Read Aghem Dzɔ̌n 13 Bible Online

Dzɔ̌n 13 - Aghem bible

Dzɔ̌n 13

¹À fə̀ êzəŋ doʼōdoʼō ko fə tsuʼ fə mɔ̀ʼ to ghe e zə zə kə̀ Zəŋso Naaŋ ko, à n lo mò Yɛso kwò ziī nû enyəa nəgha zəla e ki alezə̀ghàa mbī zən a te, e ndûw e ghee zo ebàm a vʉ̀a Tsele zə m kpē; a n lo ezə̂ mô ù ŋge ki eləgha a zəŋò fən a wə̄n gho fɛ am mbī, ù fə̀ ləghaa ghee ndùw tɛ̀ è nduw to mbī kê bughò mîaa.

²Aŋghəa Yɛso sô zəā kûun tò ghèe ghê tsə̀təndə̄ghā tə wə̄n to, a n lo êzə̀ mo Satàn n nyə̄ bonlo am fə̂ŋ è Dzudàs Eskàlìot, tɔɔŋ wɛ ù Sǎemòn enyəa ù ndùw fêe fughu Yɛso.

³Yɛso fə̀ kwo nû enyəa Tsele m fughu naŋa ghəa gho a dzə̀m aŋ ghu kə wə̄n asùghò enyəa ù mò nughuu wo a vʉ̀a Zə̀ kò, vʉ̀a ù ki sugho alendùw ebàm a vʉ̀a ghè kò.

⁴Ù m bughu naŋa tsughu ezə, ghàʼ nùghù è kɔʼ, tsɔ̀ʼ nùghù kɔ̂ʼ ndzʉ̄ tə wə̄n tə bee to, gaʼ naŋa è tsughu, kɔ̀n nyə̀ ndùw bàtɛ̀lɛ alo esā.

⁵Ù n daŋso tsòm dzə̀n tsughu mmughu an tùuw fə fəkàŋà, kàʼ ndùw alesùw fwe e tsə̀təndə̄ghā tə wə̄n a te; zèe tsùghu am bàtɛ̀lɛ zə̀a ù mò kɔlɔ̄ kele alo esā.

⁶A m bùghò Yɛso bùghò tɛ̂ wo a sə̀a Sǎemòn Pità, Pità m bvʉ â wə̄n enyəa, “Mughùbè, ghù so e sûw sughò fwee zaŋā a?”

⁷Yɛso n dzɛ̀ â wə̄n enyəa, “Fəgha kə̀là M̀ fwaʼà fɛ ghù kǎam kwo dzə yo, ghù lo ghùu kèle sùghò nù.”

⁸Pità n dzɛ̀ wə̄n enyəa, “Ghù kè sùw kòʼ yò fwee zaŋā zo.” Yɛso n dzɛ̀ â wə̄n enyəa, “Abugho Ǹ tâʼkè sûw fwee zəghà, à fi lo mò ghàʼ à ghù kòom ki yo ghəa zo.”

⁹Pità ŋ kòom dzɛ̀ nduw â wə̄n enyəa, “Mughu ù te, abugho ghù so e sûw fwee zaŋā, sûuw sùghò ghu ghaŋa gho à tuw kaŋā ko.”

¹⁰Yɛso n dzɛ̀ â Pità enyəa, “Abugho ghùw lo mò u n ghue u wə̄n u sûw, ù ki ko alekɛ̀lɛ̀ kɔʼ efwee. Ghɛ̀ à dzə̀m, ghɛ̀ zɔlɔ nù, à gɔ̀ʼɔ̀ ko yo ghùw u mɔ̀ʼ am bvʉa zɛʼɛ̄.”

¹¹Â Yɛso aledzàa səā wô enyəa, “A yo dzə̂ ghɛ̀ a dzə̀m ghɛ̀ zɔ̄lɔ̄.” À fə̀ lo bòʼ ù fə̀ kwò ziī nû ghùw wəla ù sò fêen fughuu wə̄n.

¹²A m bùghò Yɛso sùw mɛʼɛ̀ tsughu fwee e tsə̀təndə̄ghā tə wə̄n zo, ù nì dzəlà kɔ̂ʼ dzʉ tə wə̄n ebàm, ù m bvʉ â ghee enyəa, “Ghɛ̀ ŋ kòʼkɛ̀lɛ to ghəa ghə̀là Ŋ̀ ghəə̄ŋ tsughu fɛ a zəŋò ghɛ̀ à?

¹³Ghɛ̀ mugho tɔŋlo enyəa à lǒ Wàdè asùghò Mughu ù te; à lǒ èsəŋò, ghɛ̀ lo tsəghatsəgha; tɔŋlo enyəa Ŋ̀ kûm lò nû.

¹⁴Abugho mùghò wəla Ǹ lo Mughùbè wɛʼɛ àsùghò wàdè wɛʼɛ lò alesùw fwee zɛʼɛ̄, à fi lo enyəa ghɛ̀ ki alesuūw sugho fwee e ghî à li gho sughò.

¹⁵Nu fwàʼ kə̀là M̀ fwâʼ tsughu â ghɛ̀ lǒ tsə̌a am fəgha kəla ghɛ̀ ki alefwaʼā ghè kò.

¹⁶ M̀ fɛ kùum dzàa wò nù â ghɛ̀, kɔ̂ɔ fə̀ li fə̀ tsəghàsə̌a yo mughùbè ù wə̄n, ŋkāa tum yo aletsə̀ghàasə ghùw wəla ù tum wə̄n.

¹⁷Êzə̄ŋ wəla ghɛ̀ kwo səŋò zən zo, Zə̀ kə̀ lo fughuu ghɛ̀ â bughun zo abugho ghɛ̀ dêe ndûw səŋò e te zo am fwàʼ kɛʼɛ.”

¹⁸ Yɛso n dzɛ̀ kpèʼe ndùw â tsə̀təndə̄ghā tə wə̄n to enyəa, “À yò dzə̂ â ghɛ̀ a dzə̀m Ŋ̀ kə̂aa wô ghəa ghən gho, bòʼ enyəa Ŋ̀ kwo nû tsə̀təndə̄ghā taŋā təla Ǹ tsɔʼ sə wo. Shwaʼ u Kəzə̀ ù ki alebùghò sə êsəŋò enyəa, ‘Ghùw zə̀ fʉghàzəa waŋa kòom fə̀n tsughu mbə̀ghà a zəŋò mùghò.’

¹⁹M̀ fɛ dzɛ̀ nàŋa zìi wò dzə̀ ghəa ghən gho â ghɛ̀, to abugho ghəa a te a lo bughò sə kɔʼ, ghɛ̀ ke boo fughu enyəa Ǹ lo Mɛ̀zayà ù te.

²⁰ M̀ fɛ kùum dzàa wò nù â ghɛ̀, Ghùw wəla ù nì naŋā ghùw wəla Ǹ tum wo fi nî nàŋa sùghò mùghò; àsùghò enyəa ghùw wəla ù nì naŋā mugho fi nî nàŋa sùghò wə̄n wəla ù tum wô mugho.”

²¹Ghəa Yɛso kə̀a mɛʼɛ̀ tsughu ghəa ghən gho, ghəa a te ghə ŋ ŋge fəmso wə̄n am fə̂ŋ, ù n daŋso dzɛ̀ sə̀ wò an dzughu e tugho zo enyəa “Ghùw wɛʼɛ u mɔ̀ʼ lo fèen fùghu nù mugho.”

²²Tsə̀təndə̄ghā tə wə̄n tə n təm lɛɛn kaaŋ ndùw ghue e ghee, tuw kə sô kpuūw ghee enyəa Yɛso sò yia moʼò ndùghò.

²³Tsə̀ndə̄ghā zəla Yɛso fə̀ ŋgeē ləghaa, n doʼ am bughuu e wə̄n.

²⁴Sǎemòn Pità m fòʼn ndùw aghu â tsə̀ndə̄ghā è te enyəa è bvʉā ndûw â Yɛso enyəa Yɛso dzàa wô ghùw wəla ù mòʼo ghè wò.

²⁵Tsə̀ndə̄ghā è te n səəŋ kəŋo ndùw a vʉ̀a Yɛso, bvʉ â wə̄n enyəa, “Mughùbè, alo ndughoo a, ù so e fêe fughu ghû a?”

²⁶Yɛso n dzɛ̀ enyəa, “À lǒ ghùw wəla M̀ fughu ndûw fəghàzəa kən ko â wə̄n abugho Ǹ tsû kɔʼ nuum ko a te.” Ù n daŋso nì kɔ̀ʼ boʼò fə fəbàa, tsù kɔ̀ʼ alo kənumlo fùghù ndùw a Dzudàs Eskāliyɔ̀t, tɔɔŋ wɛ ù Sǎemòn Eskāliyɔ̀t.

²⁷Ghəa Dzudàs zə kɔʼ bàa fə tə fo, zə̀a fə̀ biigh fə nyəən tsughu wə̄n. Yɛso n daŋso dzɛ̀ â wə̄n enyəa, “Ghəa zə̀a ghù so e ghəŋlo, zàŋso ghəəŋ ndùw.”

²⁸Ghùw u mɔ̂ʼ fughu an chìndùghu ŋ kè tsoō zuūwkɛ̄lɛ̄ ghəa zəla Yɛso dzɛ̀ nduw â Dzudàs.

²⁹Aŋghəa Dzudàs màʼa fə̀ lo ghùw wəla ù n naaŋ kə̀a kə kua ko, tsə̀təndə̄ghā tə wə̄n tə li tə m mòʼn ndùw enyəa Yɛso fi wɛɛ dzɛ̀ enyəa ù ndùw zuū wo fəgha kə li ko alezə̄ kəzə a te; ŋkāa enyəa ù fughuu ndûw fəgha kə li ko â ghì à laa gho.

³⁰Aŋghəa Dzudàs daŋso nì zə ndûw bòʼò fə fəbàa fə te fo, n nughù sə̀ è nduw, mo tsuʼ wə n dzə̄.

³¹A m bùghò Dzudàs nùghù sə nduw, Yɛso n dzɛ̀ tsughu enyəa, “Nəghā zə m kpē â ghee alefughu ŋkɔʼso â Wɛ ù Ghùw, àsùghò â Zə̀ kò alekele ŋkɔʼso bò wə̄n.

³²Abugho Zə̀ kə̀ lo alekele ŋkɔʼso bòʼ Wɛ, à fi lo enyəa ù lo daŋso fughuu sùghò nû Wɛ â kɔʼso məla n doʼò tən, Zə kə lo daŋso ghəŋlo ù kele ŋkɔʼso an nə̀gha e te zo.

³³ Wɛ a fə̀ŋ ghaŋa gho, Ŋ̀ kôom ŋge ki yo nəgha zo sɛ̀, ghɛ̀ lô mughò kəŋo wò nù. Ghəa mugho mô dzɛ̀ â tsoʼ tə Tə̀dzûu tò, M̀ bɔɔm dzàa wò sùghò ghəa è mɔʼɔ zo â ghɛ̀ enyəa, ‘Luʼu kəla Ǹ nduūw a te, ghùw wɛʼɛ yo alebùghò fùghù.’

³⁴ Lâŋ kə̀ fughu kə̀là M̀ fughu wo â ghɛ̀ lò enyəa, ‘E dèe ləgha zo aŋ ghue zɛʼɛ̄ tò aŋghəa Ǹ ləghaa ghɛ a te. Chìa ki aleləghā sugho wàazə̀.’

³⁵A abugho ghɛ̀ ki ləgha zo aŋ ghùe zɛʼɛ, aghî a dzə̀m lo daŋso koʼòkɛlɛ wô enyəa ghɛ̀ lo tsə̀təndə̄ghā taŋā.”

³⁶Sǎemòn Pità m bvʉ â wə̄n enyəa, “Mughùbè ghùw so e ndûw ghɛ̀?” Yɛso n dzɛ̀ â wə̄n enyəa, “Luʼu kəla Ǹ nduūw a te, ghù yò alebùghò êzə̄ŋ a bàâ mùghò. Ghù lo mùghò ghûu dzùum wò nù.”

³⁷Pità m bvʉ â wə̄n enyəa, “Mughùbè, mùghò m boo enyəa abugho à lò ko evʉ, Ǹ lo nû alekpūw ghàʼ à ghù, à sò kǔuwn lǒ kwò Ǹ yo alebùghò èzə̀ŋ a bâa ghǔ a?”

³⁸Yɛso m bvʉ â wə̄n enyəa, “Ghù kùm lò nû alekpuūw fughu vʉ zaŋa? Kòʼo, M̀ fɛ kuūw dzàa nû â ghù, nùu mbvʉ sô gbə̀la tɔŋɔ mò ghù m mùghò tue màʼà tə nəgha tə təgha.”