Read Aghem Lûk 23 Bible Online

Lûk 23 - Aghem bible

Lûk 23

¹Ghe a dzə̀m n daŋso nùghù è kɔʼ, nì ndùw Yɛso a vʉ̀a Paelɛ̀t;

²ghe fi kaʼ nù alekwu Yɛso, dzàa tsùghuu enyəa, “A kəŋ kwu sə kɔʼ enyəa tûwbʉ̀ghà wən tsʉ̂a bǒon ghì ghə enaʼ a sɛ̀, ù dzɛ̀ enyəa ghî à ka mwàʼsò kə̀ e chuuw â Kaesà, dzàa kaaŋ sùghò enyəa e lo Bəghambī, də̀ŋ kə̀ tsuʼu ko.”

³Paelɛ̀t fi bvʉ nù â Yɛso enyəa, “À lò ghû də̀ŋ kə Tə̀dzûu kò à?” Yɛso m bɛ̀lɛ̀ ndùw wə̄n enyəa, “À dzɛ̀ ghù.”

⁴Paelɛ̀t n daŋso dzɛ̀ â tuw u tə fɔ̀e wò, àsùghò nɔ̀e kə aghì chi ko enyəa, “Ŋ̀ kâ ghəa è biigh è li e kôʼ ghùw wə̄n ghəŋlo.”

⁵Ghe m mgbɛɛ ko enyəa, “Ù tiso naŋa kɔʼ naʼ e Dzùdîa e dzə̀m alo efwē an tsʉ̀ e wə̄n. Ù fə̀ ziī tsughu aŋ Galèlîi, vʉ̀ ù bùghò tɛ̂ wô fɛ.”

⁶Paelɛ̀t n zuw tsughu ghəa yì, bvʉ enyəa tûw wən lo ghùw ù Galèlîi à?

⁷Ghəa ù kəŋ kele kɔʼ enyəa Yɛso sə̀ aŋ kwù è Hɛlɔ̀d, ù n nì tùm ndùw wə̄n a vʉ̀a Hɛlɔ̀d. Hɛlɔ̀d fə̀ lo sugho an Yɛ̀lusalɛ̀m an tì kə te ko.

⁸Hɛlɔ̀d ŋ kòʼ tsùghù Yɛso, duʼn sə̄so tsughu enyə, ù màʼa fə̀ kiī zuūw tsəghà zɔ̂ŋ u Yɛso wò, ù m mbùuŋ kèe tsə̀ghà alekòʼ wə̄n. Ù fə̀ diī kêe enyəa to e mô koʼò tsughuu kô ghəa Yɛso dèe fənlo è li zo a te.

⁹Ù m bvʉʉ̄n ndə̀mà tə aghəa â Yɛso, Yɛso ŋ kè kuūwn bɛlɛ̀ èghəa.

¹⁰Tuw u təfɔ̀e wə̀ tee sə̀ è wo ghèe ghê dèekə̀làŋ, tɔ̀ʼɔ̀ tùghùsò sɔ̀ʼɔ̀ ndùw ko kə̀ghu a zəŋò Yɛso.

¹¹Ghê Hɛlɔ̀d ŋ kuuwn tə̀ma ko wə̄n â nduw ghèe ghê sùghugòʼ tə wə̄n to, ghəəŋ wə̄n â nyùɛʼɛ̀ tə aghəa to, nì wò dàla è sə̀ŋò, la kɔʼ wə̄n a te, daŋso nì tùm ndùw wən ebàm a vʉ̀a Paelɛ̀t.

¹²Tsūʼ fə̀ è fì, Hɛlɔ̀d ŋ kwū ten afən ghèe Paelɛ̀t, mo sûesʉ, ghe fə̀ buʼū koʼō tsəgha yo kàʼmèsʉ mò.

¹³Ghəa ghe kôom nî wô Yɛso a vʉ̀a Paelɛ̀t, Paelɛ̀t n tɔŋɔ tsughu kəbe, tuw u tə fɔ̀e wə̀ n lo a te, àsùghò dwə̀ŋ wò.

¹⁴Ù n dzɛ̀ â ghee enyəa, “Ghɛ̀ mǒ ghùw wə̄n ni wo a vʉ̀a mùghò enyəa ù tsʉ̀a bonlo àghì enyəa ghe e tiso naaŋ kɔʼɔ naʼ zo alo efwē, Mùghò ŋ wə̄n â ghəa a tɔ̂ʼ bvʉʉn fɛ an sə kɛʼɛ̄, yìa Ŋ̀ kəŋ kele kɔʼ sughò enyəa ghu kə wə̄n kə yo aŋ ghəa yìa ghɛ̀ kwuu wə̄n a te.

¹⁵Ghuūghùe ù Hɛlɔ̀d vʉa u kôʼ enyəa ù kà ghəa e bonlo, zə̀ lò e ghee ù kòom lɛnlō, nì tùm wò wə̄n fɛ èbàm a vʉ̀a sɛ̀. Alekùum nîi tsughu, ghùw wən kâ ghəa è li e bonlo tò ù è kpuw a te,

¹⁶Ǹ nwəən buu tsughuu ko nǔ wə̄n, Ǹ zəghà wə̄n ù nùghù.”

¹⁷[Zə n lo am bùghòo kə enaʼ kə ghee enyəa, abugho ghuw a zə kə Ezəŋsō naŋa a tsəghà kpe wo, Paelɛ̀t ŋ ki aletsʉā zəghàa tsughu ghùw ù ndùghùtsāʼ u mɔ̀ʼ â ghì ghə enaʼ a te gho.]

¹⁸Ghəa ghe tso zuw ndùw ghəa a Paelɛ̀t dzɛ̀ tsughu êzə̀, ghe m bvʉ̀ tsughu an tuw kə wə̄n enyəa, “Wi nyòoŋgwən vʉ̀, ghù biso tsʉ zəghāa wo ghāʼ â Bàlabâ.”

¹⁹(Bàlabâs fə̀ ndùghùtsāʼ kɔʼ kùu ndùw ndə̀m kə̀ li ko kə fə̀ sə enaʼ ù ŋ wī ghùw a te.)

²⁰A m bùghò Paelɛ̀t sò kuūwn ləghaa alezə̀ghàa Yɛso, ù n zʉ̀sò kə̀a kpèʼe ndùw àghəa â nɔe kə aghì chì ko.

²¹Ghe ŋ kəmà ndùw ko wə̄n enyəa, “Tə̀ghaa wə̄n! Tə̀ghaa wə̄n!”

²²Paelɛ̀t n dzɛ̀ â ghee, kɔʼɔ səa ndùw tə̀nəghā tə təgha enyəa, “Mò à, ù bòʼò ghə̌əŋ ghəa è biigh è ghɛ zo a? Ŋ̀ kâ dɔ̀m kòʼ ghəa zəla ù bonlō tò ù è kpuw a te. Ŋ̀ kuuwn kamso tsughu ko nǔ sàʼsàʼà fò an sə e wə̄n Ǹ zəghà ndûw wə̄n.”

²³Ghe m mgbɛɛ buʼn səa kɔʼɔ ko m̀bɔ̀ŋ enyəa ghe wi Yɛso. Paelɛ̀t n zùw ndùw â ghee.

²⁴Paelɛ̀t n daŋso tsə̀ghàsò tsùghù kəlâŋ enyəa ghe ndûw wi Yɛso aŋ ghəa nɔ̂e kə aghì chi mô ləghaa.

²⁵Ù n tsʉ̀ zə̀ghàa sə̀ wò Bàlabâs wəla naʼ e bvʉā, tɔɔŋ tûw wəla ù fə kɔʼ ndùghùtsāʼ kùu ndùw ndə̀m kəla kə fə sə enaʼ ghùw m kpuw a te, kuuwn nì fùghù sə̀ ndùw Yɛso â ghee aŋ ghəa ghe ləghaa.

²⁶Ghəa ghe nîi nughùun nduw â Yɛso alendùw təghàa, ghe n sə kpeen ndùw ghèe ghê Sǎemòn, ghùw ù Sèlên ù lì mò ù nùghù wò enaʼ. Ghe ŋ kwu tə̀msò tsughu wə̄n alo kədàŋlo enyəa ù bòʼò a bàâ Yɛso.

²⁷Yîzən à li ghə n lo am bvʉa e nɔ̀e kə aghì kəla kə fə̀ səŋō nduw a bàâ Yɛso, mbùuŋ dìi ndùw, sàʼsò ndùw èghue, ghe kwuso se zo a zə̄ŋò Yɛso.

²⁸Yɛso m fwə̀n tsùghù ughue, dzɛ̀ â ghee enyəa, “Yizen a Yɛ̀lusalɛ̀m ghò, kà nlò mugho dì, laam dǐi tsughu nlò ghue zɛʼɛ zo àsùghò wɛ ghɛʼɛ gho.

²⁹Tî kə̀ li kə kê bùghòo nù, ghî ghə̀ e kê dzaā enyəa, ‘Dzɔ̀ lò wìzən wəla ghe lù kɛ̀ kò, àsùghò ghəla ghe lo mo ghe kaam n dzə kòʼ àsùghò wəla ù lǒ mò ù kaam nyɔŋso kòʼ wɛ gho.’

³⁰Ghe lo daŋso kaʼā tsughu ghe e diī kɔʼɔ nduw â kàʼà tò enyəa, ‘Gbɛ̀lɛ bvʉ̌a wò nlò a zəŋo ghàʼ, tsən nǎn nlò ghaʼ.’

³¹Nu abugho ghe lo aleghəəŋ ghəa ghən a zəŋò kàʼ fə̀ zʉ̂ fò, ghe lo aletsoō boʼò ghəŋlo ênzə̂n abugho fə zum tsughu a?”

³²À n lo êzə̀ mò ghî à li a lo sugho a te a bə̀ghà ghe fə̀ zaʼ lâŋ kə enaʼ ko, sùghugòʼ tə̀ nî dâŋ tsə̀ghà sùghò ghee alendùw wi.

³³Ghəa ghe bughò tɛ̂ tsughu an lùʼù kəla ghe tɔŋlo enyəa, à lò Kaŋ kə kətūw, ghe n tə̀ghàa kɔ̀ʼ Yɛso a fughu ghèe ghê ghì yìa à bə̀ghà ghe fə̀ zaʼ lâŋ kò. U mɔ̀ʼ aŋ kwe u Yɛso ù təma wo, u mɔ̀ʼ aŋ kwe u Wə̄n ù kwû wò.

³⁴ Yɛso n nùghù dzɛ̀ tsughu enyəa, “Tsele waŋā, wuwmàʼà bo e ghee zo, nu ghe kwo dzə yo fəgha kəla ghe ghəŋlo ghè kò.” Ghe n nì dzùghù tsùghu ndzʉ̀ è wən aŋ ghùe e ghee mo ghe təm tsughu bòʼ.

³⁵ Ghî ghə̀ n ti, lɛ̂ɛn ghəa yì; ghî à ne ghə ŋ kuuwn təma ndùw wə̄n â nduw, dzàa ndùw enyəa, “Ù maā ghî à li a bəghasə, ù bəghāa səā tsughu ghue wə̄n êzəŋ, bugho ù lǒ Kə̀lestò, wɛ ù Kə̀zə̀ ù tsùʼu.”

³⁶ Sùghugòʼ tə̀ n təma sùghò wə̄n â nduw, ndùw fùghu wə̄n â faa kə nlʉ̀ kò,

³⁷dzàa ndùw enyəa, “Abugho ghù kùm lo də̀ŋ kə Tə̀dzûu kò, bəghasə tsughu ghue wʉ̀a wò.”

³⁸À n lo mo ghe ŋ ghəa à tɔɔ a fəghà an baaŋ kə tsə̌a, bɛ naŋa kɔʼ edzūŋ an tuw kə wə̄n, ghe n tɔm naŋa kɔʼ am baaŋ kə te ko enyəa, “KƏN LǑ DƏ̀Ŋ KƏ TƏ̀ DZÛU KƏ TĒ KŌ.”

³⁹Zàʼà kə̀làŋ u mɔ̀ʼ aŋ ghì yì a bə̀ghà ghe fə̀ bɛ naŋa sugho m nùghù tsɔ̀ kə̀a ndùw â Yɛso enyəa, “To ghù mgbàŋ lò Bəghambī lo a, so bəghasə tsughu ghue wʉ̀a wò a, ghù bəghasə daŋ tsəgha sugho ghaʼ à.”

⁴⁰Zàʼà kə̀làŋ ù lǐ vʉ̄ ŋ kuūwn geen ndùw wə̄n enyəa, “Ghù Zə̀ kə̀ tsəŋo yo a? Ghe ŋ ghù təghàa sùghò tǒ wə̄n.

⁴¹Sɛ̀ fɛ lǒ, sɛ̀ kûu fǎan kpēe to nù, bòʼ ghəa a sɛ̀ à ghəəŋ gho; tûw wən kâ ghəa e kuuwn bonlo.”

⁴²Ù n dzɛ̀ â Yɛso enyəa, “Yɛso ghù ke moʼn mugho abugho ghù kè lô am Fɔ̀e wʉ̀a.”

⁴³Yɛso n dzɛ̀ ndùw â wə̄n enyəa, “M̀ fɛ kùum dzàa wò nù â ghù, nɛ, ghàʼ à ghù sò lò a dzə̀m alo Kəwālā.”

⁴⁴ À fə̀ lo an zuuw è kɔʼɔ teme zo, ləm kə m bvʉ̀ tsughu luʼū tən tə̀ dzə̀m ndùw tɛ̀ ndùw an tàm tə ezuw tə təgha an zuw è bəŋo zo.

⁴⁵Aŋghəa lə̄m kən bvʉ̂ doʼō, Vʉa e zəa an Ndughu è Kə̀zə̀ è ne m gbə̀n bàa sə̀ tsùghù wò alo ugbà u bʉ̀ghà.

⁴⁶ Yɛso n daŋso dì sə̀ wò an dzə̂ è tughu enyəa, “Tsele waŋā, ghue waŋa vʉ̀a M̀ fughu wô â ghù.” Ghəa ù daŋso dî tsughu êzə̀, ù m mìa kɔ̀ʼ è wo.

⁴⁷A m bùghò êzəŋo komndzūghū vʉ kôʼ tsughu ghəa yia a sə kɔʼ, ù m fùghù ndùw ŋkɔʼso â Zə̀ kò, dzɛ̀ tsùghù enyəa, “Ghùw wən mò kuūm lo ghùw ù tsəghatsəgha.”

⁴⁸A m bùghò nɔ̂e kə aghì chia kə mò zûuŋ doʼō alelɛ̂ɛn ghəa yì, kôʼ tsughu ghəa yia a nî bəla ko, ghe ŋ kwəla nyəa ndùw èbàm mo ghe m fə̀ŋ tə̀ kwu kele.

⁴⁹ À n lo mo ghî ghəla ghe fə̀ kwo wə̄n fughu a dzə̀m nyàa tì ko alo kədɛ̀, lɛ̂ɛn ghəa yì ghèe ghê yìzən ghəla ghe mò nughù sə wo ghèe ghee aŋ Galèlîi.

⁵⁰Ghùw kaŋsì ù lì n lo sugho fughu ghe fə̀ tɔŋlo enyəa à lǒ Dzùghùsî, mò ù sə̀ wò an Àlìmatìa an naʼ e Tə̀dzûu. À fə̀ lo ghûw ù dzùŋ, lò sugho tsəghatsəgha.

⁵¹Bəghà wən ka fə̄ boo tsə̀m u ghee u te wo, kè boō sughò fəgha kəla ghe fə̀ fwaʼ ghè kò. Ù mò ləəm tsəgha Fɔ̂e u Kəzə̀.

⁵²Bəghà wən n ndùw bùʼ ndùw kə̀ghu â Paelɛ̀t enyəa ù zə̀ghà wô gwən e Yɛso to e ndûw tsəla.

⁵³Ù fi bughò nì sə̀ tsùghù wò nù gwən e te zo, nyəme bɔ̀m kɔ̀ʼ am gbà u kəmbəghalaŋ, ndùw nyə̀ŋsò nàŋa nyə̀ ndùw alo kəbùʼ ghe guw nyə̄ nduw alo kənɛ̄; mo ghe kaām ghǔw fughu n nyə tsəla kòʼ.

⁵⁴À fə̀ lo tsuʼ fəla ghe biaān naŋā zeē fʉgha wo alenùghù zəā zeē wô Tsuʼntsə̄ u ghee lo a te, ghe ŋ ki alekùʼù kaʼ alezə Tsuʼntsə̄ u Tə̀dzûu

⁵⁵Yîzən ghəla ghe mò nughù sə wo ghèe ghee aŋ Galèlîi n nùghù dàŋso ndùw sùghò a bàâ gwən e wə̄n zo, ndùw kòʼ tsùghù sùghò ghəa ghe tsəla naŋā gwən e wə̄n zo a te.

⁵⁶Ghe n daŋso kwə̀n nyə̀ ndùw èbàm, kwən biaan naŋa tsughu fə̀ghà n lə̌əm mò, àsùghò vʉ n lə̌əm mò. Ghe n nùghù zʉ̀ʉn zěe wò èghue Tsuʼntsə̄ u Tə̀dzûu, aŋghəa lâŋ kə̀ deē.