Read Aghem Dzɔ̌n 17 Bible Online

Dzɔ̌n 17 - Aghem bible

Dzɔ̌n 17

¹A m bùghò Yɛso kə̀aa mɛʼɛ̀ tsughu ghəa ghən gho, ù m bòm lɛ̌ɛn kɔʼ kəwālā, ka tsughu alegɔ̀ŋlò enyəa, “Tsele, nəgha zə e mô èzəŋ e kpe â ghù aleghəŋlo enyəa ghî à kôʼ kɔʼso məla wɛ wʉ̂a ki, tò enyəa ù nìi wô ghù â kɔʼso mò a Tsele,

²bòʼ enyəa, ghəa ghù lo mò ghù m fughu wə̄n â daʼa ko a zəŋò ghì ghò a dzə̀m, enyəa ù è lo alefughu mughù è doʼn təla zo â ghî ghə̀là ghù fughu â wə̄n.

³Mughù e doʼn təla zən lǒ â ghee alekwō ghû, Zə̀ kə̀ səŋo kən kə mɔ̀ʼ, kwo sugho Yɛso Kə̀lestò wəla ghù mò tum wô fɛ am mbī.

⁴Mùghò n nì wò ghû a kɔʼso mò fɛ am mbī a bòʼ mùghò m mìasô fwàʼ kə̀là ghù mò fughu enyəa M̀ fwâʼ fɛ aŋ ghueekətsə̄.

⁵Tsele nîi naŋa mugho a vʉ̀a ghù tò mùghò è ki kɔʼso mò, tɔ̂ɔŋ kɔʼso m mɔ̀ʼɔ milā ghàʼ à ghù mò ki tsəgha to mbī e zîi tsughu.

⁶Mùghò n dě ghùw wəla ghù lo ghè wò â ghì ghə̀là ghù mò nî fughu sə wo â mùghò am mbī. Ghe fə̀ ki lo tsəgha ghî ghə̀a, ghù n nì fùghù wò ghee â mùghò, ghe yia ghe zuw dzə̀ zə̀ghà,

⁷ghe ŋ kele êzəŋ enyəa fʉgha wə̀n ù dzə̀m Ŋ̀ ki, à fùghù ghû â mùghò a Tsele.

⁸Tɔŋlo enyəa M̀ maā naʼà tum zəghà zəla ghù mò tum enyəa Ǹ naʼà â ghee, ghe mô è zuw, boo è fughu. Ghe yia kele tsughu sugho səŋò zò enyəa Ŋ̀ kûm nùghù wò a vʉ̀a ghù, àsùghò enyəa à lò ghû, ghù kùm tum wô mugho.

⁹Ŋ̀ gɔŋlò an tuw u ghee, Ŋ̀ gɔ̂ɔŋ dzə̀ yò an tuw kə mbī e dzə̀m, gɔ̂ɔŋ zaŋa e kuuwn lò ko â ghî ghə̀là ghù fughu wo â mùghò, tɔŋlo enyəa à lò ghî ghə̀a.

¹⁰Fəgha kaŋa kə lo kə̀ kə̂a kò; tò aŋghəa kə̂a kə̀ lo kə̀ kaŋā ko; kɔʼso maŋā m fɛ lǒ bòʼ ghee.

¹¹M̀ fɛ êzəŋ zəghàan tàʼn tsùghuu ghee am mbī, yìa Ǹ nughùun wô a vʉ̀a ghù. Tsele waŋa ù Zɔ̀lɔ, tsən nǎn ghee an daʼa kə̂a, kəla ghù mò fughu â mùghò, to ghe doʼò kə̀fəgha kə̀ mɔ̀ʼ, to aŋghəa ghàʼ à ghù lò fəgha ko kə mɔ̀ʼ.

¹² Nəghā zəla mùgho mò lo ghàʼ à ghee, mùgho mô ghee kwu kele an daʼa kəla ghù mò fughu â mùghò; mùghò n chǐin ghee, ghùw ù ghee u mɔ̀ʼ kà mìaa sə a te, à gɔ̀ʼɔ̀ ko yo ghùw wəla ghe fə̀ fôʼ naŋa enyəa ù kè kwəlà sâŋlò, aleluesō tsughu shwaʼ wəla ghe tɔm naŋā am Mwàʼsò kə Kəzə̀.

¹³M̀ fɛ ti an dziī M̀ bugho a vʉ̀a ghù. Ŋ̀ ghəa ghən fɛ am mbī kuuwn kə̀aa enyəa to tsə̀təndə̄ghā taŋa tə mô kì kpeen mɛʼɛ̄ sugho tsoʼn zəla Ŋ̀ ki ghè zò.

¹⁴M̀ maā shwaʼ wʉ̀a ù naʼà ndùw â ghee, mbī zə e bɛ̀ kɔʼ ghee bòʼ enyəa à ghe yo dzə̂ tò ghî a mbī gho, tò aŋghəa Ǹ yô sugho ghùw ù mbī.

¹⁵Gɔ̂ɔŋ zaŋa e yo dzə̂ enyəa ghù ni nughu sə kɔʼ ghee am mbī, e kuuwn lò enyəa ghù ni nan naŋa ghee am ghùu ghùw ù bǐigh.

¹⁶Ghe yo dzə̂ ghî a mbī gho tò aŋghəa Ǹ yô sugho ghùw ù mbī.

¹⁷Ghəəŋ tsughu ghee enyəa ghe e zɔlɔ an səŋò zəghà zəla ghù zoʼn ghee a te, tɔŋlo enyəa shwaʼ wʉ̀a ù lo êsəŋò.

¹⁸Mùghò ŋ ghee am mbī tum nyə ndùw, tò aŋghəa ghù mò tum nyə wô sugho mugho am mbī.

¹⁹Yìa Ŋ̀ kûm fughu mɛ̀ʼɛ̀ wô ghue waŋa wo alefwàʼ â ghù an tuw u ghee, enyəa ghe lo kûu fughu mɛʼɛ̀ wô sughò ghue e ghee â ghù.

²⁰Ŋ̀ kaa gɔ̀ɔŋ ko yo an tuw u aghì ghən gho, Ŋ̀ gɔ̂ɔŋ sùghò an tuw ù ghì ghəla ghe lo zuūw nîi shwaʼ waŋa wəla tsə̀təndə̄ghā taŋā tə dzâa nduw â ghee, ghe boō fughu wô â mùghò.

²¹Yìa Ŋ̀ gɔ̂ŋlo enyəa to ghe mô lò alo kəfəgha kə̀ mɔ̀ʼ aŋ ghùe e ghee, tò aŋghəa ghàʼ à ghù bɔɔ̄m lô sugho alo kəfəgha kə mɔ̀ʼ a Tsele, àsùghò enyəa sɛ̀ à ghee e bɔɔm lo sugho alo kəfəgha kə mɔ̀ʼ; to mbī boo tsughu enyəa a mùghò tum wò ghù.

²²Daʼa kəla ghù mò fughu â mùghò, mùghò m fùghù sùghò â ghee, enyəa ghe e lo fəgha ko kə mɔ̀ʼ to aŋghəa ghàʼ à ghù lò sughò fəgha ko kə mɔ̀ʼ.

²³Yìa Ŋ̀ gɔ̂ŋlo enyəa mùghò è lo fəgha ko kə mɔ̀ʼ ghàʼ à ghee tò aŋghəa ghù lò fəgha ko kə mɔ̀ʼ ghàʼ ghù, enyəa ghe e tɔ̄ʼ ti tǒ ghùw u mɔ̀ʼ, to mbī lo zuūwkɛ̄lɛ̄ enyəa a mùghò tum wò ghù, àsùghò enyəa ghù ŋ ghe ləgha to aŋghəa ghù ləghaa mugho a te.

²⁴Tsele, Ǹ ləghaa enyəa ghî ghəla ghù fughu â mùghò, ghe e lo ghàʼ à ghee an lùʼù kəla Ŋ̀ kê lo a te, to ghe lo e bɔŋɔ̄ koʼō tughu zaŋa zo; tughu zəla ghù mò fughu â mùghò, bòʼ ləgha zəla ghù fə̀ ki kele a zəŋò mùghò to mbī e bùghò zîi tsughu.

²⁵Tsele waŋa ù dzùŋ wəla ù lò tsəghatsəgha, aŋghəa ghî a mbī ghən bûʼ kwo ko yô ghû, yìa Ŋ̀ kuūwn kwo ghû tò aŋghəa ghî à li ghən kwo enyəa à mùghò tum wò ghû.

²⁶Mùgho nì dè ghû â ghee, Ǹ lo kòom bùghuu dòʼn yò aleghəŋlo enyəa, ləgha zə̀ghà zəla ghù ki a zəŋò mùghò, zə e lo a zəŋò ghee, mùghò è lo sugho a zəŋò ghee.”