Read Aghem Dzɔ̌n 12 Bible Online

Dzɔ̌n 12 - Aghem bible

Dzɔ̌n 12

¹À fə̀ bugho tsuʼu n doʼòdoʼò ko tǔu to ghe e bughò zə zə kə̀ Zəŋso naaŋ ko, Yɛso n nùghù ndùw am Bɛtānì, an ndughu lô ghe Lazalùs wəla Yɛso fə̀ zôm nughù kɔʼ alo evʉ̄.

²Ghəa ghe tsughu doʼò tsughu alezə̄ təkùnlò ghèe ghê Yɛso, Màta n dzughùu wò ùfʉ̀ghàzəa, Lazalùs ŋ kuuwn dòʼ dzəəŋ ghèe Yɛso.

³Mèle n nì kɔ̌ʼ vʉ n lə̌əm mò alo fətôo, mo ghe fênlò am wə̄n e səŋò zò, mo ghe mvʉ n te m fəghaŋlo am fəgha kə̀ li ko ghe tɔŋlo enyəa à lò Nâd, tsoʼsō tsughu ghuw a Yɛso a te, nì zè kɔʼ an nyùŋ tə kətūw tə wə̄n, luʼū tə n lə̂əm tə̀la ko zùʼù fə mvʉ fə te fo.

⁴Dzudàs Eskàlìot wəla ù fə̀ lo tsə̀ndə̄ghā è Yɛso, wəla ù lo fêen fughu Yɛso n dzɛ̀ enyəa,

⁵“Ghe mô yô alefèe vʉ mən a aŋ wən èsəŋò zò, ghe fughu kua u te wo â ghì à laa gho a?”

⁶Ù ka fə ghəa ghən kə̂a tsughu dzə̀ bòʼ ù fə̀ ŋgeē ləghaa aleyòsò ghì à laa gho, ù fə̀ êzə kəa tsughu bòʼ ù fə̀ lo ghùwtsɔ̀ŋɔ, à n naaŋ tsə̀ghà sùghò wə̄n kə̌aa kə kua u kədzeŋe u ghee wo, ù n tsoo nyɛʼɛ nìi sə̌aa tsə̀ghà sùghò ùkua a te.

⁷Yɛso ŋ kuuwn dzɛ̀ enyəa, “Zə̀ghaa nlô wìzən vʉ̀, ù ghəa ghən fɛ ghəŋ tsughu alebiaan naŋā mùghò aŋ ghəa ghəla ghe kê tsəə̄n mugho a te.

⁸Ghɛ̀ à ghê ghì à laa gho kê lò tsəgha ko fɛ nəgha tə dzə̀m; yia būghò mugho, Ŋ̀ kê yò zee tsəgha dzə̂ fɛ sɛ̀.”

⁹A m bùghò ndə̀m è Tə̀dzûu zuw tsughu enyəa Yɛso lo am Bɛtanì, ghe n lue wò fughu alebùghò koʼò daŋà tsəghà sughò Lazalùs wəla Yɛso fə̀ zôm nughù kɔʼ alo evʉ̄.

¹⁰Tuw u təfɔ̀e ghèe ghê ghì a Falasîi a fi kaʼ tsughu nǔ alekə̄ŋ dzì alekôom wiī maʼà sughò Lazalùs,

¹¹nu ndə̀mà tə aghì tə mò êzəŋ boom fughuu nduw ko â Yɛso, kòom zǔuw yo â ghee bòʼ fwàʼ kela Yɛso fə̀ fwâʼ tsughu a zəŋò Lazalùs.

¹²A m bùghò tsʉtsʉ vʉ̀, ndə̀mà tə aghì təla tə fə̀ bugho alebùghò zə Zə̄ kə̀ Zəŋso naaŋ ko an Yɛ̀lusalɛ̀m n zuw tsughu enyəa Yɛso bùghò sùghò fughu.

¹³ Ghe n chwɛɛn kɔʼ uchʉghā, nùghù ndùw alendùw kpeē nî Yɛso; dzàa tsùghu enyəa “Hòsanà! Kɔʼso n lo â ghùw wəla ù bùghòo an zən e Mughu ù te, Kɔʼso n lo â Də̀ŋ kə Ezə̀lɛ̂ kò.”

¹⁴Yɛso ŋ kəŋ tsughu tsʉa u fə ndzàkâs, kɔ̀ʼ dòʼò kɔ̂ʼ a te. Ghəa ghən fə̀ bɔɔm sə kùu ndùw Shwaʼ u Kəzə̀ wəla ghiīshʉ̀ghà à Kəzə̀ a fə̀ tɔm naŋā enyəa,

¹⁵ “Kà nlo tsəŋ dzə̀ ghəa è li zo ghî ghə Ezə̀lɛ̂ ghò, bòʼ də̀ŋ kɛʼɛ chia kə bughōo, mò ù ŋ kɔʼ dòʼò kɔʼ an tsʉa u fəndzàkâs.”

¹⁶Tsə̀təndə̄ghā tə wə̄n tə ka fə bûʼ kǎam zuwkɛ̄lɛ̄ dzə̀ ghəa ghən gho sûesʉ. À fə̀ gɔʼɔ ko an nə̀ghà zəla Yɛso bùghò kpuw tsughu a te, zòo nughu kɔʼ ndùw alo kəwālā. Ghe n daŋso tɛ̀ mòʼn wò ghəa ghəla ghe fə̀ tɔm naŋā kùu ndùw Yɛso, àsùghò enyəa ghən lò ghəa a te gho ghî a mò ghəŋlo a zəŋò wə̄n.

¹⁷Nɔ̂e kə aghì kəla kə fə̀ lo ghèe ghê Yɛso an nə̀gha zəla ù fə̀ tɔŋɔ nughù sə wo Lazalù alo èshìaa, zòm nùghù kɔ̌ʼ wə̄n alo evʉ̄, mò lo ghî ghəla ghe teso dzâa wo ghəa ghəla ghe mò koʼ, àsùghò ghəla ghe mò zuw.

¹⁸Soo kə eghəa kəla ndə̀m è aghî fə̀ lue nduw a te a vʉ̀a Yɛso fə̀ lo aŋghəa ghe zuw tsughu enyəa ù zòom nùghù wò ghùw alo evʉ̀.

¹⁹Ghî a Falasîi ghə̀ n daŋso nùghù dzɛ̀ tsughu aŋ ghùe e ghee enyəa, “Sɛ̀ kôom tsò yò aleghə̂əŋ ghəa è li zo. Kòʼô, aghî a dzə̀m êzə̄ŋ tsə̀ghà tə̀ŋò ndùw ko a bàâ wə̄n.”

²⁰Ghî à li a fə̀ lo dzəəŋ sugho ghèe ghê ghî ghəla ghe fə̀ kɔʼ wô alebùghò zə zə kə̀ Zəŋso naaŋ ko an Yɛ̀lusalɛ̀m.

²¹Ghî ghə e Tòʼò a te ghə m bùghò kòʼ wò ghùw ù Bɛ̀dsǎedà ù lì, ù sə aŋ Galèlîi ghe fə̀ tɔŋlo enyəa à lò Felèp, dzɛ̀ â wə̄n enyəa “Mughùbè, ghàʼ mô lə̀ghaa alekòʼ Yɛso.”

²²Felèp n ndùw nì kɔ̂ʼ Andùlù, ghèe wə̄n n ndùw dzɛ̀ ndùw shwaʼ u te wo â Yɛso.

²³Yɛso n dzɛ̀ â ghee enyəa, “Nəgha zə e mô êzəŋ e kpe tò Wɛ ù Ghùw è nughù ebàm alo nsə̄ghānyə̄ghā.

²⁴Alekùu nîi tsughu, à gɔ̀ʼɔ̀ ko mo sə zə esò e nyə tsughu alo təzu, zə mò è fia, abugho e naām lô ko aŋ ghu zə n naam lò ko sə zə esò; a mò è bùghò e fîaa tsughu, zə m fùuw è kɔʼ, noo bɔŋ tsughu ndə̀m è àsò.

²⁵Ghùw wəla ù ləghaa ghue u wə̄n wo yò alemùghù; a ŋ kuuwn bùghò wəla ù nì tsughu ghue u wə̄n wo enyəa e yo dzə̂ kəfəgha ko fɛ am mbī, ù ŋ kelê mùghù è doʼn təla zo.

²⁶Ghùw wəla ù lighāa alefwaʼā â mùghò ki alebwiī ghàʼ à wə̄n kə ghuw kə̀ mɔ̀ʼ, bòʼ enyəa luʼū kəlāa Ǹ lo a te, ghî a kəfwàʼ ghaŋa ghə n lo sugho fughu èzə̀. A bugho ghuw fwàʼa â mùghò, Tsele waŋa n namso ghùw ù te.

²⁷Mùghò êzəŋ lo am bàŋ kə fə̂ŋ. Ǹ so e êzəŋ e kôom dzɛ̂ èndùghō? Mùghò e yia dzɛ̂ enyəa, ‘Tsele waŋā bəghasə̄ mugho êzə̄ŋ â?’ Ɛ̂ŋgaŋ dzə̂, zə lo e ghee mùghò mò bugho fɛ am mbī, enyəa M̀ bùgho fala an nə̀gha zən.

²⁸Tsele, děe tsughu daʼa kə̂a kò.” Dzə̀ n daŋso sə̀ tsùghù wò alo kəwālā, dzàa tsùghu wò enyəa, “Mùghò n dè, Ǹ naam ki nû aledèe kpeʼe.”

²⁹Nɔ̂e kə aghì kəla kə fə̀ ti fughu n zuw dzə̀ è te, ghe n nùghù dzɛ̀ tsùghù enyəa, “À kə̀m èghuuw.” À li ghə n dzɛ̀ enyəa, “Tsəntə̄ghā e Kə̀zə̀ kə̀a ndùw àghəa â wə̄n.”

³⁰Yɛso m bɛ̀lɛ̀ ndùw ghee enyəa, “Dzə̀ zən kâ sə̀ tsùghù wò dzə̀ bòʼ mùghò; è sə̀ tsughu wò bò ghɛ̀.

³¹Nəghā zə m kpē, zəla ghe lo saʼa mbī a te àsùghò aŋghəa ghe lo dzûu maʼn səā Satàn a te.

³²Abugho ghe lo tɔ̂ʼ kɔʼso kɔʼ mugho edzuŋ, aghî a dzə̀m lo daŋso boō fughuu wô â mùghò.”

³³Ù fə̀ enyə kə̀a tsughu aledèe fughu ŋgòʼ è èvʉ zəla ù lo kpuūw ghè zò.

³⁴Nɔ̂e kə aghì chi kə ŋ kòom bɛ̀lɛ̀ ndùw wə̄n enyəa, “Ghàʼ zoʼn kele kɔʼ alo kəlàŋ enyəa, Kə̀lestò lo dòʼn tə̀la nû. Ghɛ̀ sô lò ênzə̂n alekòom dzâa wô â ghàʼ enyəa, ghe ki alekɔʼsō kɔʼ Wɛ ù Ghù edzūŋ a? Wɛ ù Ghùw bûʼ lò ndughoo a?”

³⁵Yɛso n dzɛ̀ â ghee enyəa, “Tsə̀ è te naam lò kəŋo nduw nu ghɛ̀ à ghee aŋ kə̀mà fə kə̄ghā. À fi lo enyəa e bwiī nlò am tsə̂, e kwo ko nlò ləm kə lô so e kuūwn koom bvʉ̀a a zəŋò ghɛ̀. Ghùw wəla ù bwìi alo kələm kwo yo luʼu kəla ù ndûuw a te.

³⁶Aŋghəa ghɛ̀ ki tsə̀, ghɛ̀ boo fùghù nduw nlò â ghè zò, tò ghɛ̀ ke doʼō ghî ghəla ghe mughu an tsə̂ è te.” A m bùghò Yɛso kə̀a tsughu ghəa ghən gho, ù n zə̀ghàa tàʼà tsughu ghee, ndùw nàn dòʼò è nduw.

³⁷Aŋghəa Yɛso fə̀ bûʼ tso dê ko ndə̀mà tə nsə̀ghàa tò an sə kə ghee, ghe ŋ kè sô kuūwn boō fughu â wə̄n.

³⁸E fə̀ enyə lo aleluesō tsughu shwaʼ u Kəzə̀ wəla ghùwshʉ̀ghà tɔɔŋ, Èzayà fə̀ tɔm naŋā, enyəa, “À shwaʼ waʼa ù boo ndùghò a Mughu ù te, à lò â ndùghò Mughu ù te dê tsughu daʼa kə wə̄n ko a?

³⁹Zə lo e ghee ghe fə̀ yo alebôo shwaʼ u te wo, tɔŋlo enyəa ghùwshʉ̀ghà Èzayà ma fə dzɛ̀ naŋa kpeʼe wò sùghò enyəa,

⁴⁰Zə̀ kə̀ mâa fosò nàŋa sə a ghee gho, tughu sə naŋa sùghò fə̀ŋ tə ghee enyəa mò ghe lɛnlo èghəa, ghe e koʼòkɛlɛ yo, ghe n yo sugho alezuūwkɛlɛ̄ am fə̀ŋ tə ghee, yò aletiī kôom wô a vʉ̀a mùghò tò Ǹ bâaŋ dzaŋà tə ghee.”

⁴¹Èzayà fə̀ è ènyə kəa sə wo bòʼ ù fə̀ koʼ ziī nduw daʼa kə Yɛso, ù ŋ kə̀a wò aghəa kùʼù ndùw wə̄n.

⁴²Ghî à ne a Tə̀dzûu ghə̀ m boo fùghù ndùw â wə̄n, ghe n sô kǔuwn tsəŋo aledzàa səā wô an ndɛ enyəa ghî a Falàsîi à lô dzûu səā ghee an Ndùghène è Tə̀dzûu.

⁴³Ghe fə̀ tsəŋo bòʼ ghe fə̀ ləghaa alekelê kɔʼso məla ghî a mbī a fughu tsə̀ghàtàʼà məla à fughuu Zə̀ kò.

⁴⁴Yɛso ŋ kòom dzɛ̀ sə̀ wò an dzə̂ è tughu enyəa, “Ghùw wəla ù boō fughu â mùghò kà ka boo ko â mùghò, ù bǒo fùghù sùghò â ghùw wəla ù tum wô mugho.

⁴⁵Ghùw wəla ù kòʼò mugho, kòʼò sùghò nǔ ghùw wəla ù tum wô mugho.

⁴⁶M̀ fɛ am mbī nyə wò tô tsə̀, enyəa mò ghùw bǒo fùghù dzə̀ â mùghò, ù n yò alemùghù doʼò alo kələ̄m.

⁴⁷Ghùw wəla u zuuw shwaʼ waŋa wo, vʉ̀a ù tue alenìi naŋa, Ǹ yò tò mùghò e saʼ wə̄n, nu Ŋ̀ ka mo fɛ mbī nyə wò dzə̀ alebùghò saʼ aghî; mùgho mò laam nyə wo alebùghò bəghāsə̄ ghî a mbī ghò.

⁴⁸Ghùw wəla ù kòʼò lʉghāa mugho, buw alenìi naŋâ shwaʼ waŋā ki tən nû ghùw wəla ù lo saʼā wə̄n; tɔŋlo enyəa à kè lò shwaʼ wəla u sə wo an dzughu zāŋā an tsuʼ wəla mbī kê mìanlo a te.

⁴⁹Nu Ŋ̀ kâ ghəa ghən kəā sə̀ wò dzə̀ aŋ ŋgə̄ŋ zaŋā; à lò ghuūghùe Tsele waŋā wəla ù tum sə wô mugho ù fughu mugho â daʼa ko am fəgha kəla Ŋ̀ ki aledzɛ̀ ghè kò àsùghò dzì zəla Ŋ̀ ki alekə̀a a te.

⁵⁰Lò êzə̀ mo Ŋ̀ kwo nû enyəa shwaʼ u wə̄n u lo mùghù è doʼn təla zo. Fəgha kə̀là Ŋ̀ kəā, M̀ bɔɔm kə̀aa ko aŋghəa bəghà mò naʼà wo â mùghò.”