛɛ tùghùsò dzàa ko enyəa, “Kùmkùm, ghùw wən mò lo ghèe Yɛso, tɔŋlo enyəa wə̄n lò sugho ghùw ù Galèlîi.”

⁶⁰Pità ŋ kuuwn bɛ̀lɛ̀ tsùghu ko enyəa, “Tuw kə baa yo mugho aŋ ghəa yìa ghù kə̌aa fi a tûwbʉ̀ghà.” Nùumbvʉ n daŋso tɔŋɔ kɔʼɔ mo Pità nyǒʼn kə̀aa sə̌a wò ghəa yì.

⁶¹Mughu ù te ŋ kwə̄n sɔʼ lɛ̄ɛn ndùw Pità. Pità n tɛ̀ mòʼn wò shwaʼ u Mughu ù te wəla ù mò dzɛ̂ naŋā â wə̄n enyəa, “Â nùumbvʉ̄ alekɔʼɔ̄ tɔ̄ŋ nɛ, à sò lǒ mò ghǔ m mùghò tue màʼà tənəghā tə təgha.”

⁶²Pità n daŋso zə̀ghàa tsùghù kəbe, sə̀ dì tsòʼn tsughu enyə a beē, nʉghànʉ̀ghà.

⁶³Ghî ghəla ghe mò chîin Yɛso n daŋso kaʼ tsughu alesɔ̀ʼsò wə̄n, buu wə̄n.

⁶⁴Ghe m bɔ̀n nàŋa tsùghù sə a wə̄n, bu tsughu wə̄n, ghe mò à wə̀n à, “Səŋ ghùw wəla ù bu ghû.”

⁶⁵Ghe n tsoo sùuwn sùghò wə̄n fi an ndə̀mà tə aghəa tə̀ biigh to.

⁶⁶Ghəa tsuʼ u zuw teēn tsughu, noo mə̀ ènāʼ n te n nyə̄ dzeŋe tsughu aŋ kaŋsì ghèe ghê tuw u tə fɔ̀e wò àsùghò ghê dèekə̀làŋ. Ghe n nì wò Yɛso fughu a vʉ̀a ghee.

⁶⁷Ghe mo â Yɛso enyəa, “Dzǎa wò â ghàʼ; à lò ghû wɛ ù Kə̀zə̀ ù tsùʼu a?” Yɛso m bɛ̀lɛ̀ tsùghù enyəa, “Abugho Ǹ dzɛ̂ wo â ghɛ̀ enyəa, Ǹ lo wə̄n, ghɛ̀ sô yò alebōo â mùghò.

⁶⁸Abugho M̀ bûʼ bvʉ wô sugho â ghɛ̀, ghɛ̀ sô yò sughò alebɛ̀lɛ̀.

⁶⁹Alekuūwn nîi nughù tsughu êzə̄ŋ, ghe sô Wɛ ù Ghùw doʼsò nǎaŋ tsughuu aŋ kwe ù təma u Zə̀ Kə̀ Ghaʼa Kən Kə̀ Dzə̀m.”

⁷⁰Ghe n daŋso nùghù wǎʼn bvʉ tsughu enyəa, “Tò à fì lǒ enyəa ghù lǒ Wɛ ù Kə̀zə̀ a?” Yɛso n dzɛ̀ â ghee enyəa, “Ghɛ̀ dzɛ̂ êsəŋò enyəa Ǹ lò wə̄n.”

⁷¹Ghe fi daŋso dzɛ̀ tsùghù nû enyəa, “A kôom lə̀ghaa kpeʼê sùghò kwò? Ghuūghùe e sɛ̀ zə̀ n zuw fəgha kə̀là ù dzɛ̌.”