Read Aghem Dzɔ̌n 16 Bible Online

Dzɔ̌n 16 - Aghem bible

Dzɔ̌n 16

¹Ŋ̀ ghəa ghən fɛ â ghɛ̀ dzɛ̂ wò enyəa e kwo ko ghùw wɛʼɛ lò so e bvʉ̂a kòom nù.

²Ghe lo dzùu nùghùun sə̌a wò ghɛ̀ an Ndughutə̀ne tə Tə̀dzûu tò. Nəghā e bùghòo nù, zəla mò à lò ko ndugho ù wi ghɛ, ù m moʼnlò enyəa e fi fwaʼà fwàʼ kə Kəzə̀.

³Ghe lô ghəa ghən a zəŋò ghɛ̀ ghəŋlo bòʼ ghe kaām kwo yô Tsele waŋā ŋkāa mùghò.

⁴Ŋ̀ ghəa ghən fɛ a ghɛ̀ dzɛ̀ nàŋa wò enyəa abugho nəgha e ghee e te e kê kpē tsughu, ghəa a te a kāʼ tsughu alesə̄, ghɛ̀ ŋ kele enyəa M̀ mafə â ghɛ̀ dzɛ̂ nàŋa. Ŋ̀ ka mo ghəa ghən gho â ghɛ̀ kaam dzɛ̀ dzə̀ nàŋa wò dzə̀ aŋghəa a fə̀ kaʼ tsughu, bòʼ sɛ̀ mò lô tsəgha a dzə̀m.

⁵E sô fɛ êzə̄ŋ lo enyəa, M̀ fɛ nùghùun ndùw èbàm alô ghùw wəla ù mô tum wô mugho, ghùw wɛʼɛ ù lòʼ bùʼù tsǒo bvʉa yo â mùghò luʼū kəla Ǹ nduūw a te.

⁶Ghəa Ǹ dzɛ̂ wô ghəa ghən gho êzə̄ŋ â ghɛ̀, ghɛ̀ yia a doʼò nduw alo esē.

⁷Ǹ naam kuuwn dzàa wò ko ghɛ̀ â sə̀ŋò zò enyəa, dzɔ̀ lǎam lò â ghɛ̀ enyəa to M̀ mô nughù ndûw; tɔŋlo enyəa, abugho Ǹ tâʼkè ndûw, ghùw wəla ù lo dêe tsəghà ghɛ â dzì lo bùghòo yò â ghɛ̀. Mò Ŋ̀ kuuwn nùghù ndùw dzə̀ nù, Ǹ nduw tuū wô wə̄n â ghɛ̀.

⁸Abugho ghùw wəla ù lo yôsò ghɛ lo bugho, ù lo ghəŋlo ghî a mbī a kele enyəa ghe m bo e ghəŋlo, ù lo dêe sùghò â ghee enyəa Yɛso lò tsəghatsəgha, àsùghò enyəa Zə̀ kə lo ki alesāʼ ghee;

⁹Ù lo dêe ndûw â ghee enyəa ghe m bvʉ̀ kòmlò am bòo tə ghee, bòʼ ghe kâ bǒo fùghù dzə̀ â mùghò.

¹⁰Ù lo dêe sughò â ghee enyəa ghe m bvʉ̀ kòmlò aŋ ghəa zəla e lô tsəghatsəgha, bòʼ enyəa Ǹ ndûuw a vʉ̀a Bə̀ghà; ghɛ̀ lo kòom kòʼò tsə̀ghà yò mugho.

¹¹Ù lo dêe ndûw â ghee enyəa Zə̀ kə̀ lo saʼā ghee, nu ghe ghùw wəla ù saʼā mbī zə saʼ tən.

¹²“Ǹ naam ki ndə̀mà tə aghəa Ŋ̀ ki aledzɛ̀ â ghɛ̀, Ǹ yo aledzɛ̀ êzə̄ŋ, bòʼ ghəa a te a sô ŋgěe fəmso nù ghɛ alo təfə̀ŋ.

¹³A laʼà bugho Zuʼ tə̀ Zɔlɔ tə lo bugho, tə lo e deē ghɛ â sə̀ŋò zò kùu ndùw Kə̀zə̀. Zuʼ tə te tə lô ghəa a kə̂a yò an daʼa kə wə̄n, tə lo kuuwn tèlè kə̀a kô fəgha kə̀là tə zuw ghè kò, tə lo e dzaā ziī wo sugho fəgha kəla kə ki alesə̄ â sə ko.

¹⁴Zuʼ tə te lo ghəəŋ nù mùghò è ki kɔʼso mò, bòʼ tə lo nìi dzàa wò shwaʼ waŋā â ghɛ̀.

¹⁵Fʉgha wə̄n u dzə̀m Tsele ù te ki, lǒ ù waŋā wo; zə lo e ghee Ǹ dzɛ̂ enyəa Zuʼ tə̀ Zɔlɔ tə lo nìi dzàa wò shwaʼ waŋā â ghɛ̀.”

¹⁶Fəkəmà ko enyə, ghɛ̀ lo kòʼò yò mugho, a lo kôom tsûuŋ tughūu sughò, ghɛ̀ lo kôom koʼ sugho mugho.

¹⁷Tsə̀təndə̄ghā tə wə̄n tə̀ li tə m bvʉ aŋ ghùe e ghee enyəa, “Ù bìso mòʼnlò èndūghō aŋghəa ù dzɛ̀ â sɛ̀ enyəa, ‘Fəkəmà ko enyə, ghɛ̀ kòʼò yo mugho, a lo kôom tsûuŋ tughuu sughò, ghɛ̀ lo kôom koʼ sugho mugho, bò Ǹ ndûuw alo bə̀ghà a?’ ”

¹⁸Ghe m bvʉ enyəa, “Ù mòʼò èndūghō aledzàa tsughu enyəa, ‘Fəkəmà ko enyə à?’ Ghàʼ bûʼ kwò sugho yo fəgha kə̀là ù mòʼo ghè kò.”

¹⁹Yɛso ŋ kòʼkɛ̀lɛ kɔʼ enyəa ghe ləghaa alebvʉ̄ wə̄n â ghəa zo, ù n daŋso dzɛ̀ â ghee enyəa, “Kən lò fəgha kə̀là ghɛ̀ bvʉnlo an ghùe zɛʼɛ, enyəa Ǹ yia moʼnlò èndughō aŋghəa Ǹ dzɛ̂ enyəa, ‘Fəkəmà ko enyə, ghɛ̀ lo kòʼò yò mugho, a lo kôom tsûuŋ tughūu sughò, ghɛ̀ lo kôom koʼ sugho mugho a?’

²⁰Kùmkùm, M̀ fɛ dzàa wò nù â ghɛ̀, ghɛ̀ lo e dinlō, kuu nsə, ghî a mbī a e ke kuuwn duʼnlo, ghɛ̀ è ke kuuwn mʉŋe, lò êzə̀ mò mʉŋe zɛʼɛ e lo kôom fə̀là doʼò wô eduʼnlo.

²¹Abugho wìzən sòʼo wɛ, ù n zuuw efɔnlo bòʼ nəgha e wə̄n è dzəa zə n sū. À m bùghò ù dzə tsughu, ù ŋ kòom nìzə̀ tsùghù fɔɔn zəla ù mò zuūw e dzə̀m, tsoʼn kə sô kɔʼɔ wə̄n enyəa ê ŋ wɛ dzə.

²²E fi lo enyəa ghəa ghɛ̀ lo êzə̄ŋ alemʉŋē, mò Ǹ lo kòom kòʼò kpèʼe nù ghɛ, fə̂ŋ tɛʼɛ tə e ke e zɔlɔ, mò ghùw ù lì e ke yo alenìi nughù tsoʼn kɛʼɛ aŋ ghùu ghɛ̀.

²³Abugho nəgha e te lo bugho, ghɛ̀ kê kòom bvʉ̂a yo mugho â ghəa è li zo. M̀ fɛ kùum dzàa wò nù â ghɛ̀, abugho ghɛ̀ lo bvʉ ko kwò kò â Tsele ù te an zən zaŋā, Ù lo fughuu nù.

²⁴Alebùghò tâa wô êzə̄ŋ, ghɛ̀ kaām fəgha kə̀ li ko m bvʉ an zən zaŋā. Bvʉ tsughu nlò, ghɛ̀ so kele, to fə̂ŋ tɛʼɛ̄ tə e kuūm zɔlɔ.

²⁵Ŋ̀ ghəa ghən â ghɛ̀ kwə̂ən kə̀a wò nù, mo nəgha e ndoʼò bùghò nù, zəla Ǹ lo kôom kə̂aa yô ghəa gho aŋ kwə̀ən kə ushwaʼ. Ǹ lô êzə̄ŋ e dzaā buʼn wo ghəa â ghɛ̀ kùu ndùw Tsele ù te an ndɛ an dzìi zə̂lā ghɛ̀ lo alezuūwkɛlɛ a te.

²⁶Abugho nəgha e lo kpe tsughu, ghɛ̀ lo e bvʉa tsughu fəgha ko an zən zaŋā, mo a yò dzə̂ mugho Ŋ̀ kê gɔ̂ɔŋ nduw Tsele ù te am bàm zɛʼɛ̄.

²⁷Ghuūghùe Tsele ù te ləgha sùghò nù ghɛ, tɔŋlo enyəa ghɛ̀ m mùghò ləgha, boo fùghù tsùghù sùghò enyəa a mùghò tum wò Kə̀zə̀.

²⁸Mugho mò nughu wo a vʉ̀a Tsele ù te, bùghò nyə̀ wò fɛ am mbī. M̀ fɛ êzə̄ŋ kôom zə̀ghàan tsùghu mbī aledùw èbàm a vʉ̀a Tsele ù te.”

²⁹A m bùghò ù kə̀a tsughu ghəa gho êzə̀, Tsə̀təndə̄ghā tə wə̄n tə n kɛɛ ndùw wə̄n enyəa, “Ghù vʉ̀a, ghù èzə̄ŋ e buʼn kə̀aa sə̌a wò àghəa an ndɛ; ghù kòom kwə̀ən kə̀aa yò nû.

³⁰Ghàʼ mô êzəŋ kele enyəa ghù kwò aghəa a dzə̀m. Ghuw ù lì kòom bùʼ kì yo alebvʉ̄ ghû â ghəa è li zo, nu ghàʼ mô êzəŋ kele enyəa à ghù kûum tùm wò Kəzə̀.”

³¹Yɛso m bvʉ â ghee enyəa, “Ghɛ̀ boo fùghù dzə̀ nù êzə̄ŋ a?

³²Nəghā e te e fɛ e kpee mɛ̀ʼn wò nù, zə m bùʼ kpe aŋghəa ghɛ̀ lo tiī zəghaàn mugho à nəŋ ko a te; chìa e tii nughūun nduw ko alo wə̄n an ndughu. Mò mugho êzə bûʼ yò sugho mùghò â nəŋ ko, nu Tsele ù te lo tsəgha ko ghàʼ à wə̄n.

³³Ŋ̀ ghəa ghən gho â ghɛ̀ fɛ nì dzɛ̀ wò enyəa to ghɛ̀ mô kì ebughunlo bòʼ mùghò. Ghɛ̀ lo ŋgee faan nù fɛ am mbī; kuuwn dzə̀la tsughu ko nlò fə̂ŋ tò, nu mùgho m mbī tughu tsəghà.”