Read Aghem Lûk 4 Bible Online

Lûk 4 - Aghem bible

Lûk 4

¹Yɛso mo e nughùun wò èbàm a fughu an Dzodàn mo Zuʼ tə̀ Zɔlɔ tə ŋ wə̄n am fə̂ŋ nyəən tsughu, tə n tsom kɔʼ wə̄n, ù n nùghù sòʼ ndùw aŋ ŋgwən.

²Vʉatsə̄a ghə n tsoōm kaaŋ wə̄n fughu aŋ ghə̀m mə̀ ntsuʼu n chìakò. Ù m mughu ko a fughu êzə̀, ŋgəmso zəa yo fəgha ko an tsuʼu n te mò. Ghəa tsuʼu n te n tsəghà tsughu, dzə̀ŋ n ndùw bàʼ wò wə̄n.

³Vʉatsə̄a yi ghə n daŋso dzɛ̀ â wə̄n enyəa, “Abugho e lô enyəa ghù lǒ Wɛ ù Kə̀zə̀, dzǎa tsughu enyəa tia zən fə̀là kɔʼ kəbɛ tò ghù zə.”

⁴ Yɛso m bɛ̀lɛ̀ ndùw wə̄n enyəa, “Ghe tɔm naŋa am mwàʼsò kə Kəzə̀ enyəa, ‘Ghùw kà mùghù ko yo alo kəbɛ̄.’ ”

⁵Vʉatsə̄a yi ghə n nì kɔ̀ʼ ndùw Yɛso an ndɔ̀ŋɔ̀ndɔ̀ŋɔ̀ fə ukwàʼ, a ghee aletsoō kɔʼɔ̄ tēe mò ù n wə̄n â nàʼà tə mbī tən dè ŋgə̀a wò tə dzə̀m,

⁶dzɛ̀ â wə̄n enyəa, “M̀ fughuu nù ghû a daʼa ko alesaʼa naʼà tə̀n tə̀ dzə̀m àsùghò kɔʼso n te mò, nu ghe mò â mùghò fughu nû, to m fughu â ghùw abugho Ǹ tsəm.

⁷Abugho ghù təm wo ŋguʼ to a tsəlà mùghò, ghù kele mɛʼɛ u dzə̀m.”

⁸ Yɛso m bɛ̀lɛ̀ ndùw enyəa, “Ghe tɔm naŋa am mwàʼsò kə Kəzə̀ enyəa, ‘E kɔʼso ko Mughu ù te, Zə̀ kə̀a, ghù è bɔɔm fwaʼā ko â wə̄n.’”

⁹Vʉatsə̄a a te ghə n daŋso nì ndùw Yɛso an Yɛ̀lusalɛ̀m, nì kɔ̀ʼ ndùw wə̄n edzūŋ èdzùŋ an tuw kə ndughu è Kə̀zə̀ e ne, dzɛ̀ â wə̄n enyəa, “Abugho ghù lǒ Wɛ ù Kə̀zə̀, tǎa sə tsùghù ndùw fɛ;

¹⁰ nu ghe ŋgəəŋ tɔ̄m naŋa sùghò am mwàʼsò kə Kəzə̀ enyəa ‘Ù kè tuū tum tə Wə̄n, tə e chiīn ghû,

¹¹ghe kê bɔɔ̄m toʼn kele kɔʼ ghû ènyə aŋ ghu, ghe ghômlò enyəa ghù lò tsɔ̂ɔ ghuw ko alo etīa.’”

¹² Yɛso n daŋso bɛ̀lɛ̀ ndùw wə̄n enyəa, “Ghe tɔm naŋa am mwàʼsò kə Kəzə̀ enyəa, ‘Ghù kì yo aleboon fə̀ŋ è Mughu ù te, Zə̀ kə̀a.’ ”

¹³A m bùghò vʉatsə̄a yi də̂m kê tsughu aletsōom Yɛso an ndə̀mà tə tədzǐi, a mô è nughù, kwɛ̀ nàŋa ndùw wə̄n bugho ndzɔ̀ŋ kè dzɔ.

¹⁴Yɛso n nùghù nyə̀ ndùw èbàm aŋ Galèlîi an daʼa kə Zūʼ tə te to, zɔ̂ŋ u wə̄n wə̄ ŋ kùm mìasò nyə̀ ndùw alo tə ŋgwə̀là.

¹⁵Ù n zoʼn kaŋlo àghì aŋ ghəa a Kəzə̀ an Ndughutə̀ne tə Tə̀dzûu tò, ghî ghə̀là a dzə̀m ŋ kɛɛ wə̄n.

¹⁶Ù n nùghù ndùw an Nazalɛ̀t, an naʼ zəla ù fə̀ noō kɔʼ wo a te. Ù n ndùw nyə̀ ndùw an Ndùghènē è Tə̀dzûu Tsuʼntsə̄, à màʼà lô bughoo kə wə̄n. Ù n nùghù těe kɔʼ aletɔŋlo àghəa,

¹⁷ghe m fùghù ndùw wə̄n â mwàʼsò kə Èzayà kò, tɔɔŋ ghùwshʉ̀gha. Ù n tsʉ̀ ndùw an lùʼù kəla ghe tɔm naŋā enyəa,

¹⁸ “Zuʼ tə Mughù ù te tə kê lò a zəŋò mùghò, bòʼ ù mò mugho tughu tsughu alenaʼn nduw Làbəlà è Dzùŋ â ghì à laa gho. Ù mùghò tum wò alenàʼà ndûw enyəa ghî ghəla ghe mò kɔʼ ndùghùtsāʼ mo ghe mǒ ghee kwu an tsam lo səā nù, n naʼà ndûw sughò enyəa ghî à foō a lo kòʼò àsə, àsùghò alebəghāa sə ghî ghəla ghe zuūw ŋgoʼ aŋ ghùu ghì à li gho.

¹⁹Ù mùghò tum wò alebùghò naʼà wô enyəa nəgha zə m kpe zəla Mughu ù te so bəghāa sə ghî a wə̄n.”

²⁰Ghəa ù tɔɔŋ mɛʼɛ̀ tsughu, ù n daŋso nyəme kɔʼ mwàʼsò kə te ko, fùghù ndùw èbàm â ghùw ù nàŋlō, tsùghù gàʼ dòʼò è tsughu; sə a aghì yì a dzə̀m fughu an Ndùghènē n lo ko a zəŋò wə̄n.

²¹Ù ŋ kāʼ ndùw aledzɛ̀ â ghee enyəa, “Shwaʼ u Kəzə̀ wəla ghɛ̀ zuw nɛ, ghəa a te ghə m bəla kə nî.”

²²Ghee a dzə̀m m fughu kɛɛ u wə̄n, kwə̀ən kə̀ ŋ kɔʼɔ ghee an ŋgòʼ è shwaʼ u nʉ̀ghà ù kuuw wəla ù sə wo an dzughu e wə̄n, ghe m bvʉ enyəa, “Wən mgbàŋ yǒ wɛ ù Dzùghùsî à?”

²³Ù n dzɛ̀ à ghee enyəa, “Ŋ̀ kwo nû enyəa ghɛ̀ sô kwə̀ən dzàa wò â mùghò enyəa, ‘Ghùwŋgàŋ, sǒ baaŋ tsughu ghue wʉ̀a wǒ a, ghəəŋ tsughu sùghò ghəa ghə̀là ghàʼ zuw enyəa ghù mò ghəŋlo aŋ Kàpɛnùm fɛ an naʼ zəghà.’ ”

²⁴ Ù n daŋso dzɛ̀ tsùghù enyəa, “M̀ fɛ kùum dzàa wò nù â ghɛ̀, ghùwshʉ̀ghà ù lì yo ghe niī tò kəfəgha an naʼ e wə̄n.

²⁵ M̀ fɛ kùu dzàa wò êsəŋò â ghɛ̀ enyəa, ndə̀m è yiikpuw a fə̀ lo tsəgha an Ezə̀lɛ̂ an tì kə Èlaedzà, ghəa ghuuw e fə̀ kə̂a kɔʼ dòʼò tə̀nùu tə təgha àsùghò ndzɔŋɔ to tǔu mo e tsughuu yo. An tì kə te ko, dzə̀ŋ n nyə fughu alo enaʼ, tɔŋɔ ndɔ̄ŋ,

²⁶ Zə̀ kə̀ ka fə Èlaedzà dɔ̂ɔm tum a vʉ̀a wìkpuw u mɔ̀ʼ, tsə̀ghàa sə̌a ko yo wìkpuw wəla ù fə̀ lo aŋ kɔn u Zalɛ̄fàt, an naʼ e Sidɔ̀n.

²⁷ An tì kə ghùwshʉ̀gha Elishà, kɔ̂n kə ghî a tətsùghò kə̀ n dûuw sùghò alo Ezə̀lɛ̂, Zə̀ kə̀ ŋ kè baŋlo u mɔ̀ʼ a te, tsə̀ghàa sə̌a ko yo Naamàn, ghùw Silìa.”

²⁸Ghəa ghî yi an Ndùghènē è Tə̀dzûu zuw ghəa yì, ghe ŋ ŋgɛlɛ səso tsughu enyə,

²⁹daŋso ghàʼ nùghù è kɔʼ, sè kɔ̀ʼ ndùw wə̄n an tuw kə ukwàʼ â ŋgwəlā gho aŋ kwàʼ wəla naʼ e fə̀ bəgha doʼo a te, alendùw maʼà tsughuu ndûw wən alô fə̀bɛʼɛ̀bigh.

³⁰Ù ŋ kòom mgbàŋ bwìi tsə̀ghà sə̀ ndùw ko enyə am faʼnlo e ghee, nùghù ndùw e wə̄n zo.

³¹Yɛso n daŋso nùghù tsùghù ndùw aŋ Kàpɛnùm, naʼà fə̀ Galèlîi fə̀ li fo, ù n zoʼnlo àghì fughu Tsuʼntsə̄ u ghee.

³² Dzughu zə n zuu ghee an ŋgòʼ è dzì zəla ù zoʼn ghî ghò a te, nu shwaʼ u wə̄n u fə̀ lo dò kə ushwāʼ.

³³An Ndùghène è Tə̀dzûu è te, ghùw ù lì n lo fughu ù ki zə̀a fə̀ biigh fo a zəŋo ughùe, ù ŋ ke kəbɔ̂ŋ,

³⁴“Hɛɛ̄! kà ghaʼ fəmso, sɛ̀ ki kwò a Yɛso, ghùw ù Nazalɛ̀t wə̄n a, ghù bùghò alebùghò ləŋe ghàʼ à? Ŋ̀ kwo nû ghû; ghù lǒ Ghùw ù Kə̀zə̀ ù Zɔ̀lɔ!”

³⁵Yɛso ŋ ke naŋa ndùw wə̄n, dzɛ̀ tsùghù enyəa, “Dòʼò mɔŋ, ghù mba sə nughu a zəŋò ghùw vʉ̀!” Zʉ̀ u te wə m bòʼò tə̀m wò ghùw vʉ̀ a ghueetsə̄, a fughu an sə kə aghì, nùghù sə̀ wò a zəŋò wə̄n mo kə kâ wə̄n nomso.

³⁶Dzughu zə n zum ghî a te gho a dzə̀m, chìa m bvʉ â kə̀chìa enyəa, “Wən lǒ ŋgòʼ è shwàʼ ù ghɛ wo ēnyə à? Tɔŋlo enyəa tûw wən dôo tsə̀ghàsò kə̀làŋ â zʉ̀ ù biigh wò, vʉa u səā nughùun wo.”

³⁷Zhɔ̂ŋ u Yɛso wə̀ n nyəŋ ŋgəa tsughu naʼà təla tə kɔʼɔ̄ twee wo ghèe ghê naʼ e Kàpɛnùm zò.

³⁸Yɛso n zə̀ghà tsùghu an Ndùghènē è Tə̀dzûu, nùghù ndùw an ndughu alô Sǎemòn. À n lo mo ghue ù tughu u ki nə̀ghàwì ù Sǎemòn. Ghe n dì dzɛ̀ ndùw ghəa e te zo â Yɛso.

³⁹Yɛso n səəŋ tee kəŋo ndùw an tuw kə nə̀ghàwì ù Sǎemòn, ke tsughu ghue u te wo, wə n zə̀ghàa tsùghu wə̄n. Nə̀ghàwì ù Sǎemòn n daŋso nùghù è kɔʼ, kàʼ ndùw fʉ̀ghàzəa ù tsə̀ghàsò wo â ghê Yɛso à tsə̀təndə̄ghā tə wə̄n to.

⁴⁰A m bùghò zuw e sâaŋ tsughuu nduw, ghî ghəla ghe mò ki ghî à dzaāŋ gho, ghe n nì wò ghee a vʉ̀a Yɛso. Ù m mɔ̂ɔ tsùghuu ko kə̀chìa, ù n tughuu kɔʼɔ.

⁴¹Zʉ̀ wən səa nùghùun lò a zəŋò ndə̀mà tə aghì tò, zʉ̀ u te wə m buʼn səa wò m̀bɔ̀ŋ, dzàa tsùghuu enyəa “Ghù lǒ Wɛ ù Kə̀zə̀!” Ù ŋ kē ghee, kè boo enyəa ghe kɔʼɔ̄ kūɛɛ, tɔŋlo enyəa ghe mò kwo nû enyəa ù lò Bəghambī.

⁴²A m bùghò tsuʼ u zuw tsughu, ù n nyɛʼɛ nè nùghù è tsughu, ndùw dòʼò ndùw an lùʼû kə̀ li ko wə̄n ànəŋ. Ghî ghə̀ ŋ kəŋ kaaŋ ko wə̄n enyə, ndùw kòʼ è nduw. Ghe n dəmà enyəa to ù kà mò ghee zə̀ghàa tàʼà.

⁴³Ù m fwə̀n dzɛ̀ â ghee enyəa, “Ŋ̀ ki alendùw bəŋo fughuu sughò Làbəlà è fɔ̀e u Kəzə̀ zən â nàʼà tə̀ li to sughò, tɔŋlo enyəa Zə̀ kə fə̀ mugho fɛ tum wo bòʼ fwàʼ kə̀ è chì.”

⁴⁴Yɛso n daŋso nùghù è tsughu, nàʼn kǎaŋ ndùw tùm è te an Dzùdîa an ndughutə̀ne tə ghee to.