Read Aghem Lûk 7 Bible Online

Lûk 7 - Aghem bible

Lûk 7

¹A m bùghò Yɛso kə̀a mɛʼɛ̀ tsughu ghəa ghən gho a dzə̀m â ghì ghò, ù n daŋso nùghù ndùw aŋ Kàpɛnùm.

²Komndzūghū ù tə̀sùghugòʼ ù lì n lo a fughu, ki kɔ̂ɔ fə wə̄n ù ŋge gaʼ fə̀ŋ a te. Kɔ̂ɔ fə te fə n dzaŋà, kuu kòʼò ndùw.

³A m bùghò komndzūghū vʉ zuw zɔ̂ŋ u Yɛso wò, ù n tum tsughu noo n Tə̀dzûu n lǐ mò enyəa ghe ndûw tɔŋɔ̄ fughuu tsughu wə̄n tò ù bùghò baāŋ kɔʼ kɔ̂ɔ fə wə̄n fì.

⁴A m bùghò ghe bughò kôʼ wô Yɛso, ghe ŋ ŋge buʼ tsughu kəghu â wə̄n enyə, dzɛ̀ â wən enyəa, “Ù kɔʼkpe nû tò ghù è yôsò wə̄n,

⁵tɔŋlo enyəa ù lə̀ghaa nù naʼ e sɛ̀ zò, vʉ̀a ù yòso, naʼ zəa e bəgha Ndùghènē.”

⁶Yɛso fi nughù ndùw nǔ ghèe ghee. Ghəa Yɛso kuʼso nduw fughu an ndughu, Komndzūghū vʉ ŋ kòom tùm wò fən a wə̄n a vʉ̀a wə̄n enyəa, “Mughùbè, kà ghue wʉ̀a ù bûʼ kòom fə̀mso, nu Ŋ̀ kâ bùʼ kɔ̀ʼkpè tò ghù è nyə am pfʉ̌a kaŋā.

⁷Zə̀ lò e ghee M̀ mô kôʼ tsughu enyəa Ŋ̀ kâ bùʼ kɔʼ kpe alebùghò a vʉ̀a ghù, kuuwn saʼ tsughu ko dzə̀, kɔ̂ɔ faŋa fə tughuu doʼò wô.

⁸Nu Ǹ lo ghùw wəla Ǹ tsəghàsò lâŋ kò, sùghugòʼ tia tə lo a tsəlà mùghò; abugho Ǹ tsəghàsò tsughu lâŋ kò â ghùw enyəa, ‘Ndùw!’ Ù mò è nduw; â ù lì wən enyəa, ‘Bùghò!’ Ù mò è bugho. Abugho Ǹ tsəghàsò tsughu sughò lâŋ kò â kɔ̀ɔ faŋa fo enyəa, ‘Ghəəŋ ndùw enyə,’ fə ŋ ghəŋlo è nduw.”

⁹A m bùghò Yɛso zuw shwaʼ wən wo, dzughu zə n zum wə̄n a zəŋò komndzūghū vʉ̀, ù m fə̀n dzɛ̀ ndùw â saʼ kə aghì chia kə mô bughōo a bàâ wə̄n enyəa, “Ǹ so Ǹ dzâa wô â ghɛ̀ enyəa, Ŋ̀ kaam bûʼ kòʼ kòʼ dzə̀ ŋgòʼ è èboo zən an Ezə̀lɛ̂.”

¹⁰Tum tì mo e kwəla nyəa ndùw èbàm, ndùw kòʼ ndùw ko mo kɔ̂ɔ fi fə n dzàŋ tughu.

¹¹Gha kə ŋ kè kôom sə, Yɛso n nùghù nyə̀ ndùw an nāʼ è li zo ghe tɔŋlo enyəa à lò Nâe, tsə̀təndə̄ghā tə wə̄n tə n nùghù ndùw ghèe ghee, nɔ̂e kə aghì kə̀ n sə̀ tə̀ŋò ndùw sùghò à bàâ wə̄n.

¹²A m bùghò ù kuʼso ndûw fu ū ughɔ̄ŋ wə enaʼ u te wo, ghe n tɛ̀tsə̀n kɔ̀ʼ aghî mo ghe yia boʼn səā wô â gwən e ghûw zò; mò à lǒ sɔ̀ʼ kə wɛ̄ kə̀ nûu kò â zə̀, tɔɔŋ wìkpuw ù lì. Ndə̀m è àghì n tə̂əŋ sə̌a wò fughu alo enaʼ ghèe ghê wìkpuw vʉ̀.

¹³A m bùghò Mughu ù te kôʼ tsughu nughò vʉ̀, ù ŋ kwuso èse, gɔ̀ɔŋ tsùghu wə̄n enyəa, “Kà dî sùghò ma.”

¹⁴Ù n daŋso sə kəŋo kwū tsughu kəmbùŋ, ghî ghəla ghe mò boʼò kele mbùŋ chì ko n tēe è tsughu. Ù n dzɛ̀ tsùghù enyəa, “Ǒ wɛ̂ɛtùghu, Ǹ dzɛ̂ enyəa, ghù nughu kɔʼ.”

¹⁵Ghùw kpǔuw vʉ n daŋso nùghù dòʼò è kɔʼ, kàʼ wò ghəa à kəaa gho. Yɛso fi kôom fughu kɔʼ nû nʉ̀ghà vʉ̀ â wɛ̀.

¹⁶Fə̂ŋ tə̀ n sə ghee, ghe n daŋso kàʼ ndùw Zə̀ kə̀ kɔʼso ko; dzàa tsùghuu enyəa, “Sɛ̀ ŋ ghùwshʉ̀gha ù ne kele am bvʉa e sɛ̀.” Àsùghò enyəa, “Zə̀ kə̀ ŋ ghì a wə̄n a bâŋ kòʼ.”

¹⁷Zɔ̂ŋ u Yɛso wə ŋ kùm ŋgəa tsughu mbùʼ è Dzùdîa e dzə̀m, sòʼ tɛ̀ mìa ndùw alo tə ŋgwə̀là.

¹⁸Tsə̀təndə̄ghā tə Dzɔ̌n tə n ndùw dzɛ̀ tsùghù sùghò ghəa a Yɛso a te gho â Dzɔ̌n enyə kpe.

¹⁹Dzɔ̌n n tɔŋɔ tum tsughu tsə̀təndə̄ghā tə wə̄n tə bə̀ghà enyəa ghe ndûw bvʉ â Mughu ù te enyəa, “À lò ghû ghùw wəla ù mo ki alebùghò ŋkāa a ki aleləmā tsughu ghùw ù nùghu a?”

²⁰Ghî ghən n ndùw kòʼ ndùw sùghò wə̄n, bvʉ â wə̄n enyəa, “Dzɔ̌n Fùghùu mùghù ŋ Kə̀zə̀ tum wò ghàʼ enyəa, a bughò bvʉ â ghù enyəa, à sə̀ yia lo ghû ghùw wəla ù mò ki alebùghò ŋkāa a ki aleləmā tsughu ghùw ù nùghu a?”

²¹Aŋghəa ghe naām ti a fughu êzə̀, Yɛso n sùw màʼà tsùghù ezəŋ a zəŋò ghì ghò, baaŋ tsùghù ndə̀m an dzàŋà tə ghee, shùan sə tsughu zʉ̀ ù biigh wo, tsʉ̀ sùghò sə a ndə̀mà tə ghì à foō gho.

²² Yɛso n daŋso bɛ̀lɛ̀ ndùw ghee enyəa, “Ndùw nlò ebàm, ghɛ̀ nduw dzɛ nduw fə̄ghā kə̀là ghɛ̀ kôʼ tsughu, zùw è sugho, ghî à foō a koʼò wò tə̀ luʼū, à ndɔɔ̄ bwiī yia bwîi wô tsəghatsəgha, tsùghò tia tə zəghàan wô ghî à tətsùghò ghò, kùʼ vʉa zuūw wô tuūŋ wo, ghî à kpuuwn yìa zôom wô alo evʉ̄, à laa yia zuw kɔʼ Làbəlà è Kə̀zə̀.

²³Dzɔ̀ lǒ ghùw wəla ù sò pfʉso yô nʉghà wò a zəŋò mùghò.”

²⁴A m bùghò tsə̀təndə̄ghā tə Dzɔ̌n tə nùghù tsughu, Yɛso ŋ kàʼ ndùw aletesō Dzɔ̌n â nɔ̀e kə aghì chì; ù n dzɛ̀ â ghee enyəa, “Ghɛ̌ fə̀ aŋ ŋgwən soʼ alenyəŋo lɛɛn kwò? Ghɛ̌ fə̌ fughu nduw alendùw lɛɛn kə̀dzaŋ a, kǔɛɛ kə nôʼso a?

²⁵Ghɛ̌ fə̀ laʼa soʼ alendùw kôʼ kwò? Alendùw kôʼ ghùw mò ù ŋ ghue u lā an ndzʉ̀ è dzùŋ à? Kòʼô nlò, ghî ghəla ghe laā ghue zo an ndzʉ̄ tə̀ dzûŋ tò, mùghù sugho kədzûŋ, ghe lo am gbe ù ne wo tò udwə̀ŋ.

²⁶Ghɛ̌ fə̀ kuuwn nyəŋo lɛɛn kwò? Ghùwshʉ̀ghà ŋkāa? Òhòŋò, Ǹ so Ǹ dzâa wô â ghɛ̀ enyəa, à fə̀ lo ghùw, mò ù ŋ ghùwshʉ̀gha tsə̀ghàtàʼà.

²⁷ À lǒ wə̄n ghe tɔm naŋā am mwàʼsò kə Kəzə̀ enyəa, ‘Ǹ tuu wò nǔ tum zaŋā â sə ko, ù kè bughò fəghaan naŋa dzì zə̀ghà, sěe ghù lo bughōo.’

²⁸Ǹ so Ǹ dzâa wô â ghɛ̀ enyəa, ghùw tsò yò fɛ am mbī ghe dzə an ndùm ù tsə̀ghà taʼā Dzɔ̌n, zəa e kuūwn lô enyəa Dzɔ̌n kâ kǔuwn kɔ̀ʼ ŋgàla ghè ghèe ghùw wəla ù lò bam ko alo kəwālā.”

²⁹ A m bùghò ghe zuw tsughu ghəa ghən gho, ghî yì à dzə̀m ghèe ghê dzə̀akə̀mwàʼsò m boo fughu ndùw â Zə̀ kò, ghe màʼa fə̀ lo mò Dzɔ̌n maā ghee â mùghù ŋ Kə̀zə̀ m fughu.

³⁰Ghî a Falàsîi ghə̀ ŋ kuūwn tùe màʼà ghəa ghəla Zə̀ kə fə̀ ləghaa enyəa ghe e ghəŋlo ghèe ghê dèekə̀làŋ, ghe màʼa fə̀ tue enyəa Dzɔ̌n ka ghee â mùghù ŋ Kə̀zə̀ m fughu.

³¹Yɛso n dzɛ̀ tsùghù enyəa, “Ǹ lo alebiso dzâa tsughu enyəa, ghî a nɛ ghən lo ênzə̂n, ghe mboʼo fwêen kwò enyəa à?

³²Ghe lo tò wɛghêtùghu an lùʼù kə bekewə̄n ghe tsəghàsò kə̂aa ghəa gho aŋ ghùe e ghee enyəa, ‘Yia a tso tɔŋ ndɔ̄ŋ, ghù kà ghuw kə dzùghòo kè alebən. Yia a zom zôo tə esē to, ghù kà dì kè.’

³³Dzɔ̌n Fùghùu mùghù ŋ Kə̀zə̀ ndùw bùghò nù, vʉ̀a ù zəa yô bɛ ko, mʉa sùghò yǒ lʉ̀ mò, ghɛ̀ yia a so enyəa, ‘Ù zə̀ghaa ùzʉ̀.’

³⁴Wɛ ù Ghùw vʉ̀a ù bùgho, zəa, mʉa sùghò nlʉ̀, ghɛ̀ yia a so enyəa, ‘Kòʼ âtsàadzəgha wəlà, ghùw ù kàla, fə̀n ù ghê dzə̀akə̀mwàʼsò à ghì à biigh gho!’

³⁵Ghî ghəla ghe boō fughu an tɔ u Kəzə̀ dèe wò nù enyəa tɔ u te u lo tɔ ù səŋò wò.”

³⁶Falàsîi ù lì n nàʼà tsùghù Yɛso alezɔ̀ʼ wə̄n. Ù n nyə̀ də̀ghàan ndùw èzə an ndughu lô Falàsîi vʉ̀.

³⁷ Nughò ù lì ghe fə̀ kwo fughu alo enaʼ tǒ yìzən ù bǐigh n zuw tsughu enyəa Yɛso zə̌a an ndughu alô ghùw Falàsîi vʉ̀, ù n nì kɔʼ fəbɔm à vʉa fə̀ ləə̄m fo a te, ndùw â ghè fò a fughu an ndughu. Ghe mo e tâatsə̂n fughu an ndughu nughò vʉ sô nyə̌a wò nù, à vʉa fə̀ ləə̄m fì.

³⁸Ù m bùghò fùʼu tsughu a tsəla efwēe e Yɛso dìi, sə̀ ŋ wə̄n mə̀ n tsoom tsughu aŋ ghùw a Yɛso. Ù n zè màʼà tsughu ghuw a te gho an nyùŋ tə kətuw tə wə̄n, nyɔ̀ŋ è kɔʼ daŋso tsoʼso tsughu am vʉ̄a fì.

³⁹Falàsîi vʉ̀a ù fə̀ zɔʼɔ̄ wə̄n ŋ kòʼ ghəa yì, dzɛ̀ tsùghù aŋ ghùe u wə̄n enyəa, “Abugho bəghà wə̄n mô lo ghùwshʉ̀gha, to ù mâa kèle ŋgòʼ è fə̀ghà kəla yìzən wəla ù mɔ̀ɔ wo wə̄n lo â ghè kò, enyəa à lǒ yìzən ù bǐigh.”

⁴⁰Yɛso m bɛ̀lɛ̀ ndùw wə̄n enyəa, “Sǎemòn, Ŋ̀ ki ghəa è li zo aledzɛ̀ â ghù.” Sǎemòn mo enyəa, “À lò êndūghō a Wàdè?”

⁴¹Yɛso n dzɛ̀ enyəa, “Ghî à li gho a bə̀ghà fə̀ ki ghùw ù lì, ù fɔ̀ɔn fughuu tsəghà kua wo, â ndàŋ kò, u mɔ̀ʼ fə̀ ki kəndàŋ aŋ ghə̀m n təkam n tɛ̀, u mɔ̀ʼ ŋ ki alo təkam tə tɛ̀.

⁴²A m bùghò ghe sô tsoō tsəā yo, ù n zə̀ghàa màʼà ndùw â ghee. Êzə̄ŋ, aŋ ghì a kəndàŋ ghən à bə̀ghà, à sò ghùw fɔ̌ɔn fughuu wə̄n ləghaa ndùghò, ù tsə̀ghàa sə wàazə̌ a?”

⁴³Sǎemòn, mo enyəa, “M̀ moʼò enyəa, à lò wəla ù mò zəghàa maʼa ndə̀m aŋ ghùu wə̀n.” Yɛso n dzɛ̀ â wə̄n enyəa, “Ghù n num alo efə̄ŋ.”

⁴⁴Ù n daŋso bɔe lɛɛn tsughu nughò vʉ̀, bvʉ â Sǎemòn enyəa, “Ghù vʉ̀a ghù kòʼò nughò wə̀n à? Ghəa M̀ mô nyə fɛ an ndughu zəghà, ghù kà mò mùghò â mùghù ŋ kɛ̀lɛ mə̀ àghùw mò fughu. Ù fɛ lo ù n tsǒʼn sə̀ mò aŋ ghùw ghaŋā vʉ̀ ù zè an nyùŋ tə kətuw tə wə̄n.

⁴⁵Ghù kà mò mùghò bvʉ̂ mǎaŋ kele, ù fɛ tsôo zǔuw kô ghuw ghaŋa alenyɔŋ ghûechìa M̀ mô nyə fɛ̄.

⁴⁶Ghù kà mò mùghò â tuw ko alo mvʉ̄ tsōʼsō, ù m mùghò â fwee zo alo mvʉ̄ kuuwn tsōʼsō.

⁴⁷Zən lò e ghee, Ǹ so Ǹ dzâa wô â ghù an tə̀ŋ kə̀ è chi enyəa, ndə̀mà tə təbòo tə̀là ù tso bûʼ ki ko fɛ, mùghò n nì zə̀, zuŋufia, ù ŋge dê ləgha zo. Yia a bugho ghùw wəla ù dè mbeʼe fə eləgha fo, Zə̀ kə̀ bôo tə wə̄n tə zə̂a sùghò mbəs.”

⁴⁸Yɛso n daŋso dzɛ̀ ndùw â yìzən vʉ enyəa, “Zə̀ kə̀ m bôo tə̀ghà tə̀ zə̂ ma.”

⁴⁹Ghî ghəla ghèe ghee fə̀ dzeŋe zəa ŋ kàʼ ndùw alebvʉ̄nlō aŋ ghùe e ghee enyəa, “À è wən lo ndughoo ù sə̀ buʼù zə̂a wô sughò bôo tə a ghì tǒ a?”

⁵⁰Yɛso n dzɛ̀ â nùghò ù te enyəa, “Fə̀ŋ zə̀ghà zəla ghù gaʼ tsughu a zəŋò Zə̀ kò, zə̀ ŋ ghù bəghasə; ndǔw è zəghà zò nyàʼànyàʼà.”