Read Aghem Lûk 24 Bible Online

Lûk 24 - Aghem bible

Lûk 24

¹Ghəa ghe zʉ̂ʉn zee tsughu ghue zo tsuʼ è fì, a ŋ kuuwn bùghò an tsuʼ u sûesʉ wo alo ewə̄n, ghe n chì kɔ̀ʼ utsuʼ, nùghù ndùw fughu alo eshìa, à fə̀ghà n lə̌əm mì.

²Ghe n ndùw fìi ndùw ko mo ghe n tia e bəŋso nùghù a fù u eshìa.

³Ghe mo e kôom nyə̌a ndùw nù, kè kôom kôʼ gwən e Mughu ù te.

⁴A m bùghò tuw kə sô naām kpuūw ghee aŋ ghə̀a ghə̀ è ghə̀n, ghe m fìi kɔ̀ʼ ayînû a bəghà, an ndzʉ̄ tə̀ nyəghaan to ghe ti a vʉ̀a ghee.

⁵Ghəa ghe ti fuʼū kum naŋā tsughu tuw wo a ghueetsə̄ am fə̀ŋ tə̀ tsəəŋ to, ghî yî m bvʉ â ghee enyəa, “À lǒ kwò ghɛ̀ sô dzə̂ən wô ghì a sə̀ à tughu gho am bvʉ e ghî a kpuuwn gho a?”

⁶(Ù kòom yò fɛ, ù n zòo nùghù kɔ̀ʼ alo evʉ̄). Mòʼn wò nlò ghəa ù fə kəa â ghɛ̀ aŋ Galèlîi.

⁷Ghəa ù fə̀ dzɛ̂ enyəa Wɛ ù Ghùw lo nyəa tsughuu aŋ ghu kə ghì à biigh gho, ghe lo təghàa wə̄n, ù lo kɔʼɔ səā kɔʼ alo abugho tsuʼu n kê kpe tsughu n təgha.

⁸Ghe n daŋso tɛ̀ mòʼn wò shwaʼ u wə̄n.

⁹A m bùghò ghe nughù wo fughu alo eshìa, ghe n nì kɔ̀ʼ ghəa ghən, buʼ tsughu kpe â tsoʼ tì to èghəm à ghè zò è mɔ̀ʼ, àsùghò â tsə̀təndə̄ghā tə̀ loʼ tì tə̀ dzə̀m.

¹⁰Yîzən ghəla ghe mò bughò naʼà wô ghəa gho â tum ti to, fə̀ lo ghê Mèle Màʼdàlêen ghèe Dzwǎnà àsùghò Mèle tɔɔŋ zə̂ Dzɛ̂ms, à yìzən à li gho.

¹¹Shwaʼ wən wə ŋ kuūwn bə̀n lǒ â ghee tò ghəa à bughoon gho, ghe ŋ kè naŋa kə̀tuŋlō a te.

¹²Pità n tsò kǔuwn nùghù ghàʼ nùghù kɔʼ ko nù sə̀ kə̀m ndùw ko fughu alo eshìa. Ghəa ù ndùw ghaā tsughu, ù ŋ kòʼ nyə̀ ndùw kô gbà u kəmbəghalaŋ, u tsô maʼà doʼō fughu. Ù ŋ kòom wò ebàm, kwə̀ən kə̀ ŋ kɔʼɔ wò wə̄n enyəa à è yia kûm kwò?

¹³Tsuʼ fə̀ mɔʼɔ̄ fia yîzən yi ndûw kôʼ ghəa yì, tsə̀təndə̄ghā tə Yɛso li tə n tsughuu ndùw an nàʼà fə Emà ghee a bə̀ghà, fə naʼà mò a buu tsughuu tə̀bəghaa sə̀ghàmbəgha alenùghù tsughu an Yɛ̀lusalɛ̀m ndùw tɛ̀ fùghù.

¹⁴Ghəa ghe bwîi tsughuu nduw, ghe ŋ kə̂aa tsùghuu ndùw lee tə aghəa tən tə̀ dzə̀m tə tsəghà kəŋo.

¹⁵Ghəa ghe kə̂aa tsughuu ndûw ghəa gho dzîidziī, ghuūghùe u Yɛso wə̀ ŋ kwuun wò ghee, dzeŋe nùghù ndùw ghèe ghee.

¹⁶Ghe ŋ kuūwn nùghù fə̀ŋ dòʼò è tsughu, ghe n yo alekòʼòkɛlɛ wə̄n.

¹⁷Ù m bvʉ â ghee enyəa, “Ghɛ̀ dzughu a biso pfʉ̄a wò aŋ kwò?” Ghe n daŋso temē è tsughu, alo emūŋē, ghe lo.

¹⁸Tsə̀ndə̄ghā e mɔ̀ʼ, tɔɔŋ Kə̀lopàs, n daŋso bɛ̀lɛ̀ tsùghu wə̄n enyəa, “Ghù kùʼù bwìin nyə̀ wò nù an naʼ e Yɛ̀lusalɛ̀m à, ghù sò məghāa ghəa ghəla a tsəghà kəŋo fughu an tsùʼù mən a?”

¹⁹“Ghəa à ghɛ gho?” Ù nùghù bvʉ tsughu. Ghe mo enyəa, “Ghəa a Yɛso, ghùw Nazalɛ̀t wəla ù mò lo tùghùtùghù kə ghùwshʉ̀gha kò aŋ ghəa a wə̄n à ghəəŋ gho, àsùghò aŋ ghəa a wə̄n à kəaa gho a vʉ̀a Zə̀ kò, àsùghò an sə kə ghì ghə̀n à dzə̀m.

²⁰Àsùghò ghəa tuw u tə fɔ̀e, ghèe ghê ghì ghəla ghe lɛɛn naʼ zo fə̀ nî kɔʼ wə̄n, fùghù sə̀ ndùw enyəa ghe nîi wi, àsùghò ghəa ghe mò nî təghàa kɔʼ wə̄n.

²¹À bùʼ kà yò ko êzə̀, a mò tso kuuwn kwo enyəa Zə̀ kə̌ fə̌ wə̄n tum enyəa ù bùghò bəghāa sə Ezə̀lɛ̂, a fɛ kòom lǒ, tsùʼu mə̀ m kpe n təgha aŋghəa ghəa a te a fə̀ sə.

²²Yîzən ghaʼa à li gho ghe mô gbə̀n lǒ fughu alo eshìa, ghe yia a fəghaan bùghò fwə̂n maʼà wô sughò tɔ waʼā wo.

²³Ghe yia a bughò dzɛ̂ wô enyəa ghe kâ gwən e wə̄n e kôʼ, fughu kpeʼe wò sùgho làbəlà enyəa ghe mô kòʼ tsə̀təndə̄ghā tə Kəzə̀ tə bə̀ghà a fughu tò ghəa a udzǒo, tia tə dzɛ̂ â ghee enyəa, Yɛso lò â sə à tughu gho.

²⁴Ghî ghaʼa à li gho ghàʼ à ghee mô dzeŋe lo a dzə̀m, ghe yia a nduw fughu alo eshìa bɔɔm ndùw kòʼ ndùw ko aŋ ghəa yia yîzən yi mô bughò naʼà wo, kè kôʼò sughò Yɛso.”

²⁵Yɛso fi nughù dzɛ̀ nù â ghee enyəa, “Chisɛɛ̂, làʼsò tə aghì tən, mo e tughuu tsə̀ghà kwò â ghɛ̀ alebôo shwaʼ u ghùwshʉ̀gha wəla ù fə̀ dzɛ̂ naŋā.

²⁶E fə̀ mgbaŋ yo enyəa Kə̀lestò ù te kê bùʼù fǎan tsughu dzə̀ nù sěe ù sò zəā Fɔ̂e u wə̄n wo a?”

²⁷Ù n daŋso zìi tsùghù am mwàʼsò kə Musî, teso kɔ̀ʼ ndùw ghəa a ghùe a wə̄n â ghee, kɔ̀ʼ kùm ndùw am mwàʼsò u ghîishʉ̀gha à li ghə̀n à dzə̀m.

²⁸A m bùghò ghe kuʼso ndûw naʼà fia ghe mò nduūw fughu, Yɛso m fòʼsò tsùghu tò ù so e tsəghàa daŋso.

²⁹Ghe n tɔ̀ʼ bùʼ kəghu â wə̄n enyəa, “Bwii dòʼò fɛ sɛ̀, nu zuw e sô sàaŋ ndùw nù; nəgha zə n ndùw.” Ù m bə̀ŋ ndùw sùghò alenyəa gaʼā bwiī tsughu ghèe ghee.

³⁰A m bùghò ù tsughu doʼò tsughu zə zo ghèe ghee, ù n nì kɔ̀ʼ kəbɛ, gɔ̀ɔŋ tsùghù a te, boʼn fughu tsughu â ghee.

³¹Tɔ u ghee wə n daŋso kwə̀n nyə̀ è wo, ghe n nùghù kòʼkɛ̀lɛ kɔʼ wə̄n; ù n daŋso saŋ tsughu fughu an sə kə ghee.

³²Ghe mo aŋ ghue e ghee enyəa, “Nyuūm kə mô mgbàŋa kɔʼɔ yo sɛ̀ aŋghəa ù mò bwîi kə̂aa wô shwaʼ u Kəzə̀ wò sɛ̀ à ghee an dziī a?”

³³Ghe n nùghù kɔ̀ʼ an nə̀gha e te zo, daŋso nùghù ndùw ebàm an Yɛ̀lusalɛ̀m, ndùw kòʼ ndùw tsoʼ tə̀ li tì èghəm à ghè zò e mɔ̀ʼ, àsùghò ghì à li yia ghèe ghee mò dzeŋe lo a dzə̀m.

³⁴Ghe n dzɛ̀ â ghì yì a bə̀ghà enyəa, “Mughùbè ŋ kùm zòo alo evʉ, vʉ̀ ù ndùw dê ghue wo â Sǎemòn!”

³⁵Tsə̀təndə̄ghā tì tə̀ bə̀ghà n dzɛ̀ ndùw sùghò fəgha kəla kə mô sə an dziī a zəŋò ghee, dzɛ̀ sùghò aŋghəa ghe mô nughù kôʼkɛlɛ̄ kɔʼ wə̄n ghəa ù boʼn fughu tsughu ghee â bɛ ko.

³⁶Ghəa ghe kə̂aa ghəa yì èzə̀, ghuūghùe u Yɛso wə̀ m fùw sə kɔʼ fughu an saʼ kə ghee, dzɛ̀ â ghee enyəa, “Ghɛ̀ kele bughuso zo fɛ.”

³⁷Ghe n tɛ̀ è tsəŋ, enyəa ghe wɛɛ kòʼ kəzəŋso.

³⁸Yɛso n dzɛ̀ â ghee enyəa, “À ghɛ̀ fəmsô kwò, tuw kə ghɛ kpuūw aŋ kwò?

³⁹Kòʼ nlò ghu ghaŋa gho àsùghò ghuw ghaŋa gho a, wən kùm lò mugho, mɔ̌ɔ zuw tsughu nlò mugho aŋ ghu; nu zəŋsō kə ghûw kə̀ ki yo gho wo àsùghò nyòm è ùghùe tò aŋghəa Ŋ̀ ki fɛ.

⁴⁰A m bùghò ù dzɛ̀ tsughu êzə̀, ù n dè ndùw ghu a wə̄n, à ghuw a wə̄n gho â ghee.”

⁴¹Ghe mô e duʼnlo, zə n tughuu ghaʼa â ghee aleboo, dzughu e màʼa fə̀ naam zuū ghee, Yɛso m bvʉ tsughu â ghee enyəa, “Ghɛ̀ kpaʼ ki nû fəghàzəa ko fɛ a?”

⁴²Ghe n dzə̀ fùghù ndùw wə̄n â tɔ̀ŋ kə etsə̄ghā kə̀ nyɔʼɔ̄ ko,

⁴³ù n nì pfʉ kɔʼ fughu an sə kə ghee.

⁴⁴Ù daŋso dzɛ̀ â ghee enyəa, “Wən lò shwaʼ waŋa wəla mùgho fə dzɛ̂ â ghɛ̀ ghəa mùgho fə̀ naam lo sɛ̀, enyəa ghəa ghə̀n à dzə̀m ghe tɔm naŋā am mwàʼsò kə Musî, àsùghò am mwàʼsò wəla ghiīshʉ̀ghà à fə̀ tɔm naŋā, àsùghò mwàʼsò kə Sâams kò kùu wo mùghò, a ki alenì kəbəla.”

⁴⁵Ù fi daŋso tsʉ kɔʼ nû tɔ u ghee wo alezuūwkɛlɛ̄ tsughu shwaʼ u Kəzə̀,

⁴⁶ù n dzɛ̀ â ghee enyəa, “Ghe tɔm naŋa enyəa, Kə̀lestò ù te ki alefala tsughuu dzə̂ sěe ù kè kɔʼɔ səā alo evʉ̄ abugho tsuʼu m kpe tsughu n təgha.

⁴⁷Àsùghò enyəa, ghe kê kì alenaʼn nduūŋ nduw an zən e wə̄n, â nàʼà tə̀n tə̀ dzə̀m alenìi nughù tsughu an Yɛ̀lusalɛ̀m, enyəa ghî à tiī kuwnlo am bòo tə ghee, tò Zə̀ kə̀ ghuūw maʼà bòo tə̀ ghee.

⁴⁸Ghɛ̀ ŋ ghəa ghən kôʼ, ghɛ̀ lo e teso dzâa ndûw â ghì ghò.

⁴⁹ Kòʼo sùghô, Ǹ tuu wò nù to kəla Bəghà fə̀ to naŋā â ghɛ̀, kuuwn bɔ̄ɔm dòʼo tsughu ko nlò fɛ, ghɛ̀ ni kɔʼ dzə daʼa ko aŋ ghùu Zə̀ kò.”

⁵⁰Yɛso n daŋso lɔ̄ʼsō sè nùghù ndùw tsə̀təndə̄ghā tə wə̄n êzə̄ŋ aŋ kàlà tə Bɛtānì, kele kɔʼ aghu edzuŋ, bughuso tsughu ghee.

⁵¹A m bùghò ù naam fughuu ghee â ghu kə̀ saa ko êzə̀, Zə̀ kə̀ n nì nùghù kɔ̀ʼ ndùw wə̄n alo kəwālā.

⁵²Ghe ŋ kɔʼso wə̄n, kòom nùghù nyə̀ wò èbàm an Yɛ̀lusalɛ̀m tsoʼnlo etsoʼnlo.

⁵³Ghe m mughu zēe tsəgha ko am be kə̀ ne ko, ghe ndûw kɔʼso Zə̀ kò.