Read Aghem Dzɔ̌n 1 Bible Online

Dzɔ̌n 1 - Aghem bible

Dzɔ̌n 1

¹To mbī e kaʼ Shwaʼ wən fə̀ lo nû, Shwaʼ u te u fə̀ lo ghèe Zə̀ kò, Shwaʼ u te wə n lo Kəzə̀.

²Shwaʼ u te u fə̀ lo ghèe Zə̀ kò to mbī e tsoō zîi tsughu.

³À fə̀ fʉgha wo u dzə̀m gbən wo Wə̄n an daʼa kə Kəzə̀, buw â Wə̄n to fəgha kə̀ li kə mô yò.

⁴Ù fə̀ ki emughù, mo mughù e te e lo tsə̀ â mbī e dzə̀m.

⁵Tsə̀ è te tughuu alo kələ̄m, ləm chia kə yo alenyəma maʼà Wə̄n.

⁶ Zə̀ kə n tum sə̀ wò ghùw ù lì, mo zən e wə̄n e fə̀ lo Dzɔ̌n.

⁷U fə̀ sə wo aletesō dzâa wô fwaʼ kə tsə̂ è te a ghì ghò enyəa ghe zuw, to ghe boo.

⁸Ghuūghùe u wə̄n u fə̀ yo dzə tsə̀ è te, u fə̀ fɛ bugho ko aleteso dzâa wô fwàʼ kə tsə̂ è te.

⁹Tsə̀ è sə̀ŋo è te lo zə̄lā è nyəā wo am mbī aletughū a zəŋò ghì ghò a dzə̀m.

¹⁰A fə̀ mbī mgbaŋ gbən wo ko Wə̄n, a m bùghò Ù nyə wo am mbī, mbī ŋ kè kôom koʼòkɛlɛ wə̄n.

¹¹Ù ŋ kwə̄n nyə̀ wo an naʼ e wə̄n, ghî a wə̄n ghə n tàʼkè kpeē nî Wə̄n.

¹²A m bùghò ghì ghəla ghe kpe nī Wə̄n, boo fùghù tsùghù sùghò â wə̄n, ù m fughu ghee â daʼa ko aledòʼò wɛ a Kəzə̀.

¹³Ghe ka fə doʼò dzə̀ wɛ a Kəzə̀ ghò mò Zə̀ kə̀ dzə tsughu ghee tò aŋghəa ghùw lò aletsə̀mà tsughu aledzə̄ wɛ a te, à fə̀ ləgha tsughu Kəzə̀ enyəa ghe doʼò wɛ a ghee.

¹⁴Shwaʼ u te wə n ndùw bùghò ghùw, tsùuŋ mùghùu tsughu sɛ̀ à ghee, Ù n dêe mɛ̀ʼn wò èsəŋò e dzə̀m aŋ ghəa a Kəzə̀, ŋgee dèe sùghò ghàʼ â ləgha zo. Ghàʼ a dzə̀m ŋ kòʼ daʼa kə wə̄n ko, daʼa kəla ù ki tǒ sɔ̀ʼ kə Wɛ kəla kə nughù wo a vʉ̀a Tsele.

¹⁵(À fə̀ lo Wə̄n wəla Dzɔ̌n fə̀ teso dzâa wò â ghì ghò an dzə̂ è tughu enyəa, “Wən lǒ ghùw wəla mùghò mò dzâa wò enyəa, ‘Ù bughòo â bâa mùghò mò Ù tsə̀ghàsə̀ mugho, bòʼ ù fə ki lo tsəgha nû to ghee e bughò dzə mugho.’ ”)

¹⁶Ù bùghùso sɛ̀ bughuso kwènlò bòʼ ləgha è ne zəla ù ki a zəŋò sɛ̀.

¹⁷Zə̀ kə fə̀ lâŋ kò am mbī fughu wo â Musî, Kə ŋ kuuwn dè wò ləgha e wə̄n àsùghò fəgha kə̀là ù lǒ ghè kò â Yɛso Kə̀lestò.

¹⁸Ghùw ù lì kaām kôʼ kòʼ Zə̀ kò; alo ko sɔ̀ kə wɛ kəla kə lo am bughu e Tsele, kə nì dè wò wə̄n â sɛ̀.

¹⁹Dzûu təla tə fə̀ lo an Yɛ̀lusalɛ̀m n tum sə wò tə fɔ̀e ghèe ghê ghî a Lɛvì ghò, enyəa ghe bùghò bvʉ â Dzɔ̌n enyəa, “Ghù lò ndugho a?”

²⁰Ghe n ndùw bvʉ̀ ndùw sùghò ghəa ghən â Dzɔ̌n, ù ŋ kè tue alebɛ̀lɛ̀ ghee, ù ŋ dzɛ̀ ndùw ezɔŋɔ an ndzughu e tughō zo enyəa, “À yò dzə̂ mughò Kə̀lestò ù te.”

²¹ Ghe ŋ kòom bvʉ̀ â wə̄n enyəa, “Ghù kuuwn lò ndughoo a? À lò ghùwshʉ̀ghà Èlaedzà à? Ŋkāa ghù lo ghùwshʉ̀gha ù Kə̀zə̀ wəla ghàʼ ləə̄m tsəgha a?” Dzɔ̌n mo è tue. ù m bɛ̀lɛ̀ tsughu ghee enyəa, “Ɛ̂ŋgaŋ dzə̂.”

²²Ghe m bvʉ â wə̄n enyəa, “Ghù sò yia kuuwn biso lò tsughu ndughoo? Ghù aŋ ghùe wʉ̂a, ghù dzɛ̂ èndughō? Fughu wò ghaʼ â fwə̀n kə edzughu ko, tò ghàʼ ndûw dzâa ndûw â ghì ghəla ghe tum sə wô ghaʼ.”

²³ Dzɔ̌n n dzɛ̀ enyəa, “Ǹ lo ko ghùw u kə̀bɔ̀ŋ, Ǹ naʼn kwəla wô â ŋgwəla gho enyəa, ‘Nə̀ghaso nlǒ dzì â Mughu ù tē!’ [Kùu ndùw shwaʼ wəla ghùwshʉ̀ghà ù Kə̀zə̀, tɔɔŋ Èzayà fə̀ tɔm naŋā.]”

²⁴À n lo êzə̀ mò à ghee tum sə̀ wò ghì a Falàsîi.

²⁵Ghe m bvʉ â wə̄n enyəa, “Ghù sò ghì ghò â mùghù ŋ Kə̀zə̀ ŋ kuuwn fughu tò ndugho a, ghù sô yô Kə̀lèstò, yò sugho Èlaedzà, ŋkāa ghùwshʉ̀ghà ù Kə̀zə̀ a?”

²⁶Dzɔ̌n n bɛ̀lɛ̀ ndùw ghee enyəa, “Ŋ̀ ghî à fughu â mùghù ŋ Kə̀zə̀ mò, zə̀ e kuūwn lo enyəa ghùw lo fì an tsə̀tèʼè fɛʼɛ mò ghɛ̀ kwo yo wə̄n.

²⁷Ù bùghò a bàâ mùghò, ù kǔuwn tsə̀ghàsə̀ mugho, Ŋ̀ kâ tsò kɔ̀ʼ kpē aledòʼò ghùw ù kə̀fwàʼ ù wə̄n aletsughū zê gbaʼ u tə gùw u wə̄n.”

²⁸Ghəa ghən fə̀ bəla kə ni an nàʼà fə Bɛtānì an tsə kə zuw è səa zo, am bà kə dzughuu Dzodàn kə̀là Dzɔ̌n fə̀ fughuu ghî ghò â mùghù ŋ Kə̀zə̀ mò a te.

²⁹Tsʉtsʉ vʉ̀, Dzɔ̌n mo e koʼò mo Yɛso sò sə̌a kəəŋ wò a vʉ̀a wə̄n. Dzɔ̌n n dzɛ̀ enyəa, “Kòʼ nlò Tsʉa u ndzì u Kə̀zə̀ wəla u ghəŋlo enyəa Zə̀ kə̀ ghuūw maʼà bòo tə ghì a mbī.

³⁰Wən lǒ ghùw wəla mùghò mò dzɛ̂ enyəa, ‘Ghùw wəla ù bùghò a bâa mùghò mò ù tsə̀ghàsə̀ mugho.’ Tɔŋlo enyəa ù fə̀ lo ziī nû to ghe e dzə mugho.

³¹Ghuūghùe waŋā, mùgho mò kwo sugho yo Wə̄n. E lo enyəa Ŋ̀ ghî à fɛ fughuu â mùghù ŋ Kə̀zə̀ mò aletsʉā naŋā kɔʼ sə ghɛʼɛ̄, ghɛ̀ ghî ghə Ezə̀lɛ̂, enyəa ghɛ̀ e lo alekòʼòkɛlɛ̄ Wə̄n.”

³²Dzɔ̌n n teso dzɛ̀ ndùw tsə̌a zəla ù mò kôʼ enyəa, “Mùghò ŋ kò mdùwʼ Zuʼ tə̀ Zɔlɔ to tə sə tsughu wo alo kəwālā aŋ ghùe wə ebuŋū, bùghò tsughu maa tsughu a zəŋò wə̄n.

³³Ghuūghùe waŋā, mùgho fə̀ kwo sugho yo wə̄n, à sô fɛ lo enyəa, ghùw wəla u tum wô mugho enyəa M̀ bughò, mùghò è fughuu ghî ghò â mùghù ŋ Kə̀zə̀ mò, fə dzɛ â mùghò enyəa, ‘Ghùw wəla ghù kè koʼo Zuʼ tə̀ Zɔlɔ tə sə tsughu wô alo kəwālā, bùghò tsùghù maa dòʼò tsùghù a zəŋò wə̄n, kele tsughu enyəa à fi lo wə̄n wəla ù lo fughuu ghɛ â Zuʼ tə̀ Zɔlɔ[1] to aleghəŋlo enyəa ghɛ̀ doʼo ghî à fughu gho.’

³⁴Mughò ŋ kùm kòʼ, M̀ fɛ êzə̄ŋ dzâa wò nù enyəa wən lǒ Wɛ ù Kə̀zə̀.”

³⁵A m bùghò tsʉtsʉ vʉ, Dzɔ̌n n ti ghèe ghê tsə̀təndə̄ghā tə wə̄n to tə bə̀ghà.

³⁶Ù ŋ kôʼ aŋghəa Yɛso səā kəə̄ŋ wo a te, ù n nùghù dzɛ̀ tsùghù enyəa, “Kòʼ nlô Tsʉa ù Ndzì è Kəzə̀ à.”

³⁷A m bùghò tsə̀təndə̄ghā tì tə̀ bə̀ghà zuw tsughu ghəa yi gho êzə̀, tə n nùghù ndùw a bâa Yɛso.

³⁸Â Yɛso alebàŋà lɛɛ̄n tsughu, ù ŋ kòʼ ghee, mo ghe yia ghe bugho â bâa wə̄n, ù m bvʉ â ghee enyəa, “Ghɛ̀ kəŋo kə̀ kwò?” Ghe m bvʉ â wə̄n enyəa, “Wàdè, ghù mùghù ghɛ?”

³⁹Ù n dzɛ̀ â ghee enyəa, “Bùgho kòʼ nlò.” Ghe m bùghò kòʼ tsughu luʼū kəla ù mùghù a te; zee mɛ̀ʼɛ̀ ndùw tsûʼ fə te fo ghèe ghê Yɛso, bòʼ à fə̀ lo an tàm tə ezuw tə chìakò an nə̀gha è guŋso zo.

⁴⁰Ghùw ù mɔ̀ʼ aŋ ghî ghəla ghe fə̀ zuw shwaʼ u Dzɔ̀n wo n nùghù ndùw a bǎa Yɛso fə̀ lo Andèle, wàazə̀ Sǎemòn Pità.

⁴¹A m bùghò Andèle zəghà tsughu Yɛso, ù ndùw kòʼ ndùw wàazə̀ tɔɔŋ Sàemòn, dzɛ̀ â wə̄n enyəa, “Ghàʼ ŋ Kə̀lestò u te kôʼ.”

⁴²Ù n nì ndùw wə̄n a vʉ̀a Yɛso. Yɛso n lɛɛn ko wə̄n enyəə, dzɛ̀ a wə̄n enyəa, “Ghù fɛ lo Sàemò Pità tɔɔŋ wɛ ù Dzɔ̌n. A lô ghù êzəŋ tɔŋlo enyəa à lò Sefàs; mo e moʼn tsùghu enyəa, ‘À lò Pità (ŋkāa Kənɛ.’ ”)

⁴³Tsuʼu tsʉtsʉ vʉ̀, Yɛso m moʼn tsughu enyəa to e mô nughu ndûw aŋ Galèlîi. A m bùghò ù nùghùun nduw, ù ŋ kòʼ tsùghu Felêb, dzɛ̀ â wə̄n enyəa, “Nùghu wò a bâa mùghò.”

⁴⁴An lo êzə̀ mo Felêb sə sùghò am Bɛ̀dsǎedà tò Pità ghèe Andèle.

⁴⁵Felêp n ndùw kòʼ ndùw Natanìɛl, dzɛ̀ â wə̄n enyəa, “Ghàʼ ŋ kə̀ŋ kôʼ ghùw wəla Musî fə̀ tɔm naŋā kùʼù ndùw wə̄n am mwàʼsò kə kəlàŋ asùgho aŋghəa ghiīshʉ̀ghà a Kəzə̀ a fə̀ tɔm naŋā. À lò Yɛso, wɛ ù Dzùghùsî, tɔɔŋ ghùw Nazalɛ̀t.”

⁴⁶Natanìɛl m bvʉ a wə̄n enyəa, “Ghəa è dzûŋ è li e mboʼo lò ko nû e lô alesəā wô an Nazalɛ̀t à?” Felêp mô â wə̄n enyəa, “Bùgho kòʼò tsugho an sə ghə̂a.”

⁴⁷A m bùghò Yɛso kôʼ Natanɛɛ̀l ù səā kəə̄ŋ wo a vʉ̀a wə̄n, Ù n dzɛ̀ tsùghù enyəa, “Kôʼ kùum kə ghuw kə Ezə̀lɛ̂ kò mo ù bə̌ən ghəəŋ yo ghəa gho a.”

⁴⁸Natanìɛl m bvʉ a wə̄n enyəa, “Ghù mùghò kele ênzə̂n?” Yɛso m bɛ̀lɛ̀ ndùw wə̄n enyəa, “To Felêb e tɔŋɔ ghù, à lǒ mò M̀ mâa ghù kòʼ zìi fî a ghù mò lô a tsəla kâʼ fə fîʼ.”

⁴⁹Natanìɛl fi dzɛ̂ ndùw nù â wə̄n enyəa, “Wàdè ghù lǒ Wɛ ù Kə̀zə̀. Ghù lǒ Də̀ŋ kə Ezə̀lɛ̂.”

⁵⁰Yɛso n dzɛ̀ â wə̄n enyəa, “To ghù êzəŋ fi boo tsughu bòʼ Ǹ dzɛ̂ wô enyəa M̀ mô kòʼ ghù a tsəla kâʼ fə fîʼ a? Ghù lo naam kòʼò àghəa mo ghə n tsə̀ghàsə̀ ghən.”

⁵¹ Yɛso ŋ kòom dzɛ̀ ndùw â wə̄n enyəa, “Kùmkùm, Ǹ dzâa wô â ghɛ̀ enyəa, ghɛ̀ lo kòʼò kəwālā kə tsʉ dòʼo, àsùghò tsə̀təndə̄ghā tə Kəzə̀ tò tə tsughuu kɔʼɔ̄ an làŋ kə Wɛ ù Ghùw.”