Read Aghem Dzɔ̌n 10 Bible Online

Dzɔ̌n 10 - Aghem bible

Dzɔ̌n 10

¹Tsuʼ fə̀ lio fo, Yɛso n tsʉ̀a àghì, ù ŋ kwə̀əŋ n dzɛ̀ â ghee enyəa, “Kùmkùm, M̀ fɛ kùu dzàa wò nù â ghɛ̀, ghùw wəla ù tsɔŋ baam nyə an ghɔŋ u təndzì, mô ù ka nyə a fǔu u ughɔ̄ŋ, ù lô ghùwtsɔ̀ŋɔ.

²Ghùw wəla ù kuūwn tsəghà nyə a fǔu u ughɔ̄ŋ, à lǒ wə̄n bàʼàtə̀ndzì.

³À lo â wə̄n ghùw ù chìnlo tsʉā fuū u ughɔ̄ŋ wo; ù tɔɔŋ tsughu ndzì tə wə̄n alo zən, tə n zuwkɛlɛ wò dzə̀ è wə̄n, ù n daŋso bâ sə̀ wò ghee.

⁴A m bùghò ù nì sə wo ghee êzə̀, ù n tee ndzə̀a â sə ko an dzì è sòʼo; ndzì tə m bɔɔm sə̀ tə̀ŋò ndùw sùghò a bàâ wə̄n, bòʼ ghe zuūwkɛlɛ dzə̀ è wə̄n.

⁵Ndzì tə te tə yo dzə̂ to tə e səā təŋò ndûw a bàâ ghùw nughùnùghù, tə n tiin nùghù è tsughu, bòʼ tə sô zuūwkɛlɛ yo dzə̀ è ghùw nughùnùghù ù te.”

⁶Yɛso fə̀ ghəa ghən kəa nduw â ghee an shwaʼ u kwə̀n kə̀ kwən wo, ghe ŋ kè sô kuūwn zuūwkɛlɛ̂ fəgha kə̀là ù mòʼò ghè kò.

⁷Yɛso fi kôom tèso ndùw nù tuŋlō u ghee wo enyəa, “M̀ fɛ kuu dzàa wò nù â ghɛ̀, à lò mugho fuū u ughɔ̄ŋ u təndzì wò.

⁸Ghî ghəla ghe fə̀ bughò sə ko a zəŋò, ghî ghəla ghe fə̀ foʼsò twən wo enyəa ghe lɛnlo â dzì tò, kùm lò ghîtsɔŋ gho ghe yia bvʉ̂a sughò dziī to, ndzì tə̀ ŋ kè kuūwn zuūw dzə̂ â ghee.

⁹Ǹ lo fuū u ughɔ̄ŋ, abugho à lò ko ndughoo ù tsə̀ghà nyə dzə a zəŋò mùghò, lo zəa nù tuw ko; ù e ke doō tsəghāa nyəa, tsə̀ghà sə̌a, kele sùghò fʉ̀ghà zəa u wə̄n.

¹⁰Ghùwtsɔ̀ŋɔ bughò ko alebùghò tsɔŋ àsùghò alewī ŋkāa aledzùuw maʼà. M̀ fɛ bùghò enyəa ghî à kele èmùghù, ghe e laʼā yo fəgha ko.

¹¹Ǹ lo bàʼàtə̀ndzì ù dzùŋ; Bàʼàtə̀ndzì ù dzùŋ lo wəla ù lo alekpuūw fughu vʉ e ndzì tə wə̄n.

¹²Abugho ghe tsə̄ tsughu ghùw enyəa ù è lɛnlo â ndzì tò, mò à ndzì tə te tə ki yo wə̄n, ù tǐi naaŋ tàʼn tsùghu nù ndzì te to abugho ù kòʼ ndûw bəgha ko kə bughoo; bə̀gha kə̀ te kə m bùghò kwǔun pfʉ kɔʼ ndzì tə̀ li to, dzùm sàaŋ tsughu tə̀ loʼ to.

¹³Ghùw wəla ghe tsə̄ tsughu wə̄n enyəa ù è lɛnlo â dzì tò nùghùun tǐi tàʼn tsùghù təndzì bòʼ ù sò tsô lô ko ghùw ù kə̀fwàʼ; ù ki dzə yo nəgha zo a zəŋò ndzì tə te to.

¹⁴Ǹ lo bàʼàtə̀ndzì ù dzùŋ, Ŋ̀ kwo nû ndzì taŋa to, ndzì taŋa tia tə kwo sughò mugho.

¹⁵Tò aŋghəa Tsele waŋā kwō mugho a te, yìa Ŋ̀ kwo sugho wə̄n. Yìa M̀ fughu mughù zaŋa zo â ndzì taŋa to.

¹⁶Ŋ̀ ki nû ndzì tə̀ li to mo tə yo dzə aŋ saʼ kən. Ŋ̀ ki alenìi təmā dzəə̄ŋ wo ghee, ghe e zuuw â mùghò. Ndzì tə te tə e lo alo kəsāʼ kə mɔ̀ʼ, ki sugho bàʼàtə̀ndzì u mɔ̀ʼ.

¹⁷Tsele waŋa mugho fɛ ləghaa bòʼ M̀ boō alefughu ghue waŋā enyəa mùghò e ke kôom lo alenì ebàm.

¹⁸Ghùw yò tò ù è wiī maʼà mùghò. À kǔuwn ləgha tsughu mugho alefughuu ndûw ghue waŋa; nu Ŋ̀ ki kədaʼa alefughu, tò aŋghəa M̀ bɔɔ̄m ki sughô daʼa ko alenì ebàm. À daʼa kən â mùghò fughu Tsele waŋā.”

¹⁹Ghəa Dzuū tə̀ zuw ghəa ghəla Yɛso kə̀a tsughu, ghe ŋ kele kpeʼe tsughu ndzùghùn tə emòʼnlò kùu ndùw wə̄n.

²⁰Ndə̀m è ghee n dzâa enyəa, “Ù ki zə̀a fə̀ biigh fo, ù zə̀ghaa ùzʉ̀, à lò kə kwò a bûʼ ki alezə̂ən shwaʼ u wə̄n a?”

²¹Kə̂m kə aghî kə̀ li kə ŋ kuuwn dzɛ̀ enyəa, “Shwaʼ u wə̄n u fween dzə̀ yò u ghùw wəla ù zəghāa zʉ̀ wò. To ghùw ù zə̀a fə̀ biigh fə ŋ ghəŋlo enyəa ghî à foō ghə e koʼō luʼū to a?”

²²Ghuw ghəla ghe zəā tsəgha zə kəla ghe fə̀ zə̂əŋ tsəgha aŋghəa ghe fə̀ nî fughu kɔʼ Ndùghù è Kə̀zə̀ è nē a te an Yɛ̀lusalɛ̀m m kpè è tsughu.

²³À n lo an nə̀gha zə eghuūw, Yɛso m bwîi kaŋlo an Ndùghù è Kə̀zə̀ è nē an Yɛ̀lusalɛ̀m am bà kəla ghe tɔŋlo enyəa à lò fuū u mbɛ̀ u Solomòn.

²⁴Dzuū tə̀ m bùghò tàʼ zùuŋ kɔʼ wə̄n, bvʉ â wə̄n enyəa “Ghù ghàʼ alo kəŋgômso so bòʼò naŋa ndûw tɛ̂ ghɛ̀? Abugho à lò ghû Kə̀lestò ̀u te, dzǎa sə wò â ghàʼ an ndzughu e tughō zo.”

²⁵Yɛso m bɛ̀lɛ̀ ndùw ghee enyəa, “M̀ mâa dzɛ̀ â ghɛ̀, ghùw wɛʼɛ vʉ̀a ù yò alebōo. Fwà kə̀là M̀ fwaʼa an zən e Tsele waŋa, fwàʼ kə teso dzàa nù ghùw wəla Ǹ lo ghè wò.

²⁶Ghɛ̀ yo alebōo bòʼ ghɛ̀ yo dzə ndzì taŋa to.

²⁷Ndzì taŋa tə zuūwkɛlɛ dzə̀ zaŋa, yìa M̀ kwo ghee, ghee yia bwîi a bàâ mùghò.

²⁸M̀ fughuu ghee a mùghù zəla e doʼò tən, ghee kê yò sùghò alekpuūw ləŋe; fəgha kə̀ li kə yo alenìi nughù ghee aŋ ghùu mùghò.

²⁹Tsele waŋā wəla ù fughu wo ghee â mùghò, tùghù tsə̀ghà taʼà aghì a dzə̀m. À fi lo enyəa ghùw ù lì kòom yò tò ù è chuūw nughù sə ghùw ù ghee u mɔ̀ʼ an ghu kə Tsele ù te.

³⁰Ghàʼ à bə̀ghà lò alo kəfəgha kə̀ mɔ̀ʼ.”

³¹Dzuū tə̀ n tsughu kuum kpeʼe kɔʼ atia tə̄əm wə̄n a te.

³²Yɛso ŋ kuuwn dzɛ̀ ndùw â ghee enyəa, “Mùghò ŋ ghəəŋ ghɛ â də̀mà tə aghəa tə̀ dzûŋ təla bəghà mò de â mùghò. Ghɛ̀ mugho êzə̄ŋ biso təmlō alo atīa aŋ ghəa è ghɛ zò a tè à?”

³³ Dzuū tə̀ m bɛ̀lɛ̀ tsughu wə̄n enyəa, “Ghàʼ ghû tə̌əm dzə̀ yò bòʼ fwàʼ kə̀a kə̀ dzùŋ kò; Ghà ghǔ fɛ so e təə̄m wi enyəa ghù kòʼò lʉ̀ghaa Kə̀zə̀. Ghù mgbàŋ lǒ ghùw nsɔ̌ɔŋnchùw, ghù vʉ̀a ghù naāŋ kɔʼɔ nduw ghue wʉ̀a wò enyəa ghù lò Kəzə̀.”

³⁴ Yɛso m bɛ̀lɛ̀ ndùw ghee enyəa, “Ghe kâ mgbaŋ tɔm naŋa aŋ làŋ kɛʼɛ enyəa, ‘Ǹ dzɛ̄ enyəa ghɛ lo ùzʉ̀.’

³⁵Abugho Kə lo aletɔŋɔ̄ ghì ghəla kə fə̀ fughu wô shwaʼ u wə̄n wo â ghee enyəa à lò uzʉ̀ (a yo alesàʼà kuūwn kôʼ shwaʼ u Kəzə̀),

³⁶yia a bughò mugho, bəghà mò ndzəə̄m tsɔʼ kɔʼ nû, tùm nyə̀ wò am mbī; ghɛ̀ sô lǒ ênzə̂n alekoōm dzaā wo enyəa, ‘Ghù sùuwn Kə̀zə̀ a, bòʼ Ǹ dzɛ̀ enyəa, Ǹ lo Wɛ ù Kə̀zə̀ a?’

³⁷A bùghò à lo mô M̀ fwaʼà yò fəgha kəla bəghà mò de â mùghò, kâ nlò boo fughu dzə̀ â mùghò.

³⁸Mò à lò dzə enyəa M̀ fwāʼa nù, ghɛ yia buw aleboō fughu â mùghò bòʼ shwaʼ waŋa, kuuwn bòo tsughu ko nlô fwàʼ kə te ko, tò ghɛ̀ lo e kwo, ghɛ̀ zuwkɛlɛ sugho enyəa Bəgha lo a zəŋò mùghò, tò ghəa Ǹ lôo a zəŋò wə̄n.”

³⁹Ghe ŋ kòom nughu kpeʼe kɔʼ enyəa to a mô kwu wə̄n, wàzəletūm n nùghùu nɔ̀ti sə tsughu aŋ ghu kə ghee.

⁴⁰ Ù ŋ kôom nughu dàŋ ndùw ebàm am bà kə dzughù Dzodàn kə̀la Dzɔ̌n fə̀ buʼù fughu ghî ghò a te â mùghù ŋ Kə̀zə̀ mò, ndùw mùghù dòʼò ndùw a fughu.

⁴¹Ndə̀mà tə aghì tə m bùghò a vʉ̀a wə̄n, dzàa tsughu enyəa, “Dzɔ̌n ka fə dê dzə̂ tsə̌a tə̀ li to, ghəa ghə̀n a zə̀m Dzɔ̌n fə̀ kuūwn kəaa kùu ndùw ghùw wən fə̀ lo èsəŋò.”

⁴²Ndə̀m è àghì fughu èzə n daŋso boo fùghù nduw â Yɛso.