Read Aghem Dzɔ̌n 14 Bible Online

Dzɔ̌n 14 - Aghem bible

Dzɔ̌n 14

¹Yɛso n dzɛ̀ â tsə̀təndə̄ghā tə wə̄n to enyəa, “E kwo ko fə̂ŋ tɛʼɛ tə lô so e tsəəŋ nù, boo fùghù tsughu ko nlò â Zə̀ kò, ghɛ̀ boo fughu wo sùghò â mùghò.

²Dzughu a təndughu a lo ndə̀m am mùghùu kə bəghà, abugho à mò yo êzə̀, to Ŋ̀ ka mò dzɛ̀ â ghɛ̀ enyəa M̀ fɛ ndùuw alendùw fəghaān naŋā tsughu təluʼū â ghɛ̀.

³Abugho Ǹ ndûw fəghaān naŋā tsughu luʼū to â ghɛ̀, Ǹ lo kôom bughò èbàm M̀ bughò nî ghɛ̀ tò sɛ̀ è lo a dzə̀m, enyəa luʼu kəla Ǹ lo a te ghɛ̀, è lo sugho fughu èzə̀.

⁴Ghɛ̀ kwo nû luʼū kəla Ǹ nduūw a te, ghɛ̀ yia kwo sugho dzì è te.”

⁵Tɔ̀mâs m bvʉ̀ ndùw â Yɛso enyəa, “Mughùbè, ghàʼ kwo yo luʼū kəla ghù ndǔuw a te. Ghà laʼà sò fughu bughò mo a dzì tsəghà ghɛ̀?”

⁶Yɛso n dzɛ̀ ndùw â wə̄n enyəa, “Ǹ lo dzì, yìa Ǹ lô səŋò zò àsùghò mùghù zò. Ghùw yo alebùghò tɛ̂ alô Bə̀ghà mò ù kà tsə̀ghà a zəŋò mùghò.

⁷Abugho ghɛ̀ mô kwo mugho, to ghɛ̀ mô kwo sughò Bəghà. Êzə̄ŋ ghɛ̀ ŋ wə̄n kôʼ, ndòʼ kwò sugho wə̄n.”

⁸Felèp n ndzɛ̀ â wə̄n enyəa, “Mughùbè děe wò ghaʼ â Tsele wʉ̂a to fə̂ŋ taʼa tə zʉ̂ʉn tsughuu.”

⁹Yɛso m bɛ̀lɛ̀ ndùw wə̄n enyəa, “À fi lo enyəa, an dəghà kə kəgha kəla Ǹ lô fɛ sɛ̀ a Felèp, ghɛ̀ kaām kwo to yo mugho a Felèp? Ghùw wəla ù lo mò ù m mùghò kôʼ, ù ŋ kôʼ sùgho Bəghà. À sò lò kə kwò ghɛ̀ sô naām məghaan wə̄n a?

¹⁰Ghɛ̀ kāam boo to enyəa ghàʼ à bə̀ghà lò kəfəgha kə̀ mɔ̀ʼ à? Shwaʼ wəla Ŋ̀ kə̂aa wô â ghɛ̀, à yò dzə̂ aŋ ŋgəŋ zaŋa, à lo daʼa kə bəghà kəla kə lô a zəŋò mùghò.

¹¹Boo tsughu nlò aŋghəa Ǹ dzɛ̂ enyəa ghàʼ à bə̀ghà lò kə fəgha kə̀ mɔ̀ʼ ŋkāa ghɛ̀ boo tsughu mugho am fwàʼ kə̀là ghɛ̀ koʼ wo M̀ fwâʼ tsughu.

¹²M̀ fɛ kùum dzàa wò nù â ghɛ̀, ghùw wəla ù boo fughu â mùghò, ù lo fwàʼà sùghò nǔ fwàʼ kə̀là M̀ fwaʼā ghè kò, ù bùʼù fwaʼà tsəgha sə bòʼ enyəa M̀ fɛ ndùuw â vʉ̀a bə̀ghà.

¹³Abugho ghɛ̀ bvʉ ko ghəa è ghɛ zo an zən zaŋā, Ǹ sô ghə̌əŋ nù, tò bəghà è lo kele ŋkɔʼso bòʼ mùghò.

¹⁴Abugho ghùw wɛʼɛ kûm bvʉ ko ghəa è ghɛ zo an zən zaŋā, Ǹ sô ghə̌əŋ nù.”

¹⁵Yɛso n dzɛ̀ â tsə̀təndə̄ghā tə wə̄n to enyəa, “Abugho ghɛ̀ ləghaa mugho, ghɛ̀ ki alenaaŋ lâŋ kaŋa ko.

¹⁶Ǹ lo gɔ̀ɔŋ ndùw â bə̀ghà ù lo tuū wò ghɛ̀ â ghùw wəla ù lo yôsò ghɛ, wəla ù lo doʼn təla ghɛ̀ à ghee.

¹⁷À lǒ wə̄n Zuʼ təla tə dêe fughu səŋò zò kùu ndùw Kə̀zə̀. Ghî a mbī yo dzə̂ alekpeē nî wə̄n bòʼ ghe yo alekòʼ wə̄n ŋkāa ghe kwo yo wə̄n. Yia a bughò ghɛ, ghɛ̀ kwo nû wə̄n bòʼ ù lǒ ghɛ̀ à ghee, vʉ̀a ù kè lô a zəŋò ghɛ̀.

¹⁸Ǹ yo alezə̀ghàa ghɛ̀ tò waatsʉ̄, Ǹ lo bùghò nù ebàm a vʉ̀a ghɛ̀.

¹⁹A tsûuŋ ko enyə, mbī lo kòom kòʼò yò mugho, ghɛ̀ lo e koʼō mugho. Bòʼ enyəa M̀ mugho nû, ghɛ̀ lo e mughu sugho.

²⁰Tsuʼ u te u kê bùghòo nù, wəla ghɛ̀ ke kele tsughu enyəa ghàʼ à bə̀ghà lò kəfəgha kə mɔ̀ʼ tò aŋghəa sɛ̀ lô sugho fəgha ko kə mɔ̀.

²¹Ghùw wəla ù zuūw lwâŋ waŋa wo, bɔɔm bwìi ndùw a te, vʉ̀ lô ghùw vʉ̀a ù biso ləghaa mugho. Ghùw wəla ù ləghaa mugho, Bəghà lo ləghaa sùghò wə̄n, mùghò è ləghaa sugho wə̄n, dèe fùghu sùghò ghue waŋā â ghùw ù te.”

²²Dzudà (wəla à kuūwn yô dzə Eskalìot) m bvʉ â Yɛso enyəa, “Mughùbè, à kǔuwn lǒ bòʼ kwò ghù lo kaā dêe ko ghue wʉ̀a wò â ghàʼ tsə̀təndə̄ghā təgha a, mo mbī kuuwn yò a te?”

²³Yɛso m bɛ̀lɛ̀ ndùw wə̄n enyəa, “Abugho ghùw ləghaa mugho, ù kì alebwiī aŋghəa Ǹ ləghaa a te, bəghà lo e ləghaa sugho wə̄n, ghàʼ kê bughò mughù ghàʼ à ghee.

²⁴Ghùw wəla ù ləghaa yô mugho yò sughò alekɔʼso mùghò. Ghəa ghəla ghɛ̀ zuūw an ndzughu zaŋā yo dzə̂ à ghaŋa gho, à lò shwaʼ u Bəghà wəla ù tum sə wô mugho.

²⁵Mùghò n dzɛ̀ naŋa wò ghəa ghən gho â ghɛ̀, êzə̄ŋ wəla Ǹ naām lô fɛ sɛ̀.

²⁶Ghùw wəla ù lo dêe ghɛ â dzì, wəla ù lo yôsò ghɛ tɔɔŋ Zuʼ tə̀ Zɔlɔ təla Bəghà lo tuū wo â ghɛ̀ an zən zaŋā lo zoʼn ghɛ̀ â ghəa gho a dzə̀m, zə̀əŋ wò sùghò ghɛ̀ aŋ ghəa ghən à dzə̀m mùgho mò dzɛ̂ naŋā â ghɛ̀.

²⁷M̀ fughu ghɛ â bughun zo, bughun zaŋā zəla M̀ fughu â ghɛ̀, Ŋ̀ kâ fùghù dzə̀ to aŋghəa mbī fughuu. E kwo ko ghùw wɛʼɛ lô so e bâŋsò fə̀ŋ aŋghəa è li zo ŋkāa ù lò so e tsəŋo ghə̀a è li zo.

²⁸Ghɛ̀ maā zuw ghəa ghə̀là mugho mô dzɛ̂ naŋā â ghɛ̀ enyəa, ‘Ghəa Ǹ zəghàan tsughu ghɛ fɛ, Ǹ lo kôom bùghò nù ebàm â ghɛ̀.’ Abugho ghɛ̀ ləghaa mugho, ghɛ̀ laam ki aleduʼnlo enyəa Ǹ ndûuw a vʉ̀a Bə̀ghà, bò Bəghà tsə̀ghàsə̀ mugho.

²⁹M̀ fɛ dzɛ̀ zìi wò dzə̀ nù â ghɛ̀ mo e kaām sə, enyəa mo e lo kôom nì ko kə̀bəla, ghɛ̀ n lo alebōo.

³⁰Ŋ̀ kôom ki yo ndə̀m è aghəa à kəaa gho sɛ̀, bòʼ enyəa ghùw wəla ù saʼā mbī zən bughò nù. Ù kì ki yo daʼa kə li ko a zəŋò mùghò.

³¹Ǹ telè fwàʼà ko an dzə̂ è Bə̀ghà, to mbī lo kele enyəa Ǹ ləghaa nù Bəghà. Nùghù kɔ nlò to sɛ̀ nughù fɛ an lùʼu kən.”