Read Aghem Dzɔ̌n 18 Bible Online

Dzɔ̌n 18 - Aghem bible

Dzɔ̌n 18

¹A m bùgho Yɛso gɔ̀ɔŋ mɛʼɛ̀ tsughu, ù n dàŋ sə kɔʼ bɔ̂ʼ kə̀ loʼ ko ghe fə̀ tɔŋlo enyəa Bɔ̂ʼ kə Kidə̀lɔ̀n ghèe ghê tsə̀təndə̄ghā tə wə̄n to. Ghe n ndùw dəŋò kəla sum ù li u fə̀ lo a te, ghe n nyə̀ ndùw fughu an usum u te wo.

²À n lo êzə̀ mò Dzudàs wəla ù fə̀ fêe fughu wə̄n kwo nû luʼū kə te ko, tɔŋlo enyəa Yɛso fə̀ nduūw kpeen zee tsəgha fughu ghèe ghê tsə̀təndə̄ghā tə wə̄n to.

³Dzudàs n ndùw bùghò fughu an sum u te wo à saʼ kə təsùghugòʼ kò ghèe ghê gbè tə̀ tə Ndùghù è Kə̀zə̀ è ne an Yɛ̀lusalɛ̀m tə̀ li to, mò a tùm wò tuw u təfɔ̀e ghèe ghê ghì a Falàsîi ghò, ghe ŋ ki fʉgha wə ntɔ̄, à kɛ̀ʼɛ̀ wò.

⁴Yɛso ŋ kwo ziī fəgha kəla kə ki alesə̄ a zəŋò wə̄n. Ù n tee sə̀ è wo èsə̄, bvʉ â ghee enyəa, “Ghɛ̀ kəŋo ndùghò?”

⁵Ghe m bɛ̀lɛ̀ ndùw wə̄n enyəa, “Ghàʼ kəŋo Yɛso, ghùw ù Nazalɛ̀t.” Yɛso dzɛ̀ â ghee enyəa, “À lò mugho wə̄n.” À n lo êzə̀ mo Dzudà wəla ù fèe fughu Yɛso n ti dzəəŋ sugho fughu ghèe ghee.

⁶Ghəa Yɛso dzɛ̀ sə nduw â ghee enyəa, “À lò mugho wə̄n.” Ghe n ti səəŋ kəŋo è nduw, bvʉ̀ dòʼò ndùw a ghueetsə̄.

⁷Yɛso ŋ kòom bvʉ kpeʼe ndùw ko â ghee enyəa, “Ghɛ̀ kəŋo ndùghò a?” Ghe n naam dzɛ̀ ndùw ko â wə̄n enyəa, “Yɛso, ghuw ù Nazalɛ̀t.”

⁸Yɛso m bɛ̀lɛ̀ ndùw ghee enyəa, “Mùghò n dzɛ̀ â ghɛ̀ enyəa à lò mugho wə̄n, Abugho à lò enyəa ghɛ̀ kəŋo mughò, zəghā nlò ghî ghə̀n gho to ghe nughù.”

⁹Zən fə̀ lo aleluesō tsughu shwaʼ wəla Yɛso fə̀ kə̂a naŋā tsughu enyəa u bùghò èsəŋò enyəa, “Aŋ ghî ghə̀là ghù mo fughu â mùghò, ghùw ù mɔ̀ʼ a te kâ mìaa sə a te.”

¹⁰Sàemòn Pità ŋ ki kɔʼ, ù n daŋso sɔ̀ŋ sə̀ è kɔʼ, tswɛ̀ kə̀a màʼà ndùw tûuŋ kə kwe u zə̂a kə kɔ̀ɔ fə Tuw kə fɔ̀e è nē a te; zən e kɔ̀ɔ fə te fə mò lo Maakùs.

¹¹ Yɛso n dzɛ̀ â Pità enyəa, “Zughu naŋa nyə tsughu kɔ zəghà ebàm am būʼ. Ŋ̀ ki alebòʼò mbùŋ kəla bəghà fughu â mùghò enyəa M̀ boʼò.”

¹²Komndzūghū ù tə̀ sùghùgòʼ à sùghùgòʼ tə wə̄n to ghèe ghê gbè tə Tə̀dzûu ti tə n daŋso kwù kɔ̀n tsùghù Yɛso.

¹³Ghe n nì ndùw dzə̀ wə̄n esə a vʉ̀a Anàs, tɔɔŋ bə̀ghàwi ù Kaefàs wəla u fə̀ lo tuw kə fɔ̀e è nē an nùm kə te ko.

¹⁴ Kaefàs fə̀ lo ghùw wəla ù fə̀ tsʉ̂ ndûw ghî à ne a Tə̀dzûu ghò, dzɛ̀ â ghee enyəa, “Dzɔ̀ lo enyəa to ghùw u mɔ̀ʼ mò kpuw an tuw u ghì ghə̀n à dzə̀m.”

¹⁵Tsə̀ndə̄ghā e mɔ̀ʼ àsùghò Sàemòn Pità n nùghù ndùw a bàâ Yɛso. A m bùghò tsə̀ndə̄ghā e lì zən sò lo mò fɔ̀e è nē fə̀ kwo nu wə̄n, ù nyə daŋso ndùw ghèe ghê Yɛso am mbɛ̀ è Fɔ̀e è ne è te.

¹⁶Pità n kuuwn tee dòʼò tsughu a fǔu ù mbɛ̀; tsə̀ndə̄ghā è li zə̀a Fɔ̀e è ne tɔ̂ʼ kwo n daŋso ndùw kə̀a ndùw àghəa â kɔ̀ɔ fə̀ zən fəla fə ti a fǔu mbɛ̀, fə n zə̀ghàa nyə̀ wo Pità.

¹⁷Kɔ̂ɔ fə̀ zən fə te fə m bvʉ â Pità enyəa, “Ghù mgbaŋ̀ yò sugho tsə̀ndə̄ghā e ghùw wəla a?” Pità mô è tue, enyəa, “Hǎe dzə̄, Ǹ yo dzə̄ tsə̀ndə̄ghā è wə̄n!”

¹⁸Fwo u fə̀ lo nû, kɔ̀ɔ mi mə̀ m kpàa kɔ̀ʼ uwən ghèe ghê gbè tə̀ tɔ̄ʼ to, ghe n zʉɛɛ, Pità n ti sugho fughu, ù zʉɛɛ̄ sughò wən u te wo.

¹⁹Zə n lo êzə̀, Fɔ̀e è ne zə m bvʉnlo àghəa â Yɛso kùu ndùw tsə̀təndə̄ghā tə wə̄n àsùghò tsʉ̀ e Yɛso zò.

²⁰Yɛso m bɛ̀lɛ̀ ndùw wə̄n enyəa, “Mùgho mò ghəa ghaŋa a kəaa an ndɛ â ghì ghò a dzə̀m an Ndughutə̀ne tə Tə̀dzûu tò àsùghò an Ndùghù è Kə̀zə̀ an Yɛ̀lusalɛ̀m, luʼū kəla aghî à dzə̀m bùghò zûŋlo a te. Ŋ̀ kaām ghəa è li zə n nân kə̀a kòʼ.

²¹À lò kə kwò ghɛ̀ sô bvʉʉ̄n mugho â ghəa ghən gho a? Bvʉ tsughu â ghî ghəla ghe mò zuw shwâʼ waŋa wo, enyəa mùgho mò â ghee dzɛ êndūghō, nu ghe maā zuw fəgha kə̀là mùghò mo kəaa ghè kò.”

²²A m bùghò Yɛso bɛ̀lɛ̀ nduw wə̄n enyə, gbè è lôʼ fughu n sə̀ghàa bu wə̄n alo kəsɛ̄ɛ, bvʉ â wə̄n enyəa, “À lǒ kwò ghù bɛ̀lɛ̀ Fɔ̀e è ne an ŋgòʼ è dzì zəla à?”

²³Yɛso m bɛ̀lɛ̀ ndùw wə̄n enyəa, “Abugho à lǒ mò mùghò ŋ kə̀a bonlo, teso dzàa wò â ghî ghò a dzə̀m, mò Ŋ̀ kuuwn kə̀a dzɔ̀ nù, à sò lo kə kwò ghù sə̀ghàa bu mugho a?”

²⁴Anàs n nì tùm ndùw Yɛso a vʉ̀a Kaefàs, tɔɔŋ Fɔ̀e è ne è zə̀, mò ghe naam kɔ̀n nàŋa ko wə̄n am mbgāʼ.

²⁵Sǎemòn Pità n naam ti ko fughu, zʉɛɛ ù wən. Ghî à li ghə m bvʉ â wə̄n enyəa, “To ghù lo sugho tsə̀ndə̄ghā e wə̀n à?” Pità mo â ghee enyəa, “Hǎe dzə̂, Ǹ yo dzə̂.”

²⁶Kɔ̂ɔ fə Fɔ̀e è ne fə̀ li fo, tɔɔŋ ghùw kèndughu ù ghùw wəla Pità fə̀ sugho nughù kɔʼ tûŋ kə wə̄n ko m bvʉ â Pità enyəa, “To mugho mò koʼ ghɛ̀ à Yɛso an usum u vʉ a?”

²⁷Pità n nāam tue ko nù. Nùu mbvʉ n daŋso tɔ̀ŋ è kɔʼ.

²⁸Ghî à ne a Tə̀dzûu ghə̀ n daŋso nì sə̀ wò Yɛso an ndùghù è Kaefàs, ndùw fùghù ndùw wə̄n am mbɛ̀ a lô Paelɛ̀t, tɔɔŋ gɔvə̀nò am mbùʼ è te, â zùwzùw kə utsūʼ ko. Ghuūghùe e ghee zə kè kuūwn nyə an Pə̀lə̀tɛlùm[11], e kwo ko ghe lô dzəsō ghue e ghee zo, ghe doʼò mo ghe kâ zə̌ zə kə̀ Zəŋso Naaŋ ko, to aŋghəa e fə̀ lo am bùghoo kə ghee[12]:

²⁹Paelɛ̀t n daŋso bùghò sə̀ kòʼ wò ghee a beē, bvʉ â ghee enyəa, “Ghɛ̀ ghùw wə̄n kwu enyəa ù bǒon kə̀ kwò?”

³⁰Ghe n bɛ̀lɛ̀ ndùw wə̄n enyəa, “Abugho ghùw wə̄n mô tâʼkè ghəə̄ŋ bonlo èghəa, to ghàʼ kâ mò nì wò dzə̂ wə̄n fɛ a vʉ̀a ghù.”

³¹Paelɛ̀t n dzɛ â ghee enyəa, “Abugho e lô êzə̀, biso nîi ndǔw nlǒ wə̄n, ghɛ̀ nduw saʼ nduw wə̄n aŋghəa lâŋ kɛʼɛ kə deē.” Ghê ne a Tə̀dzûu tə mo â wə̄n enyəa, “Lâŋ kə̀ dêe dzə̀ yò enyəa ghàʼ lo nû alewi ghù aŋ ŋgəŋ zaʼā.”

³² E fə̀ enyə sə aleluesō tsughu shwaʼ wəla Yɛso fə̀ kə̂a naŋā aledè ŋgòʼ è evʉ̄ zəla ù lo kpuūw ghè zò.

³³Paelɛ̀t ŋ kôom nùghù nyə ndùw èbàm am pə̀lɛ̀tɛ̀lùm, tɔŋɔ tsughu Yɛso, bvʉ â wə̄n enyəa, “À lǒ ghû Də̀ŋ kə Tə̀dzûu kò à?”

³⁴Alebɛ̀lɛ̀ ndûw, Yɛso m bvʉ â wə̄n enyəa, “Ghù ghəa ghən kə̂aa sə̌a wò ghə̀là ghù kwo â mùghò ŋkāa à lò ghəla ghe bughò dzɛ̂ wô nû â ghù a?”

³⁵Paelɛ̀t m bɛ̀lɛ̀ ndùw wə̄n enyəa, “À lǒ mò Ǹ lo ghùw ù Tə̀dzûu à? À lò ghî ghə enaʼ ghə̂a ghèe ghê Tuw u təfɔ̀e wò, ghe nî fughu tsəgha wo ghu â mùghò. Ghù biso boōn kə̀ kwò?”

³⁶Yɛso m bɛ̀lɛ̀ ndùw wə̄n enyəa, “Fɔe waŋa u yo dzə̂ u mbī wo. Abugho fɔe waŋa u mô lô fɛ u mbī wo, to ghî a kəfwàʼ ghaŋa kâ mo tso boo dzə̀ enyəa Dzûu tə̀ gaʼ kəghu a zəŋò mughò. A sò fɛ lo enyəa fɔe waŋa u kâ fɛ am mbī sə dzə̀.”

³⁷Paelɛ̀t m bvʉ â wə̄n enyəa, “À fi lo enyəa ghù lo kədə̀ŋ à?” Yɛso m bɛ̀lɛ̀ ndùw wə̄n enyəa, “Ghù dzɛ̀ enyəa Ǹ lo kədə̀ŋ; ghe mò dzə mugho tò kədə̀ŋ. Soo kə eghəa kəla mùghò mò bughò fɛ a te am mbī mò lo alebùghò kə̂a èsəŋò. Ghùw wəla ù ləghaa səŋò e te zo zuuw â mùghò.”

³⁸Paelɛ̀t m bvʉ â wə̄n enyəa “Səŋò e lo kə kwò?” Ghəa Paelɛ̀t bvʉ tsughu êzə̀, ù n daŋso nùghù sə kpeʼe ndùw a beē a vʉ̀a Dzûu tò, dzɛ â ghee enyəa, “Ŋ̀ kâ ghəa e biigh e li e kôʼ a zəŋò ghùw wə̄n.

³⁹A nyɔʼ lò bughoo kɛʼɛ̄ enyəa, mùghò e tsʉa zəghaan səa wò ghùw ù ndùghù tsaʼ u mɔ̀ʼ â ghɛ̀ an nə̀gha e zə kə̀ Zəŋso naaŋ ko. Ghɛ̀ ləgha nù enyəa Ǹ tsʉā zəghàa səā wô ghɛ̀ â Də̀ŋ kə̀ Tə̀dzûu kə̀là a?”

⁴⁰Ghe m bɛ̀lɛ̀ nduw wə̄n alo mbɔ̀ŋ enyəa, “Ɛ̂ŋgaŋ dzə̂, ghàʼ ləghaa ko Bàlabâ.” Bàlabâ fə̀ lo ghùwtsɔ̀ŋɔ ù bǐigh.