Read Aghem Lûk 6 Bible Online

Lûk 6 - Aghem bible

Lûk 6

¹ Tsuʼntsə̄ u Tə̀dzûu ù li wo, Yɛso n tsəghàa dzì am bəghaa zə asāŋ è li zo, tsə̀təndə̄ghā tə wə̄n tə ŋ kə̂aan pfʉ̌a ndùw tuw wə asāŋ.

²Falàsîi tə̀ li tə m bvʉ â ghee enyəa, “Ghɛ̌ chi ghaa kə̀ kwò, ghɛ̀ sô ghəə̄ŋ ghəa ghəla lâŋ kə̀ dòʼŋkè boo nɛ Tsuʼntsə̄ a?”

³Yɛso m bɛ̀lɛ̀ ndùw enyəa, “Ghɛ̀ kaam tɔɔŋ ghəa ghəla Dɛvìd fə̀ ghəŋlo a, ghəa dzə̀ŋ fə̀ za tsughu wə̄n a, à ghì ghə̀là ghèe ghee fə̀ lo a dzə̀m à?

⁴ Dɛvìd fə̀ nyə nduw an ndùghù è Kə̀zə̀, nyə̀ nì zə kɔʼ bɛ kə Kəzə̀ kəla à ki ko fɔ̀e tò alezə̄, fùghù tsùghù sùghò ghì ghə̀là ghèe ghee fə̀ lo a dzə̀m.”

⁵Ù n dzɛ̀ â ghee enyəa, “Wɛ ù Ghùw lò mughu ù Tsǔʼntsə̄.”

⁶Tsuʼntsə̄ ù li wo sughò, Yɛso n nyə̀ ndùw alenyəa tsʉ̂ àghì an Ndùghène è Tə̀dzûu, bəghà ù lì n lo a fughu mo kwe u wə̄n ù təma u kpuw dòʼò nù.

⁷Tə̀ Falàsîi ghèe ghê dèekə̀làŋ à li ghə ŋ welè lɛ̌ɛn ko enyəa Yɛso sə̀ kpɛ̀ʼɛ baaŋ tsughu nǔ ghùw Tsuʼntsə̄ a, to ghe kwu wə̄n.

⁸Ù n lo mò ù mâa kèle zìi fəgha kela ghe moʼō â ghè kò, ù n dzɛ̀ â kpùuwkə̀kwe vʉ̄ enyəa, “Tee kəŋo wò fɛ.” Ghùw vʉ ndùw těe ndùw fughu.

⁹Yɛso n dzɛ̀ â ghee enyəa, “Ǹ so M̀ bvʉā wô a ghɛ̀ enyəa, à è yia lo nû lâŋ kò à, aleghəŋlo èdzɔ̀ Tsuʼntsə̄ ŋkāa aleghəŋlo èbo à? Alebəghaasə ghùw ŋkāa alewī ghǔw a?”

¹⁰Ù n daŋso lɛɛn kaaŋ wò ndughu e dzə̀m, dzɛ̀ â kpùuwkə̀kwe vʉ̄ enyəa, “Nə̀ghǎan sə ndùw kwe ko.” Ghəa ù nə̀ghàan sə nduw, kwe kə te kə ŋ kòom těe wò èbàm an tsə̀n tə wə̄n.

¹¹Ghe n sàŋ ndùw à chia enyə̄, kàʼ ndùw alesâan ghəa zə̄lā ghe lô aleghəŋlo â Yɛso.

¹²An tsùʼu n te mò, Yɛso ŋ kɔʼɔ gɔ̀ɔŋ tsə̀ghà aŋ kwàʼ; ù ŋ gɔ̀ɔŋ bwǐi ndùw à Zə̀ kò tsuʼ fì.

¹³Ghəa tsuʼ u zuw tsughu, ù n tɔŋɔ tsughu tsə̀təndə̄ghā tə wə̄n, shìaa sə̀ wò ghee eghə̄m à ghè ghò a bə̀ghà. Ù ŋ ŋgɔ̄m tsughu tə te to enyəa à lò tətsoʼ.

¹⁴Ù fə̀ ni sə wo Sǎemòn wəla ù fə̀ təghàa tsughu zən zo enyəa à lò Pità, à wàazə̀ Pità ù te, Andùlù, ù n nì sə̀ wò Dzɛ̂ms, nì sə̀ wò Dzɔ̌n, nì sə̀ wò Felêp, nì sə̀ wò Batùlùmîa,

¹⁵nì sə̀ wò Matìo, nì sə̀ wò Tɔ̀mâs, nì sə̀ wò Dzɛ̂ms, tɔɔŋ wɛ ù Afìus, àsùghò Sǎemòn, tɔɔŋ ghùw ù Zilɔ̀t wən.

¹⁶Dzudàs n lo sugho a te, tɔɔŋ wɛ ù Dzɛ̂ms, àsùghò Dzudàs Eskàlìot wəla ù mò bughò fêe fughu Yɛso.

¹⁷Yɛso n nùghù sə̀ tsùghù wò aŋ ukwàʼ ghèe ghê tsə̀təndə̄ghā tə wə̄n to, bùghò těe tsughu an nə̀ghàsò kə kəlùʼu ghèe ghê ndə̀m è tsə̀təndə̄ghā tə̀ li tən àsùghò saʼ kə aghì kò ghe fə̀ sə kaāŋ wo an Dzùdîa, an Yɛ̀lusalɛ̀m, àsùghò aŋ ŋgùŋù tə ndzùghùntsòʼ è Tâe àsùghò e Sidɔ̀n zò.

¹⁸Ghî ghən fə̀ bugho alebùghò zyə̂ən shwaʼ u wə̄n àsùghò alebùghò bâaŋ dzàŋà tə ghee; ghəla ghe fə fəmā sugho aŋ ghùu zʉ̀ ù biigh wo, Yɛso m baaŋ kɔʼ ghee.

¹⁹Nɔ̂e kə aghì chì kə̀ dzə̀m n dəmà ko alemɔ̀ɔ tsughu wə̄n, nu daʼa kə̀ li kə mò səā wo a zəŋò wə̄n, baaŋ wò ghee a dzə̀m.

²⁰Ù n daŋso nùghùsò kɔʼ kətuw, lɛɛn ndùw tsə̀təndə̄ghā tə wə̄n, dzɛ̀ enyəa, “Dzɔ̀ lò ghɛ ghî à laa gho, tɔŋlo enyəa fɔ̂e u Kəzə̀ ù lɛɛn ghɛ̀.

²¹Dzɔ̀ lò â ghɛ̀ ghəla ghɛ̀ lô dzəŋ to êzə̄ŋ, nu ghɛ̀ lo kuuwn zəa kuuw nù. Dzɔ̀ lò â ghɛ̀ ghəla ghɛ̀ dînlo êzə̄ŋ nu ghɛ̀ kê tsǒʼn nù.

²² Dzɔ̀ lò â ghɛ̀, abugho ghî à bâa ghɛ̀, bàʼà zə̀ghàan ghɛ̀, sùuwn ghɛ̀, bôon zən ghɛʼɛ̄, bòʼ ghəa e Wɛ ù Ghùw!

²³ Abugho ghe ghəŋlo êzə̀, ghɛ̀ è tsoʼnlo, buu èfwəŋ aŋ ghue è ghaa zo, bòʼ namso kɛʼɛ kə̀ ne kə lo nû alo kəwālā. Nu ghê tsele a ghê tsele fə̀ ghəəŋ sugho êzə̀ â ghiīshʉ̀ghà a Kəzə̀ ghò.

²⁴Yia a bughò ghɛ̀ ghəla ghɛ̀ kuū êzə̄ŋ, ghɛ̀ kê lò an tsù, nu ghɛ̀ ŋ ghue zɛʼɛ e zə ten.

²⁵Ghɛ̀ ghəla nə̀ghà mɛʼɛ n də̂mlo êzə̄ŋ, ghɛ̀ kê zǔuw ŋgōʼ, nu ghɛ̀ kê kǔuwn lò tədzəŋ. Ŋgoʼ kê lò sugho â ghɛ̀ ghəla ghɛ̀ tsoʼnlo êzə̄ŋ, nu ghɛ̀ kê kǔuwn lò alo emūŋē, ghɛ̀ è dînlō.

²⁶Abugho ghî à kɛɛ̄ mɛʼɛ̀ ghɛ, ghɛ̀ ke fala, nu ghê tselè a ghê tsele fə̀ bɔɔm kɛɛ sugho ghê ghiīshʉ̀ghà a Kəzə̀ êzə̀.”

²⁷“Yìa Ǹ so Ǹ dzâa wô â ghɛ̀ ghəla ghɛ̀ zyəə̄n shwaʼ waŋa wo fɛ êzə̄ŋ enyəa, ghɛ̀ è ləghaa nduw ghî ghəla ghe bwîi an tàaŋ tə efwēe tɛʼɛ̄, dèe ndùw sùghò èdzɔ̀ â ghəla ghe bâa ghɛ.

²⁸E tsəa nduw nlò təghàa fò an tuw u ghì ghəla ghe tsɔ̂ɔm ghɛ, gɔ̀ɔŋ ndùw an tuw u ghì ghəla ghe sûuwn ghɛ.

²⁹Abugho ghùw sə̀ghàa dzôʼ kə̀a kò alo kəsɛ̄ɛ, děe mɛ̀ʼɛ ndǔw wə̄n â kə̀ li kən. Wəlà ù nì nughu kɔʼ sàŋ zəghà, kà sə̂mlò alezə̀ghàa daŋso ndûw fə̀ mʉa nlʉ̀ fəgha â wə̄n.

³⁰E fughuu nduw fəgha ko â chìa wəla ù nɔe wô; abugho ghùw kuūwn kelebəgha kɔʼ fʉgha wʉ̀a wò nû, kà fʉgha u te u kôom bvʉ̄.

³¹ Ghəa ghəla ghù ləghaa enyəa to ghî à mô ghə̌əŋ wò â ghù, e bɔɔm ghəəŋ nduw sugho êzə̀ â ghee.

³²Abugho ghù ləghaa ko ghî ghəla ghe ləghaa ghû, ghù a te zəa kɔ̄ʼɔ̂ kwò? Tɔŋlo enyəa ghî à biigh bɔɔm ŋgəəŋ ləghaa sùghò ghì ghəla ghe ləghaa ghee êzə̀.

³³Abugho ghù ghəə̄ŋ ko dzɔ̂ zò â ghì ghəla ghe dêe ghû â dzɔ̀ zò, ghù a te zəa kɔ̄ʼɔ̂ kwò? Ghî à biigh a ŋgəəŋ ghəəŋ sùghò nù êzə̀.

³⁴Abugho ghù fɔ̀ɔn fughuu ko fʉgha wo â ghî ghəla ghù mòʼò enyəa ghe lo tsəa tsə̀ghàa wò nù ebàm, ghù a te zəa kɔ̄ʼɔ̂ kə̀ kwò? Ghî à biigh a fɔ̂ɔn dzə̂əŋ sùghò nù fʉgha wo aŋ ghùe e ghee, ghe sô kwo enyəa ghe lo kòom kèle kpēen nù ebàm ghe buʼù kele tsəghàsò.

³⁵E laam ləghaa nduw nlò ghî ghəla ghe bâa ghɛ, ghəəŋ ndùw èdzɔ̀ â ghee. Fɔ̀ɔn fùghuu ndùw sùghò ghee â fʉgha wo, kòom mòʼn yò enyəa ghe lo fughuu tsə̀ghàa wò nù ebàm. Abugho ghɛ̀ ghəŋlo êzə̀, namso kɛʼɛ kə e ke e ghaʼa, ghɛ̀ è ke e lo wɛ a Zə̀ kə̀ ghaʼa kən kə̀ dzə̀m; nu Ù lə̀ghâa ghì ghəla ghe fughuu yô kɛɛ wo, à ghì à mʉa gho.”

³⁶“Kele nlò se è kwuso zo, to Tsele wɛʼɛ ki se è kwusō zo.

³⁷Ghɛ̀ ka e saʼa ghî ghò, Zə̀ kə̀ lô saʼā sughò ghɛ; kà nî sùghò enyəa ghùw ghə̌əŋ boon nù, Zə̀ kə̀ lô nîi sughò enyəa ghɛ̀ ŋ ghəəŋ bonlo. Ghuūw maʼa nlò bôo tə aghì tò, Zə̀ kə̀ lo Ghuūw maʼà sughò bòo tɛʼɛ.

³⁸E bughuu â ghu ko, tò Zə̀ kə̀ è fughuu sugho ghû; Kə lo foʼò kɔʼ fʉgha wʉ̀a ù dzûŋ wò, kə zoʼn luesō tsughu enyə aŋ ghu kə̂a, u luū sə, nu ŋgòʼ è dzì zəla ghù fughu a te, ghe kê ghù bɔ̌ɔm fughuu sùghò èzə̀.”

³⁹ Yɛso n dzɛ̀ kpèʼe ndùw â ghee aŋ kwə̀ən kə ushwāʼ enyəa, “To ghùw ù fǒo ŋ wàazə̀ ghùw ù fǒo mboʼo tɛ̀ɛ bwìi to a? To ghe dzeŋe ndûw bvʉ̂a nyəa tsughu alo kɓɔ̀ʼ ghee a te gho a bə̀ghà.

⁴⁰ Wàakə̀mwàʼsò kà wàdè ù wə̄n tsəghà sə, kə̀chìa wəla ù kuūwn ŋge zoʼn tsughu ghəa gho, to ù dòʼò tǒ wàdè ù wə̄n.

⁴¹Ghù kòʼò kô sugho e fəkàʼ zəa e lô an sə e wàazùghù, ghù kuuwn kòʼò yò bâŋ chia kə lô alô è zəghà zò esə a?

⁴²Ghù lò ênzə̂n aledzɛ̀ â wàazùghù enyəa, ‘Ŋ wàazə̀, na M̀ foō maʼà səā wô sugho e fəkàʼ zəa e lô an sə zəghà,’ mo ghuūghùe wʉ̂a ù koʼò yò bâŋ chia kə lô alo e zəghà zò esə à? Bəən kə ghûw tò ghû, bùʼu fo màʼa sə wò dzə̀ bâŋ chia kə lô alô è zəghà zò esə, sěe ghù sə̀ tɔʼɔ̀ koʼò alefoō maʼà səā sughò zəla e lô an sə e wàazùghù.”

⁴³“Nu kâʼ fə̀ dzûŋ fə̀ li fə yo fə mʉā tam kə̀ biigh ko, fə̀ biigh fə̀ li fə yo sughò fə mʉā tam kə̀ dzûŋ kò;

⁴⁴ nu a kâʼ fə̀ kele ko an tam kə wə̄n, tɔŋlo enyəa, a yo alekùɛɛ àŋgəm aŋ kàʼ fə echwàn ŋkāa a kûɛɛ àdzʉ aŋ kàʼ fə nyɔ̌ɔŋmgbê.

⁴⁵ Ghùw ù dzùŋ bɔ̌ɔm ghəəŋ ko èdzɔ̀ kùu ndùw fə̀ŋ è wə̄n è dzùŋ. Ù bǐigh, vʉ̀a ù ghəə̄ŋ sughò bo zo kùu ndùw sùghò fə̀ŋ è wə̄n è bǐigh; nu dzughu e bɔɔm kə̀a sə̌a wò kô ghəa ghəla a lue doʼō ghùw an unʉ̀ghà.”

⁴⁶“Ghɛ̀ mugho biso ŋgɔɔ kaŋlo enyəa, ‘Mughùbè, Mughùbè,’ aŋ kwò, mò ghɛ̀ fwaʼà yò fəgha kə̀là Ǹ dzâa â ghɛ̀ a?

⁴⁷Ghùw wəla ù ləgha wô mugho, zuw tsughu shwaʼ waŋa, bwìi ndùw a te, Ǹ dêe wò nù fəgha kə̀là ù lò â ghè kò.

⁴⁸Ù lǒ tǒ ghùw wəla ù fə̀ so e bəgha ndughu, tsə̀m dzɔ̀ nyə̀ tsughu kəbəghànlò; tsùghù zìi sə̀ kɔ̀ʼ wò è kuʼ an lùʼu kə̀ tughu ko; fʉ̀ghàdzughù tə̀ mo e səa nù, bùghò tə̀m ughue a an ndughu è te, zə̀ ŋ kè nôʼ, ghe màʼa fə̀ bəgha dzɔ̂ kɔʼ.

⁴⁹Ghùw wəla ù kuūwn zuw, kè bwîi aŋ ghəa a te gho lo tǒ ghùw wəla ù fə̀ bəgha ndughu mo ù kà kùʼ bəghàan kò; fʉ̀ghàdzughù tə̀ mo e bughò tə̀ma wò ko ughue a te, zə̀ n daŋso seʼe bvʉ̀ e tsughu, biso seʼê tsughu seʼe è fɛɛ̄n zo.”